.jpg)
ទិដ្ឋភាពសមុទ្រឈើពណ៌បៃតងខ្ចី នៅក្រុងដុងតៃ ខេត្តជៀងស៊ូ ត្រូវបានថតពីលើអាកាស។ AFP
ក្រុងប៉េកាំង: ឯក្រុងដុងតៃ ខេត្ដជៀងស៊ូភាគខាងកើតប្រទេសចិនដីព្រៃក្នុងឧទ្យានមនុស្សឈើលឿង (ឧទ្យានព្រៃហ៊ួងហៃ) មានទំហំព្រៃឈើជាង ៨០ ភាគរយ។ វាជាដែនដីអេកូឡូស៊ីសុទ្ធសាធ រំលេចទេសភាពស្រស់ត្រកាល និងរីសតកម្សាន្ដសម្រាប់អ្នកប្រាថ្នាស្រូបខ្យល់អាកាសបរិសុទ្ធ។
ភ្ញៀវទេសចរមានអារម្មណ៍ស្រស់ស្រាយ គេងស្ដាប់សំឡេងបក្សីគន់ផ្ទៃមេឃខៀវខ្ចីស្រូបខ្យល់អុកស៊ីហ្ស៊ែនសម្រាក និងសម្រាន្ដក្នុងបរិយាកាសត្រជាក់ល្ហឹមនាឱកាសវិស្សមកាល។
បុប្ផាផ្កាព្រៃចោលសម្រស់ និងជះក្លិនពិដោរឈ្ងុយឈ្ងប់ ដែលធ្វើឲ្យស្បើយអស់ភាពតានតឹងលើដែនដីឆ្នេរមហាសមុទ្រប៉ាស៊ីហ្វិកខាងលិច។ ព្រៃឈើដុះជាជួរលើផ្ទៃដីលាតសន្ធឹង ៣០០០ ហិកតារំលេចបានជាធម្មជាតិបៃតងស្រស់ជុំជិតដោយសល់តែស្ពានឈើ។
លោកអ្នកនឹងបានដឹងថាអារម្មណ៍ដ៏វិសេសនៅក្នុងសមុទ្រឈើនេះ ជាឱសថទិព្វសម្រាប់កែរោគនឿយហត់ កាត់បន្ថយស្ដ្រេសពីការងារប្រចាំថ្ងៃ និងភាពក្រេវក្រោធឲ្យស្គាល់តែពាក្យថា សម្រាក សម្រាក និងសម្រាក។
នេះជាទីកន្លែងលេងធម្មជាតិសម្រាប់កុមារជាជម្រើសដ៏ស័ក្ដិសមរបស់ក្រុមគ្រួសារជាមួយទិដ្ឋភាពឈើដុះជាជួរវាលស្មៅ និងស្ពានឈើ។ បុប្ផាផ្កាព្រៃចម្រុះពណ៌ដុះរាយប៉ាយគ្រប់ច្រកល្ហកក្នុងឧទ្យានបង្កើតបានជាកម្រាលព្រំផ្កាដ៏ស្រស់ស្អាតគ្រប់ពណ៌។
ទីស្នាក់ និងអង្គុយញ៉ាំអាហារកណ្ដាលសមុទ្រឈើ។ អីុនស្តាក្រាម
ឧទ្យានព្រៃហ៊ួងហៃជាជម្រករុក្ខជាតិ និងសត្វព្រៃជាច្រើនប្រភេទរួមទាំងបក្សី សត្វព្រៃ ផ្កា និងវាលស្មៅដែលជាទស្សនីយភាពគ្មាននៅក្នុងទីក្រុងឡើយ។ មានរុក្ខជាតិចម្រុះជាង ២៥០ ប្រភេទ បក្សី ២៤០ ប្រភេទ និងសត្វព្រៃជាង ៣០ ប្រភេទរស់នៅយ៉ាងសុខដុមក្នុងឧទ្យានសមុទ្រឈើ។
ពូជជីវសាស្ដ្រចម្រុះទាំងនេះត្រូវបានអភិរក្សយ៉ាងល្អ។ អ្នកខ្លះនិយាយថា ឧទ្យានសមុទ្រឈើលឿងនេះជាពិភពរបស់សត្វព្រៃ ពិភពរបស់បក្សី និងជាពិភពរបស់បុប្ផាផ្កាព្រៃ និងស្មៅផងដែរ។ ឧទ្យានព្រៃហ៊ួងហៃ ឬសមុទ្រឈើលឿងជាតំបន់អភិរក្សព្រៃធម្មជាតិដ៏ធំក្នុងចំណោម ៣ ដែលសម្បូរសត្វក្រៀលមកុដក្រហម ពពួកប្រើស និងដីសើមតាមឆ្នេរអតីតសហភាពសូវៀត។
តម្លៃសំបុត្រប្រមាណ ៥០ យន់ (៣១០០០ រៀល) និងថ្លៃជិះរថយន្ដអគ្គិសនីម្នាក់ ១០ យន់ (៦៣០០ រៀល)។ គូស្នេហ៍ ឬក្រុមគ្រួសារអាចជួលកង់ (កែបច្រើន) ជិះគយគន់ទេសភាពក្នុងតម្លៃ មួយម៉ោង ៣០ ទៅ ៥០ យន់៕HR
ពន្លឺសូរ្យសែងចាំងចន្លោះមែករុក្ខជាតិ នៅឧទ្យានឈើ។ អីុនស្តាក្រាម
