The Phnom Penh Post Search

Search form




Logo of Phnom Penh Post newspaper Phnom Penh Post - ម៉ី កល្យាន ៖ កម្ពុជា​ត្រូវការ​ការ​វិវត្ត​មិន​ត្រូវការ​បដិវត្ដន៍​ទេ

ម៉ី កល្យាន ៖ កម្ពុជា​ត្រូវការ​ការ​វិវត្ត​មិន​ត្រូវការ​បដិវត្ដន៍​ទេ

លោក បណ្ឌិត ម៉ី កល្យាន នា​ពេល​កន្លង​មក។
លោក បណ្ឌិត ម៉ី កល្យាន នា​ពេល​កន្លង​មក។ រូបថត សហការី

ម៉ី កល្យាន ៖ កម្ពុជា​ត្រូវការ​ការ​វិវត្ត​មិន​ត្រូវការ​បដិវត្ដន៍​ទេ

កាលពី​សប្ដាហ៍​មុន​លោក​ ម៉ី​ កល្យាន ទីប្រឹក្សា​ជាន់​ខ្ពស់​នៃ​ឧត្តម​ក្រុម​ប្រឹក្សា​សេដ្ឋកិច្ច​ជាតិ​បាន​​បង្ហាញ​ពី​​ជីវប្រវត្តិ​ការ​សិក្សា និង​កិច្ចការ​​ដែល​លោក​បាន​ប្រឡូក​​ជាង​បី​ទសវត្សរ៍​នៅ​បរទេស​មុន​នឹង​​​លោក​លា​ពី​ការងារ​ចូល​និវត្តន៍​កាលពី​ឆ្នាំ ២០០៨។

ក្នុង​សប្ដាហ៍​នេះ​លោក កល្យាន​ បាន​​​ផ្ដល់​នូវ​ទស្សនទាន​ខ្លះៗ​អំពី​របៀប​​ដឹកនាំ​ប្រទេស​ឆ្ពោះ​ទៅ​រក​ការ​អភិវឌ្ឍ​ឲ្យ​ដូច​ប្រទេស​​មួយ​ចំនួន​ក្នុង​តំបន់​។

ដោយ​បាន​ឆ្លង​កាត់ និង​រស់​ក្នុង​របប​ជាច្រើន​នៅ​ក្នុង​ប្រទេស​កម្ពុជា​ និង​បាន​ដឹង​ពី​​ដើម​ចម​ដែល​បណ្ដាល​​ឲ្យ​ប្រទេស​នេះ​មាន​ឈ្មោះ​ថា ​ជា​ប្រទេស​​ក្រីក្រ​មួយ​ក្នុង​លោក​នោះ​គឺ «​សង្គ្រាម​ផ្ទៃក្នុង» ដែល​​​​​​​កើត​ចេញ​ពី​​អំពើ​​អយុត្តិធម៌​សង្គម។

លោក ម៉ី កល្យាន ​មាន​ប្រសាសន៍​ថា​ភាព​អយុត្តិធម៌​សង្គម​តែងតែ​រារាំង​ដល់​​​​​​ការ​អភិវឌ្ឍ​គ្រប់​ទម្រង់ និង​ឈាន​ទៅ​រក​ភាព​អស្ថិរភាព​ និង​អសន្ដិសុខ​របស់​ប្រទេស។​​ លោក​បាន​ពន្យល់​ថា​ខ្មែរ​មាន​​ជម្រើស​ដ៏ល្អ​តែ​មួយ​​គត់​គឺ​អនុវត្ត​លទ្ធិប្រជាធិបតេយ្យ​ឲ្យ​បាន​ល្អ។​

លោក​បាន​បញ្ជាក់​​ថា៖ «​ប្រជាធិបតេយ្យ​មិនមែន​​ល្អ​ឥតខ្ចោះ​ទេ​តែ​វា​ល្អ​ជាង​របប​ផ្សេងៗ​ដោយ​ពលរដ្ឋ​មាន​ពេលវេលា​ពី ៤ ទៅ ៥ ឆ្នាំ​ម្ដង​ដើម្បី​បោះឆ្នោត​ជ្រើសរើស​តំណាង​​របស់​ខ្លួន​»។

លោក​បាន​បន្ថែម​ថា៖ «បើ​តាម​គំនិត​ខ្ញុំ ​ប្រទេស​ខ្មែរ​យើង​ត្រូវការ​តែ​របស់​​​​បី​យ៉ាង​​ទេ​គឺ​ស្ថិរភាព​ ការ​​អភិវឌ្ឍ និង​យុត្តិធម៌​សង្គម»។

