ពោធិ៍សាត់: សភាពទឹកល្អក់ ហូរកួចដ៏ខ្មួលខ្មាញ់បោកបក់ដើមឈើធំៗ និងផ្ទាំងថ្ម បង្កើតបានជាទិដ្ឋភាពស្ញើបគួរឲ្យស្រៀវឆ្អឹងខ្នង ដែលមិនស័ក្ដិសមចំពោះការងូតទឹក ឬហែលលេងកម្សាន្ដនារដូវវស្សាឡើយ។ ប៉ុន្ដែសម្រាប់អ្នកចេះហែលជាក់ ការងូតទឹកកំពុងហូរពេញកម្លាំងនេះ ក៏ជាសកម្មភាពដ៏សប្បាយរីករាយម្យ៉ាងដែរពីព្រោះល្បាក់កំរោញជាទីឋានត្រជាក់រហឹម ទោះក្រោមបរិយាកាសក្ដៅខ្លាំងយ៉ាងណាក៏ដោយ។
ខណៈអ្នកខ្លាចទឹក ឬអ្នកអត់ចេះហែលទឹកប្រាកដជាលើកដៃ Bye Bye ភ្ញៀវទេសចរចូលចិត្ដលេងទឹក នឹងមានការភ្ញាក់ផ្អើល ពេលឈានជើងចុះទឹកកំពុងហូរកួចខ្លាំង មានជម្រៅរាក់ត្រឹមពីស្នងជើងទៅចង្កេះ ប៉ុណ្ណោះនៅចំណុចគល់ឈើធំ។
លោក លី ណា ដែលមិនមានអារម្មណ៍រអាចំពោះល្បាក់ទឹកហូរ បាននិយាយថា៖ «វាមិនជាបញ្ហាចោទចំពោះរូបខ្ញុំនោះទេ ពីព្រោះខ្ញុំចេះហែលទឹក និងចូលចិត្ដលេងទឹក»។
មិនត្រឹមតែចុះងូតលេង បុរសមកពីស្រុកឧដុង្គ ខេត្ដកំពង់ស្ពឺរូបនេះ ថែមទាំងបានហក់ឡើងតោងវល្លិធំ ជិះជាទោងយោងយ៉ាងសប្បាយលើផ្ទៃទឹកថែមទៀតផង។
យ៉ាងណាមិញ ក្នុងរដូវវស្សា ភ្លៀងធ្លាក់ស្ទើរតែរៀងរាល់ថ្ងៃ រមណីយដ្ឋានល្បាក់កំរោញ មានកម្ពស់ទឹកកាន់តែខ្ពស់ ដែលអាចបង្កគ្រោះថ្នាក់ដល់ភ្ញៀវទេសចរ ខណៈមន្ដ្រីទេសចរណ៍ខេត្ដក៏បានជម្រាបជូនដំណឹងពីឱកាសមិនគួរចុះទឹកល្បាក់កំរោញក្នុងរដូវនេះឡើយ។
មន្ដ្រីទេសចរណ៍ខេត្ដពោធិ៍សាត់ បានណែនាំថា រដូវប្រាំង ដែលមានទឹកតិចៗ ជាពិសេស នៅរដូវបុណ្យចូលឆ្នាំចិន និងចូលឆ្នាំថ្មីប្រពៃណីជាតិខ្មែរ ល្បាក់កំរោញ ទទួលភ្ញៀវជាច្រើននាក់។
លោក សំ ឃីម ប្រធានមន្ទីរទេសចរណ៍ខេត្ដពោធិ៍សាត់បានឲ្យដឹងថា៖ «ល្បាក់កំរោញ ខែភ្លៀង ភ្ញៀវលេងអត់បានទេ ពីព្រោះទឹកឡើងហៀរដល់ច្រាំង។ ប៉ុន្ដែវេលាស័ក្ដិសមចំពោះការកម្សាន្ដហែលទឹកលេង នៅល្បាក់កំរោញ គឺនៅរដូវប្រាំង។ ទីឋាននេះមិនអាចលេងជាអចិន្រ្ដៃយ៍នោះទេ ជួនកាលមាន និងជួនកាលអត់»។
ដំណើរលើផ្លូវជាតិ ៥៥ ដែលលាតសន្ធឹងពីក្រុងពោធិ៍សាត់ ដល់ឃុំថ្មដាជាប់ព្រំប្រទល់ខេត្ដត្រាត ប្រទេសថៃ ប្រវែងជាង ១៨០ គីឡូម៉ែត្រនិងចម្ងាយប្រមាណ ៥០ គីឡូម៉ែត្រ ពីក្រុងពោធិ៍សាត់ភ្ញៀវទេសចរនឹងបានឃើញស្លាកសញ្ញាមួយនៅខាងឆ្វេង ដែលចង្អុលបង្ហាញពីគោលដៅរមណីយដ្ឋានល្បាក់កំរោញ កំពុងរង់ចាំវត្ដមានរបស់ភ្ញៀវឆៀងចូលអើតឈ្ងោក។
រមណីយដ្ឋានល្បាក់កំរោញស្ថិតក្នុងភូមិអង្ក្រង ឃុំសំរោង ស្រុកភ្នំក្រវាញខេត្ដពោធិ៍សាត់ រំលេចនូវភាពស្រស់បំព្រងនៃព្រៃឫស្សីតូចៗ ដែលដុះទេរត្របាញ់ចូលគ្នា បង្កើតបានជាដំបូលឫស្សីដ៏ត្រជាក់ សម្រាប់ការអង្គុយលម្ហែមុនពេលដើរចុះមាត់ទឹក។
នៅក្នុងព្រៃឫស្សីមានបន្ទប់ទឹក ២ ដែលមានសភាពទ្រុឌទ្រោមមិនសូវស្អាតបាត ជាទីកន្លែងសម្រាប់ភ្ញៀវចូលផ្លាស់សម្លៀកបំពាក់ មុន និងក្រោយពេលចុះលេងទឹក។
បន្ទាប់ពីទៅលេងកម្សាន្ដនៅរមណីយដ្ឋានល្បាក់កំរោញ ភ្ញៀវទេសចរកុំភ្លេចបង្ហួសទៅទស្សនាចម្ការក្រូចពោធិ៍សាត់របស់អ្នកពោធិ៍សាត់ពិតៗ និងភ្លក្សរសជាតិក្រូចអ្នកស្រុកដើមនេះ។
ក្រៅពីសរសើរមិនដាច់ពីរសជាតិក្រូចពោធិ៍សាត់ ផ្អែមធ្ងន់ លាយជូរតិចៗឈ្ងុយឆ្ងាញ់ ខុសពីក្រូចតំបន់ដទៃ ដែលមានជាតិផ្អែមស្រាលនោះ លោក សំ ឃីម បានប្រាប់ថា៖ «នៅតំបន់ជុំវិញរមណីយដ្ឋានល្បាក់កំរោញជាទីតាំងសម្បូរចម្ការក្រូចពោធិ៍សាត់។ ចំពោះស្ថិតិក្រៅផ្លូវការ តាមខ្ញុំដឹងចម្ការក្រូចនៅតំបន់នេះលាតសន្ធឹងលើផ្ទៃដីមិនក្រោម ៣០០០ ហិកតា។ ក្រូចពោធិ៍សាត់ សម្បូរជាងគេគឺនៅឃុំសំរោង ស្រុកភ្នំក្រវាញ»៕