The Phnom Penh Post Search

Search form

Logo of Phnom Penh Post newspaper Phnom Penh Post - ការ​អភិវឌ្ឍ​ទីផ្សារ​គណនេយ្យ​នៅ​ប្រទេស​កម្ពុជា




ការ​អភិវឌ្ឍ​ទីផ្សារ​គណនេយ្យ​នៅ​ប្រទេស​កម្ពុជា

ការ​អភិវឌ្ឍ​ទីផ្សារ​គណនេយ្យ​នៅ​ប្រទេស​កម្ពុជា

140117_13
លោកស្រី Helen Brand ប្រធានសមាគម ACCA សហការី

ភ្នំពេញៈ លោក​ស្រី Helen Brand ប្រធាន​សមាគម Chartered Certified Accountants (ACCA) បាន​មក​ដល់ កម្ពុជា ក្នុង​សប្តាហ៍​នេះ​ក្នុង​ដំណើរ​ទស្សនកិច្ច​រយៈ​ពេល​ពីរ​ថ្ងៃ​នៅ​កម្ពុជា​ក្នុង​បំណង​ពង្រឹង​ផ្នែក​គណនេយ្យ​របស់​កម្ពុជា។ លោក​ស្រី​រួម​ជាមួយ​នឹង​តំណាង​មក​ពី​ក្រុមប្រឹក្សា​គណនេយ្យ​ជាតិ (NAC) និង​វិទ្យាស្ថាន​គណនេយ្យករ​ជំនាញ និង​សវនករ​កម្ពុជា បាន​ចុះ​ហត្ថលេខា​លើ​អនុស្សរណៈ​នៃ​ការ​យោគ​យល់​គ្នា​ក្នុង​កិច្ច​ខិតខំ ប្រឹង​ប្រែង​ក្នុង​ការ​បង្កើន​ទំនាក់​ទំនង​អន្តរជាតិ និង​បណ្ដុះ​បណ្ដាល​នៅ​ក្នុង​ឧស្សាហកម្ម​គណនេយ្យ។

មាន​សមាជិក ACCA កម្ពុជា​ប៉ុន្មាន​នាក់​នៅ​ពេល​បច្ចុប្បន្ន ដែល​ពួក​គេ​នឹង​ទទួល​បាន​សញ្ញាបត្រ​បញ្ចប់​ការ​សិក្សា​ពី ACCA និង​អ្វី​ជា​ការ​ចាំ​បាច់​ក្នុង​ការ​បង្កើត​អាជីព​ផ្នែក​គណនេយ្យ​ឲ្យ បាន​កាន់​តែ​ល្អ​ប្រសើរ​នៅ កម្ពុជា?

មាន​សមាជិក ACCA ជិត ១០០ នាក់​នៅ​កម្ពុជា ហើយ​យើង​មាន​និស្សិត​ជិត ២ ០០០ នាក់​កំពុង​បន្ត​ការ​សិក្សា​នៅ ACCA។ ពួកគេ​ចេញ​មក​ពី​ប្រភព​និង​មាន​សញ្ញាបត្រ​ផ្សេងៗ​គ្នា ហើយ​ចង់​ធ្វើ​ការងារ​ក្នុង​ការ​អនុវត្ត​ជាក់ស្ដែង​ជា​សាធារណៈ វិស័យ​ឯកជន វិស័យ​សេវា​ហិរញ្ញវត្ថុ​ព្រម​ទាំង​វិស័យ​សាធារណៈ​ផង​ដែរ។ ពួក​គេ​នាំ​មក​នូវ​តួនាទី និង​អាជីព​វិជ្ជាជីវៈ​រៀងៗ​គ្នា ក្រម​សីលធម៌ និង​សមត្ថភាព​បច្ចេកទេស​ដែល​ការ​សិក្សា​នៅ ACCA បាន​ផ្ដល់​ឲ្យ​ពួក​គេ​ហើយ​អនុញ្ញាត​ឲ្យ​ពួក​គេ​រួម​ចំណែក​យ៉ាង​មាន​ប្រសិទ្ធភាព​ដល់​អង្គការ​របស់​ពួក​គេ និង​ទី​បំផុត​ដើម្បី​អភិវឌ្ឍ​សេដ្ឋកិច្ច​របស់​កម្ពុជា​កាន់​តែ​ទូលំ​ទូលាយ។ នៅ​កម្ពុជា​យើង​ជា​ដៃ​គូ​ជាមួយ​នឹង​វិទ្យាស្ថាន​គណនេយ្យករ​ជំនាញ​និង សវនករ​កម្ពុជា។ ក្នុង​រយៈ​ពេល​មួយ​ឆ្នាំ​កន្លង​មក យើង​បាន​មើល​ឃើញ​កំណើន​សមាជិក ៩ ភាគរយ ហើយ​កំណើន​និស្សិត ២ ភាគរយ​នៅ កម្ពុជា ប៉ុន្តែ​នៅ​មាន​ការងារ​ចំពោះ​មុខ​ច្រើន​ក្នុង​ការ​បង្កើត​មុខ​ជំនាញ និង​ការ​កសាង​សមត្ថភាព​នៅ​ក្នុង​ប្រទេស​នេះ។

