.jpg)
ភ្នំពេញៈ ជាទីក្រុងបេះដូងពាណិជ្ជកម្មដ៏ចំណាស់ រាជធានីភ្នំពេញសម្បូរទៅដោយតំបន់ទេសចរណ៍ប្រវត្តិសាស្ត្រជាច្រើនដែលបាននិងកំពុងទាក់ទាញការចាប់អារម្មណ៍ពីសំណាក់ទេសចរអន្តរជាតិ ជាពិសេសអ្នកដែលចូលចិត្តសិក្សាស្រាវជ្រាវពីប្រវត្តិសាស្ត្រ ចម្លាក់ក្បូរក្បាច់រចនា និងសំណង់ស្ថាបត្យកម្មពីអតីតកាល និងបច្ចុប្បន្ន។
ដំណើរទស្សនាបេតិកភណ្ឌប្រវត្តិសាស្ត្រនេះអាចធ្វើឡើងតាមរយៈរថយន្តអគ្គិសនីខ្នាតតូចដែលយានជំនិះនេះបានកំពុងក្លាយជាមធ្យោបាយជាទីចាប់អារម្មណ៍របស់ភ្ញៀវទេសចរ។
សំចតរង់ចាំទទួលភ្ញៀវមកជិះកម្សាន្តតាមតំបន់ប្រវត្តិសាស្ត្រនានានៅក្នុងទីក្រុងភ្នំពេញ រថយន្តអគ្គិសនីមានចំនួន ១៥ កៅអីរាងតូចជាងរថយន្តក្រុងដទៃទៀត និងបំពាក់ទៅដោយកង្ហារ ៤ សម្រាប់ការបន្ថយកម្ដៅ។
រថយន្តអគ្គិសនីនាំភ្ញៀវទស្សនាស្ថាបត្យកម្មប្រវត្តិសាស្ត្រនៅរាជធានីភ្នំពេញ។ រូបថត ហេង ជីវ័ន
រថយន្តនេះអាចបើកទ្វារចំហៀងបានទាំងអស់ ងាយស្រួលសម្រាប់ការចេញចូល និងទស្សនានូវទេសភាព ឬទិដ្ឋភាពផ្សេងៗក្នុងទីក្រុង ភ្ជាប់ទៅដោយឧបករណ៍ទំនើបៗដូចជា ថេប្ល៊ិត (Tablets) ជាជំនួយក្នុងការបង្ហាញប្រាប់ពីទីតាំង រូបភាព និងប្រវត្តិរបស់ទីកន្លែងប្រវត្តិសាស្ត្រទាំងនេះពីសម័យមុនរហូតមកដល់បច្ចុប្បន្នជាមួយនឹងកាសស្តាប់ (Earphone) ដែលអាចនិយាយបានច្រើនភាសាដូចជា អង់គ្លេស បារាំង អាល្លឺម៉ង់ អេស្ប៉ាញ រុស្ស៊ី ចិន ជប៉ុន និងភាសាខ្មែរ។
លោក ហ្សង់ ព្យែរ ហ្វ្រឺណូ (Jean Pierre Freneau) ជនជាតិបារាំង និងជាម្ចាស់រថយន្តដឹកភ្ញៀវទេសចរមួយនេះបានប្រាប់ឲ្យ ភ្នំពេញ ប៉ុស្តិ៍ដឹងថា៖ «នៅពេលដែលខ្ញុំចាប់ផ្តើមវាមុនដំបូងគឺមានតែ ២-៣ ភាសាទេ។ ខ្ញុំចង់នាំភ្ញៀវទេសចរទៅស្គាល់កន្លែងប្រវត្តិសាស្ត្រនានានៅក្នុងទីក្រុង ហើយយើងមានថេប្ល៊ិតឲ្យភ្ញៀវប្រើប្រាស់។ ខ្ញុំគិតថានេះជាគំនិតល្អ។ នៅក្នុងថេប្ល៊ិតនោះយើងមានរូបភាពពីអតីតកាល និងបច្ចុប្បន្នបង្ហាញទៅកាន់ភ្ញៀវ។ ម្យ៉ាងទៀតយើងអាចចូលទៅកាន់ទីតាំងពិសេសៗមួយចំនួនបានដែលមនុស្សមួយចំនួនមិនអាចចូលដូចជាអគាររបស់យូណេស្កូជាដើម»។
ស្ថាបនិករថយន្តលោក ហ្សង់ ព្យែរ ហ្វ្រឺណូ។ រូបថត យូសុះ អាប់ឌុលរ៉ាស់ហ៊ីម
