The Phnom Penh Post Search

Search form

Logo of Phnom Penh Post newspaper Phnom Penh Post - ការ​អភិវឌ្ឍ​វិស័យ ICT នៅ​កម្ពុជា​នៅ​មាន​កម្រិត




ការ​អភិវឌ្ឍ​វិស័យ ICT នៅ​កម្ពុជា​នៅ​មាន​កម្រិត

ការ​អភិវឌ្ឍ​វិស័យ ICT នៅ​កម្ពុជា​នៅ​មាន​កម្រិត

140103_13
លោក កេន ចាន់ថន ប្រធានសម្ព័ន្ធបច្ចេកវិទ្យាព័ត៌មានកម្ពុជា ហុង មិនា

ភ្នំពេញៈ វិស័យ​បច្ចេកវិទ្យា​សារគមនាគមន៍ និង​ព័ត៌មាន របស់​កម្ពុជា​នឹង​អាច​មាន​កំណើន​ឆាប់​រហ័ស​ក្នុង​រយៈ​ពេល​ប៉ុន្មាន​ឆ្នាំ​ខាង​មុខ​នេះ ប៉ុន្តែ​បញ្ហា​ប្រឈម​នៅ​តែ​មាន​ដដែល មុន​ពេល​ដែល​វិស័យ​នេះ​អាច​សម្រេច​បាន​សក្ដានុពល​ពេញ​លេញ​របស់​ខ្លួន​ក្នុង​ឆ្នាំ ២០២០។ នេះ​បើ​យោង​តាម​លោក កេន ចាន់ថន ប្រធាន​សម្ព័ន្ធ​បច្ចេកវិទ្យា​ព័ត៌មាន​កម្ពុជា។ លោក​បន្ត​ថា Koika ជា​អង្គការ​ប្រទេស កូរ៉េ​ខាង​ត្បូង កំពុង​សហការ​ជាមួយ​ក្រសួង ប្រៃសណីយ៍ និង​ទូរគមនាគមន៍ ស្ដី​ពី​សេចក្ដី​ព្រាង​ផែនការ​មេ ICT កម្ពុជា សម្រាប់​ឆ្នាំ ២០១៤ រហូត​ដល់​ឆ្នាំ ២០២០ ដែល​នឹង​ជំរុញ​វិស័យ​ទាំង​មូល​ឲ្យ​កាន់​តែ​ឆ្ពោះ​ទៅ​មុខ។

តើ​អ្វី​ដែល​ទប់ស្កាត់​មិន​ឲ្យ​វិស័យ​នេះ​សម្រេច​បាន​សក្ដានុពល​ពេញ​លេញ​របស់​ខ្លួន​នៅ​ពេល​នេះ?

ទីផ្សារ​របស់ ICT នៅ​កម្ពុជា​នៅ​តូច​នៅ​ឡើយ។ ប្រាក់​ចំណូល​សរុប​បាន​ពី​វិស័យ​នេះ​មាន​ប្រហែល ១០០ លាន​ដុល្លារ​អាមេរិក ប៉ុណ្ណោះ​បើ​ធៀប​នឹង​ប្រទេស​ផ្សេង​ទៀត​នៅ​ក្នុង​តំបន់​ដែល​មាន​ប្រាក់​ចំណូល​កើន​ឡើង​ដល់​រាប់​រយ​ពាន់​លាន​ដុល្លារ​អាមេរិក។ អ្នក​ប្រើ​ប្រាស់​អ៊ីនធឺណិត​មាន​ចំនួន​តិច​ធ្វើ​ឲ្យ​ថ្លៃ​ដើម​កាន់​តែ​ខ្ពស់។ ខ្ញុំ​គិត​ថា​នៅ​ពេល​អ្នក​ប្រើ​ប្រាស់​អ៊ីនធឺណិត​នៅ​កម្ពុជា​កើន​ឡើង​ដល់ ជាង ៣ លាន​នាក់ ពេល​នោះ​នឹង​មាន​សង្ឃឹម​ច្រើន​សម្រាប់​ក្រុមហ៊ុន​ឯកជន​ក្នុង​ការ​រក​បាន​ប្រាក់​ចំណូល​ក្នុង​វិនិយោគ​នៅ​ក្នុង​ឧស្សាហកម្ម ICT ។