តើ​ការ​ធ្វើ​ទស្សនកិច្ច​របស់​អ្នក​នៅ​កម្ពុជា​ជា​ចម្បង​ផ្ដោត​លើ​ការ​បង្កើន​ភាព​ជឿ​ទុក​ចិត្ត និង​ទំនុក​ចិត្ត​ក្នុង​ឧស្សាហកម្ម​គណនេយ្យ​កម្ពុជា​ឬ?

ការ​ធ្វើ​ទស្សនកិច្ច​របស់​ខ្ញុំ​គឺ​ដើម្បី​បង្ហាញ​ពី​ការ​ប្ដេជ្ញា​ចិត្ត​របស់ ACCA ចំពោះ​កម្ពុជា និង​ការ​អភិវឌ្ឍ​វិជ្ជាជីវៈ​គណនេយ្យ​នៅ​ទី​នេះ។ កម្ពុជា​នៅ​តែ​ជា​ដៃ​គូ​មួយ​ដ៏​សំខាន់​ក្នុង​ការ​អភិវឌ្ឍ​វិជ្ជាជីវៈ ពិសេស​នៅ​ក្នុង​ប្រទេស អាស៊ាន ហើយ​ខ្ញុំ​ចង់​មក​ធ្វើ​ទស្សនកិច្ច​នៅ​កម្ពុជា​ដើម្បី​ទទួល​បាន​ទស្សនៈ ផ្ទាល់​នៃ​ការ​អភិវឌ្ឍ​វិជ្ជាជីវៈ​នៅ​កម្ពុជា។

តើ​អ្នក​បាន​ផ្ដល់​ដំណោះស្រាយ​ដល់​រដ្ឋាភិបាល​កម្ពុជា​ស្ដី​ពី​ការ​បរាជ័យ​នៅ​ក្នុង​អភិបាល​កិច្ច​សាជីវកម្ម​ឬ​ទេ?

បញ្ហា​នេះ​គឺ​ត្រូវ​ធ្វើ​បាន​យ៉ាង​ល្អ​បំផុត​តាម​រយៈ​ការ​សម្លឹង​មើល​លើ​ពិភពលោក​ខណៈ​យើង​មើល​ឃើញ​ការ​គ្រប់​គ្រង​សាជីវកម្ម​ជា​បញ្ហា​ក្នុង​ស្រុក និង​ពិភពលោក។ បើ​សម្លឹង​មើល​ត្រឡប់​ទៅ​ក្រោយ​វិញ ACCA ជឿ​ជាក់​ថា ការ​គ្រប់​គ្រង​កិច្ច​សាជីវកម្ម​មិន​បាន​ល្អ​គឺ​ជា​ចំណុច​កណ្ដាល​នៃ​ការ​បរាជ័យ​ហិរញ្ញវត្ថុ​ក្នុង​ឆ្នាំ ២០០៧/២០០៨ ក្នុង​សេដ្ឋកិច្ច​លោក​ខាង​លិច។ យើង​បាន​ធ្វើ​ការ​ចាប់​តាំង​ពី​ពេល​នោះ​ក្នុង​ការ​ចែក​រំលែក​ការ​អនុវត្ត​ជាក់ស្ដែង​ល្អ​បំផុត​នៅ​ក្នុង​ការ​គ្រប់​គ្រង​ទាំង​នៅ​ក្នុង​ពាណិជ្ជកម្ម និង​វិស័យ​សាធារណៈ។

តើ​វិស័យ​គណនេយ្យ​កែលម្អ​ដូច​ម្ដេច​ដែល​ធ្វើ​ឲ្យ​សេដ្ឋកិច្ច​របស់ កម្ពុជា កាន់​តែ​មាន​ភាព​ល្អ​ប្រសើរ​ឡើង ពិសេស​ប្រព័ន្ធ​ពន្ធដា​របស់​ខ្លួន?

