.jpg)
កូរ៉េខាងត្បូងបាននិយាយនៅថ្ងៃចន្ទកន្លងទៅថា ខ្លួនមិនទាន់មានការសម្រេចចិត្តណាមួយអំពីសមយុទ្ធយោធារួមគ្នាជាមួយសហរដ្ឋអាមេរិកទេ ប៉ុន្តែការធ្វើបែបនេះក៏មិនគួរបង្កើតឱ្យមានភាពតានតឹងជាមួយកូរ៉េខាងជើងទេ ក្រោយប្រទេសនេះបានព្រមានកូរ៉េខាងត្បូងថា កុំឱ្យធ្វើសមយុទ្ធនេះចំពេលសញ្ញាទំនាក់ទំនងប្រទេសទាំង ២ កំពុងធ្លាក់ចុះ។
បើតាមឱ្យដឹងពីសារព័ត៌មាន Reuter កូរ៉េខាងត្បូង និងសហរដ្ឋអាមេរិកតែងតែធ្វើសមយុទ្ធយោធាជាទៀងទាត់ជាពិសេសនៅនិទាឃរដូវ និងរដូវក្តៅ ដែលកូរ៉េខាងជើងតែងតែព្រមានមិនឱ្យធ្វើ ដោយហៅសកម្មភាពនេះថា ជាការហាត់សមសម្រាប់សង្គ្រាម។
លោកស្រី គីម យ៉ូជុង បងប្អូនស្រីរបស់មេដឹកនាំកូរ៉េខាងជើង គីម ជុងអ៊ុន និងមន្រ្តីជាន់ខ្ពស់គណបក្សពលករ ដែលកំពុងកាន់អំណាចបានព្រមានទីក្រុងសេអ៊ូលកាលពីថ្ងៃអាទិត្យថា ការធ្វើសមយុទ្ធនេះ នឹងកាត់បន្ថយកិច្ចខិតខំប្រឹងប្រែងដើម្បីកសាងទំនាក់ទំនងឡើងវិញ។
ការព្រមានរបស់លោកស្រីបានកើតឡើងប៉ុន្មានថ្ងៃ បន្ទាប់ពីកូរ៉េទាំង ២ បានស្តារឡើងវិញនូវខ្សែ-ទូរស័ព្ទ បន្ទាន់នៅក្រុងព្យុងយ៉ាង ដែលបានផ្តាច់ខ្លួនកាលពី ១ ឆ្នាំមុន៕
