.jpg)
ទេសភាពល្ហល្ហេវនៃអាងទឹកហូរពីទំនប់អាតៃ។ រូបថត ភ្នំពេញ ប៉ុស្ដិ៍
ក្រុងពោធិ៍សាត់: អូរសោម ជាសហគមន៍ជនបទតូចមួយស្ថិតនៅចំកណ្ដាលជួរភ្នំក្រវាញ រវាងតំបន់អភិរក្សក្រពើភ្នំ និងភ្នំសំកុះ ភាគនិរតីប្រទេសកម្ពុជាកំពុងប្រែក្លាយជាគោលដៅអេកូទេសចរណ៍ និងអ្នកនិយមសម្រស់ធម្មជាតិមកពីគ្រប់ច្រកល្ហក។
ភូមិឋានដ៏ស្ងប់ស្ងាត់ចំនួន ៤ ដែលមានប្រជាជនសរុបប្រមាណ ៤០០ គ្រួសារភាគច្រើនជាជនជាតិដើមភាគតិច ជង គឺជាមជ្ឈមណ្ឌលទេសចរណ៍ដែលផ្ដល់បទពិសោធជីវិតបែបជនបទសម្រាប់ភ្ញៀវបរទេសមុនពេលពួកគេធ្វើដំណើរទៅកាន់ទីក្រុងវប្បធម៌ និងប្រវត្ដិសាស្ដ្រ។
លោក ម៉ៃឃើល ជាមួយភរិយាដែលជាអ្នកថែសួនដូចគ្នានៅបារាំង បានចាប់ផ្ដើមដំណើរពីភ្នំពេញឆ្លងកាត់កោះកុង និងអូរសោមនៃខេត្ដពោធិ៍សាត់ មុនពេលបន្ដដំណើរទៅកាន់បាត់ដំបង និងសៀមរាប។ ដំបូងឡើយពួកគេគ្រោងស្នាក់នៅអូរសោមតែ ២ យប់ដោយជ្រើសរើសការគេងក្នុងអង្រឹងតម្លៃ ១ ម៉ឺនរៀលម្នាក់។
លោក ម៉ៃឃើល បានប្រាប់ថា៖ «យើងគិតថា ចង់ស្នាក់នៅទីនេះតែ ២ យប់ទេ រួចបន្ដទៅខេត្ដបាត់ដំបង និងសៀមរាប។ តែពេលយើងបានឃើញសម្រស់ទេសភាពធម្មជាតិស្អាត បដិសណ្ឋារកិច្ចល្អ ព្រមទាំងអាហារសរីរាង្គ និងតម្លៃសមរម្យ យើងសម្រេចចិត្ដបន្ថែមប៉ុន្មានថ្ងៃទៀត»។
បឹងហ្គាឡូបឹងមាសស្ថិតនៅសហគមន៍អេកូទេសចរណ៍អូរសោម។ រូបថត ភ្នំពេញ ប៉ុស្ដិ៍
អំឡុងពេលស្នាក់នៅអូរសោម ប្ដីប្រពន្ធទាំង ២ នាក់បានដើរលេងតាមភូមិ ឡើងភ្នំសំកុះ ទស្សនាអាងក្រពើ ទឹកធ្លាក់ឆាយរកា និងឆាយប្រុយជាដើម។
អូរសោម ជាសហគមន៍ដែលពលរដ្ឋធ្លាប់ប្រកបរបរកាប់ឈើ ប្រមាញ់សត្វព្រៃ និងរុករានដីខុសច្បាប់បានប្រែក្លាយការរស់នៅបែបជាសហគមន៍អេកូទេសចរណ៍ដែលពលរដ្ឋអាចរកកម្រៃផ្គត់ផ្គង់ជីវភាពគ្រួសារ។
ដើម្បីបង្កើនជីវភាព និងបញ្ចៀសមុខរបរខុសច្បាប់ មជ្ឈមណ្ឌលសហគមន៍ក្រវាញអូរសោម (OsoamCCC) ត្រូវបានបង្កើតឡើងក្នុងបំណងបង្កើនគុណភាពនៃការរស់នៅតាមរយៈការអប់រំ បណ្ដុះបណ្ដាលវិជ្ជាជីវៈ អេកូទេសចរណ៍ និងកម្មវិធីកសិកម្មជាដើម។
លោក នួន លីម ស្ថាបនិកមជ្ឈមណ្ឌលជាទីដែលបម្រើជាផ្ទះស្នាក់ដ៏ពេញនិយមបំផុតមួយនៅអូរសោមបាននិយាយថា៖ «មជ្ឈមណ្ឌលសហគមន៍ក្រវាញអូរសោម បង្កើតឡើង ៥ ឆ្នាំហើយជាមួយនឹងវត្ដមានភ្ញៀវទេសចរតិចតួចបំផុត។ ពួកគេទទួលទានជាមួយយើង និងស្នាក់នៅក្នុងអង្រឹង។ ឆ្នាំទី ២ ទេសចរកើនឡើងបន្ដិចពី ៣៥ នាក់ក្នុងឆ្នាំ ២០១៤ ដល់ ៤៥ នាក់ក្នុងឆ្នាំ ២០១៥។ ពួកគេសុទ្ធតែជាអ្នកផ្សងព្រេងពិតៗដោយការជិះម៉ូតូធំៗឆ្លងកាត់តំបន់ជួរភ្នំក្រវាញ»។
