The Phnom Penh Post Search

Search form

សហគមន៍​ជំរំ​ទោច ដង្ហោយ​ចង់​ឈ្នះ​ប្រាក់​រង្វាន់ $ ៣៥០០០

Content image - Phnom Penh Post
ទេសចរ​ក៏អាច​ទស្សនាសត្វ​បក្សី​ប្លែកៗ​បាន​ដែរ​ក្រៅ​ពី​មើល​សត្វទោច​នៅ​សហគមន៍​ទេសចរណ៍​ធម្មជាតិ​មើល​សត្វ​ទោច។ រូប សហការី

សហគមន៍​ជំរំ​ទោច ដង្ហោយ​ចង់​ឈ្នះ​ប្រាក់​រង្វាន់ $ ៣៥០០០

មណ្ឌលគិរីៈ ថ្មីៗ​នេះ​អង្គការ​សមាគម​អភិរក្ស​សត្វព្រៃ​បាន​ជូន​ដំណឹង​ដោយ​ទទូច​មួយ​ស្តី​អំពី​តំបន់​សហគមន៍​ទេសចរណ៍​ធម្មជាតិ​ជំរំ​ទោច ដែល​មាន​ទីតាំង​ស្ថិត​នៅ​ក្នុង​ដែនជម្រក​សត្វព្រៃ​កែវសីមា ខេត្ត​មណ្ឌលគិរី​ត្រូវការ​ការគាំទ្រ​ដោយ​វិធី​បោះឆ្នោត ដើម្បី​ចូលរួម​ប្រជែង​យក​កញ្ចប់​ថវិកា​មូលនិធិ​ពី​សមាគម​អភិរក្ស​នៅ​អឺរ៉ុប EOCA មាន​ប្រាក់​រង្វាន់​ចំនួន ៣៥ ០០០ ដុល្លារ ។

សហគមន៍​ទេសចរណ៍​ធម្មជាតិ​មើល​សត្វ​ទោច ឬ Jahoo-Gibbon Camp ដែល​ស្ថិត​ក្នុង​ស្រុក​កែវ​សីមា​ខេត្ត​មណ្ឌលគិរី​របស់​ប្រទេស​កម្ពុជា បាន​ជាប់​នៅ​ក្នុង​ចំណោម​សហគមន៍​ទេសចរណ៍​ធម្មជាតិ​ចំនួន ៥ ចុងក្រោយ ដែល​ត្រូវ​ប្រជែង​យក​កញ្ចប់​ថវិកា​មូលនិធិ​ពីសមាគម​អភិរក្ស​នៅ​តំបន់​អឺរ៉ុប EOCA តាមរយៈ​ការបោះឆ្នោត​ពី​សាធារណជន​ច្រើន​ជាងគេ ដើម្បី​យក​ទៅ​អភិវឌ្ឍ​សហគន៍ ចាប់ផ្តើម​ពី​ឥឡូវ​រហូត​ដល់​ថ្ងៃទី ១៨ ខែ​តុលា ឆ្នាំ ២០១៧ ខាងមុខ។

ចំពោះ​បេក្ខភាព​ផ្សេងៗ​ទៀត ដែល​ត្រូវ​ចូលរួម​ប្រជែង​ដែរ​នោះ​រួមមាន​ដូចជា​សហគមន៍​ព្រៃឈើ​អាមបូរ៉ូ អាណាឡុក ប្រទេស​បូលីវៀ សហគមន៍​រេដ បែលី ហ្គូណុន ប្រទេស​ប៉ឺនីន​ខាងត្បូង សហគមន៍​ទេសចរណ៍​ធម្មជាតិ និង​ស្តារ​ព្រៃ​ឡើង​វិញ ជីមប៉ាន់នី ប្រទេស​អ៊ូហ្គង់ដា និង​តំបន់​វាល​ទេសភាព​ស្មីតហីល​ក្នុង​ប្រទេស​អង់គ្លេស។

បើតាម​លោក ណាច ណប់ មន្ត្រី​សម្របសម្រួល​ផ្នែក​ទេសចរណ៍​នៃ​តំបន់​សហគមន៍​ទេសចរណ៍​ធម្មជាតិ​ជំរំ​ទោច បាន​ឲ្យ​ដឹង​ពី​កំណ​កំណើត​សហគមន៍ និង​សក្ដានុពល​ទាក់ទាញ​ទេសចរ​ថា៖ «តាម​ពិត​ទៅ​នោះ​សហគមន៍​ទេសចរណ៍​ធម្មជាតិ​ជំរំ​ទោច បាន​សាកល្បង​ការផ្សព្វផ្សាយ​អំពី​សក្ដានុពល​ផ្នែក​ទេសចរណ៍​គឺ​ចាប់តាំង​ពី​ឆ្នាំ ២០១៤ ខណៈ​ការអនុវត្ត​ជា​ផ្លូវការ​វិញ​បាន​ចាប់ផ្តើម​នៅ​ឆ្នាំ ២០១៦។ ទីនេះ​ជា​ប្រភេទ​តំបន់​ព្រៃ​ពាក់កណ្តាល​ស្រោង មាន​វិសាលភាព​លើ​ផ្ទៃដី​ចំនួន ៦ គីឡូម៉ែត្រ​ការ៉េ មាន​សត្វ​ទោច​ចំនួន ៨ ក្បាល មាន​ផ្ទះ​តង់​សម្រាប់​ការ​ស្នាក់​នៅ​ចាំមើល​សត្វ​ទោច​ចំនួន ៤ និង​ផ្ទះបាយ​រួមគ្នា​មួយ»។

