.jpg)
នៅរដូវប្រាំង អូរផ្លាយមានទឹកថ្លា និងរាក់ងាយស្រួលងូតលេង។ លាង ផាន់ណារ៉ា
ក្រុងសែនមនោរម្យ: និយាយពីមណ្ឌលគិរី ភ្ញៀវទេសចរមុខជានឹកដល់សម្រស់ធម្មជាតិវាលស្មៅបៃតងខ្ចី ទឹកធ្លាក់ប៊ូស្រា និងចម្ការដំណាំប៊័រដ៏ឈ្ងុយឈ្ងប់ ព្រមទាំងផ្ទះ និងជនជាតិដើមភាគតិច។
ខណៈអ្នកដំណើរជាច្រើនរមែងតម្រង់គោលដៅដំបូងទៅកាន់រមណីយដ្ឋានទឹកធ្លាក់ប៊ូស្រា អ្នកខ្លះមិនបានចាប់អារម្មណ៍ដំណើរលើកំណាត់ផ្លូវនោះថាមានរមណីយដ្ឋានធម្មជាតិអូរផ្លាយ ដែលកំពុងត្រូវបានអភិវឌ្ឍជារីសតដ៏ទាក់ទាញមួយ។
រមណីយដ្ឋានធម្មជាតិអូរផ្លាយ ដែលស្ថិតក្នុងភូមិពុំទាន់មានឈ្មោះ ឃុំស្រែអំពូម ស្រុកពេជ្រដា ខេត្ដមណ្ឌលគិរី រំលេចនូវផ្ទៃទឹកថ្លាឈ្វេងហូររឹមៗលើកម្រាលថ្មបែកជាចំណាំងព្រាកៗបែកពពុះ ដែលស័ក្ដិសមជាទីឋានងូតទឹកកម្សាន្ដពីសំណាក់ភ្ញៀវទេសចរគ្រប់រូប សម្រាប់ឱកាសសម្បូរភ្ញៀវនារដូវប្រាំងចាប់ពីខែវិច្ឆិការហូតដល់រដូវបុណ្យចូលឆ្នាំប្រពៃណីជាតិ។
ទឹកភ្លៀងនារដូវវស្សា លាយឡំនឹងប្រភពទឹកច្រោះកាត់ព្រៃព្រឹក្សានៃទីទួលខ្ពង់រាប បង្កើតបានជាចរន្ដទឹកសម្បុរស្ករត្នោតហូរកាត់កម្រាលថ្មនៅលើដងអូរផ្លាយ ដែលស្ថិតនៅមិនឆ្ងាយពីកំណាត់ផ្លូវឆ្ពោះទៅកាន់រមណីយដ្ឋានទឹកជ្រោះប៊ូស្រា។
ទោះជាកម្ពស់ទឹកឡើង ចរន្ដទឹកហូរខ្លាំង បាតអូរក៏ជ្រៅជាងមុន ដែលអាចបង្កគ្រោះថ្នាក់ដល់អ្នកនិយមងូតទឹកលើដងអូរ ហើយសម្រស់ផ្ទៃទឹកប្រែជាល្អក់កករបន្តិចមែន ក៏រមណីយដ្ឋានធម្មជាតិអូរផ្លាយនៅអាចទាក់ទាញភ្ញៀវទេសចរចូលមកលេងកម្សាន្ដ បើទោះបីជាមិនសម្បូរភ្ញៀវច្រើនដូចរដូវប្រាំងយ៉ាងណាក្ដី។
លោក អៀង ស៊ីធុល អាយុ ៤៦ ឆ្នាំ អ្នកគ្រប់គ្រងនៅរមណីយដ្ឋានធម្មជាតិអូរផ្លាយ បានឲ្យដឹងថា៖ «ភ្ញៀវទេសចរចូលមកកម្សាន្ដលេងនៅរមណីយដ្ឋានជាហូរហែ ជាពិសេស នៅថ្ងៃចុងសប្ដាហ៍ និងថ្ងៃបុណ្យទានផ្សេង»។
ដោយត្រូវបានអភិវឌ្ឍជារីសតឯកជន អូរផ្លាយផ្ដល់សកម្មភាពកម្សាន្ដជាច្រើន លើសពីការងូតទឹកលើដងអូរ ដូចជា ការថតរូបសែលហ្វ៊ីដោយគ្រងឈុតប្រពៃណីជនជាតិភាគតិច ក្នុងផ្ទះជនជាតិ ក្យូសលម្ហែ និងផ្ទះស្នាក់រហូតដល់ ១០០ ខ្នងថែមទៀត។
