សៀមរាប៖ ផ្ទះឈើបុរាណអែបវាលស្រែក្នុងបរិស្ថានធម្មជាតិដ៏ស្ងប់ស្ងាត់ប្រកបដោយផាសុកភាពអាចជាក្ដីស្រមៃរបស់មនុស្សទូទៅ ជាពិសេស ទេសចរបរទេសដែលចង់ទទួលនូវបទពិសោធការរស់នៅស្រុកស្រែជនបទបែបប្រណីតភាព។ ចុះទម្រាំតែផ្ទះបុរាណប្រណីតរហូតដល់ ១ ភូមិ ដែលរំលេចទេសភាពដ៏ស្រស់ត្រកាល ព្រមទាំងហ៊ុមព័ទ្ធដោយគូទឹកជុំវិញ បឹងឈូក រុក្ខជាតិត្រជាក់ល្ហឹម និងវាលស្រែ ក៏ដូចជា អាងហែលទឹកលក្ខណៈឯកជន។
ស្ថិតនៅចម្ងាយតែ ២ គីឡូម៉ែត្រពីប្រាសាទបាគង រីសតផ្ទះខ្មែរបុរាណ ម៉ានេ ហរិហរាល័យ ផ្ដល់នូវទីសម្រាកលម្ហែបែបធម្មជាតិ ខ្យល់អាកាសបរិសុទ្ធ និងគេចផុតពីសំឡេងអ៊ូអរជាមួយនឹងភាពស្ងប់សុខនៃជំនោររំហើយវាលស្រែវាលស្រូវ។
អ្នកស្រី កី ម៉ានេ ម្ចាស់រីសត ម៉ានេ ហរិហរាល័យ បានប្រាប់ភ្នំពេញប៉ុស្ដិ៍ថា៖ «មនុស្សយើងចាប់ផ្ដើមធុញទ្រាន់នឹងអគារខ្ពស់ៗ ភាពអ៊ូអរ សូរសំឡេងរំខានគ្រប់ប្រភេទ ដែលធ្វើឲ្យយើងរត់រកធម្មជាតិជួយរំលែកទុក្ខ ដើម្បីសុខភាពអាយុយឺនយូរ។ បើភ្ញៀវបរទេសចាប់អារម្មណ៍អគារខ្ពស់ៗ ពួកគេច្បាស់ជាទៅសិង្ហបុរី ជប៉ុន ឬប្រទេសនៅអឺរ៉ុប។ ប៉ុន្ដែបើគាត់សម្រេចចិត្ដជ្រើសរើសយកខេត្ដសៀមរាបយើង គាត់ប្រាកដជាដឹងថា សៀមរាបមិនត្រូវបានអនុញ្ញាតឲ្យកសាងអគារខ្ពស់ៗនោះទេ។ ពួកគាត់ច្បាស់ជាត្រូវការភាពស្ងប់ស្ងាត់ ជាទេសចរណ៍បែបវប្បធម៌ និងប្រវត្ដិសាស្ដ្រ»។
អង្គុយទទួលទានអាហារពេលព្រឹកតែ ២ នាក់ យ៉ាងរ៉ូមេនទិក ប្ដីប្រពន្ធសញ្ជាតិវេណេស៊ុយអេឡា បាននាំគ្នាមកប្រារឰខួបកំណើតក្រោមបរិយាកាសសម្រស់ធម្មជាតិបែបស្រុកស្រែចម្ការជាលើកដំបូងក្នុងឆាកជីវិត។
អ្នកស្រី Yoraima Petter ជាវេជ្ជបណ្ឌិតផ្នែកសម្ផស្សស្បែក បាននិយាយថា៖ «ខ្ញុំមានអារម្មណ៍ថាអស្ចារ្យណាស់សម្រាប់ពួកយើង។ ដំបូងឡើយ ខ្ញុំចង់ផ្ដល់ទីកន្លែងស្នាក់នៅប្រកបដោយបរិយាកាសល្អបំផុតជាកាដូជូនស្វាមីខ្ញុំក្នុងឱកាសខួបកំណើតរបស់គាត់»។
