.jpg)
ទេសភាពទន្លេ Huong ដែលត្រូវបានតាក់តែងក្នុងអត្ថបទអក្សរសិល្ប៍ និងកំណាព្យ។ រូបថត AFP
ក្រុងហាណូយ: អស់រយៈកាលជាយូរ ទីក្រុង Hue ត្រូវបានចាត់ទុកជាដែនដីនៃសិល្បៈ វប្បធម៌ អក្សរសិល្ប៍ និងកំណាព្យ នៅវៀតណាម ក៏ដូចជាស្រុកកំណើតរបស់កវីនិពន្ធល្បីៗក្នុងប្រវត្តិសាស្ត្ររបស់ប្រទេសនេះដែរ។
ក្នុងជំនួបរវាងអ្នកបម្រើការក្នុងវិស័យទេសចរណ៍ និងអ្នកនិពន្ធ ពួកគេជឿថា ទីក្រុង Hue មានសក្ដានុពលខ្ពស់ក្នុងការប្រើប្រាស់វិស័យអក្សរសិល្ប៍ ជាភាពទាក់ទាញភ្ញៀវទេសចរ។
ទីភ្នាក់ងារទេសចរណ៍ បានចាប់ផ្ដើមផ្ដល់កញ្ចប់ដំណើរកម្សាន្តដោយផ្សារភ្ជាប់ទៅតាមការរៀបរាប់ក្នុងកំណាព្យនិពន្ធដោយកវីមានដើមកំណើតក្នុងទីក្រុង Hue។
លោក ត្រាន ក្វាងហាវ ជានាយកទីភ្នាក់ងារទេសចរណ៍ Huetourist បានឲ្យដឹងថា៖ «ក្រុមហ៊ុនរបស់យើងបានរៀបចំកញ្ចប់ដំណើរកម្សាន្ត ៥ ថ្ងៃទៅកាន់ផ្នូររាជវង្ស រាជវាំង អារាម និងផ្ទះបុរាណមានសួនច្បារ អាងទឹកធម្មជាតិ ទៅតាមអត្ថបទអក្សរសិល្ប៍ដែលបកប្រែរួច»។
លោក ហាវ បានឲ្យដឹងទៀតថា មគ្គុទេសក៍ទេសចរណ៍ដ៏ជោគជ័យរបស់លោក អាចសូត្រឃ្លាដ៏ពីរោះៗនៃកំណាព្យស្ដីអំពីទីក្រុង Hue។
នាយកភ្នាក់ងារទេសចរណ៍រូបនេះបានលើកឡើងថា៖ «ភ្ញៀវទេសចរយើងជក់ចិត្តនឹងស្ដាប់កំណាព្យរៀបរាប់ពីចម្លាក់ថ្មនៅអារាម Huyen Khong Son Thuong ណាស់»។
លោកបន្តថា៖ «ដូច្នេះយើងគិតថា ការប្រើប្រាស់អក្សរសិល្ប៍ស្ដីពីទីក្រុង Hue ក្នុងការរៀបចំកញ្ចប់ទេសចរណ៍ គឺជាគំនិតដ៏ប្រពៃមួយ ហើយយើងក៏អាចច្នៃបង្កើតផលិតផលទេសចរណ៍ដ៏ប្លែកមួយផងដែរ»។
ទីក្រុង Hue ក៏ជាស្រុកកំណើតរបស់អ្នកនិពន្ធល្បីៗក្នុងប្រវត្តិសាស្ត្រដូចជា លោក ង្វៀង ឌូ (១៧៦៦-១៨២០) កវី កាវ បាក្វាត (១៨០៩-១៨៥៥) និង ផាន ប៊យចាវ (១៨៦៧-១៩៤០)។
អារាមដ៏ល្បីល្បាញនៅទីក្រុង Hue ប្រទេសវៀតណាម។ រូបថត AFP
ទន្ទឹមនឹងនោះ កំណត់ត្រារាជវង្សស្ដេចអង្គមុនៗ ក៏មានទេពកោសល្យខាងតែងនិពន្ធនិងអក្សសាស្ត្រផងដែរ។
អ្នកនិពន្ធ ហូដាង ថាញ់ង៉ក់ បានគាំទ្រថា៖ «ប្រសិនបើយើងរៀបចំកញ្ចប់ទេសចរណ៍ផ្សារភ្ជាប់នឹងស្នាដៃអក្សរសិល្ប៍ល្អៗ យើងមិនត្រឹមតែអាចទាក់ទាញភ្ញៀវទេសចរប៉ុណ្ណោះទេ ថែមទាំងផ្ដល់នូវការចងចាំពីវប្បធម៌ និងប្រវត្តិសាស្ត្ររបស់យើងផងដែរ»។
ដោយឡែក អ្នកនិពន្ធ លោក ឡេ វូទ្រឿងយ៉ាង បានកត់សម្គាល់ឃើញថា វិស័យទេសចរណ៍អក្សរសិល្បៈ មានភាពទាក់ទាញគួរសមក្នុងសកលលោក ប៉ុន្តែមានតែមនុស្សមានចំណូលចិត្តពិតប្រាកដទេដែលចាប់អារម្មណ៍រឿងនេះ។
លោកនិយាយថា៖ «ទាល់តែអ្នកស្នេហាអក្សរសិល្ប៍ និងមានចំណេះដឹងពីសាវតារវប្បធម៌ស្រដៀងគ្នា ទើបគេចាប់អារម្មណ៍ទិញកញ្ចប់ទេសចរណ៍បែបនេះ ហើយវាក៏មិនងាយស្រួលដែរក្នុងការនាំភ្ញៀវទៅមើលគោលដៅទេសចរណ៍មានរៀបរាប់ក្នុងកំណាព្យល្បីៗ»។
ទោះបីជាអត្ថបទអក្សរសិល្ប៍ និងកំណាព្យសម្បូរបែបក្ដី ក៏ការផ្សព្វផ្សាយទៅកាន់ភ្ញៀវទេសចរនៅមានកម្រិតនៅឡើយ។ ទិសដៅទេសចរណ៍ទាំងនោះក៏ត្រូវបានស្នើឲ្យដាក់រូបចម្លាក់ អត្ថបទអក្សរសិល្ប៍ ភ្ជាប់ជាមួយឈ្មោះម្ចាស់ស្នាដៃ និងកាលបរិច្ឆេទ។
តំបន់ភ្នំនៅទីក្រុង Hue ក៏ត្រូវបានស្នើឲ្យរៀបចំពិព័រណ៍ស្នាដៃកំណាព្យ និងអក្សរសាស្ត្រស្តីពីទីក្រុងនេះ និងអំពីវប្បធម៌វៀតណាម បន្ថែមពីលើការសម្ដែងសិល្បៈ និងសកម្មភាពកម្សាន្តបែបវប្បធម៌សម្រាប់សាធារណជន។
លោក ឡេ ហ៊ូមិញ នាយកស្ដីទីនាយកដ្ឋានទេសចរណ៍ បានលើកឡើងថា៖ «គំនិតនេះអាចទៅរួច ហើយខ្ញុំនឹងធ្វើការពិភាក្សាជាមួយអ្នកវិនិយោគក្នុងការអនុវត្តគម្រោងទេសចរណ៍»៕ANN/VNS
