ក្រុងប្រេស៊ីលីយ៉ា៖ ពន្លឺថ្ងៃចាប់ផ្ដើមជះរស្មីលើជួរភ្នំខានតាប្រ៊ីយ៉ា នៃប្រទេស អេស្ប៉ាញ ក្រុមអ្នកឡើងភ្នំបានទៅដល់កំពូលរួចជាស្រេចក្នុងបំណងទស្សនាខ្លាឃ្មុំសម្បុរត្នោត។
ដោយមានការអៀនខ្មាសដែលស្ថិតក្នុងបញ្ជីសត្វជិតផុតពូជរបស់អេស្ប៉ាញ ខ្លាឃ្មុំត្នោតខានតាប្រ៊ីយ៉ា បានបង្កើនចំនួនច្រើនក្នុងតំបន់ភ្នំភាគពាយព្យក្រោយពីស្ទើរតែផុតពូជ។
ហ្វើណាន់ដូ ហ្គារីតាហ្គូអ៊ីតា បានជួលផ្ទះ ១ ខ្នង នៅក្រុង La Peral ជាកំពែងក្នុងដែនជម្រកធម្មជាតិ Somiedo នៃតំបន់ Asturias ជាបុគ្គលដំបូងដែលបានថតហ្វូងខ្លាឃ្មុំដោយប្រើលេនស៍កាមេរ៉ាវែង។
វិស្សមកាលជាមួយក្រុមគ្រួសារ ផ្ទះជួលនោះមានចម្ងាយតែប៉ុន្មានម៉ែត្រពីភ្នំ ដែលក្រុមអ្នករង់ចាំមើលហ្វូងខ្លាឃ្មុំត្នោតដំឡើងតង់រៀងរាល់ថ្ងៃ ដោយបំពាក់ឧបករណ៍កែវយឺត និងកាមេរ៉ាថ្លៃៗ។ ពួកគេរង់ចាំឃ្លាំមើលខ្លាឃ្មុំចេញពីព្រៃ និងឡើងតាមជម្រាលភ្នំដើម្បីស៊ីផ្លែប៊ឺរី ដុះតាមគុម្ពព្រៃ។
ភាពភ្ញាក់ផ្អើលនឹងប្រទះភ្នែកឃើញខ្លាឃ្មុំ ១ ក្បាល សាស្ដ្រាចារ្យវ័យ ៥៣ ឆ្នាំរូបនេះបានលាន់មាត់ថា៖ «វាធ្វើឲ្យយើងមានអារម្មណ៍រំភើបរីករាយ និងមានសុភមង្គល។ លោកអ្នកនឹងមានអារម្មណ៍រំជើបរំជួល»។
ក្នុងទសវត្សរ៍ឆ្នាំ ១៩៨០ មិនសូវមានឱកាសបានឃើញខ្លាឃ្មុំត្នោតនៅតំបន់ជួរភ្នំខានតាប្រ៊ីយ៉ា ដែលលាតសន្ធឹងជាង ៤០០ គីឡូម៉ែត្រ តាមឆ្នេរភាគខាងជើងប្រទេស អេស្ប៉ាញ។
ហ្គីលលើម៉ូ ផាឡូមេរ៉ូ ប្រធានអង្គការ the Fundacion Oso Pardo (មូលនិធិខ្លាឃ្មុំត្នោត) បាននិយាយថា ធ្លាក់មកត្រឹមចន្លោះ ៦០ ឬ ៧០ ក្បាល ពួកវាប្រែក្លាយជាសត្វជិតផុតពូជ។ ប៉ុន្ដែក្រោយយុទ្ធនាការយ៉ាងសស្រោកសស្រាំរបស់ក្រុមអ្នកអភិរក្ស ចំនួនខ្លាឃ្មុំបានកើនឡើងគួរឲ្យកត់សម្គាល់ ហើយពេលនេះ តំបន់នោះមានខ្លាឃ្មុំចន្លោះពី ៣៣០ ទៅ ៣៥០ ក្បាល ដោយមានខ្លាឃ្មុំញីជាង ៤០ ក្បាលដែលបង្កើតកូនរៀងរាល់ឆ្នាំ។
អភិបាលក្រុង លោក បេឡាមីណូ ហ្វេមេនដេស បាននិយាយថា ខ្លាឃ្មុំបានក្លាយជាគោលដៅទេសចរណ៍ក្នុងតំបន់ព្រៃអភិរក្ស Somiedo ដែលពីមុនមិនធ្លាប់មានទេសចរមកឡើយ។
យ៉ាងណាមិញ បច្ចុប្បន្នសហគមន៍ដែលមានប្រជាជន ១ ៣០០ នាក់ បានបង្កើតហាង និងសណ្ឋាគារសម្រាប់ភ្ញៀវទេសចរចំនួន ៩០ ដែលមាន ១ ៤០០ បន្ទប់៕ AFP/HR