.jpg)
ថ្មប្រាសាទបាសែតក្នុងសភាពដួលរលំរាយប៉ាយពាសពេញដី កាលពីឆ្នាំ ២០១៦ ពេលគម្រោងជួសជុលទើបតែចាប់ផ្ដើម។ ហុង មិនា
ក្រុងបាត់ដំបងៈ ការយកចិត្តទុកដាក់ និងជាយុទ្ធសាស្ត្រដាក់កំណត់គោលដៅអភិរក្សទីប្រាសាទបុរាណចេញពីក្រសួងវប្បធម៌ និងវិចិត្រសិល្បៈតាមរយៈគម្រោងជួសជុលប្រាសាទបុរាណដ៏ល្អប្រណីតជាច្រើនដំណាក់កាលធំៗមកនោះ ទីបំផុតប្រាសាទបាសែតបានរំលេចចេញរូបរាង ស្វាគមន៍ទេសចរជាតិ និងអន្តរជាតិបណ្តើរៗហើយ ក្រោមការប្រឹងប្រែងយ៉ាងដុតដៃដុតជើងពីមន្ទីរវប្បធម៌ និងវិចិត្រសិល្បៈខេត្តបាត់ដំបង ចាប់តាំងពីឆ្នាំ ២០១៥ មក។
កសាងក្នុងរជ្ជកាលស្តេចព្រះបាទសូរ្យវរ្ម័នទី ១ នាអំឡុងឆ្នាំ ១០០២-១០៥០ មានទីតាំងនៅភូមិបាសែត ឃុំតាភុន ស្រុកសង្កែ ខេត្តបាត់ដំបង មានចម្ងាយប្រមាណជា ១៥ គីឡូម៉ែត្រពីក្រុងបាត់ដំបង ដោយស្ថិតនៅជាប់នឹងដងផ្លូវថ្នល់កៅស៊ូតែម្តង ហើយមិនពិបាករកផ្លូវចូលវែងឆ្ងាយនោះឡើយ។នៅជិតប្រាសាទនេះក៏មានស្រះទឹកបុរាណមួយផងដែរ ដោយមានបណ្ដោយប្រវែង ២០ ម៉ែត្រ និងទទឹង ១២ ម៉ែត្រ និងជម្រៅ ១០ ម៉ែត្រ។
លោកសាស្ត្រាចារ្យបណ្ឌិត ធុយ ចាន់ធួន អនុប្រធានវិទ្យាស្ថានវប្បធម៌ និងវិចិត្រសិល្បៈនៃរាជបណ្ឌិត្យសភាកម្ពុជា បានឲ្យដឹងថា៖ «ប្រាសាទបាសែត សាងសង់ឡើងក្នុងគោលបំណងឧទ្ទិសទៅលទ្ធិព្រហ្មញ្ញសាសនា ហើយផ្អែកតាមសម័យកាលនោះជាព្រហ្មញ្ញសាសនាពេញនិយមលើទេវព្រះសិវៈ ឬព្រះឥសូរ»។
ទោះជាមានការតំណាលតៗគ្នាអំពីរឿងប្រាសាទបាសែតល្បីមានរចនាប័ទ្មល្អប្រណីត តែប្រាសាទត្រូវបានដួលរាបស្មើដី និងផ្នែកខ្លះទៀតត្រូវបានកប់បាត់រូបរាងតែម្តង។ ទើបតែថ្មីៗនេះ ប្រាសាទត្រូវបានស្ដារតាមរយៈគម្រោងជួលជុលនាដំណាក់កាលចុងក្រោយ។
ពិធីបួងសួងសុំសេចក្ដីសុខបញ្ចប់គម្រោងជួសជុល។ មន្ទីរវប្បធម៌ និងវិចិត្រសិល្បៈ ខេត្តបាត់ដំបង
ទើបបានធ្វើពិធីបួងសួងសុំសេចក្តីសុខបញ្ចប់គម្រោងជួសជុលដំណាក់កាលចុងក្រោយ និងទទួលយកវត្ថុបុរាណពីក្រុមការងារជួសជុលប្រាសាទ មករក្សាទុកនៅសារមន្ទីរខេត្តបាត់ដំបង ពីព្រឹកម្សិលមិញ លោក ទេស ប្រាថ្នា ជាមន្ត្រីការិយាល័យរដ្ឋបាលនៃមន្ទីរវប្បធម៌ និងវិចិត្រសិល្បៈ ខេត្តបាត់ដំបង បានឲ្យដឹងពីគម្រោងជួសជុលប្រាសាទបាសែត ផងដែរថា៖ «តាមពិតគម្រោងនៃការជួសជុលរបស់មន្ទីរវប្បធម៌ និងវិចិត្រសិល្បៈខេត្តបាត់ដំបង លើប្រាសាទបាសែតបានចាប់ផ្តើមធ្វើការជួសជុលមាន ៤ ដំណាក់កាលធំៗឯណោះ។
ដោយដំណាក់កាលទី ១ យើងធ្វើការរៀបរយទៅលើសំណង់ប្រាង្គប្រាសាទតូចមួយ ដែលនៅដាច់ពីគេកាលពីឆ្នាំ ២០១៥ ហើយចាប់ពីឆ្នាំ ២០១៦ ដល់ឆ្នាំ ២០១៨ នេះ ដែលមាន ៣ ដំណាក់ទៀត គឺយើងជួសជុលទៅលើសំណង់ប្រាង្គធំៗ នៃប្រាសាទបាសែតទាំងស្រុង ដែលត្រូវបញ្ចប់គម្រោងជួសជុលនៅឆ្នាំនេះ»។
ចម្លាក់បុរាណបាក់បែកនៅប្រាសាទបាសែត។ ហុង មិនា
លោកក៏បង្ហាញពីក្តីរំពឹងទុកពីសម្ទុះនៃភ្ញៀវទេសចរអាចមកទស្សនាប្រាសាទបាសែត ដែលគ្រោងនឹងបើកសម្ពោធឲ្យចូលទស្សនាជាផ្លូវការ ក្រោយបញ្ចប់គម្រោងជួសជុលឆ្នាំ ២០១៨ នេះថា៖ «សូម្បីតែរូបខ្ញុំ ដែលជាកូនចៅជំនាន់ក្រោយក៏មានការស្ញប់ស្ញែងពីភាពអស្ចារ្យនៃរូបរាងប្រាសាទបាសែត។ ទោះបីជាយើងពុំទាន់កំណត់ថ្ងៃបើកស្វាគមន៍ជាផ្លូវការនៃការបើកឲ្យភ្ញៀវទស្សនាប្រាសាទនេះក្តី តែមួយផ្នែកធំ នៃបរិវេណប្រាសាទ អាចអនុញ្ញាតឲ្យភ្ញៀវចូលទស្សនា ថតរូបកម្សាន្តលេងបានហើយ។ ក៏សង្ឃឹមដែរថា នឹងមានបងប្អូនខែ្មរទាំងទីជិតឆ្ងាយឆៀងចូលមកទស្សនាប្រាសាទបាសែតបានច្រើន ដែលនេះក៏ជាផ្នែកមួយនៃសក្តានុពលថ្មីមួយទៀតរបស់ខេត្តបាត់ដំបងផងដែរ»៕
ស្រះទឹកបុរាណ ទំហំ ២០ ម៉ែត្រ គុណ ១២ ម៉ែត្រ។ ហុង មិនា
ស្លាកសញ្ញាបង្ហាញគម្រោងជួសជុលប្រាសាទបាសែត។ ហុង មិនា
