.jpg)
ទេសភាពសមុទ្រឈើរលករលេញ ជាច្រើនស្រទាប់ នៅភ្នំបាយឆៅ។ ផា លីណា
ក្រុងសែនមនោរម្យ: ដែនជម្រកសត្វព្រៃភ្នំព្រេច គ្របដណ្ដប់លើផ្ទៃដីព្រៃប្រមាណ ២២២ ៥០០ ហិកតា ស្ថិតក្នុងតំបន់អភិរក្សដោយព្រះរាជក្រឹត្យចុះឆ្នាំ ១៩៩៣ ជាតំបន់សម្បូរបែបនៃទីជម្រកសត្វព្រៃ និងព្រៃឈើដែលលាតសន្ធឹងពីព្រៃបៃតងនៃតំបន់ភ្នំ រហូតដល់តំបន់ព្រៃរបោះ និងវាលស្មៅសើម។
ឈរគន់ពីពយលយលើខ្នងភ្នំខ្ពស់ផុតចុងឈើ រចនាជារានហាល មានក្យូសលម្ហែ បង់អង្គុយលេង អមដោយសួនច្បារផ្កាភ្ញី យើងអាចមើលឃើញសម្រស់ជ្រលងភ្នំខ្ពស់រាបស្រោបព្រៃព្រឹក្សា ដែលហាក់បីដូចជាទឹករលកបោកបក់រលេញលើផ្ទៃជលសា ចាំងឆ្លុះមេឃា រំលេចជាពណ៌បៃតងតភ្ជាប់ផ្ទៃមេឃដោយពពកសក្បុស។
ស្ថិតនៅជាប់នឹងផ្លូវជាតិលេខ ៧៦ ពីមណ្ឌលគិរីទៅកាន់ខេត្ដរតនគិរី នៃស្រុកកោះញែក ចម្ងាយប្រមាណ ១០ គីឡូម៉ែត្រពីក្រុងសែនមនោរម្យ និង ៣ គីឡូម៉ែត្រពីផ្លូវបំបែកកោះញែក និងប៊ូស្រា ទីឋានគន់សមុទ្រឈើលើភ្នំបាយឆៅ ដែលទើបដាក់ឲ្យដំណើរការ ៦ ខែ បានក្លាយជាទីជំនួបអ្នកនិយមសម្រស់ធម្មជាតិ និងប្រាថ្នាថតរូបសែលហ្វ៊ីដ៏ស្រស់ត្រកាល។
គយគន់ពីជ្រុងខាងប៉ែកខាងស្ដាំទៅខាងឆ្វេងលើរានហាល ភ្ញៀវទេសចរនឹងបានឃើញរលកសមុទ្រឈើ ៤ ផ្នត់ កំពុងបោកបក់រុញច្រានរកច្រាំងបន្ដបន្ទាប់គ្នា គួរឲ្យផ្ដិតទុកក្នុងកាមេរ៉ាជាអនុស្សាវរីយ៍។
សមុទ្រឈើ នៃដែនជម្រកសត្វព្រៃភ្នំព្រេច ជាទីឋានតែមួយ ដែលទេសចររមែងនាំគ្នាទស្សនាពីកូនភ្នំមួយក្បែរភ្នំដោះក្រមុំ ឯភូមិឡៅកា សង្កាត់សុខដុម ក្រុងសែនមនោរម្យ ខេត្តមណ្ឌលគិរី។
ឈរមាត់ច្រកទ្វារ ដែលរចនាដោយការលើកដើមឈើងាប់មួយដើមទាំងឫសជាខ្លោងទ្វារដ៏គួរឲ្យទាក់ទាញ លោក លែន អាយុ ៤៣ ឆ្នាំ រង់ចាំស្វាគមន៍ភ្ញៀវមកទស្សនាសមុទ្រឈើពីភ្នំបាយឆៅ ដោយប្រើតែដៃម្ខាងទាំងការទទួលប្រាក់ថ្លៃសំបុត្រ និងអាប់លុយជូនភ្ញៀវ។