បញ្ហា ផ្សេង​ទៀត​នោះ​គឺ​កម្ពុជា​នៅ​ខ្វះ​គោល​នយោបាយ និង​បទ​ប្បញ្ញត្តិ​ទាក់​ទង​ជាមួយ​វិស័យ ICT។ យើង​ត្រូវ​ការ​ច្បាប់​ដើម្បី​ការ​ការពារ​ផល​ប្រយោជន៍​រួម​សម្រាប់ វិស័យ​ឯកជន​នៅ​ក្នុង​វិស័យ​នេះ និង​ដើម្បី​ធានា​បាន​នូវ​ក្រម​សីលធម៌​របស់​អ្នក​ប្រើ​ប្រាស់​ដូច​ជា ច្បាប់​ទាក់ទង​នឹង​ទូរគមនាគមន៍ ការ​ធ្វើ​ពាណិជ្ជកម្ម​តាម​ប្រព័ន្ធ​អ៊ីនធឺណិត។ល។ ធនធាន​មនុស្ស និង​សមត្ថភាព​នៅ​ក្នុង​ជំនាញ​របស់ IT នៅ​មាន​កម្រិត។ ហេដ្ឋា​រចនា​សម្ព័ន្ធ​ដែល​រួម​មាន ឧបករណ៍​ទំនើប​បែប ឌីជីថល និង​ខ្សែ​កាប អ៊ីនធឺណិត ជាដើម ត្រូវ​បាន​កម្រិត​ដល់​អ្នក​ប្រើ​ប្រាស់​នៅ​ក្នុង​ទី​ក្រុង​នេះ​ប៉ុណ្ណោះ។

ឧស្សាហកម្ម​របស់ ICT មាន​សក្ដានុពល​ខ្ពស់​នៅ​ក្នុង​វិស័យ SME ដោយ​សារ​ពួក​គេ​នឹង​ត្រូវ​ការ​ក្នុង​ការ​កែលម្អ​ប្រព័ន្ធ​គ្រប់​គ្រង របស់​ពួក​គេ ប៉ុន្តែ​ចំណេះ​ដឹង​ពី​របៀប​ប្រើ​ប្រាស់​នៅ​មាន​កម្រិត​ហើយ​ផល​ប្រយោជន៍​ក្នុង​ការ​ប្រើ​ប្រាស់ ICT នៅ​លើ​ពាណិជ្ជកម្ម​របស់​ពួកគេ​ក៏​បាន​ធ្វើ​ឲ្យ​មាន​កំណើន​យឺត​ដល់​វិស័យ​នេះ​ផង​ដែរ។

តើ​វិស័យ ICT នៅ​កម្ពុជា​បច្ចុប្បន្ន​មាន​ស្ថានភាព​យ៉ាង​ណា​ដែរ?

ថ្មីៗ​នេះ​វិស័យ ITC មាន​ការ​អភិវឌ្ឍ​ច្រើន។ មាន​ក្រុមហ៊ុន​ជាច្រើន​កំពុង​បង្កើត​ឡើង​ដើម្បី​ផ្តល់​ផលិតផល ICT និង​សេវា​ដូចជា Software ការ​ប្រឹក្សា និង​កម្មវិធី​សម្រាប់​ទូរស័ព្ទ​ចល័ត និង​កុំព្យូទ័រ ព្រម​ទាំង​ផលិត​ជា Software សម្រាប់​អតិថិជន​នៅ​ក្រៅ​ប្រទេស​ផង​ដែរ។ ឧស្សាហកម្ម​នេះ​កំពុង​ផ្តល់​ឱកាស​ការងារ​កាន់​តែ​ច្រើន​សម្រាប់​និស្សិត IT។