Content image - Phnom Penh Post
ផ្ទះតង់​ស្នាក់នៅ​មើល​សត្វ​ទោច​នៅ​សហគមន៍​ទេសចរណ៍​ធម្មជាតិ​មើល​សត្វ​ទោច។ រូប សហការី

លោក​បន្តថា៖ «ទេសចរ​នឹង​មាន​អារម្មណ៍​ថ្មី​ប្លែក​ម្យ៉ាង​មិន-ខាន​ឡើយ​ពី​តំបន់​នេះ ប្រសិនបើ​បាន​សាកល្បង​ម្តង​នោះ។ តាំង​ពីដើម​មក​សម្ទុះ​ភ្ញៀវ​មក​ទស្សនា ភាគច្រើន​ជា​ជន​បរទេស ខណៈ​ភ្ញៀវ​ខ្មែរ​យើង​វិញ​កម្រ​មាន​ណាស់។ ចំនួន​ភ្ញៀវ​ជា​មធ្យម​មក​ទស្សនា​មាន ៤-៥ ក្រុម​ប៉ុណ្ណោះ​ក្នុង ១ ខែ»។

លោក​ ណាច ណប់ ក៏បាន​ឲ្យដឹង​ពី​តម្លៃ​សេវាកម្ម​ផងដែរ​ថា៖ «ប្រសិនបើ​ភ្ញៀវទេសចរ​មានតែ​ម្នាក់​មក​ទស្សនា​នោះ យើង​ឲ្យ​គាត់​បង់ប្រាក់​ចំនួន ១៥ ដុល្លារ ដែល​ជា​សេវាកម្ម​ចូលរួម​អភិរក្ស​សហគមន៍ ខណៈ​ភ្ញៀវ​មាន ២ នាក់​វិញ​ត្រូវ​បង់​តែ ២៥ ដុល្លារ​ប៉ុណ្ណោះ លើ​ការ​ស្នាក់​នៅ​ផ្ទះ​តង់ ១ យប់ ដោយ​ផ្ទះ​តង់​យើង​មួយ​បន្ទប់​មាន​គ្រែ។ ចំណែក​តម្លៃ​អាហារ​វិញ បើ​ភ្ញៀវ​ម្នាក់​ត្រូវ​ចំណាយ​ប្រាក់​ចំនួន ១៥ ដុល្លារ​សម្រាប់​អាហារ ៣ ពេល។ តែ​ប្រសិន​បើ​ក្រុម​ភ្ញៀវ​មាន​គ្នាច្រើន​វិញ សម្រាប់​ម្នាក់​ត្រូវ​បង់ប្រាក់​លើ​អាហារ​តែ ៤ ដុល្លារ​ប៉ុណ្ណោះ ១ ពេល ឬ ១២ ដុល្លារ ៣ ពេល»។

ប្រិយមិត្ត​អាច​ចូលរួម​បោះឆ្នោត​គាំទ្រ​តំបន់​សហគមន៍​ទេសចរណ៍​ធម្មជាតិ​ជំរំ​ទោច​របស់​កម្ពុជា​យើង ដោយ​គ្រាន់តែ​ចូល​ទៅ​គេហទំព័រ​របស់​អង្គការ​សមាគម​អភិរក្ស​សត្វព្រៃ (WCS) មាន​ឈ្មោះ​ថា WCS Cambodia ឬ https://www.facebook.com/wcscambodia.fb/

បន្ទាប់​មក ប្រិយមិត្ត​ចុច​លើ​ពាក្យ Vote Now ។ ជំហាន​ចុងក្រោយ គឺ​ចុច​លើ​ពាក្យ Cast Your-Vote (ចុចធីក​លើ Terms and conditions ជាមុន) ខណៈការ​បោះឆ្នោត​នឹង​បញ្ចប់​នៅ​ថ្ងៃ​ទី ១៨ តុលា ឆ្នាំ ២០១៧ ខាងមុខ​នេះហើយ៕