ទាក់ទិន​នឹង​បញ្ហា​សេដ្ឋកិច្ច និង​​ការ​អភិវឌ្ឍ​ជាតិ​លោក ម៉ី កល្យាន បាន​មាន​ប្រសាសន៍​ថា​ក្រុម​អ្នក​វិនិយោគ​ជាតិ និង​អន្តរជាតិ​គេ​តែង​ចាំ​ឃ្លាំ​​មើល​​ពី​ស្ថានភាព​នយោបាយ​ក្នុង​ប្រទេស​​ដែល​ពួកគេ​​កំពុង​​វិនិយោគ ឬ​គ្រោង​នឹង​មក​​វិនិយោគ​​​ ដើម្បី​​​គិតគូរ​ពី​ផែនការ​វិនិយោគ​រយៈពេល​វែង​ ឬ​ខ្លី។

លោក​បន្ដ​ថា​កម្ពុជា​ខុស​​​ពី​វៀតណាម​ជា​ប្រទេស​កុម្មុយនីស្ត​ដែល​មាន​ប្រព័ន្ធ​នយោបាយ​​ដឹកនាំ​រដ្ឋ​​បែប​ផ្សេង។

កម្ពុជា​មាន​សំណាង​ល្អ​ដែល​រដ្ឋធម្មនុញ្ញ​បាន​កំណត់​យក​ជា​ប្រទេសប្រជាធិបតេយ្យ​ដែល​​ជា​កត្តា​ទាក់​ទាញ​អ្នក​អភិវឌ្ឍន៍ និង​វិនិយោគិន​ផង​​ដែរ។ ទោះ​ជា​យ៉ាង​ណា​កម្ពុជា​​ត្រូវ​សន្យា​ពី​​ការ​​​រក្សា​​បាន​នូវ​​ស្ថិរភាព​នយោបាយ​យូរ​អង្វែង​ដើម្បី​មាន​ឱកាស​ជំរុញ​​ការ​អភិវឌ្ឍ​​ និង​​គិតគូរ​ដល់​យុត្តិធម៌​សង្គម។

លោក បណ្ឌិត ម៉ី កល្យាន​ បាន​រំឭក​ថា​តាម​​ប្រវត្តិសាស្ដ្រ​កម្ពុជា​វិវាទ​ផ្ទៃ​​ក្នុង និង​​អយុត្តិធម៌​សង្គម​បាន​នាំ​ទៅ​​ដល់​សង្គ្រាម​ដោយ​​ផ្ដួល​ពី​របប​មួយ​ដោយ​របប​មួយ​ទៀត។​ ឧទាហរណ៍​ក្រុម​ ប៉ុល​ ពត បាន​​​វាយ​​ដណ្ដើម​អំណាច​ពី​សេនា​ប្រមុខ លន់ នល់ ​រីឯ លន់ នល់ ធ្វើ​រដ្ឋប្រហារ​ទម្លាក់​​​សម្ដេច​​ឪ​ព្រះនរោត្តម សីហនុ ជាដើម​។​​

លោក​ថ្លែង​ថា​៖ «ជាទូទៅ​ខ្ញុំ​យល់​​ថា​នៅ​មាន​បញ្ហា​​​ច្រើន​ក៏ប៉ុន្តែ​យើង​នាំ​គ្នា​ដោះស្រាយ​ទៅ​ត្រូវ​​​មាន​ភាព​យោគយល់​គ្នា​ធ្វើ​ម៉េច​ឲ្យ​មាន​ស្ថិរភាព​យូរ​អង្វែង។ ​ខ្ញុំ​ជឿ​ថា​យើង​អាច​ធ្វើ​បាន​​​បន្តិច​ម្តងៗ​ព្រោះ​យើង​បាន​ចាប់​​ផ្តើម​ពី​បាត​ដៃ​ទទេ»។ ​

លោក​​សេដ្ឋវិទូ​រូប​នេះ​បាន​​​បន្ថែម​ថា​៖ ​«ខ្ញុំ​ថា​ជាទូទៅ​យើង​​ [ ដើរ] ទៅ​តាម​ផ្លូវ​មួយ​ដែល​​ត្រឹមត្រូវ​ហើយ​ក៏​ប៉ុន្តែ​ចំពោះ​ល្បឿន​វា​អាស្រ័យ​ទៅ​លើ​ការ​គិត​ពិចារណា​ផ្សេងៗ​គ្នា។ យើង​ត្រូវ​តែ​ចាប់​ផ្តើម​គិត​បន្ថែម​​ទៀត​ដោយ​​ត្រូវ​ចាប់​ផ្តើម​ពី​បាត​​ [ក្រោម​] ​មក»។

