ក្រុងច្បារមន: ព្រះអង្គមិនមែនជាមគ្គុទេ្ទសក៍ទេសចរណ៍ ឬឆ្លងកាត់វគ្គបណ្ដុះបណ្ដាលពីសេវាកម្មនាំភ្ញៀវដើរកម្សាន្ដក្នុងព្រៃ និងឡើងភ្នំអ្វីសោះឡើយ។ ព្រះអង្គគ្រាន់តែជាព្រះសង្ឃព្រះពុទ្ធសាសនា ១ អង្គដែលគង់នៅតែអង្គឯងក្នុងអាស្រមឈ្មោះ វត្ដព្រៃមេត្ដាធម្មជាតិ ជាទីកន្លែងដែលតារាចម្រៀងមាស សុខសោភា ផ្ដួចផ្ដើមដាំកូនឈើ ១ ម៉ឺនដើម។
យ៉ាងណាមិញ ព្រះតេជគុណ ព្រំ ធម្មជាតិ បានក្លាយជាទីភ្នាក់ងារមគ្គុទេ្ទសក៍ទេសចរណ៍ដោយមិនដឹងព្រះកាយ និងអាស្រមអារាមដែលជាសំណង់ឈើមួយខ្នងតាំងព្រះពុទ្ធបដិមាតូចៗប៉ុន្មានអង្គ និងព្រះពុទ្ធរូបប៉ុន្មានផ្ទាំង តំណាងឲ្យទីឋានសក្ការៈសម្រាប់ពុទ្ធបរិស័ទគ្រប់រូបក៏ក្លាយជាមជ្ឈមណ្ឌល និងផ្ទះស្នាក់ផងដែរ។
ព្រះតេជគុណមានសង្ឃដីកាថា៖ «មានមនុស្សមកពីប្រទេសនេះ ប្រទេសនោះ ឆាតមកអាតា្ម ហើយអាត្មា សួរថាហេតុអ្វីបានដឹងថា អាត្មានៅទីនេះ? ពីព្រោះអាត្មាអត់បានវេបសាយអីទេ ក្រៅពីហ្វេសប៊ុក។ ពួកគេប្រាប់ថា ពួកគេដឹងតៗគ្នាថា ទីនេះមានទទួលសេវាកម្មជូនភ្ញៀវទេសចរដើរព្រៃ»។
ដោយមានជនបរទេសទាក់ទងស្វែងរកការណែនាំដើរព្រៃក្នុងតំបន់ភ្នំក្រវាញ និងភ្នំឱរ៉ាល់ចំពោះព្រះសង្ឃពុទ្ធសាសនាដែលមកតាំងអាស្រមក្នុងព្រៃនេះជារឿយៗតាមរយៈបណ្ដាញសង្គម ម្ចាស់គណនី «Metta Forest» បានឲ្យដឹងថា ពួកគេមកពីជុំវិញពិភពលោកទាំងតំបន់អឺរ៉ុប អាមេរិក និងអាស៊ី។
ព្រះសង្ឃស្រឡាញ់ធម្មជាតិអង្គនេះបានបន្ដថា៖ «ភ្ញៀវដែលទាក់ទាញអាត្មា មកពី around the world។ ពេលខ្លះអាត្មាសួរថាមកពីណា? គាត់ថា មកពីកាណាដា ខ្លះអាមេរិក អាហ្សង់ទីន ប្រេស៊ីល ហ្វាំងឡង់ នូវែលសេឡង់ អ៊ីចឹងទៅ។ អ្នកខ្លះមកអត់ស្គាល់លោកអត់ស្គាល់អី លេងជាមួយលោកដូចលេងជាមួយមិត្ដភក្ដិអ៊ីចឹងទៅ»។
កាលពីខែឧសភា ២០ ឆ្នាំមុន តេជគុណ ព្រំ ធម្មជាតិ មកសង់អាស្រមតូចមួយក្នុងព្រៃនៃភូមិពោធិ៍មាស ឃុំត្រពាំងជោរ ស្រុកឱរ៉ាល់ បំណងជួយថែរក្សាព្រៃឈើ និងស្វែងរកទីឋានស្ងប់ស្ងាត់សម្រាប់ការប្រណិប័តន៍ព្រះធម៌ព្រះសម្មាសម្ពុទ្ធ។
ទោះបីជាព្រះតេជគុណរមែងនិមន្ដត្រាច់ចរក្នុងព្រៃនៃតំបន់ភ្នំឱរ៉ាល់ ធ្លាក់ទៅដល់ជួរភ្នំក្រវាញស្ទើរតែសព្វជ្រុងជ្រោយយ៉ាងណាក៏ដោយ ក៏ព្រះសង្ឃព្រះពុទ្ធសាសនាអង្គនេះមិនបាននិមន្ដជូនភ្ញៀវទេសចរលុកព្រៃដោយផ្ទាល់នោះទេ ដោយព្រះអង្គបានបង្វែរកិច្ចការនេះឲ្យពលរដ្ឋក្នុងសហគមន៍ស្រឡាញ់ធម្មជាតិវិញ។