និយាយបណ្ដើរ ភ្នែកត្របាញ់រកគ្នាក្នុងន័យបង្ហាញនូវភាពផ្អែមល្ហែម លោក Ciro Izarra ជានាយកប្រតិបត្ដិប្រចាំតំបន់ កំពុងរស់នៅក្នុងប្រទេស សិង្ហបុរី បានបន្ដថា៖ «នេះជាកាដូយ៉ាងពិសេសពីភរិយាខ្ញុំ។ គាត់បានផ្ដល់ឲ្យខ្ញុំនូវការរស់នៅក្នុងបរិស្ថានបរិសុទ្ធរយៈពេល ៤ យប់។ យើងបានប្រារឰពិធីខួបកំណើតយ៉ាងស្ងប់សុខ។ វាពិតជាទីកន្លែងដ៏អស្ចារ្យ»។
លោកបានឲ្យដឹងថា៖ «នេះជាលើកដំបូងដែលខ្ញុំមកកាន់កម្ពុជា។ ខ្ញុំបានឃើញសណ្ឋាគារនេះលើអ៊ីនធឺណិត ហើយខ្ញុំបានមើលឃើញថា ទីនេះពិតជាស្រស់ស្អាតបំផុតប្រចាំតំបន់។ ដូច្នេះ យើងក៏សម្រេចចិត្ដមកទីនេះ។ យើងចូលចិត្ដសម្រស់ធម្មជាតិ និងស្ថាបត្យកម្មផ្ទះឈើបុរាណ»។
ប្រសូតក្នុងឆ្នាំ ១៩៨២ ក្នុងគ្រួសារសហគ្រិនមួយ កី ម៉ានេ បានបញ្ចប់ការសិក្សាផ្នែកគណនេយ្យ និងច្បាប់ និងបានប្រឡូកក្នុងវិស័យជំនួយមីក្រូហិរញ្ញវត្ថុជាមួយអ្នកម្ដាយ។ មិនយូរប៉ុន្មាន ដោយមានចំណូលចិត្ដធ្វើដំណើរទូទាំងពិភពលោក ស្ដ្រីកូន ៤ នាក់រូបនេះ បានពាំនាំយកបទពិសោធ និងចំណេះដឹងផ្នែកបដិសណ្ឋារកិច្ចបើកសម្ពោធសណ្ឋាគារដំបូងឈ្មោះ Mane Boutique Hotel and Spa ក្នុងឆ្នាំ ២០១៥។
ក្រោយពីទទួលជោគជ័យចំពោះការបើកសម្ពោធសណ្ឋាគារទី ១ នៅសៀមរាប អ្នកស្រី កី ម៉ានេ បានបន្ដបន្ថែមយីហោខ្មែរនេះជាបន្ដបន្ទាប់រហូតដល់រីសត ម៉ានេ ហរិហរាល័យ ជាសាខាទី ៦ កាលពីពាក់កណ្ដាលខែសីហាកន្លងទៅនេះ។
ម៉ានេ ហរិហរាល័យ ស្ថិតនៅលើផ្ទៃដីរហូតដល់ ៧ ហិកតា ជាបរិវេណភូមិឋានដ៏ប្រណីតមួយដែលមានផ្ទះបុរាណឈើបែបប្រណីត ៣៤ ខ្នង ផុសត្រដែតអែមរុក្ខជាតិ និងដុះជ្រំជុំវិញបឹងឈូក វាលស្រែ និងស្រះដ៏ធំដែលរំលេចនូវកូនកោះឈើមួយដើមៗតូចៗ។
ជាប្រវត្ដិសាស្ដ្រពិត និងជារឿងអច្ឆរិយៈដ៏អស្ចារ្យមួយ ម៉ានេ ហរិហរាល័យ ស្ថិតនៅលើទីតាំងអតីតរាជធានីបុរាណនៃឆ្នាំ ៨០២ ក្នុងរជ្ជកាលស្ដេចជ័យវរ័្មនទី ២ ដែលបានច្បាំងឈ្នះសង្គ្រាម និងកាន់កាប់តំបន់បឹងទន្លេសាប។