នៅ​ពេល​​សួរ​ថា​ប្រសិន​​​បើ​​​គណបក្ស​ប្រជាជន​កម្ពុជា​របស់​លោក​នាយករដ្ឋមន្ដ្រី ហ៊ុន សែន ​ចាញ់​ឆ្នោត​តើ​កម្ពុជា​នឹង​​​មាន​​សង្គ្រាម​ឬ​យ៉ាង​ណា​​?លោក​ ម៉ី កល្យាន ​ហាក់​ដូចជា​ស្ទាក់ស្ទើរ​ក្នុង​ការ​​ឆ្លើយ​សំណួរ​នេះ​ ប៉ុន្ដែ​លោក​ថា​៖ ​«ពិបាក​និយាយ​ណាស់​មិនមែន​សម្ដេច​​ [ហ៊ុន សែន] ម្នាក់​លោក​ធ្វើឲ្យ​ប្រទេស​​ហ្នឹង​​មាន​​សន្តិសុខ​បាន​ទេ​ទាល់​តែ​​ទាំងអស់​គ្នា​រួបរួម​គ្នា​កុំ​ឲ្យ​​ឆេវឆាវ ហើយ​​ការ​​​បង្រួប​​បង្រួម​គ្នា​គឺជា​ផ្លូវ​ដ៏​ត្រឹមត្រូវ​ប៉ុន្តែ​យើង​ត្រូវ​សារ៉េ​ (Adjust) បន្តិច​​ម្តងៗ​ឲ្យ​ល្អ​ជាង​មុន»។

លោក​បន្ដ​ថា​បើ​យើង​​ឆេវឆាវ​ឡើង​ចុះៗ​អត់​​ចំណេញ​ទេ»។

លោក​បាន​បញ្ជាក់​ថា​៖ «យើង​ត្រូវ​ដើរ​​តាម​ផ្លូវ​ត្រូវ​ហើយ​យើង​ត្រូវ​ដោះស្រាយ​​តាម​បែប​​វិវត្តន៍ «Evolution» មិនមែន​បដិវត្តន៍​ «Revolution» ​ទេ។

លោក កល្យាន បាន​បន្ថែម​ថា៖ «​យើង​​​​ធ្វើ​ម្តង​បន្តិចៗ​មនុស្ស​​ធ្វើ​​មាន​​ខុស​មាន​ត្រូវ។​ បើ​មនុស្ស​ម្នាក់​ធ្វើ​ការងារ​មួយ​ខុស​មនុស្ស​ម្នាក់​ទៀត​មិន​ប្រាកដ​ថា​អត់​ធ្វើ​ខុស​ទេ។ ជួន​កាល​​គាត់​ខ្សោយ​ជាង​អ្នក​មុន​ផង។ អ៊ីចឹង​បាន​ខ្ញុំ​ថា​យើង​​ត្រូវ​ខិតខំ​បន្ត​ទៀត​ត្រូវ​បន្ត​​សមិទ្ធផល​របស់​យើង​បន្ត​ទៀត»។

ទាក់ទិន​​នឹង​​កិច្ចសហប្រតិបត្តិការ​​​ការបរទេស​លោក ម៊ី កល្យាន បាន​អបអរ​ចំពោះ​ភាព​ឆ្លាតវៃ​របស់​រាជរដ្ឋាភិបាល​កម្ពុជា​ដែល​បាន​​​​បញ្ចូល​​កម្ពុជា​ជា​សមាជិក​អង្គការ​អន្តរជាតិ​​នានា​ដូចជា​អាស៊ាន​​ ឬ​អង្គការ​ពាណិជ្ជកម្ម​ពិភពលោក​ព្រមទាំង​ការ​រាប់​អាន​​មិត្តភក្ដិ​បរទេស​ជាច្រើន​ក្នុង​​ពិភពលោក​ពិសេស​​ចិន អាមេរិក​ និង​​សិង្ហបុរី គឺជា​កត្តា​ចាំបាច់​ដើម្បី​​រក្សា​តុល្យភាព​ក្នុង​ការ​អភិវឌ្ឍ​។

លោក កល្យាន បាន​មាន​ប្រសាសន៍​ថា​៖ «ខ្ញុំ​ពុំមែន​ជា​អ្នក​បច្ចេកទេស​ខាង​នយោបាយ​ការទូត​ទេ​ប៉ុន្តែ​ជា​ធម្មតា​យើង​​មាន​មិត្ត​ច្រើន​ល្អ។ ប្រទេស​តូច​ដូច​យើង​នេះ​បើ​ដូច​ជំនាន់​សាមកុក​វិញ​យើង​ងាប់​បាត់​ហើយ​ក៏​ប៉ុន្តែ​សម័យ​នេះ​យើង​មាន​អាស៊ាន​នោះ​ជា​ការ​គិត​ពី​គោល​នយោបាយ​ជាតិ​​មួយ​»​។