អ្វី​ជា​ចំណាប់​អារម្មណ៍​នៅ​ទី​នេះ​គឺ​កម្ពុជា​កំពុង​ផ្ដោត​ទៅ​លើ​ការ​គ្រប់​គ្រង​តាម​ប្រព័ន្ធ​អ៊ីនធឺណិត​របស់​រាជ​រដ្ឋាភិបាល។ ការ​គ្រប់​គ្រង​នេះ​កំពុង​រៀបចំ​ផែន​ការ​ក្នុង​ការ​ធ្វើ​សមាហរណកម្ម ប្រព័ន្ធ ICT នៅ​តាម​ក្រសួង ស្ថាប័ន​គ្រប់​គ្រង​ទូទាំង​ប្រទេស​ដើម្បី​កែលម្អ​ប្រព័ន្ធ​គ្រប់​គ្រង ទិន្នន័យ ព្រម​ទាំង​សេវា​សាធារណៈ​ដែល​ជា​ឱកាស​ដ៏​ល្អ​មួយ​សម្រាប់​ក្រុមហ៊ុន​នៅ ក្នុង​ឧស្សាហកម្ម ICT ដើម្បី​ផ្ដល់​សេវាកម្ម និង​ផលិតផល​របស់​ពួក​គេ។

ទីផ្សារ​នេះ​នឹង​កើន​ឡើង​ដោយ​សារ​តែ​យុវវ័យ​កម្ពុជា​នៅ​ពេល​នេះ​អាច​អាន​ភាសា​អង់គ្លេស ហើយ​ចង់​ស្វែង​យល់​ពី​បច្ចេកវិទ្យា​ដែល​ត្រូវ​បាន​គេ​ផ្ដល់​ឲ្យ​ដូចជា ស្មាត​ហ្វូន និង​ការ​ប្រើ​ប្រាស់​អ៊ីនធឺណិត​យ៉ាង​ងាយ​ស្រួល។

តើ ICT មាន​តួនាទី​អ្វី​នៅ​ក្នុង​វិស័យ​សេដ្ឋកិច្ច?

ICT ជួយ​បង្កើន​ផលិតភាព និង​កំណើន​សេដ្ឋកិច្ច។ សម្រាប់​វិស័យ​ឯកជន វា​បង្កើន​ផលិតភាព​សន្សំ​ពេល​វេលា និង​កាត់​បន្ថយ​ការ​ចំណាយ​។ ដោយ​បំពាក់​ឧបករណ៍​ ICT ពួកគេ​ធ្វើ​ការងារ​បាន​កាន់​តែ​រហ័ស ទំនាក់​ទំនង​បាន​កាន់​តែ​ល្អ​ប្រសើរ​មាន​សុវត្ថិភាព​ក្នុង​ការ​គ្រប់​គ្រង​ទិន្នន័យ​ហើយ​ដំណើរការ​ទាំង​មូល​នឹង​កាន់​តែ​មាន​ប្រសិទ្ធភាព។ ICT អនុញ្ញាត ឲ្យ​វិស័យ​ឯកជន​ក្នុង​ការ​ឆ្ពោះ​ទៅ​មុខ​កាន់​តែ​លឿន​មាន​ន័យ​ថា វា​នឹង​ជួយ​បង្កើន​កំណើន​សេដ្ឋកិច្ច​ផង​ដែរ។

តើ​អ្វី​ជា​ការ​ព្យាករ​របស់​លោក​សម្រាប់ ICT ក្នុង​ឆ្នាំ ២០១៤?

វិស័យ ICT នឹង​ទទួល​បាន​កំណើន​ខ្ពស់​ក្នុង​អំឡុង​ពេល​ធ្វើ​សមាហរណកម្ម សេដ្ឋកិច្ច​អាស៊ាន​នា​ឆ្នាំ ២០១៥ ដោយ​សារ​តែ​ក្រុមហ៊ុន​ជាច្រើន​នឹង​អាច​ពង្រីក​អតិថិជន​ទូទាំង​ប្រទេស​ក្នុង​តំបន់​អាស៊ាន។ ខ្ញុំ​គិ​តថា​ឧស្សាហកម្ម ICT នៅ​កម្ពុជា​នឹង​អាច​សម្រេច​បាន សក្ដានុពល​ពេញ​លេញ​របស់​ខ្លួន​ក្នុង​ឆ្នាំ ២០២០ គឺ​នៅ​ពេល​ធនធាន​មនុស្ស ហេដ្ឋា​រចនា​សម្ព័ន្ធ និង​សមត្ថភាព​ភាសា​ត្រូវ​បាន​ធ្វើ​ឲ្យ​កាន់​តែ​ល្អ​ប្រសើរ​ឡើង។

