ខេត្តព្រះសីហនុៈ ក្រុមហ៊ុន ម៉ុង ឫទ្ធី គ្រុប ដែលទទួលសិទ្ធិវិនិយោគលើគម្រោងដីសម្បទានសេដ្ឋកិច្ចពីរដ្ឋាភិបាលប្រមាណជិត ២ ម៉ឺនហិកតា បានពង្រីកទំហំប្រតិបត្តិការអាជីវកម្មរបស់ខ្លួនលើវិស័យ កសិកម្ម ជាបន្តបន្ទាប់ពីមួយឆ្នាំទៅមួយឆ្នាំ។ ផ្តើមចេញពីដំណាំដូងប្រេង ក្រុមហ៊ុនបានពង្រីកផ្ទៃដីដាំដុះលើប្រភេទដំណាំកៅស៊ូកសិដ្ឋានចិញ្ចឹមជ្រូក ផ្ទៃដីដាំដុះស្រូវ និង ដំណាំស្វាយជាដើម។ ខណៈការដាំដុះដំណាំស្វាយកំពុងកើនឡើងនៅ កម្ពុជា ក្រុមហ៊ុនបានសម្រេចនាពេលថ្មីនេះវិនិយោគលើរោងចក្រវេចខ្ចប់ស្វាយដើម្បីនាំចេញទៅលក់នៅទីផ្សារអន្តរជាតិ។
អ្នកយកព័ត៌មាន ភ្នំពេញ ប៉ុស្តិ៍ បានជួបជាមួយលោក ម៉ុង ចាន់ថុល កូនប្រុសលោក ម៉ុង ឫទ្ធី ដែលជាអ្នកគ្រប់គ្រងគម្រោងកសិដ្ឋានចិញ្ចឹមជ្រូក និងដំណាំស្វាយរបស់ក្រុមហ៊ុនដើម្បីសាកសួរពីព័ត៌មាននានា ទាក់ទងនឹងគម្រោងវិនិយោគលើរោងចក្រថ្មីនេះ។
ដំណើរការសាងសង់រោងចក្រវេចខ្ចប់ស្វាយរបស់ក្រុមហ៊ុនលោកមានការវិវឌ្ឍដល់ណាហើយមកទល់ពេលនេះ?
យើងបានចុះកិច្ចព្រមព្រៀងជាមួយដៃគូវិនិយោគរបស់យើងរួចហើយ ដើម្បីដំណើរការរោងចក្រវេចខ្ចប់ស្វាយដើម្បីនាំចេញនេះ។ គាត់មកពីខាង សិង្ហបុរី ហើយគាត់ជាអ្នកសហការផ្តល់បច្ចេកទេស និងស្វែងរកទីផ្សារសម្រាប់គម្រោងនេះខាងយើងជាអ្នកសម្របសម្រួលប្រមូលទិញនិងផ្គត់ផ្គង់ស្វាយ។ យើងកំពុងដំណើរការសាងសង់រោងចក្រ និងបំពាក់ឧបករណ៍បច្ចេកទេសនានាដើម្បីដំណើរការរោងចក្រ។ រោងចក្រនេះវិនិយោគដោយមានទឹកប្រាក់ប្រមាណ ២ លានដុល្លារគឺធ្វើឡើងដើម្បីវេចខ្ចប់ស្វាយនាំចេញទៅលក់លើទីផ្សារអន្តរជាតិ។ បើតាមគម្រោងរោងចក្រនឹងបញ្ចប់រួចរាល់នៅចុងឆ្នាំនេះហើយនៅឆ្នាំដំបូងយើងគ្រោងនឹងនាំចេញស្វាយប្រមាណ ៤ ០០០ តោនមុននឹងពង្រីកបន្តទៀតនៅឆ្នាំបន្ទាប់។
តើរោងចក្រនេះនឹងវេចខ្ចប់តែស្វាយដែលក្រុមហ៊ុនលោកដាំទេ ឬក៏នឹងប្រមូលទិញពីកសិករដែរ?