តេជគុណ ព្រំ ធម្មជាតិ មានសង្ឃដីកាថា៖ «អាត្មាឲ្យប្រជាពលរដ្ឋដែលមានចិត្ដឈឺឆ្អាលការពារព្រៃដើម្បីទទួលបន្ទុកជាអ្នកជូនភ្ញៀវទេសចរដើរព្រៃ តែបើញោមខ្ជិលៗ អាតា្មអត់ខ្វល់អីទេ។ អាត្មាជួយតែអ្នកចេះជួយអភិរក្សព្រៃ និងសត្វព្រៃនោះទេ»។
ព្រះសង្ឃដែលមកតាំងអាស្រមទីនេះ ២ ទសវត្សរ៍បានបន្ថែមថា៖ «អាត្មាបានណែនាំត្រួសៗថា តើពួកគេចង់ដើរទៅណា? បើក្រវាញ វាឆ្ងាយបន្ដិច ហើយវាស៊ីម៉ោង ស៊ីពេលវេលា និងស៊ីថវិកា។ បើទៅឱរ៉ាល់ ជិតជាង ហើយសេវាកម្មជូនត្រឹមតែ ២០ ម៉ឺនរៀលអីហ្នឹង។ តែបើទៅតំបន់ភ្នំក្រវាញ ពួកគេត្រូវចំណាយច្រើន»។
ចំពោះការប្រើប្រាស់ភាសា ព្រះសង្ឃពុទ្ធសាសនា ព្រំ ធម្មជាតិ មានសង្ឃដីកាដាក់ខ្លួនថា៖ «My English is from jungle។ អង់គ្លេសអាត្មាមកពីព្រៃទេ។ ញោមកុំប្រកាន់។ អាត្មារៀនពីភ្ញៀវវិញទេ។ បើចង់ដឹងចង់សួរអី ប្រើកាយវិការឲ្យគេប្រាប់ទៅ»។
ក្រៅពីទទួលការកក់របស់ភ្ញៀវ ព្រះតេជគុណដែលចេះឈឺឆ្អាលចំពោះបរិស្ថានអង្គនេះបានផ្ដល់ទីតាំងអាស្រមជាកន្លែងស្នាក់របស់ភ្ញៀវ និងបកប្រែភាសាខ្លះៗដល់អ្នកស្រុកភូមិជាអ្នកនាំ និងអ្នកដាំស្លផងដែរ។
ចំពោះនិស្សិត ពួកគេមកបោះតង់សម្រាកនៅក្នុងបរិវេណវត្ដ និងជិះគោយន្ដទៅលេងភ្នំតូចៗខាងក្រោយអាស្រមមើលទិដ្ឋភាពជួរភ្នំក្រវាញ រួចទៅលេងទឹកទំនប់ពាមល្វា។
ព្រះភិក្ខុ ព្រំ ធម្មជាតិ បានបន្ដថាចំពោះភ្ញៀវគេង ២ ទៅ ៣ យប់គឺពួកគេមកសម្រាកនៅអាស្រមមួយយប់ រួចព្រឹកឡើងធ្វើដំណើរបន្ដដូចជា នៅភ្នំឱរ៉ាល់ ១ ឬ ២ យប់។ ពួកគេធ្វើដំណើរពីភ្នំតាំងពីព្រឹកមកដល់អារាមវិញនៅរសៀលម៉ោង ៤ រួចក៏នាំគ្នាឡើងឡានត្រឡប់ទៅភ្នំពេញវិញ។
ព្រះសង្ឃដែលតែងតែនិមន្ដបិណ្ឌបាតសុំក្ដីសន្ដោសពីការសម្លាប់សត្វព្រៃធ្វើជាចំណីអាហារ ព្រំ ធម្មជាតិ ត្រូវបានចាត់ទុកជាព្រះសង្ឃអាចធ្វើការប្រាស្រ័យទាក់ទងជាមួយសត្វព្រៃដែលមានភាពស៊ាំនឹងវត្ដមានរបស់ព្រះអង្គ។
ព្រះតេជគុណបានបកស្រាយថា៖ «មិនមែនមកពីអាត្មាចេះភាសាសត្វអាចទាក់ទងជាមួយសត្វព្រៃ ដូចជា ក្ងោកនោះទេ។ តាមពិតវាជាការប្រើទំនាក់ទំនងតាមដួងចិត្ដអីទេញោម។ វាជារឿងធម្មជាតិទេ ហើយដោយសារអាត្មាមាននិស្ស័យជាមួយព្រះពុទ្ធសាសនាចំពោះការអធ្យាស្រ័យមនុស្សសត្វច្រើន»។
សម្រាប់ព័ត៌មានលម្អិតស្ដីពីកិច្ចការរបស់ព្រះសង្ឃ ព្រំ ធម្មជាតិ និងសាកសួរពីដំណើរកម្សាន្ដត្រាច់ចរតាមព្រៃភ្នំតូចធំនៃជួរភ្នំក្រវាញ និងឱរ៉ាល់អាចទាក់ទងព្រះតេជគុណផ្ទាល់តាមរយៈទូរស័ព្ទ ០១៥ ៣៥ ៤៥ ៤៥៕