អត្ថបទគួរចាប់អារម្មណ៍

  • អាជ្ញាធរ​ហាម​កប់​សព ឬ​ធ្វើ​ម៉ុង​នៅ​តាម​ជើងភ្នំ​ស្វាយ

    បន្ទាយមានជ័យៈ អាជ្ញាធរ​ខេត្ត​បន្ទាយមានជ័យ​បាន​ចេញ​បម្រាម​មិន​ឲ្យ​មាន​ការ​សាងសង់​ផ្នូរ​កប់​សព ធ្វើ​ចេតិយ​ ឬ​ធ្វើ​ម៉ុង​នៅ​តាម​ជើងភ្នំ​ស្វាយ​ក្នុង​ក្រុង​សិរីសោភ័ណ​ទៀត​ឡើយ ដោយសារ​តែ​វា​ធ្វើឲ្យ​ខូច​ដល់​សោភណភាព​ភ្នំ​ធម្មជាតិ​ដែល​ជា​ទី​ទៅ​កម្សាន្ត​សម្រាប់​ភ្ញៀវទេសចរ​ជាតិ និង​អន្តរជាតិ​។ ការសម្រេច​នេះ​ត្រូវ​បាន​ធ្វើ​ឡើង​នៅក្នុង​កិច្ចប្រជុំ​មួយ​នៅ​សាលាខេត្ត​កាលពី​ថ្ងៃទី​ ១៤ ខែ​សីហា​ឆ្នាំ​ ២០១៨​។

  • ចិន​នឹង​បញ្ជូន​ក្រុម​អ្នកចរចា​ទៅ​អាមេរិក

    ក្រុងប៉េកាំងៈ ក្រសួង​ពាណិជ្ជកម្ម​ចិន​បាន​ឲ្យ​ដឹង​កាលពី​ថ្ងៃ​ព្រហស្បតិ៍​ថា ចិន​នឹង​បញ្ជូន​អ្នកចរចា​ជាន់​ខ្ពស់​ទៅ​សហរដ្ឋអាមេរិក​នៅ​ចុង​ខែ​សីហា​នេះ ដើម្បី​បន្ត​ការចរចា​ពាណិជ្ជកម្ម​ឡើង​វិញ ដែល​ជា​កិច្ចប្រជុំ​សាធារណៈ​លើកដំបូង​ក្នុង​រយៈពេល​ជាច្រើន​សប្ដាហ៍​ទាក់ទង​នឹង​ប្រធានបទ​នេះ ខណៈ​ជម្លោះ​ពាណិជ្ជកម្ម​មាន សភាព​កាន់តែ​ខ្លាំង​ឡើង​។

  • បរទេស​ និង​ខ្មែរ​ ៥៣ ​នាក់​ត្រូវ​បាន​ចាប់​ខ្លួន​ពាក់ព័ន្ធ​នឹង​គ្រឿងញៀន

    ព្រះសីហនុៈ ជនបរទេស និង​ខ្មែរ​ចំនួន​ ៥៣ ​នាក់​ត្រូវ​បាន​ចាប់ខ្លួន​កាលពី​ម្សិលមិញ​នៅក្នុង​សង្កាត់​លេខ​ ៤ ក្រុង​ព្រះសីហនុ​ពេល​កំពុង​ប្រព្រឹត្ត​បទល្មើស ជួញដូរ និង​ប្រើប្រាស់​គ្រឿងញៀន​នៅក្នុង​រង្គសាល​ស្កាយឡាញ​ ១ ​កន្លែង​។

  • CPP ការពារ​លទ្ធផល​បោះឆ្នោត ហើយ​ថា​រាល់​ការរិះគន់​គឺជា​ការប្រមាថ​ប្រជាជន​កម្ពុជា​យ៉ាង​ធ្ងន់ធ្ងរ

    ភ្នំពេញៈ បន្ទាប់ពី​ទទួល​បាន​ជ័យជម្នះ​ក្ដោប​ក្ដាប់​យក​អាសនៈ​ទាំង​ ១២៥ នៅក្នុង​រដ្ឋសភា មន្ត្រី​ជាន់ខ្ពស់​នៃ​គណបក្ស​ប្រជាជន​កម្ពុជា​កាលពី​ម្សិលមិញ​បាន​ចេញ​មុខ​នៅ​ចំពោះ​ប្រព័ន្ធ​ផ្សព្វផ្សាយ​ជាតិ និង​អន្តរជាតិ​ដើម្បី​ការពារ​ជ័យជម្នះ​ដែល​ទទួល​បាន​ពី​ការបោះឆ្នោត​កាលពី​ថ្ងៃទី​ ២៩ ខែ​កក្កដា​កន្លង​មក​នេះ ហើយ​ក៏​បាន​វាយបក​ធ្ងន់ៗ​ប្រឆាំង​បណ្ដា​ប្រទេស​ប្រជាធិបតេយ្យ​ខ្លះ និង​អតីត​គណបក្ស​ប្រឆាំង​ដែល​រិះគន់​ខ្លួន​ថា​បាន «​ប្រមាថ​យ៉ាងធ្ងន់ធ្ងរ​» ដល់​ឆន្ទៈ​ប្រជាជន​កម្ពុជា ហើយ «​ឧបាយកល​ដ៏ពិសពុល​» របស់​ពួកគេ​បាន​ទទួល​បរាជ័យ​ជា​អ្វី​ដែល​អតីត​មន្ត្រី​ជាន់ខ្ពស់​គណបក្ស​ប្រឆាំង និង​អ្នកវិភាគ​ជំទាស់​។