មាន​ការ​ព្យាករ​ថា​នឹង​មាន​កង្វះ​អ្នក​ជំនាញ​ខាង IT ចំនួន ១ លាន​នាក់​នៅ​លើ​ពិភពលោក ហើយ​ការ​ខ្វះខាត​នេះ​នឹង​កើន​ឡើង​ដល់ ១០ លាន​នាក់​នៅ​ក្នុង​រយៈ ១០ ឆ្នាំ​ទៀត។

កម្ពុជា​គួរ​ពិចារណា​ពី​ការ​វិនិយោគ​ខាង​ធនធាន​មនុស្ស និង​ហេដ្ឋា​រចនា​សម្ព័ន្ធ​ខាង​វិស័យ ICT ហើយ​សេវា​នេះ​ជា​ផ្នែក​មួយ​នៃ​ការ​ធ្វើ​ពិពិធកម្ម​ដើម្បី​ជំរុញ​សេដ្ឋកិច្ច​ជាជាង​ការ​ពឹង​ផ្អែក​លើ​វិស័យ​សម្លៀក​បំពាក់ និង​ស្បែក​ជើង ដែល​ពោរ​ពេញ​ទៅ​ដោយ​ហានិភ័យ។

ដើម្បី​បង្កើត​ក្រុមហ៊ុន ICT គេ​ត្រូវ​ការ​ចំណាយ​តិច​ជាង​ការ​បង្កើត​រោងចក្រ​កាត់ដេរ​ដល់​ទៅ ៧០០ ដង ដោយ​គេ​គ្រាន់​តែ​ត្រូវ​ការ​អ្នក​ដែល​មាន​ជំនាញ​ធ្វើ​ការ​ខាង ICT ប៉ុណ្ណោះ។ Software គឺជា​ផលិតផល​ដែល​មាន​តម្លៃ​ខ្ពស់ និង​អាច​ធ្វើ​ឲ្យ​សេដ្ឋកិច្ច​កើន​ឡើង​បាន​យ៉ាង​រហ័ស។

តើ​ធ្វើ​យ៉ាង​ណា​ដើម្បី​ឲ្យ​វិស័យ​នេះ​រីក​ចម្រើន​បន្ថែម​ទៀត?

អ្វី ដែល​ល្អ​នោះ​គឺ​កម្ពុជា មាន​អ្នក​ជំនាញ​ផ្នែក​ព័ត៌មានវិទ្យា​ក្មេងៗ​ដែល​មាន​ទេព​កោសល្យ​កំពុង តែ​បង្កើត​ក្រុម​ដោយ​ខ្លួន​ឯង​សរសេរ Software លក់​ដល់​ក្រុមហ៊ុន​តូចៗ។ ពួក​គេ​មាន​គំនិត​ផ្តួច​ផ្តើម​មាន​ទាំង​ជំនាញ ប៉ុន្តែ​ខ្វះ​ប្រភព​ទុន​ដើម្បី​បង្កើត​ជា​ស្ថាប័ន​មួយ​ដែល​អាច​ទទួល​ធ្វើ​គម្រោង​ធំៗ។​អ្វី​ដែល​យើង​ត្រូវ​ការ​ពេល​នេះ​គឺ​ការ​គាំទ្រ​ពី​រាជ​រដ្ឋាភិបាល។ ការ​បោះទុន​លើ​ហេដ្ឋា​រចនា​សម្ព័ន្ធ​ប្រសើរ​ជាង​នេះ មាន​តម្លៃ​ថ្លៃ ដូច្នេះ​គួរ​តែ​មាន​ការ​ប្រមូល​ទុន​រួម​គ្នា​ពី​អ្នក​ដែល​ពាក់​ព័ន្ធ​ដើម្បី ឲ្យ​ការ​បណ្តាក់​ទុន​ក្នុង​វិស័យ​នេះ​ទទួល​បាន​ប្រាក់​ចំណេញ៕

អត្ថបទគួរចាប់អារម្មណ៍