ដោយមានការអភិវឌ្ឍជាលំដាប់ មជ្ឈមណ្ឌលបានបង្កើតទំព័រហ្វេសប៊ុក និងវេបសាយផ្ទាល់ខ្លួនដើម្បីផ្សព្វផ្សាយកិច្ចការសហគមន៍រហូតប្រែក្លាយជាគោលដៅអេកូទេសចរណ៍។
ទេសភាពនាពេលព្រឹកព្រហាម វេលាអាកាសធាតុត្រជាក់មានអ័ព្ទ។ រូបថត ភ្នំពេញ ប៉ុស្ដិ៍
លោក លីម ប្រាប់ភ្នំពេញប៉ុស្ដិ៍ថា៖ «ពេលនេះយើងមានផ្ទះស្នាក់ ២ និងផ្ទះសំណាក់ ២ ដែលត្រៀមបើកទ្វារ ៣ បន្ថែមទៀត។
ដោយស្ថិតនៅចម្ងាយប្រមាណ ១២០ គីឡូម៉ែត្រពីទីរួមខេត្ដកោះកុង និង ៦០ គីឡូម៉ែត្រពីឃុំប្រមោយ ទីរួមស្រុកវាលវែងនៃខេត្ដពោធិ៍សាត់ដែលមានស្ថានភាពផ្លូវដ៏លំបាកបំផុត។ អូរសោម គ្មានភោជនីយដ្ឋានផ្ដល់សេវាកម្មម្ហូបអាហារភ្លាមៗតាមការកុម្ម៉ង់នោះទេ ក្រៅពីការកក់ទុក ២ ទៅ ៣ ថ្ងៃមុន ដោយទុកឱកាសឲ្យពលរដ្ឋស្វែងរកមាន់ទាតាមផ្ទះ និងបន្លែក្បែររបងផ្ទះ។
លោក ឈុប ពីនី ជាអ្នកភ្នំពេញដែលបានរៀបការជាមួយភរិយានៅអូរសោម និងរួមរស់ជាមួយគ្នា ២០ ឆ្នាំបានបើកទ្វារផ្ទះសំណាក់មួយ និងបន្ទប់បឹងហ្គាឡូ ២ ចម្ងាយតែប៉ុន្មានគីឡូម៉ែត្រពីផ្ទះស្នាក់លោក លីម បានផ្ដល់បន្ទប់ស្នាក់តម្លៃពី ១០ ទៅ ៣០ ដុល្លារក្នុង ១ យប់។
លោក ពីនី ម្ចាស់ផ្ទះសំណាក់បឹងមាសបានប្រាប់ថា៖ «យើងមិនមានផ្សារលក់ផលិតផលម្ហូបអាហារអ្វីធំដុំទេ។ ភ្ញៀវមិនអាចកុម្ម៉ង់ម្ហូបភ្លាមៗបានឡើយ។ យើងត្រូវការកក់ទុកមុន ដើម្បីឲ្យយើងអាចរកបន្លែ និងត្រីសាច់»។
ទេសចរបរទេសអង្គុយកម្ដៅខ្លួនក្បែរភ្នក់ភ្លើង រីករាយនឹងបទពិសោធជីវិតបែបជនបទ។ រូបថត ភ្នំពេញ ប៉ុស្ដិ៍
លោក នួន លីម អាយុ ៣៨ ឆ្នាំធ្លាប់ជាមន្ដ្រីអនុរក្សព្រៃនៃខេត្ដកោះកុង ១១ ឆ្នាំបានបើកផ្ទះស្នាក់ដោយផ្ដើមដំបូងតែមួយបន្ទប់សម្រាប់ភ្ញៀវដើរផ្សេងព្រេងគ្មានគោលដៅប៉ុណ្ណោះ។ ពេលនេះផ្ទះស្នាក់ OsoamCCC មានផ្ទះប្រពៃណីខ្មែរ ៨ និងតុបាយធំមួយជាមួយតៀមកាហ្វេមួយ។
លោក លីម បានអះអាងថា៖ «បច្ចុប្បន្នយើងបានទទួលភ្ញៀវមកពីច្រើនប្រទេសជុំវិញពិភពលោក។ រៀងរាល់ថ្ងៃយើងបើកទ្វារយ៉ាងតិច ២ ទៅ ៣ បន្ទប់សម្រាប់ទាំងភ្ញៀវជាតិ និងអន្ដរជាតិ។ ពួកគេញ៉ាំនូវអ្វីដែលយើងញ៉ាំរាល់ថ្ងៃដូចគ្នា»។
មជ្ឈមណ្ឌលសហគមន៍ក្រវាញអូរសោមក៏បានបើកទូលាយចំពោះអ្នកស្ម័គ្រចិត្តជួយដល់កិច្ចការសង្គមដូចជា ការបង្រៀនភាសាអង់គ្លេស កុំព្យូទ័រ ថែទាំសួន កសិកម្ម និងគម្រោងសាងសង់ផ្ទះជូនពលរដ្ឋក្រីក្រជាដើម។
សហគមន៍អេកូទេសចរណ៍អូរសោមមានទីតាំងស្ថិតនៅក្នុងឃុំអូរសោម ស្រុកវាលវែង ខេត្ដពោធិ៍សាត់។ សម្រាប់ព័ត៌មានបន្ថែម សុំទាក់ទងតាមលេខទូរស័ព្ទ ០៨៩ ៨៩ ៩៨ ៩៥៕
