.jpg)
ខេត្តកែបមានឆ្នេរអំណោយផលដល់ការជិះទូកក្ដោង ដោយសារទឹកសមុទ្រមានសភាពរាក់ ហើយគ្មានឆ្លាម។ រូបថត នួន សុខសារីម
ក្រុងកែប៖ ស្ថិតលើទូកក្ដោងជាមួយអ្នកជំនាញ និងមិត្តភក្ដិម្នាក់ទៀត អ្នកទេសចរ នួន សុខសារីម កំពុងផ្ចង់អារម្មណ៍ស្ដាប់់ការណែនាំពីវិធីបញ្ជាទូកក្ដោង ដោយចលនាខ្សែក្ដោង និងដៃចង្កូតយ៉ាងរស់រវើក ទៅតាមទិសដៅខ្យល់បក់។
ក្រោយពីភ្លក្សបទពិសោធជិះទូកក្ដោងលើកដំបូង អ្នកទេសចររូបនេះ បានពិពណ៌នាអារម្មណ៍របស់លោកថា៖ «ជិះទូកក្ដោងនៅសមុទ្រអ៊ីចឹង ពិតជាសប្បាយណាស់។ ខ្ញុំរំភើបផង ស្រៀវខ្លួនផង ព្រោះអត់ចេះហែលទឹក ប៉ុន្តែខ្ញុំទុកចិត្តអ្នកជំនាញ និងឧបករណ៍សុវត្ថិភាព»។
ការជិះទូកក្ដោងដ៏ពេញនិយមនៅប្រទេសជឿនលឿន មិនត្រឹមតែជាសកម្មភាពកីឡានោះទេ។ យានអាស្រ័យកម្លាំងខ្យល់លើទឹកនេះ ត្រូវបានប្រើប្រាស់សម្រាប់ជិះលេងកម្សាន្ត តម្រូវសម្រាប់ភ្ញៀវទេសចរនិយមស្វែងរកភាពរំជើបរំជួល និងបណ្ដែតអារម្មណ៍លើសាគរ ដោយគ្មានសំឡេងរំខានពីម៉ាស៊ីននាវា។
លោក វីលឃីនសិន ណែនាំភ្ញៀវពីវិធីបញ្ជាទូកក្ដោង។ហុង មិនា
នៅឆ្នេរសមុទ្រកម្ពុជា អ្នកទេសចរអាចមកកាន់រីសត ថ្ងៃបាំងឆត្រ (Knai Bang Chatt) នៅខេត្តកែប ដើម្បីទទួលបានការកម្សាន្តជិះទូកក្ដោង ក្រោមការណែនាំពីអ្នកជំនាញបរទេសដ៏រួសរាយលោក នែល វីលឃីនសិន (Neil Wilkinson)។
ជាមួយបទពិសោធបញ្ជាទូកក្ដោង ១៧ ឆ្នាំ អ្នកជំនាញរូបនេះបានឲ្យដឹងថា បច្ចុប្បន្ន Discovery Centre គឺជាកន្លែងជិះទូកក្ដោងតែ ១ គត់នៅកែប និងប្រចាំប្រទេស កម្ពុជា។
លោក វីលឃីនសិន បានឲ្យដឹងទៀតថា៖ «យើងចាប់ផ្ដើមទូកក្ដោងនេះ នៅពេលដែលខ្ញុំបានមកកំពតជាង ៥ ឆ្នាំ ហើយមិនធ្លាប់ឃើញទូកក្ដោង ១ គ្រឿងសោះនៅសមុទ្រកម្ពុជា។ ដូច្នេះទូកក្ដោងរបស់យើងអាចថាពិសេស និងមានតែ ១ គត់ លើផ្ទៃសមុទ្រស្ងប់ស្ងាត់ល្ហល្ហេវ»។
អ្នកជំនាញដែលធ្លាប់ធ្វើដំណើរជុំវិញពិភពលោក ពីបារាំង ក្រិក តួកគី កេនយ៉ា និងអូស្ត្រាលី តាមរយៈជំនាញទូកក្ដោងរបស់លោក មុននឹងមកកាន់ការងារជាអ្នកគ្រប់គ្រងនៅ Discovery Centre បានឲ្យដឹងថា លោកចូលចិត្តកម្ពុជាដោយសារតែឆ្នេរសមុទ្រភាគខាងត្បូងប្រទេស នេះអំណោយផលដល់អ្នកទើបនឹងរៀនបញ្ជាទូកក្ដោង និងនាវាផ្សេងៗប្រកបដោយសុវត្ថិភាព។