យើង​ជឿ​ជាក់​យ៉ាង​ខ្លាំង​ថា​គណនេយ្យ​មាន​គុណភាព​ខ្ពស់ របាយការណ៍​ហិរញ្ញវត្ថុ និង​ការ​ធ្វើ​សវនកម្ម​ដើរ​តួនាទី​ដ៏​សំខាន់​នៅ​ក្នុង​ដំណើរការ​សេដ្ឋកិច្ច។ ហេដ្ឋា​រចនា​សម្ព័ន្ធ​ហិរញ្ញវត្ថុ​មាន​គុណភាព​ល្អ​គឺ​មាន​សារៈ​សំខាន់​ក្នុង​ការ​អភិវឌ្ឍ​សេដ្ឋកិច្ច​ឲ្យ​មាន​ការ​រីក​ចម្រើន ដូចជា​ការ​លើក​កម្ពស់​ហេដ្ឋា​រចនា​សម្ព័ន្ធ​រូបវន្ត ដូចជា​ការ​កែ​លម្អ​ផ្លូវ​ថ្នល់ និង​ផ្លូវ​រថភ្លើង ខែ្ស​កាប​ទូរគមនាគមន៍ និង​សុវត្ថិភាព​ប្រព័ន្ធ​បង្ហូរ​ទឹក​និង​អគិ្គសនី។

មាន​ទំនាក់​ទំនង​ដ៏​សំខាន់​រវាង​ការ​អភិវឌ្ឍ​ហេដ្ឋា​រចនា​សម្ព័ន្ធ​រូបវន្ត និង​អភិបាលកិច្ច​ដ៏​រឹង​មាំ និង​របាយការណ៍​ហិរញ្ញវត្ថុ​ប្រកប​ដោយ​ប្រសិទ្ធភាព​នៅ​ក្នុង​ប្រទេស មាន​សេដ្ឋកិច្ច​កំពុង​រីក​ចម្រើន។ ឧទាហរណ៍ បើ​ធនធាន​បាន​វិនិយោគ​ក្នុង​ការ​ដាក់​បណ្ដាញ​ទឹក​នៅ​តាម​ទី​កន្លែង មិន​អាច​ធ្វើ​បាន​លទ្ធផល​ចុង​ក្រោយ​ជា​ធម្មតា​ក្លាយ​ជា​ផ្លូវ​គ្មាន​គោលដៅ​បាត់បង់​ថាមពល និង​ការ​ខូចខាត​ទូរគមនាគមន៍។ សម្រាប់​អ្នក​ដែល​វិនិយោគ​ខាង​ពាណិជ្ជកម្ម​ឯកជន​នៅ​ក្នុង​សេដ្ឋកិច្ច​ទាំង​នេះ​ក្របខណ្ឌ​របាយ​ការណ៍​សាជីវកម្ម​មាន​ភាព​ចាំ​បាច់។

តើ​ក្រម​សីលធម៌ និង​ជំនឿ​ទុក​ចិត្ត​ជា​បញ្ហា​សំខាន់​នៅ​កម្ពុជា​សម្រាប់ ACCA ឬ​ទេ? ហេតុ​អ្វី?

ក្រម​សីលធម៌​គឺជា​ធាតុ​ផ្សំ​ដ៏​សំខាន់​នៃ​ការ​ក្លាយ​ជា​សមាជិក​របស់ ACCA ដោយ​មិន​គិត​ពី​ទី​កន្លែង លក្ខណៈ​សម្បត្តិ​គ្រប់​គ្រាន់​របស់​មនុស្ស​នោះ​ទេ។ មុខ​វិជ្ជាជីវៈ និង​ក្រម​សីលធម៌​ត្រូវ​បាន​បង្កប់​ក្នុង​ការ​បញ្ជាក់​ពី​លក្ខណៈ​សម្បត្តិ និង​គ្រប់​ការ​ប្រឡង ប៉ុន្តែ​យើង​ក៏​មាន​មុខ​វិជ្ជាជីវៈ និង​មេរៀន​ក្រម​សីលធម៌​ដាច់​ដោយ​ឡែក​ពី​គ្នា ដែល​ត្រូវ​បាន​ផ្ដល់​ជូន​តាម​អ៊ីនធឺណិត​ដើម្បី​ធ្វើ​តេស្ដ​និស្សិត ស្ដី​ពី​សមត្ថភាព​ក្នុង​ការ​យល់​របស់​ពួកគេ​នៃ​ការ​វិនិច្ឆ័យ​ក្រម​សីលធម៌​ដែល​ពួកគេ​នឹង​ត្រូវ​តែ​ក្លាយ​ជា​គណនេយ្យករ​អាជីព។ វា​គឺជា​មេរៀន​ចាំ​បាច់​ដែល​ពួកគេ​ត្រូវ​តែ​បំពេញ​មុន​ពេល​ពួក​គេ អាច​ត្រូវ​បាន​អនុញ្ញាត​ឲ្យ​ចូល​ជា​សមាជិក។

