The Phnom Penh Post Search

Search form




Logo of Phnom Penh Post newspaper Phnom Penh Post - ឫស​ឈើ​បាន​ក្លាយ​ជា​ស្ពាន​តភ្ជាប់​ភូមិ​នៅ​កោះ

ឫស​ឈើ​បាន​ក្លាយ​ជា​ស្ពាន​តភ្ជាប់​ភូមិ​នៅ​កោះ

ឫស​ឈើ​បាន​ក្លាយ​ជា​ស្ពាន​តភ្ជាប់​ភូមិ​នៅ​កោះ

Content image - Phnom Penh Post

កោះស៊ូម៉ាត្រាៈ គេ​សង្កេត​ឃើញ​ថា​រយៈពេល​ប្រមាណ​ជា​ប៉ុន្មាន​រយ​ឆ្នាំ​ចុង​ក្រោយ​នេះ​មាន​រឿង​ចម្លែក​បាន​កើតឡើង​នៅ​ក្នុង​ភូមិ​តូច​ពីរ​របស់​ប្រទេស​ឥណ្ឌូនេស៊ី​ឯណោះ។ ភូមិ​ទាំង​នោះ​ស្ថិត​ភាគ​ខាង​លិច​នៃ​កោះ​ស៊ូម៉ាត្រា ដោយ​គេ​បាន​ឃើញ​មាន​ដើមឈើ​បាន​ចាក់​ឫស​ប្រទាក់ក្រឡា​គ្នា​បង្កើត​បាន​ជា​ស្ពាន​មួយ​មាន​ប្រវែង​៣០​ម៉ែត្រ​ឆ្លងកាត់​ទន្លេ​មួយ​ខណៈ​អ្នក​ភូមិ​ក៏​អាច​ប្រើ​វា​សម្រាប់​ឆ្លង​និង​ដឹក​ទំនិញ​នានា​បាន​ផង​ដែរ​។ បច្ចុប្បន្ន​ទី​នោះ​ត្រូវ​បាន​គេ​ស្គាល់​វា​ថា​«ចេមបាតាន អាកា (Jembatan Akar)»​ដែល​មាន​ការ​ទាក់ទាញ​អារម្មណ៍​ភ្ញៀវ​ទេសចរ​យ៉ាង​ខ្លាំង​ទៅ​ទស្សនា​។

130520_24a
130520_24a

យោងតាម​ព័ត៌មាន​អ្នក​ស្រុក​នោះ​បាន​ឲ្យ​ដឹង​ថា​ស្ពាន​ឫស​ឈើ​នេះ​មាន​កំណើត​ដំបូង​ឡើយ​នៅ​ឆ្នាំ​១៨៩០​ដោយ​គំនិត​របស់​លោក​ប៉ាគីស សូហាន ជា​គ្រូ​បង្រៀន​សាសនា​មូស្លីម​នៅ​ភូមិ​លូបួក ក្លែរ ហើយ​សិស្ស​របស់​លោក​ដែល​នៅ​ភូមិ​ពូលុត ពូលុតនា​ត្រើយ​ទន្លេ​ម្ខាង​ទៀត​ឯណោះ​មិន​សប្បាយ​ចិត្ត​នឹង​ការ​ធ្វើ​ដំណើរ​មក​រៀន​នូវ​គម្ពីរ​គូរ៉ាន​របស់​សាសនា​នោះ​ឡើយ​ព្រោះ​មាន​ទន្លេ​បាតាងបាយ៉ាង​ជា​ឧបសគ្គ។

លោក​គ្រូ​ក៏​បាន​សម្រេច​ចិត្ត​ដាំ​ដើមឈើ​ប្រភេទ​ចាវី ចាវី ចំនួន​ពីរ​ដើម​នៅ​ត្រើយ​ទន្លេ​ទាំង​សង​ខាង​ហើយ​លោក​ប្រើ​ដើម​ឫស្សី​ជា​គ្រោង​មួយ​សម្រាប់​ឲ្យ​ឫស​ឈើ​តោង​វារ​រហូត​បង្កើត​បាន​ជា​ស្ពាន​ឫស​ឈើ​ឆ្លងកាត់​ទន្លេ​នេះ​ឡើង។ តែ​នៅ​ពីរ​ទសវត្សរ៍​ដំបូង​វា​មិន​អាច​ឲ្យ​អ្នក​ភូមិ​និង​សិស្សានុសិស្ស​ធ្វើដំណើរ​ឬ​ដឹកទំនិញ​លើ​វា​បាន​ឡើយ។

លុះ​ដល់​រយៈពេល​២៦​ឆ្នាំ​ទើប​វា​បាន​លេច​ចេញ​ជា​រូបរាង​មួយ​ដ៏​គួរ​ស្មាន​មិន​ដល់​ដែល​គេ​ហៅ​វា​ថា​ស្ពាន​ចេមបាតាន អាកា។ ពី​មួយ​ឆ្នាំ​ទៅ​មួយ​ឆ្នាំ​ឫស​ឈើ​ទាំង​នោះ​បាន​ចាក់​ឫស​ប្រទាក់​គ្នា​បង្កើត​បាន​ជា​ស្ពាន​ដ៏​រឹងមាំ​មួយ​តែ​ម្តង។

ស្ពាន​យោង​ធ្វើ​ពី​ឫស​ឈើ​មាន​កម្ពស់​ជាង​បី​ម៉ែត្រ​ពី​ផ្ទៃ​ទឹក​ទន្លេ​បាតាងបាយ៉ាង​នោះ​ក៏​អាច​បង្ក​គ្រោះថ្នាក់​ផង​ដែរ​ពេល​គេ​ធ្វើ​ដំណើរ​នៅ​រដូវ​ភ្លៀង ព្រោះ​វា​អាច​រអិល​។ ដើម្បី​រក្សា​សុវត្ថិភាព​និង​ការពារ​កុំ​ឲ្យ​មាន​គ្រោះថ្នាក់​នោះ អ្នក​ភូមិ​បាន​យក​ឈើ​ក្តារ​ចង​ទប់​និង​សរសៃ​ដែក​ថែប​ចង​ភ្ជាប់​វា​ឲ្យ​រងមាំ​ជាង​មុន៕PR

អត្ថបទគួរចាប់អារម្មណ៍