The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្យាន​រុក្ខជាតិ​ថ្នាំ​ចិន​ដ៏ធំបំផុត​ក្នុងលោក ១ ឆ្នាំ​មានភ្ញៀវ​ជាង ៥០ ម៉ឺននាក់

ឧទ្យាន​រុក្ខជាតិ​ថ្នាំ​ចិន​ដ៏ធំបំផុត​ក្នុងលោក ១ ឆ្នាំ​មានភ្ញៀវ​ជាង ៥០ ម៉ឺននាក់

Content image - Phnom Penh Post
ឧទ្យាន​រុក្ខជាតិ​ថ្នាំចិន​ដ៏ធំបំផុត​ក្នុងលោក​លាតសន្ធឹងលើ​ផ្ទៃ​ដី ២០២ ហិកតា ស្ថិត​នៅ​ខេត្ត​ក្វាង​ស៊ី ប្រទេសចិន​។ តាំង វីដា

ឧទ្យាន​រុក្ខជាតិ​ថ្នាំ​ចិន​ដ៏ធំបំផុត​ក្នុងលោក ១ ឆ្នាំ​មានភ្ញៀវ​ជាង ៥០ ម៉ឺននាក់

ខេត្តក្វាងស៊ី: ជាមួយ​​ប្រវត្តិសាស្រ្ដដ៏​យូរ​លង់​នៃ​ការ​ប្រើប្រាស់​រុក្ខជាតិ​ជាឱសថកែ​រោគនានា ប្រទេស​ចិនក្រៅពីមាន​ស្ត្រី​ស្រាវជ្រាវ​ថ្នាំ​បុរាណ​ជាប់​ពាន​រង្វាន់​ណូបែល​ ​ក៏​មានសួនដាំដុះ​ឱសថ​បុរាណ​ដ៏ធំ​គ្មានពីរ​ក្នុងលោក។

ទទួល​ស្គាល់​ដោយ​កំណត់ត្រា​ហ្គីនណេស​ពិភពលោក​ (Guinness World Records) ថាឧទ្យាន​រុក្ខជាតិឱសថ​ធំ​ជាង​គេ​បំផុត​ក្នុងលោក​ ​សួន​នេះមាន​ដើម​រុក្ខជាតិ​​ថ្នាំ​ជាង ៨៩០០ ប្រភេទ និង​បាន​កំពុងទាក់ទាញ​ភ្ញៀវ​ទេសចរ​ជាតិ​ និង​អន្ដរជាតិ​ចូលទស្សនា​ជាង ៥០ ម៉ឺននាក់ក្នុង ១ ឆ្នាំ។

​បង្កើតឡើង​តាំង​ពី​ឆ្នាំ ១៩៥៩ លើ​វិសាលភាព​ផ្ទៃដី ២០២ ហិកតា ឧទ្យាន​រុក្ខជាតិ​ឱសថ​​ក្វាងស៊ី (Guang Xi Botanical Garden of Medical Plants) ជាវិទ្យាស្ថាន​អភិវឌ្ឍន៍​រុក្ខជាតិ​ឱសថ​តំបន់​ស្វយ័តជនជាតិ​ជួង ជា​សាខា​វិទ្យាស្ថាន​បណ្ឌិត​សភា​វិទ្យាសាស្រ្ដ​ឱសថ​ចិន​ស្ថិតក្នុង​ក្រុង ណាននីង ខេត្ត​ក្វាងស៊ី​។

អនុប្រធាន​គ្រប់គ្រង​សួនច្បារ​រុក្ខជាតិ​ឱសថក្វាង​ស៊ី​លោកស្រី Liu Fang បាន​ឲ្យ​ដឹងថាសួនច្បារ​រុក្ខជាតិ​នេះ​ប្រមូលផ្តុំ​នូវ​រុក្ខជាតិ​ថ្នាំ​ចិន​ដ៏កម្រ​រាប់ពាន់​មុខ​ដែលជា​ផលិតផល​រុក្ខជាតិ​ឱសថក្នុងស្រុក​ និង​នាំចូល​ពី​បរទេស ​ហើយ​ក្នុងនោះក៏មាន​រុក្ខជាតិ​ខ្លះ​មាន​អាយុកាល​រាប់រយឆ្នាំ​។