លោក​បណ្ឌិត ម៉ី កល្យាន ​បាន​ផ្ដល់​ជា​ទស្សនទាន​ថា​ប្រទេស​ខ្លាំង​នានា​តែង​​​មាន​​គោល​នយោបាយ​​ការទូត​ល្អ​​ (Foreign Policy) ​ហើយ​​ប្រើប្រាស់​ការទូត​​នេះ​ដើម្បី​​ផលប្រយោជន៍​ជាតិ​គ្មាន​មនោសញ្ចេតនា​បុគ្គល​ទេ​ដោយ​​​​ត្រូវ​សិក្សា​វិភាគ​ឲ្យ​បាន​​ច្បាស់​លាស់​ក្នុង​ការ​សម្រេច​ចិត្ត​លើ​កិច្ចសហប្រតិបត្តិការ​ការបរទេស​។

ដោយ​បាន​អង្កេត​ពី​ភាព​ខ្លាំង​លើ​ប្រទេស​ជឿន​លឿន​មួយ​ចំនួន​នៅ​ទ្វីប​អាស៊ី និង​អឺរ៉ុប​ដែល​ភាព​ខ្លាំង​របស់​គេ​គឺ​ «យុវជន​ខ្លាំង​»​។ យុវជន និង​វិទ្យាសាស្រ្ដ​ជា​​អ្នក​ដើរ​តួ​សំខាន់​ក្នុង​ការ​ជំរុញ​​កំណើន​សេដ្ឋកិច្ច។ កម្លាំង​យុវជន​មាន​ថាមពល​​​ខ្លាំង​ណាស់​ខណៈ​ពិភពលោក​បើក​ចំហ​ដោយ​បច្ចេកវិទ្យា​ទំនើប។ សម្រាប់​​យុវជន​កម្ពុជា​លោក​​មាន​​សារ​ពីរ​ចំណុច​​ដែល​​ចង់​ចែក​​រំលែក​ទៅ​​កាន់​ពួកគេ​​​។ ទី ១-គឺ​យុវជន​​​ត្រូវ​នាំ​គ្នា​កសាង និង​​ថែរក្សា​ផ្ទះ​​ខ្លួនឯង​។«ទាល់​តែ​​យើង​​មាន​​ផ្ទះ​ហ្នឹង​ហើយ​ទើប​​កូនចៅ​​យើង​​មាន​ការ​​ជឿន​លឿន​​ទៅ​ទៀត​កុំ​នាំ​គ្នា​បំផ្លាញ​ផ្ទះ»។ ទី ២- យុវជន​ត្រូវ​​មាន​ភាព​ស្វិតស្វាញ​ខំ​រៀន​ឲ្យ​ខ្លាំង​ទាំង​ចំណេះ និង​ជំនាញ​។ ទាំងអស់​គ្នា​ត្រូវ​ចាំ​ថា​​៖ «អ្វីៗ​មិន​​​បាន​​​​​មក​យើង​ដោយ​ងាយស្រួល​ទេ​»។

លោក បណ្ឌិត កល្យាន ជា​ឪពុក​របស់​កូនស្រី​ម្នាក់​វ័យ ២៨ ឆ្នាំ​ហើយ​​​នាង​នឹង​​រៀបការ​នៅ​ខែ​សីហា​​ខាង​មុខ​នៅ​ប្រទេស​អង់គ្លេស។​

លោក​ពេញ​ចិត្ត​ចំពោះ​ជីវិត​ខ្លួនឯង​ដោយ​បាន​ពិពណ៌នា​ថា «​សមស្រប​ដែរ​​» ពីព្រោះ​បាន​ទៅ​​​​រៀន​នៅ​​បរទេស​ធ្វើការ​​នៅ​អង្គការ​សហប្រជាជាតិ (UN) និង​បាន​វិល​មក​ជួយ​កសាង​ប្រទេស​ដូច​បំណង​​»។ ជីវិត​ចុងក្រោយ​លោក​ចង់​ឃើញ​​​​ប្រទេស​ជឿន​លឿន​ជាង​​មុន​ចង់​ឲ្យ​ប្រជាជន​កម្ពុជា​ជាពិសេស​យុវវ័យ​មាន​ការ​​ចេះ​ដឹង​​ជាង​​មុន​ហើយ​ធ្វើ​យ៉ាង​ណា​​កុំ​ឲ្យ​​ប្រទេស​​​ត្រឡប់​ត្រឡិន​បន្ត​ទៀត៕

រាយការណ៍​បន្ថែម​ដោយ តាំង រីនិត្យ

អត្ថបទគួរចាប់អារម្មណ៍