ខេត្តត្បូងឃ្មុំៈ រមណីយដ្ឋានហ្លួងព្រះស្តេចកន ឬរាជធានីស្រឡប់ដូនតីពិជ័យព្រៃនគរ គឺបណ្ដុំនៃប្រវត្តិសាស្ត្រ វប្បធម៌ និងសាសនាដែលបានបង្កប់នូវរឿងរ៉ាវរបស់អតីតស្តេចខ្មែរមួយព្រះអង្គមានស្នាព្រះហស្ថដ៏អស្ចារ្យគឺព្រះស្រីជេដ្ឋាធិរាជព្រះស្តេចកន ដែលបានសោយរាជ្យឆ្នាំ ១៥១២-១៥២៥។ បច្ចុប្បន្នទីនេះមិនត្រឹមជារមណីយដ្ឋានប្រវត្តិសាស្ត្រដ៏ល្បីមួយប៉ុណ្ណោះ តែក៏កំពុងក្លាយជាទីកន្លែងទាក់ទាញចំណាប់អារម្មណ៍ពលរដ្ឋយ៉ាងច្រើនទាក់ទិននឹងជំនឿវត្ថុស័ក្តិសិទិ្ធ និងការគោរពព្រះពុទ្ធសាសនា គឺមានពុទ្ធរូបផ្ទំ ១ អង្គដ៏ធំសម្បើម។
ស្ថិតនៅភូមិបន្ទាយព្រៃនគរ និងភូមិអង្គរក្នុង ឃុំដូនតី ស្រុកពញាក្រែក ខេត្ដត្បូងឃ្មុំមានចម្ងាយជាង ១៤ គីឡូម៉ែត្រពីផ្លូវបំបែកនៃទិសដៅខេត្តកំពង់ចាម និងមណ្ឌលគិរីដោយបត់ឆ្វេងឆ្ពោះទៅខេត្តកំពង់ចាមនោះនឹងបានឃើញរមណីយដ្ឋានហ្លួងព្រះស្ដេចកន ឬអ្នកស្រុកនិយមហៅថា វត្តអង្គរក្នុង។
ទីនេះត្រូវបានអភិរក្សចាប់តាំងពីឆ្នាំ ២០០៦ មកដោយការសង់រូបសំណាក ហ្លួងព្រះស្ដេចកនកំពុងជិះសេះលើកធ្នូសរបាញ់ដែលបង្ហាញពីឫទិ្ធអំណាច និងរូបសម្បតិ្ត រឹងមាំស្វាហាប់ និងមានតួប្រាសាទបុរាណសង់ពីថ្មបាយក្រៀមចំនួន ២ ដែលជាទីកន្លែងសក្ការៈបូជានៃសាសនាក្នុងអតីតកាលបន្សល់មកដល់បច្ចុប្បន្ននេះ។
ទន្ទឹមនឹងនេះរមណីយដ្ឋានខាងលើក៏បានកសាងពុទ្ធរូប ១ ព្រះអង្គផ្ទំជាព្រះពុទ្ធរូបមួយដ៏ធំជាងគេបំផុតនៅក្នុងប្រទេសកម្ពុជាដែលមានប្រវែងពីចុងព្រះបាទទៅព្រះកេស ៤៥ ម៉ែត្រ ២ តឹក កម្ពស់ពីព្រះហស្ថទៅព្រះកេស ១៣ ម៉ែត្រ ៥ តឹក។ ព្រះពុទ្ធរូបនេះត្រូវបានចាប់ផ្តើមកសាងនៅឆ្នាំ ២០០៧ និងរួចរាល់នៅឆ្នាំ ២០០៩។ ខណៈព្រះពុទ្ធរូបនេះសង់ឡើងក្នុងគោលបំណងបង្ហាញទៅដល់ពុទ្ធបរិស័ទឲ្យស្គាល់ពីកិរិយារបស់ព្រះពុទ្ធបរមគ្រូនាពេលព្រះអង្គផ្ទំ។