លោកបានថ្លែងប្រាប់ ភ្នំពេញ ប៉ុស្ដិ៍ ថា៖ «ទីនេះពិតជាល្អណាស់ ព្រោះអត់មានចរន្តទឹកខ្លាំង គ្មានឆ្លាម គ្មានផ្ទាំងថ្ម ហើយទឹកក៏រាក់ទៀត។ អ្នកមកជិះទូកក្ដោងមានភាពជឿជាក់ក្នុងការរៀន ព្រោះខ្ញុំគិតថា ពួកគេអត់បារម្ភរឿងទឹកជ្រៅ។ សូម្បីតែនៅរដូវវស្សាមានខ្យល់ខ្លាំង ក៏វាអំណោយផលដល់ការជិះទូកក្ដោងដែរ»។
ភ្ញៀវអាចជ្រើសរើសការជិះទូកក្ដោងជាមួយគ្រូជំនាញ ឬក៏ការបញ្ជាទូកដោយខ្លួនឯង ប្រសិនបើពួកគេចេះគ្រប់គ្រងវាស្រាប់ ក្រោយពីធ្វើតេស្ត ៥ នាទីលើទឹក។
អ្នកគ្រប់គ្រងមជ្ឈមណ្ឌលជិះទូកក្ដោង Discovery Centre លោក វីលឃីនសិន បានបន្តថា៖ «យើងប្រើទូកប្រភេទ Hobie Cat ក្នុងការបង្រៀន ព្រោះវាងាយស្រួលបត់បែនស្ទើរតែ ៣៦០ ដឺក្រេ។ ទូកនេះត្រូវបានផលិតដូចយន្តហោះដែរ។ យើងមានទូកប្រភេទនេះ ២ បែប គឺអាតូចសម្រាប់ជិះ ២ នាក់ ឬ ៤ នាក់ ប្រសិនបើមានខ្យល់ខ្លាំង និងអាធំអាចផ្ទុកបាន ៤ នាក់»។
លោក នែល វីលឃីនសិន អ្នកគ្រប់គ្រងមជ្ឈមណ្ឌលជិះទូកក្ដោង Discovery Centre។ហុង មិនា
លោកបានរៀបរាប់ទៀតថា៖ «យើងក៏មានទូកប្រភេទ Optimist sailing ជាស្ដង់ដាស័ក្ដិសមសម្រាប់កុមាររៀនបញ្ជាទូកក្ដោង ដោយផ្ដើមពីបច្ចេកទេសងាយៗ ដែលពួកគេអាចយកទៅប្រើប្រាស់លើទូកក្ដោងប្រភេទផ្សេងទៀតបាន។ យើងក៏មានទូកកាយៈ និងក្ដារចែវច្រវា ហើយបើមានខ្យល់ទៀត វារឹតតែប្រសើរក្នុងការជិះទូកក្ដោង»។
អំឡុងចុង និងដើមឆ្នាំ លោកសម្គាល់ឃើញថា៖ «វេលានេះ យើងមានខ្យល់គ្រប់គ្រាន់ល្អណាស់ ហើយយើងតែងតែតាមដានព្យាករអាកាសធាតុលើអ៊ីនធឺណិត ព្រោះការស្វែងយល់ពីខ្យល់ គឺជាធាតុសំខាន់បំផុតក្នុងការរៀនជិះទូកក្ដោង។ បើគ្មានខ្យល់ទេ វាដូចជាការជិះឡានអត់សាំងអ៊ីចឹង»។
ក្រៅពីការផ្ដល់បទពិសោធកម្សាន្ត ខណៈកម្ពុជាក៏មានសហព័ន្ធកីឡាទូកក្ដោងផងដែរនោះ Discovery Centre ក៏បានជួយបណ្ដុះបណ្ដាលធនធានកីឡាករកម្ពុជា ដែលអាចនឹងតំណាងមុខមាត់ប្រទេសនៅថ្ងៃអនាគតផងដែរ។