អ្នកស្រី កី ម៉ានេ បានប្រាប់ភ្នំពេញប៉ុស្ដិ៍ អំពីការប្រើប្រាស់ឈ្មោះរីសតផ្ទះឈើនេះថា៖ «ម៉ានេ ជាឈ្មោះខ្ញុំផ្ទាល់ ដែលចុះបញ្ជីជាក្រុមហ៊ុន និងត្រូវបានប្រើក្នុងសណ្ឋាគារដំបូងតាំងពីឆ្នាំ ២០១៥។ បច្ចុប្បន្ន ម៉ានេ ជាសម្ព័ន្ធសណ្ឋាគារចំនួន ៧ កន្លែងខុសៗគ្នា។ គោលបំណងចម្បង គឺយើងបង្កើតបដិសណ្ឋារកិច្ចកម្ពុជា (Cambodian Hospitality) ស្ដីពីទស្សនៈអ្នកម្ដាយកូន ៤ នាក់ (Mother of four) សម្រាប់ភ្ញៀវទូទៅ និងលក្ខណៈគ្រួសារ»។
អ្នកម្ដាយកូន ៤ រូបនេះបានបន្ដថា៖ «យើងមានបំណងផ្សព្វផ្សាយឈ្មោះយីហោខ្មែរមិនត្រឹមតែក្នុងប្រទេស ប៉ុន្ដែយើងក៏នឹងពង្រីកសាខាទៅក្រៅប្រទេសថែមទៀត។ រយៈពេល ៥ឆ្នាំមកនេះ យើងបានពង្រីកយីហោ ៧ សាខាហើយ ហើយយើងមានគម្រោងទៅបើកនៅបារាំង និងជប៉ុនទៀត»។
ជាមួយបំណងចង់នាំអារម្មណ៍ភ្ញៀវដែលស្នាក់នៅក្នុងផ្ទះឈើប្រណីតបានផ្ដិតភ្ជាប់នូវរូបភាពបែបប្រពៃណីពីអតីតកាលជាង ១ ២០០ ឆ្នាំមុន ហរិហរាល័យ ជា «ដែនដីរបស់ព្រះ» ក្នុងសាសនាព្រហ្មញ្ញ ដែលហរិ មានន័យថា ព្រះវិស្ណុ និង ហរា គឺជាព្រះសិវៈ។
ស្ថិតក្នុងសម្លៀកបំពាក់ប្រពៃណីហូរផាមួងយ៉ាងសមសួនជានារីខ្មែរ អ្នកស្រី ម៉ានេ បានឲ្យដឹងថា៖ «ហរិហរាល័យ ជាអតីតរាជធានីបុរាណ តាំងពីជំនាន់ព្រះមហាក្សត្រជ័យវរ័ន្មទី ២ ក្នុងសតវត្សរ៍ទី ៩ សម័យមុនអង្គរ។ ព្រះអង្គបានកសាងប្រាសាទ ៣ គឺបាគង រលៃ និងព្រះគោ ដែលមានចម្ងាយប្រមាណ ២ គីឡូម៉ែត្រ ពីរីសតរបស់យើង»។
អ្នកស្រីបានបន្ដថា៖ «យើងចង់រំឭកដល់អាណាចក្រខ្មែរយើងពីមុន ដែលប្រាង្គប្រាសាទនានាសុទ្ធតែមានគូទឹកព័ទ្ធជុំវិញទាំងអស់។ នៅពេលភ្ញៀវចូលដល់បរិវេណរីសត ពួកគាត់មានអារម្មណ៍ដូចបានឈានជើងចូលពិភពមួយដ៏ស្ងប់ស្ងាត់ ហើយភ្ញៀវបរទេសនឹងទទួលបាននូវបទពិសោធជាមួយផ្ទះខ្មែរ វប្បធម៌ខ្មែរយើង សំណង់របស់យើង»។
បើទោះបីជាចង់នាំអារម្មណ៍ភ្ញៀវវិលទៅកាន់អតីតកាលយ៉ាងណាក៏ដោយ ក៏ប្រណីតភាព និងផាសុកភាពគឺជាចំណុចចម្បងដែល ម៉ានេ ហរិហរាល័យ ផ្ដល់ជូនភ្ញៀវមិនឲ្យទាស់ចិត្ដ។