ភ្លៀងរដូវវស្សាផ្សំប្រភពទឹកពីទីទួលខ្ពស់ធ្វើឲ្យអូរផ្លាយមានទឹកហូរខ្លាំង។ ផា លីណា
លោក ស៊ីធុល បានប្រាប់ឲ្យដឹងថា៖ «ចំពោះផ្ទះស្នាក់នៅរីសតនេះ នឹងបើកដំណើរការប្រមាណ ១០ ខ្នងនៅរដូវបុណ្យភ្ជុំបិណ្ឌខាងមុខ ហើយនៅបុណ្យចូលឆ្នាំប្រពៃណីខ្មែររួច យើងក៏នឹងមានសង់ផ្សារមួយថែមទៀត»។
ស្ថិតក្នុងដំណាក់កាលកំពុងអភិវឌ្ឍន៍ រួមទាំង ផ្លូវបេតុង ក្យូសលម្ហែ ភោជនីយដ្ឋាន និងផ្ទះស្នាក់នេះ រមណីយដ្ឋានធម្មជាតិអូរផ្លាយ បើកទ្វារស្វាគមន៍ភ្ញៀវមកពីគ្រប់ទិសទី ដោយមិនចាំបាច់ចំណាយថ្លៃសំបុត្រអ្វីឡើយ។
អ្នកគ្រប់គ្រងរូបនេះ បានបន្ដថា៖ «បច្ចុប្បន្ននេះ យើងមិនមានការលក់សំបុត្រចូលលេងរមណីយដ្ឋាននោះទេ លុះត្រាតែយើងបញ្ចប់ការសាងសង់ហេដ្ឋារចនាសម្ព័ន្ធសិន។ តម្លៃសំបុត្រ ក៏នឹងមិនថ្លៃដូចនៅរមណីយដ្ឋានប៊ូស្រានោះដែរ។ មនុស្សម្នាក់ យើងគិតត្រឹម ៣ ០០០ រៀល និងរថយន្ដសម្រាប់ចំណតខាងក្នុងរមណីយដ្ឋានពី ២ ០០០ ទៅ ៣ ០០០ រៀលប៉ុណ្ណោះ»។
លោកបញ្ជាក់ដែរថា៖ «អូរផ្លាយ មិនមែនជាដងអូរសម្រាប់ងូតទឹកលេងមួយកន្លែងនោះទេគឺវានៅមានទឹកធ្លាក់ប្រភពខាងលើ និងក្រោម ២ កន្លែង មានលក្ខណៈស្រស់ស្អាតមែនទែន។ ពេលផ្លូវបេតុងទៅដល់ យើងនឹងបានទៅលេងកាន់តែងាយស្រួល»។
ទោះជារដូវវស្សា ទឹកល្អក់បន្តិចមែន តែវត្តមានភ្ញៀវទេសចរនៅតែមាន។ ផា លីណា
ដើម្បីទាក់ទាញភ្ញៀវធ្វើដំណើរឆ្លងកាត់រមណីយដ្ឋានប៊ូស្រាដ៏ល្បីល្បាញនោះ សេវាកម្មបម្រើភ្ញៀវមួយឈុតចាប់ពីទីឋានធម្មជាតិទឹកធ្លាក់ ក្យូសលម្ហែ ផ្ទះជនជាតិ ផ្សារ សំបុត្រធូរថ្លៃ រហូតដល់ភោជនីយដ្ឋានលក់ម្ហូបម្ហា តម្លៃសមរម្យ ត្រូវបានបង្កើតឡើង។
លោក អៀង ស៊ីធុល បានលើកឡើងថា៖ «ទាំងអស់នេះ គឺដើម្បីភាពរីករាយសម្រាប់ភ្ញៀវគ្រប់រូប»។
គួរបញ្ជាក់ថា បន្ទាប់ពីរដូវភ្លៀង ដែលធ្វើឲ្យផ្ទៃទឹកអូរប្រែក្លាយជាល្អក់នេះ ចាប់ពីខែវិច្ឆិកា រហូតដល់ ខែមិថុនា សម្រស់ផ្ទៃទឹកនឹងប្ដូរមកពណ៌ខៀវគួរឲ្យចង់ងូតលេងវិញ៕
