.jpg)
ប្រឡាយ និងស្រះទឹកព័ទ្ធជុំជិតរមណីយដ្ឋានធម្មជាតិ ភូមិស្លា។ ផា លីណា
ក្រុងសៀមរាបៈ ធ្វើដំណើរតាមផ្លូវក្រវាត់ក្រុងឆ្ពោះទៅកាន់វត្ដចក ចូលតាមច្រកផ្សារកន្ដ្រក ប្រមាណ ២ គីឡូម៉ែត្រ លោកអ្នកនឹងបានឃើញដើមឈើដង្គត់ទើបដុះពន្លកស្លឹកថ្មីឈរកណ្ដាលទ្រូងផ្លូវ ជាសញ្ញាប្រាប់ភ្ញៀវថា ដល់ទីតាំងរមណីយដ្ឋានធម្មជាតិភូមិស្លាហើយ។
ឯនាយខាងឆ្វេងដៃ ស្រះធំៗថ្លាឆ្លុះភ្នំក្រោមលើផ្ទៃទឹក ជួយបន្សាបកម្ដៅពេលភ្ញៀវចតយានយន្ដភ្លាម។ ប្រឡាយ ៣ ឆ្នូត សណ្ដូកខ្លួនប្របតាមផ្លូវដើរហែរហមដំណើរដោយដើមចេកឈរជាជួរទៅកាន់ក្យូស ១១ ខ្នង បង្កើនបរិយាកាសកាន់តែរមនា ខណៈដែលប្រឡាយទាំង ៣ ត្រូវបានតភ្ជាប់ដោយស្ពានឈើ ២ សម្រាប់ផ្ដល់ភាពងាយស្រួលដល់ភ្ញៀវដើរឆ្លងកាត់។
នៅខាងស្ដាំមានក្យូសធំ ២ ក្បែរគល់ស្ពានឈើ ភ្ជាប់ដោយស្ពានកាត់វាលស្រែ ទីគយគន់ទេសភាពរមណីយដ្ឋាន និងថតរូបសែលហ្វ៊ីដ៏ស័ក្ដិសម។
ដោយមិនពិបាកដើររកឆ្ងាយ បន្ទប់ទឹកស្អាត ២ គ្របដំបូលទូកក្រឡាប់ឈរចំកណ្ដាលរមណីយដ្ឋាន ក្បែរច្រកចូលធំ ដែលផ្ដល់ភាពងាយស្រួលដល់ភ្ញៀវអង្គុយគ្រប់ក្យូស។
ស្ថិតនៅក្នុងភូមិកន្ត្រក ឃុំស្វាយដង្គំ មិនឆ្ងាយប៉ុន្មានពីភ្នំក្រោម រមណីយដ្ឋានធម្មជាតិភូមិស្លា ទើបតែស្វាគមន៍ភ្ញៀវនៅថ្ងៃទី ១៥ ខែវិច្ឆិកា នេះ ជាមួយនឹងសេវាកម្មមុខម្ហូបចម្អិនពីកសិផលប្រជាសហគមន៍ ដែលជាដំណាំ និងសាច់ចិញ្ចឹមបែបធម្មជាតិ។
លោក ខាំ សេរីចន្ថា ជំនួយការប្រឹក្សាយោបល់ទូទៅប្រចាំរមណីយដ្ឋានធម្មជាតិភូមិស្លា បាននិយាយថា៖ «យើងចូលរួមចំណែកបង្កើនទីផ្សារសហគមន៍តាមរយៈការប្រើប្រាស់បន្លែ និងសាច់គ្មានជាតិគីមី ដែលអាចជួយទ្រទ្រង់ដល់កសិផលសហគមន៍ និងគិតគូរទៅដល់សុខភាពភ្ញៀវមកកម្សាន្ដនៅភូមិស្លា»។
ភ្ញៀវអាចមើលថ្ងៃអស្ដង្គត និងបន្តអង្គុយលេងដល់ម៉ោង ៩ យប់។ ផា លីណា
លោកបានបន្ដថា មាន់ ទាស្រែ ផ្ទាប់បន្លែស្រស់ៗពីសហគមន៍កសិកម្មសាមគ្គីចំរើនផល ប្រឡាក់អាំងទឹកឃ្មុំ និងអាម៉ុកខ្យង ជាមុខម្ហូបពិសេសប្រចាំតំបន់ភូមិស្លា ដែលនឹងផ្ដល់នូវរសជាតិជាប់ចិត្ដនៅក្នុងឱកាសបើក- សម្ពោធនេះតទៅ។
ក្រៅពីមុខម្ហូបស្រែ រមណីយដ្ឋានធម្មជាតិភូមិស្លា រំលេចនូវទស្សនីយភាពប្លែកដាច់ដោយឡែកជាមួយក្យូសធំៗ ៧ គន់ទេសភាពមាត់បឹងធម្មជាតិ និងផ្ទះបុរាណ ១ ខ្នង ព្រមទាំងក្យូសខ្នាតកណ្ដាលចំនួន ១៣ អមដោយសម្រស់វាលស្រែបៃតងស្រស់ ទិដ្ឋភាពភ្នំក្រោម ដោយទទួលខ្យល់ជំនោរត្រជាក់គ្រប់ពេលវេលា។
រមណីយដ្ឋានផ្ដើមទទួលភ្ញៀវពីម៉ោង ១០ ព្រឹកដល់ម៉ោង ៦ ល្ងាច ខណៈនៅពេលខាងភូមិស្លា ត្រៀមស្វាគមន៍ភ្ញៀវរហូតដល់ម៉ោង ៩ យប់ ជាមួយភ្លើងពណ៌រាត្រីយ៉ាងស្រស់បំព្រង និងផ្ទះលម្ហែថែមទៀត។
ក្នុងឱកាសបុណ្យអុំទូកខាងមុខនេះ ភូមិស្លាក៏មានការបញ្ចុះតម្លៃ ១៥ ភាគរយចាប់ពីថ្ងៃទី ១៥ ដល់ថ្ងៃទី ៣០ ខែវិច្ឆិកា។ នៅពេលបញ្ចប់ការសាងសង់ ១០០ ភាគរយ ភូមិស្លា នៅមានហាងកាហ្វេ ភោជនីយដ្ឋានម៉ាស៊ីនត្រជាក់ ផ្ទះឈើបុរាណដែលគ្រោង ចប់សព្វគ្រប់នៅដើមឆ្នាំ ២០១៩។
សម្រាប់ព័ត៌មានលម្អិត និងការកក់ក្យូស ដែលទើបបានបើកសម្ពោធក្ដៅៗនេះអាចទាក់ទងតាមលេខទូរស័ព្ទ ០៧៧ ៩៣០ ០០០៕
ក្យូសតម្រៀបគ្នា ហែរហមដោយដើមចេកជាជួរ។ផា លីណា
សាច់ និងបន្លែ ជាផលិតផលសហគមន៍កសិកម្ម។ផា លីណា
ទឹក និងរុក្ខជាតិបៃតងជួយផ្ដល់ភាពត្រជាក់ដល់ភ្ញៀវ។ ផា លីណា
វីដេអូ៖