គ្រងសម្លៀកបំពាក់ទាហាន បុរសម្នាក់ ជាអតីតយុទ្ធជននៅតំបន់អូរស្មាច់ ខេត្ដឧត្ដរមានជ័យ ដែលបាត់បង់ដៃដោយសារតែការប៉ះទង្គិចចុងអាវុធ ៥-៦ កក្កដា ១៩៩៧ លោក លែន បានរៀបរាប់ពីចំនួនភ្ញៀវតាមការគណនាចំណូលប្រចាំថ្ងៃថា៖ «ក្នុង ១ ថ្ងៃ ជួនកាល ៥ ម៉ឺនរៀល ជួនកាល ១៥ ០០០ រៀលក៏មាន។ ដូចម្សិលមិញ បាន ១ ថ្ងៃ ១០ ម៉ឺនរៀល។ ប៉ុន្ដែខ្ញុំមិនមែនយកមកដាក់ក្នុងហោប៉ៅខ្ញុំទេបង!»។
នៅរានហាល ភ្ញៀវទេសចរមិនរំលងការថតរូបលេង។ ផា លីណា
អតីតយុទ្ធជន ដែលទទួលបានប្រាក់បៀវត្សរ៍ ១ ខែ ១០០ ដុល្លារ ពីម្ចាស់រីសតរូបនេះ បានបន្ដថា ដោយសារខែនេះភ្ញៀវច្រើន ភ្ញៀវមកលេង ១ ខែសរុបទៅបានពី ២០ ម៉ឺន ទៅ ៤០ ម៉ឺនរៀល។ ចំពោះថ្ងៃបុណ្យទាន ជាក់ស្ដែង នៅថ្ងៃចូលឆ្នាំភ្ញៀវចូលលេងច្រើន ដែលមានចំណូលរហូតដល់ ២ លានរៀលឯណោះ។ លោករំពឹងថា នៅរដូវបុណ្យភ្ជុំបិណ្ឌខាងមុខ ភ្ញៀវកាន់តែច្រើនមកលេងភ្នំបាយឆៅតាមរយៈ ការដឹងតៗគ្នា និងការចែកចាយតាមមិត្ដភក្ដិលើបណ្ដាញសង្គម។
ពយភ្នំបាយឆៅ បើកសម្ពោធភោជនីយដ្ឋានលក់ម្ហូបម្ហា ភេសជ្ជៈជូនភ្ញៀវ ដែលមានបំណងចង់សម្រាកទទួលទានបាយ និងគន់ទេសភាព និងការពង្រីករានហាលសម្រាប់ភ្ញៀវឈរថតបានគ្រប់ជ្រុងរហូតដល់ខ្ទមជនជាតិ។
លោក លែន បានបន្ថែមថា ចាប់ពីទីឋានគយគន់ទេសភាពសមុទ្រឈើរហូតទៅដល់បាតអូរ ដែលក៏ជាតំបន់កម្សាន្ដទាក់ទាញយុវជន និងភ្ញៀវបរទេស មានចម្ងាយប្រមាណពី ៧០០ ទៅ ៨០០ ម៉ែត្រ ដោយការធ្វើដំណើរតាមម៉ូតូឬរថយន្ដកែច្នៃតាមផ្លូវផ្សេង។
តម្លៃចូលទៅកាន់ពយទស្សនាសមុទ្រឈើលើភ្នំបាយឆៅ សម្រាប់រថយន្ដក្រុង ១ គ្រឿង ១ ម៉ឺនរៀល រថយន្ដធុនតូច ៥ ០០០ រៀល និងម៉ូតូ ១ គ្រឿង ២ ០០០ រៀល៕
ភ្នំបាយឆៅ មានកន្លែងអង្គុយលេង និងញ៉ាំអាហារ។ ផា លីណា
តម្លៃចូលរថយន្ត ៥ ពាន់រៀល និងម៉ូតូ ២ ពាន់រៀល។ ផា លីណា
វីដេអូ៖
