ក្រុងម៉ានីល: ហ្វីលីពីនបានបើកឆ្នេររីសតដ៏ពេញនិយមបំផុតនៅលើដែនកោះ បូរ៉ាសេ ឡើងវិញ ដើម្បីស្វាគមន៍ភ្ញៀវទេសចរ នៅថ្ងៃសុក្រនេះ ក្រោយពីបិទសម្អាតភាពកខ្វក់រយៈពេល ៦ ខែ ដែលញាំញីដោយទេសចររាប់ឆ្នាំកន្លងមក។
ពេលរដ្ឋាភិបាលបានបើកដំណើរការឆ្នេរឡើងវិញ កោះបូរ៉ាសេ នឹងនៅសល់សណ្ឋាគារ និងភោជនីយដ្ឋានតិចជាងមុន ចំនួនភ្ញៀវត្រូវបានកំណត់ និងត្រូវអនុវត្ដច្បាប់តឹងរ៊ឹងដើម្បីរក្សាសម្រស់ធម្មជាតិឆ្នេរ។
វិធានការទាំងអស់នេះត្រូវបានធ្វើឡើង ដើម្បីការពារសម្រស់ផ្ទៃទឹកត្បូងមរកត និងឆ្នេរដ៏សក្បុស ដែលអន្ទងចិត្ដភ្ញៀវ ២ លាននាក់ក្នុង ១ ឆ្នាំ។
រដ្ឋមន្ដ្រីទេសចរណ៍ លោកស្រី បេណាដេត រ៉ុមូឡូ ពូយ៉ាត រំពឹងថា កោះបូរ៉ាសេដ៏ថ្មីសន្លាងនេះនឹងបើកទំព័រសករាជទេសចរណ៍ថ្មីក្នុងប្រទេសហ្វីលីពីន ដោយការបន្ថែមគោលដៅទេសចរណ៍ផ្សេងៗទៀត។
ឆ្នេរ ១០០០ ហិកតា ទទួលអ្នកគេងសំដិលថ្ងៃរហូតដល់ ៤ ម៉ឺននាក់ ដែលចាយប្រាក់ ១ ពាន់លានដុល្លារក្នុង ១ ឆ្នាំ។ តែវាក៏បានបន្សល់ទុកនូវភ្នំសំរាម ប្រព័ន្ធបង្ហូរទឹកលិចលង់ ខូចបរិស្ថានផងដែរ។
ស្ថិតក្រោមច្បាប់ថ្មីនេះ ពេលសម្អាតម្ដង ភ្ញៀវតែ ១៩ ២០០ នាក់នឹងត្រូវបានអនុញ្ញាតឲ្យឡើងដែនកោះដោយរដ្ឋាភិបាលចង់គ្រប់គ្រងចំនួនបន្ទប់សណ្ឋាគារឲ្យសមល្មម។ ភោជនីយដ្ឋាន និងជាពិសេសកាស៊ីណូជាច្រើនក៏ប្រឈមនឹងការបិទទ្វារផងដែរ៕