អ្នកស្រី ម៉ានេ បាននិយាយថា៖ «ដើមឡើយ យើងចង់ឲ្យភ្ញៀវទេសចរជាតិ និងអន្ដរជាតិបានស្គាល់ផ្ទះខ្មែរបុរាណដែលសង់តាមរចនាប័ទ្មសម័យដើម ដោយយោងតាមមតិរបស់ភ្ញៀវ និងបទពិសោធរបស់យើងផ្ទាល់ យើងក៏សម្រេចចិត្ដបំពាក់គ្រឿងបរិក្ខារ និងសម្ភារទំនើបៗបន្ថែមពីលើផ្ទះប្រពៃណីក្នុងបំណងបំពេញនូវតម្រូវការរបស់ភ្ញៀវនាពេលបច្ចុប្បន្ន»។
អ្នកស្រីបន្ដថា៖ «រីសតយើងមានភាពខុសប្លែកពីគេទាំងផ្ទះខ្មែរធ្វើពីឈើប្រណីតហើយខាងក្នុងផ្ទះ គឺយើងបំពាក់គ្រឿងបរិក្ខារទំនើប ដូចជា បន្ទប់ទឹកបន្ទប់គេង និងគ្រឿងប្រើប្រាស់ដទៃទៀត។ បើនិយាយពីបរិស្ថានវិញ គឺប្រៀបដូចជាយើងរស់នៅក្នុងភូមិបុរាណកាលពី ១ ២០០ ឆ្នាំមុននៃសម័យព្រះបាទជ័យវរ្ម័នទី ២»។
កំពុងនាំកូនៗជិះកង់លេងដែលបញ្ឈរ ២ គ្រឿង ក្រោមផ្ទះនីមួយៗកាត់តាមភូមិឋានយ៉ាងរីករាយ អ្នកម្ដាយមកពីភ្នំពេញជាមួយក្រុមគ្រួសារធំមួយ ដែលសុំមិនបញ្ចេញឈ្មោះ បាននិយាយទាំងទឹកមុខញញឹមថា៖ «ការសម្រាកក្នុងផ្ទះបែបខ្មែរនេះ ល្អម្យ៉ាងដែរ។ ទីនេះ មានសភាពស្ងប់ស្ងាត់ ផាសុកភាព មានដើមស្រូវ វាលស្រែ ទឹក និងដើមឈើត្រជាក់។ ភាគច្រើនចំណាយពេលនៅទីនេះច្រើន ដោយសារកូនៗខ្ញុំចូលចិត្ដជិះកង់ ជិះទាទឹក ហែលទឹក និងសម្រាកលម្ហែកាយ»។
ជាលើកទី ២ ហើយក្រោយពីរីសត ម៉ានេ ហរិហរាល័យ ទើបបើកសម្ពោធជាង ២ ខែ ស្ដ្រីដែលជាប់ចិត្ដនឹងផ្ទះឈើបុរាណ មិនធ្លាប់ទទួលបានបទពិសោធរស់នៅក្នុងផ្ទះឈើបែបបុរាណជនបទ អ្នកស្រី ហាក់មានអារម្មណ៍ប្លែកជាមួយនឹងបរិយាកាសបរិសុទ្ធ ស្រឡះមុខ ស្រឡះមាត់។
អ្នកស្រី ប្រាប់ភ្នំពេញប៉ុស្ដិ៍នៅក្រោមបរិយាកាសមានតែកង់ និងរថយន្ដអគ្គិសនីក្នុងបរិវេណភូមិរីសតទាំងមូលថា៖ «ខ្ញុំមានអារម្មណ៍ថា ហាក់ដូចជាកំពុងតែស្ថិតក្នុងឈុតឆាកភាពយន្ដបុរាណ»។