លោក នែល វីលឃីនសិន បាននិយាយថា៖ «ខ្ញុំបាននាំចំណេះដឹងជាច្រើនឆ្នាំរបស់ខ្ញុំមកកាន់ទីនេះ ដើម្បីណែនាំ និងបង្រៀនអ្នកដែលនឹងក្លាយជាកីឡាករកម្ពុជាផ្នែកទូកក្ដោងនេះ»។
គម្រោងយូរអង្វែងសម្រាប់ក្លិបទូកក្ដោង គឺការណែនាំកីឡាលើទឹកមួយនេះដល់យុវជនកម្ពុជា ដើម្បីឲ្យពួកគេដុសខាត់ទេពកោសល្យក្លាយជាអ្នកជំនាញអាជីពនៅក្នុងការប្រកួតអន្តរជាតិនានា។
អគ្គនាយករីសតថ្ងៃបាំងឆត្រ លោក ជេហ្វ មូនស៍ (Jef Moons) បានឲ្យដឹងថា៖ «ក្លិបទូកក្ដោងយើងក៏មានរៀបចំការបណ្ដុះបណ្ដាលសម្រាប់អ្នកចង់ចាប់អាជីពនេះ ក៏ដូចជាជួយផ្សារភ្ជាប់ប្រជាជនកម្ពុជាទៅនឹងបទពិសោធដ៏ស្រស់បំព្រងនៃឆ្នេរសមុទ្រដ៏ស្អាតរបស់កម្ពុជាផងដែរ»។
សកម្មភាពរៀបចំទូកក្ដោងចុះទឹក ដើម្បីឲ្យភ្ញៀវជិះលេងកម្សាន្ត អាស្រ័យលើថាមពលកម្លាំងខ្យល់សុទ្ធសាធ។ ហុង មិនា
វិលមកកាន់ឆ្នេរខ្សាច់នៃរីសតវិញប្រកបដោយសុវត្ថិភាព ក្រោយពីបញ្ចប់ការជិះ ទូកក្ដោងទាំងក្ដីរំភើប អ្នកទេសចរ នួន សុខសារីម បានបង្ហាញទឹកមុខញញឹមញញែម ខណៈអ្នកជំនាញបានសរសើរលើកទឹកចិត្តលោកថា មានទេពកោសល្យ ហើយរៀនឆាប់ចេះពីការបញ្ជាទូកក្ដោងលើសមុទ្រ។
លោក សារីម បានសម្ដែងចំណាប់អារម្មណ៍ថា៖ «ខ្ញុំអាចនិយាយបានថា ការជិះទូកក្ដោងពិតជាសប្បាយ និងរំភើប ហើយឆ្នេរកែបយើងក៏ស្អាតដែរ។ ថ្ងៃណាមួយ ខ្ញុំនឹងត្រឡប់មកទីនេះវិញ ដើម្បីអនុវត្តការជិះទូកក្ដោងនេះបន្តទៀត»។
នៅ Discovery Centre ការជិះទូកក្ដោងមានចាប់ពីម៉ោង ៨ ព្រឹក រហូតដល់ ៥ ល្ងាចជារៀងរាល់ថ្ងៃ។ តម្លៃនៃការជិះអាស្រ័យតាមប្រភេទទូកគឺ៖ Optimist/Dinghy (មានចំនួន ១១ គ្រឿង) តម្លៃ ២០ ដុល្លារក្នុង ១ ម៉ោង ប្រភេទ Wave 13-foot catamaran តម្លៃ ៣០ ដុល្លារ ក្នុង ១ ម៉ោង ប្រភេទ T2 16-foot Hobie Cat តម្លៃ ៥០ ដុល្លារ ក្នុង ១ ម៉ោង ប្រភេទ Wind surfing (Star board with 5.5-meter sail) តម្លៃ ២០ ដុល្លារ ក្នុង ១ ម៉ោង។
ព័ត៌មានបន្ថែមមាននៅទំព័រហ្វេសប៊ុក @discoverycentrekep ឬ ទំនាក់ទំនងទូរស័ព្ទលេខ ០៧៨ ៣៣៣ ៦៨៥៕
វីដេអូ៖
