ភ្នំពេញៈ ការកើនឡើងនៃសាលាមតេ្តយ្យឯកជននៅ ភ្នំពេញ ក្នុងរយៈពេលប៉ុន្មានឆ្នាំចុងក្រោយនេះបានផ្តល់ឱកាសឲ្យក្រុមហ៊ុនផ្គត់ផ្គង់សម្ភារក្មេងលេង Toys&Me ឈរជើងក្នុងទីផ្សារនៅប្រទេស កម្ពុជា។ Toys & Me កំពុងសម្លឹងឃើញការផ្លាស់ប្តូរឥរិយាបថរបស់ឱពុកម្តាយសម័យទំនើប។
លោក កេង ទិត្យភិរម្យ អគ្គនាយកហាងលក់សម្ភារក្មេងលេងឈានមុខគេ Toys & Me បានឲ្យដឹងថា ទីផ្សារក្នុងការផ្គត់ផ្គងសម្ភារក្មេងលេងនៅតែមានសក្តានុពលខ្លាំង។
តើក្រុមហ៊ុន Toys & Me ចាប់ផ្តើមដោយរបៀបណា?
Toys & Me កើតឡើងនៅឆ្នាំ ២០០៧ ជាពេលដែលសាលាមតេ្តយ្យឯកជនចាប់ផ្តើមច្រើន។ យើងឃើញថា កង្វះខាតនៃការផ្គត់ផ្គង់សម្ភារក្មេងលេងបែបអប់រំដល់សាលា មានការលំបាក។ សាលាទាំងនោះត្រូវទៅទិញពីប្រទេសជិតខាង ពេលនោះយើងផ្តោតតែលើសម្ភារក្មេងលេងបែបអប់រំប៉ុណ្ណោះ។ ចាប់តាំងពីឆ្នាំ ២០០៨ យើងចាប់ផ្តើមបន្ថែមសម្ភារក្មេងលេងនៅក្នុងហាងដើម្បីទាក់ទាញអតិថិជនជាឪពុកម្តាយ។ ពេលនោះយើងចាប់ផ្តើមពន្យល់ឪពុកម្តាយពីប្រយោជន៍នៃសម្ភារក្មេងលេងដែលជួយដល់ការលូតលាស់ និងប្រាជ្ញាស្មារតីពួកគេ។ ការខិតខំប្រឹងប្រែងរបស់យើងទទួលបានលទ្ធផលនៅពេលដែលការលក់កើនឡើង ១២០ ភាគរយក្នុងឆ្នាំ ២០១២ ហើយយើងរំពឹងថា នឹងកើនឡើងបន្ថែមទៀតនៅក្នុងឆ្នាំនេះ។
អ្វីនាំឲ្យមានកំណើននៅរយៈពេលប៉ុន្មានឆ្នាំចុងក្រោយនេះ?
យើងត្រូវក្រឡេកមើលមុនឆ្នាំ ២០០៧។ ឪពុកម្តាយពេលនោះគឺជាអ្នកដែលកើតនៅ ១៩៧៩ ហើយបានឆ្លងកាត់ការតស៊ូក្នុងជីវិតក្រោយរបប ប៉ុល ពត។ ដូច្នេះសម្ភារក្មេងលេង និយាយចំពោះពួកគាត់គឺជា ការខ្ជះខ្ជាយថវិកា។ ពួកគាត់មិនយល់ពីប្រយោជន៍របស់វា ដែលអាចជួយដល់ប្រាជ្ញា ស្មារតី របស់ក្មេងឡើយ។ នៅពេលដែលគាត់មកហាងយើងដំបូង គាត់ភ្ញាក់ផ្អើលនៅពេលដែលបានឃើញតម្លៃខ្ពស់ជាងនៅតាមផ្សារ។ យើងព្យាយាមពន្យល់គាត់ពីសារប្រយោជន៍នៃសម្ភារក្មេងលេងមានគុណភាព ដែលមិនផ្ទុកនូវសារធាតុពុលបង្កឲ្យប៉ះពាល់ដល់សុខភាពរបស់ក្មេង។ ក្រោយពីបានដឹងចំណុចទាំងនេះ ឪពុកម្តាយក្មេងគាត់ ហ៊ានចំណាយ។
Toys & Me មានដំណើរការយ៉ាងណាដែរនៅក្នុងទីផ្សារ?
នៅពេលឥឡូវនេះ យើងមិនមានការប្រកួតប្រជែងនោះទេ។ មានអ្នកចែកចាយផ្នែកសម្ភារក្មេងលេងនេះ ដែលលេចធ្លោមួយទៀតដែរនៅក្នុងស្រុក ប៉ុន្តែពួកយើងមានអតិថិជន ក្នុងរង្វង់ទីផ្សារផ្សេងគ្នា ដូច្នេះ មិនមែនជាបញ្ហានោះទេ។ ទីផ្សាររបស់យើងគឺសំដៅរកមហាជន មានន័យថានរណាក៏អាចចូលហាងរបស់យើង ហើយអាចចេញទៅវិញជាមួយសម្ភារខ្លះដែរ។ ទីនេះយើងរក្សាតម្លៃឲ្យមានលក្ខណៈប្រកួតប្រជែងប្រៀបធៀបតម្លៃ ក្នុងតំបន់ និងក្រៅប្រទេស។
មកដល់ពេលនេះ យើងផ្គត់ផ្គង់សម្ភារលេង ដល់សាលាឯកជនមិនតិចជាង ៥០ នោះទេ ហើយយើងមានហាងចែកចាយរហូតដល់ ៥ កន្លែង នៅក្នុងទីតាំងសំខាន់ៗ ក្នុងទីក្រុង ភ្នំពេញ។ យើងក៏មានគម្រោងពង្រីកហាងបន្ថែម ទាំងនៅខេត្ត និងទីក្រុង។ យើងចង់ក្លាយជាហាងចែកចាយដែលធំជាងគេបំផុតនៅ កម្ពុជា នាពេលអនាគត។
តើលោកមើលឃើញអនាគតទីផ្សារដូចម្តេចដែរ?
និយាយពីទីផ្សារយើងឃើញមានឱកាសច្រើន។ ទោះបីពេលនោះមានក្រុមហ៊ុនមកពីក្រៅក៏ត្រូវគិតថា Toys & Me ជាគូប្រជែងសំខាន់ដែរ ព្រោះយើងមានវត្តមានមុនពួកគេ៕