អ្នកស្រី ម៉ានេ ដែលរមែងឡើងចុះភ្នំពេញ-សៀមរាប ញឹកញយក្នុងការមើលខុសត្រូវជំនួញច្រើនសាខា បានបន្ដថា៖ «ចំពោះម្ហូប យើងផ្ដោតសំខាន់លើម្ហូបខ្មែរ ដែលគ្រឿងផ្សំរកបានពីជុំវិញផ្ទះខ្លួនឯងដោយគ្មានជាតិគីមី»។
ជាមួយបទពិសោធបើកសេវាកម្មបដិសណ្ឋារកិច្ចជាច្រើនសាខានេះ អ្នកស្រី បានស្រាយចម្ងល់ដែលរីសតដ៏ប្រណីតនេះ មានតែបុគ្គលិកក្នុងស្រុកទាំងអស់ថា៖ «ខ្ញុំមានមោទនភាពក្នុងនាមជាជនជាតិខ្មែរ កើតលើទឹកដីខ្មែរ។ ខ្ញុំរីករាយដែលបានបង្កើតមុខជំនួញដែលបានផ្ដល់ការងារឲ្យកូនខ្មែរ និងជួយសម្រួលជីវភាពរបស់ពួកគេ។ យើងមានក្រុមការងារមានបទពិសោធ និងសមត្ថភាពអាចដឹកនាំ និងបន្ដបណ្ដុះបណ្ដាលដល់ប្អូនៗជំនាន់ក្រោយ»។
អ្នកស្រីលើកឡើងថា៖ «ប្អូនៗខ្លះ បានបញ្ចប់ការសិក្សាត្រឹមបាក់ឌុប និងពូកែភាសាអង់គ្លេស តែគាត់អត់មានលទ្ធភាពរៀនបន្ដ។ អ៊ីចឹង គាត់អាចធ្វើការបណ្ដើរ និងរៀនបណ្ដើរដើម្បីអាចបង់ថ្លៃសាលា។ ប្រសិនជាគាត់បំពេញការងារបានល្អ គាត់អាចឡើងតំណែងដល់កម្រិតថ្នាក់គ្រប់គ្រង។ ចំពោះជំនាញបដិសណ្ឋារកិច្ចនេះ ពួកគាត់រៀនតៗពីគ្នាដោយចាប់ផ្ដើមពីថ្នាក់ក្រោមរៀនពីថ្នាក់លើរហូតដល់ពួកគាត់ឡើងកាន់តែខ្ពស់។ ភាគច្រើន ពួកគាត់ជាពលរដ្ឋរស់នៅក្នុងខេត្ដសៀមរាបនេះតែម្ដង»។
អ្នកស្រី កី ម៉ានេ បានប្រាប់ថា ផ្ទះបុរាណខ្មែរ តម្លៃ ២៧៧ ដុល្លារមួយយប់ អាចទទួលស្វាគមន៍មនុស្សធំ ២ នាក់ និងក្មេងៗ ២ នាក់ ហើយនៅរដូវសម្បូរភ្ញៀវចាប់ពីខែវិច្ឆិកា ធ្នូ មករា និងកុម្ភៈ តម្លៃនឹងកើនដល់ ៣៧៧ ដុល្លារ រួមទាំង អាហារពេលព្រឹក អាហារថ្ងៃត្រង់ រថយន្ដទទួលទៅមកព្រលានយន្ដហោះ បេនឡានក្រុង និងសេវាកម្មជូនដំណើរពីសណ្ឋាគារទៅកាន់ផ្សារចាស់ រួមទាំងអាហារសម្រន់ បង្អែម និងនំខ្មែរផ្សេងៗទៀត។
រីសតហរិហរាល័យ មានចម្ងាយ ២ គីឡូម៉ែត្រពីប្រាសាទបាគង និងប្រមាណ ១៤ គីឡូម៉ែត្រ ពីប្រាសាទអង្គរវត្ដ ឬ ១០ គីឡូម៉ែត្រពីតំបន់ផាប់ស្ទ្រីត។ សម្រាប់ព័ត៌មានបន្ថែម សុំចូលទៅកាន់ទំព័រហ្វេសប៊ុក @manehariharalaya ឬ ០៦៣ ២១១ ៧៧៧៕
វីដេអូ៖