មានចំណតទទួលភ្ញៀវនៅសណ្ឋាគារ ហ៊ីម៉ាវ៉ារី រថយន្តក្រុងតូចនេះចាប់ផ្តើមទទួលភ្ញៀវទេសចរក្នុងមួយថ្ងៃ ២ ដងក្នុងការធ្វើដំណើរ ១ ដងរយៈពេល ២ ម៉ោងចាប់ពីម៉ោង ៩ និង ៣០ នាទីព្រឹកដល់ម៉ោង ១១ និង ៣០ ថ្ងៃត្រង់ និងម៉ោង ១ និង ៣០ រសៀលដល់ម៉ោង ៤ ល្ងាច ។ តម្លៃធ្វើដំណើរសម្រាប់មនុស្សធំ ២២ ដុល្លារ និងសម្រាប់កុមារតម្លៃ ១៩ ដុល្លាររួមជាមួយនឹងការធានារ៉ាប់រងដល់អ្នកដំណើរ។
រថយន្តធ្វើដំណើរទៅកាន់តំបន់ទេសចរណ៍ចំនួន ២២ មានអគារប្រៃសណីយ៍ពីសម័យអាណានិគមបារាំង អគារក្រុមប្រឹក្សាអភិវឌ្ឍន៍កម្ពុជា អគារបណ្ណាសារជាតិ ផ្ទះចិន រួចត្រឡប់ទៅស្ពាននាគវត្តភ្នំឆ្ពោះទៅកាន់ទូតអាមេរិក បណ្ណាល័យជាតិ។ ក្រោយឈប់សម្រាកបន្តិចរថយន្តក៏បន្តទៅកាន់ស្ថានីយរថភ្លើង ផ្សារធំថ្មីផ្លូវ ១៨៧ សាកលវិទ្យាល័យភូមិន្ទវិចិត្រសិល្បៈ សារមន្ទីរជាតិ អគារ យូណេស្កូ ព្រះបរមរាជវាំង និងផ្លូវ ២៤០ ដែលជាអតីតកន្លែងចិញ្ចឹមដំរី របស់ព្រះមហាក្សត្រក្នុងអតីតកាល។
ជាមួយថេប្ល៊ិត និងកាសស្ដាប់ ភ្ញៀវអាចស្វែងយល់ពីប្រវត្តិទីតាំងនីមួយៗ។ រូបថត យូសុះ អាប់ឌុលរ៉ាស់ហ៊ីម
ទាន់ទិននឹងការបរិយាយប្រវត្តិទីតាំងនីមួយៗ ម្ចាស់រថយន្តក្រុងតូច ជនជាតិបារាំងអាយុ ៥៦ ឆ្នាំរូបនេះបានឲ្យដឹងថា៖ «ខ្ញុំបានអានសៀវភៅប្រវត្តិសាស្ត្រខ្មែរចំនួន ១០ ក្បាល ហើយខ្ញុំបានទៅជួបជាមួយនឹងគ្រួសាររាជវង្សខ្មែរ ដើម្បីឲ្យព្រះអង្គពន្យល់ប្រាប់ពីប្រវត្តិព្រះបរមរាជវាំង និងតំបន់ដទៃទៀតដូចជាប្រវត្តិអតីតកន្លែងចិញ្ចឹមដំរីរបស់អតីតព្រះមហាក្សត្រជាដើម»។
លោក ហ្សង់ ព្រែរ ហ្វ្រឺណូ បានមករស់នៅប្រទេសកម្ពុជាជាមួយភរិយាតាំងពីឆ្នាំ ២០១៤ ជាមួយការដាក់ទុនបើកមុខរបរលើវិស័យទេសចរណ៍ចំនួន ២ គឺ នាវាដឹកភ្ញៀវទេសចរ និង រថយន្តតូចដឹកភ្ញៀវទេសចរនេះ។
ទៅថ្ងៃអនាគត លោក ហ្សង់ ព្យែរ ហ្វ្រឺណូ មានបំណងនឹងបញ្ជូលបន្ថែមនូវភាសា ២ ទៀតចូលក្នុងប្រព័ន្ធបរិយាយប្រវត្តិជាភាសាកូរ៉េ និងអ៊ីតាលី។
ទន្ទឹមនឹងនេះលោកក៏មានគម្រោងពង្រីកបន្ថែមនូវរថយន្តក្រុងទេសចរណ៍នេះទៅតាមកន្លែងមួយចំនួននៅខេត្តសៀមរាប និងពង្រីកដល់ក្រុងហាណូយ ប្រទេសវៀតណាម និងក្រុងម៉ាឡាការបស់ម៉ាឡេស៊ីផងដែរ៕
Husain Haider
រូបភាព និងការបរិយាយក្នុងថេប្ល៊ិត មានជម្រើសជាច្រើនភាសា។ រូបថត យូសុះ អាប់ឌុលរ៉ាស់ហ៊ីម
វីដេអូ