Content image - Phnom Penh Post
រុក្ខជាតិថ្នាំ​ជាង ៨៩០០ ប្រភេទ​លូត​លាស់​នៅក្នុងឧទ្យាន​ថ្នាំចិន​ដ៏ធំ​។ តាំង វីដា

លោក​ស្រី​ថា ​រុក្ខជាតិ​ឱសថ​ទាំងនេះ​មាន​ផលប្រយោជន៍ក្នុងការ​ព្យាបាល​ជំងឺ​រាប់រយ​ប្រភេទ ហើយក៏​ជា​ថ្នាំ​បំប៉ន​សុខភាព​ផងដែរ។

យ៉ាងណាក៏ដោយ​លោកស្រី​បាន​ថ្លែងថា៖ «រុក្ខជាតិ​នៅទីនេះ​មិនត្រូវ​បានដាក់​លក់​នោះ​ទេវា​គ្រាន់តែ​ចំណុច​​ទេសចរណ៍ ហើយ​ជា​មន្ទីរពិសោធន៍​​តែប៉ុណ្ណោះ​។ យើង​មាន​ក្រុមហ៊ុន​ស្រាវជ្រាវ​មួ​យ​ល្បីឈ្មោះ​ដែល​​ទទួល​ផលិតនូវឱសថ​បុរាណ​ជីវសាស្រ្ដពី​ទីនេះ»។

បើតាម​អ្នកស្រី Liu Fang ក្រៅពី​ល្បី​ឈ្មោះ​ជា​សួន​រុក្ខជាតិ​ឱសថ​បុរាណ​ ចិន ​ធំជាងគេ​មួយ​នៅក្នុងពិភពលោក​ សួនច្បារ​រុក្ខជាតិ​ឱសថ​ក្វាងស៊ី​ក៏ជារមណីយដ្ឋាន​ធម្មជាតិ​កែច្នៃ​ទាក់ទាញ​ទេសចរ​ជាតិ​ និង​អន្តរជាតិ​ជាង ៥០ ម៉ឺន​នាក់​កាលពី​ឆ្នាំ ២០១៤ ឲ្យមក​កម្សាន្តដើមឈើ​តូច​ធំ វល្លិ ស្មៅ មើម និង​ផ្សិតជាដើម​ដែល​សុទ្ធ​សឹង​តែអាច​ប្រើ​ជា​ឱសថ​។

ក្រៅពីជាប់​កំណត់​ត្រា​ឯតទគ្គកម្ម​ពិភពលោក​កាលពី​ឆ្នាំ ២០១១ ​សួនច្បារ​​រុក្ខជាតិ​ឱសថ​ក្វាង​ស៊ី​ក៏ជាប់​ពានរង្វាន់​ជា​សួនច្បារ​រុក្ខជាតិ​ស្តង់ដារ​លើ​ពិភពលោកផង​ដែរ។

យោង​តាម​ម​គ្គុ​ទ្ទេសចរណ៍​នៅ​ទីនោះ​ ​តម្លៃ​សំបុត្រចូល​ទស្សនា​សួន​រុក្ខជាតិ​នេះ គឺ ២,៥០ ដុល្លារ សម្រាប់​ភ្ញៀវ​ម្នាក់ ប៉ុន្តែ​តម្លៃ​នេះ​អាច​កើន​ដល់ ១០ ដុល្លារ អំឡុងរដូវកាល​ដែល​មាន​ភ្ញៀវ​ទេសចរ​ច្រើន៕

អត្ថបទគួរចាប់អារម្មណ៍