ក្រៅពីនេះក៏បង្កប់ជំនឿដ៏ស័ក្តិសិទិ្ធរបស់ព្រះអង្គសំរឹទ្ធ ឬព្រះអង្គខ្មៅដែលស្ថិតនៅក្នុងព្រះវិហារផងដែរដោយសារពុទ្ធបរិស័ទជិតឆ្ងាយតែងតែមកគោរពបូជានៅទីនេះជារៀងរាល់ថ្ងៃសីលមិនដែលខាននោះឡើយ។
ព្រះភិក្ខុ ម៉ែន ប្រុស គង់នៅវត្តអង្គរក្នុង ឬវត្តហ្លួងព្រះស្តេចកនមានសង្ឃដីកាថា៖ «ចំណុចពិសេសមួយទៀតគឺក្សិណទឹកជុំវិញប្រាសាទពីបុរាណហ្នឹង។ បច្ចុប្បន្ននេះគឺនៅតែជាក្សិណទឹកដដែល គ្រាន់តែថាទឹករាក់ ឬជ្រៅតាមរដូវកាល ហើយពលរដ្ឋទីនេះសហការគ្នាណាស់បានជួយថែរក្សាបេតិកភណ្ឌនានា ថែរក្សាដើមឈើ គ្មានការបំផ្លាញអីទេ ហើយវត្តក៏ទើបតែជីកស្រះធំៗចំនួន ២ បន្ថែមទៀតផងដែរសម្រាប់សង់ទីកន្លែងកម្សាន្ត»។
រមណីយដ្ឋានហ្លូងព្រះស្តេចកនទទួលបានភ្ញៀវទេសចរចំនួន ៥០ នាក់ទៅ ១០០ នាក់ពីថ្ងៃចន្ទ ដល់ថ្ងៃសុក្រ ខណៈនៅថ្ងៃសៅរ៍-អាទិត្យវិញអាចមានភ្ញៀវចាប់ពី ១០០ នាក់ឡើងទៅ។ នាពេលមានពិធីបុណ្យ មិនថាបុណ្យជាតិ ឬសាសនា ទីនេះមានភ្ញៀវមកកម្សាន្តដល់រាប់ពាន់នាក់ដែរ។
ព្រះភិក្ខុ ម៉ែន ប្រុស មានសង្ឃដីកាបន្ថែមថា៖ «ពេលមានពិធីបុណ្យផ្សេងៗ ដូចជាបុណ្យចូលឆ្នាំខ្មែរជាដើមនោះ ព្រះចៅអធិការវត្តតែងតែរៀបចំពិធីរយៈពេល ១០ ថ្ងៃដល់កន្លះខែដោយមានការកម្សាន្តច្រើនដូចជា ល្ខោន បញ្ចាំងកុន លេងល្បែងប្រជាប្រិយ និងរាំលេងជាដើម ដើម្បីឲ្យពលរដ្ឋចូលរួមពិធីបុណ្យឲ្យបានគ្រប់ៗគ្នា»។
បើយោងតាមឯកសារមហាបុរសខែ្មរក្នុងព្រះរាជកិច្ចដឹកនាំនៃហ្លួងព្រះសេ្តចកន បានធ្វើឲ្យវិស័យវប្បធម៌ សេដ្ឋកិច្ច សង្គមកិច្ច មានការអភិវឌ្ឍ ហើយបានបោះពុម្ពរូបិយវត្ថុប្រាក់ស្លឹង និងមានមាសសន្លឹកចរាចរលើកដំបូងបង្អស់ក្នុងប្រវត្តិសាស្ត្រកម្ពុជា។ ខណៈឯកសារប្រវតិ្តសាស្ត្រក៏បានសរសេរទៀតថា ព្រះបាទស្រីជេដ្ឋាទី ២ ឬហ្លួងព្រះស្ដេចកនទ្រង់បានឡើងសោយរាជ្យពីឆ្នាំ ១៥០៨ ឬឆ្នាំ ១៥១២ នៃគ.ស នៅឯទួលបាសាន ហើយទ្រង់បានសោយទិវង្គតនៅឆ្នាំ ១៥២៥ នៅឯបន្ទាយស្រឡប់ដូនតីពិជ័យព្រៃនគរ៕
វីដេអូ៖