យើង​ជឿ​ជាក់​ថា ក្រម​សីលធម៌​គឺជា​បញ្ហា​ដ៏​សំខាន់​ទូទាំង​ពិភពលោក។ វា​គឺជា​អ្វី​ដែល​តម្រូវ​ឲ្យ​មាន​ការ​ប្រុង​ប្រយ័ត្ន​ក្នុង​ការ​អនុវត្ត ពាណិជ្ជកម្ម​ដើម្បី​ធានា​ឲ្យ​ប្រាកដ​ថា នឹង​មាន​បញ្ហា​តិចតួច​បំផុត។

តើ​វិទ្យាស្ថាន ឬ​អង្គការ​អ្វី​ដែល​លោក​ស្រី​កំពុង​ធ្វើការ​នៅ​កម្ពុជា​ដើម្បី​ធានា ឲ្យ​បាន​ប្រាកដ​ថា ការ​អប់រំ និង​សមត្ថភាព​បាន​កែលម្អ​នៅ​ក្នុង​ឧស្សាហកម្ម​នេះ?

ACCA សហការ​ជិត​ស្និទ្ធ​ជាមួយ​ភាគី​ពាក់ព័ន្ធ​សំខាន់ៗ​ចម្រុះ​មួយ​ចំនួន​នៅ កម្ពុជា ក្នុង​ការ​គាំទ្រ​ដល់​ការ​អប់រំ និង​ក្រប​ខណ្ឌ​សមត្ថភាព​ហិរញ្ញវត្ថុ។ យើង​សហការ​យ៉ាង​ជិត​សិ្នទ្ធ​ជាមួយ​ក្រុម​ប្រឹក្សា​គណនេយ្យ​ជាតិ វិទ្យាស្ថាន​គណនេយ្យករ​ជំនាញ និង​សវនករ​កម្ពុជា អាជ្ញាធរ​សវនកម្ម​ជាតិ គណៈកម្មការ​មូលបត្រ​កម្ពុជា និង​អគ្គ​នាយកដ្ឋាន​ពន្ធដារ។ យើង​សហការ​យ៉ាង​ជិត​ស្និទ្ធ​ជាមួយ​នឹង​សាកល​វិទ្យាល័យ​ជាច្រើន​ព្រម​ទាំង​ភ្នាក់ងារ​ពហុភាគី​ដូចជា​ធនាគារ​អភិវឌ្ឍន៍​អាស៊ី​នៅ​កម្ពុជា​ផង​ដែរ។

តើ​លោក​ស្រី​ធ្វើ​ដូចម្ដេច​ក្នុង​ការ​កែលម្អ​ឱកាស​របស់​និស្សិត​កម្ពុជា​ក្នុង​ការ​ក្លាយ​ជា​សមាជិក​របស់ ACCA?

ACCA សហការ​យ៉ាង​ជិត​ស្និទ្ធ​ជាមួយ​ដៃ​គូ​ពីរ​នៅ កម្ពុជា គឺ CamEd Business School និង FTMS Global Cambodia។ យើង​ដឹក​នាំ​កម្មវិធី «បណ្ដុះ​បណ្ដាល​គ្រូ​បង្គោល» ជា​ទៀតទាត់ និង​កិច្ច​ប្រជុំ​ក្រៅ​ផ្លូវ​ការ​ជាមួយ​ដៃ​គូ ព្រម​ទាំង​សាកល​វិទ្យាល័យ​ជាច្រើន​ក្នុង​ការ​កែលម្អ​អត្រា​ប្រឡង ជាប់​សម្រាប់​និស្សិត​ក្នុង​ការ​បន្ត​ការ​សិក្សា​ថ្នាក់ ACCA និង​កែលម្អ​សមត្ថភាព​បង្រៀន​នៅ​ក្នុង​ប្រទេស​នេះ​ផង​ដែរ៕ PB

អត្ថបទគួរចាប់អារម្មណ៍