យើងនឹងទិញពីកសិករដែរ ប៉ុន្តែវាអាស្រ័យលើទំហំ និងតម្រូវការនៅលើទីផ្សារជាក់ស្តែង។ ជាទូទៅកសិករយើងភាគច្រើនពួកគាត់ដាំស្វាយ «កែវរមៀត»។ ដូច្នេះប្រសិនបើទីផ្សារគេគាំទ្រស្វាយកែវរមៀត យើងនឹងទិញស្វាយនេះពីកសិករដើម្បីវេចខ្ចប់នាំចេញ។ យើងនៅមិនទាន់មានពូជស្វាយដែលទីផ្សារក្រៅប្រទេសគេស្គាល់ខ្លាំងនៅឡើយទេ តែសម្រាប់ប្រទេសដទៃដូចជា តៃវ៉ាន់ ហ្វីលីពីន ថៃ ម៉ិកស៊ិក វិញ គេមានពូជស្វាយដែលត្រូវបានទទួលស្គាល់ជាអន្តរជាតិអាចនាំចេញយកទៅលក់នៅក្រៅប្រទេសបានប្រាក់កម្រៃច្រើនជាងការលក់នៅក្នុងស្រុក។ មានការខុសប្លែកបន្តិចដោយសារថា ទីផ្សារអន្តរជាតិគេពេញនិយមស្វាយទុំខណៈការលក់ស្វាយកែវរមៀតរបស់យើងកន្លងមកគឺស្វាយចាស់។
វាជាដំណឹងល្អមួយព្រោះថា មានកសិករជាច្រើនបានបង្កើនផ្ទៃដីដាំដុះដំណាំស្វាយនៅប៉ុន្មានឆ្នាំចុងក្រោយនេះ ហើយភាគច្រើនជាប្រភេទស្វាយកែវរមៀត។ កសិករជាច្រើនក៏បានលក់ឲ្យឈ្មួញក្នុងស្រុកនិងក្រៅស្រុកសម្រាប់នាំចេញរួចហើយដែរតើខុសគ្នាយ៉ាងដូចម្តេចពីឈ្មួញដែលធ្លាប់មានកន្លងមក?
បើតាមខ្ញុំដឹង ការកើនឡើងផ្ទៃដីដាំដុះស្វាយកែវរមៀតនាពេលនេះ គឺដោយសារកសិករឃើញមានទីផ្សារ និងមានតម្រូវការពីខាង វៀតណាម។ យើងក៏មិនមានទិន្នន័យពីផលិតកម្មដែលយើងមានជាក់ស្តែងនិងទំហំតម្រូវការជាក់ស្តែងពីខាងឈ្មួញ វៀតណាម ដែរ។ ដូច្នេះសំណួរសួរថា តើវាមានអីកើតឡើងប្រសិនបើខាង វៀតណាម គេឈប់ទិញ? តើយើងនឹងលក់ឲ្យអ្នកណានៅពេលនោះ? ដូច្នេះការកើនឡើងនៃផ្ទៃដីដាំដុះស្វាយកែវរមៀត គឺថាអ្វីៗមិនទាន់ប្រាកដប្រជានៅឡើយទេ។ យើងត្រូវការរោងចក្រវេចខ្ចប់ព្រោះថា ស្វាយដែលយើងប្រមូលពីកសិករ យើងមិនអាចនាំចេញដោយផ្ទាល់ទេ។
យើងត្រូវលាងសម្អាតមេរោគ សម្អាតជាតិគីមីជាមុនសិន។ យើងត្រូវធ្វើតាមលក្ខខណ្ឌតម្រូវទីផ្សារដែលគេយកចិត្តទុកដាក់ខាងផ្នែកភូតគាមអនាម័យ សុវត្ថិភាពចំណីអាហារ និងស្តង់ដារវេចខ្ចប់ត្រឹមត្រូវ។ ម្យ៉ាងទៀតស្វាយដែលនាំចេញត្រូវបែងចែកតាមទំហំស្មើៗគ្នា។ ស្វាយកែវរមៀតដែលកសិករយើងមានគឺមានជាតិគីមីច្រើន។ ដើម្បីទទួលបានស្ថិរភាពតម្លៃ និងទីផ្សារ ការដាំស្វាយដោយរើសពូជស្វាយដែលមានគុណភាពល្អគឺមានសារៈសំខាន់ណាស់។ ស្វាយ កែវចិន ស្វាយទុរេន ជាដើមមានស្ថិរភាពទីផ្សារជាង ព្រោះវាជាប្រភេទស្វាយដែលមានគុណភាពខ្ពស់របស់ខ្មែរ ហើយវាមានរសជាតិឆ្ងាញ់ងាយលក់ចេញ។ កន្លងមកនេះក្រុមហ៊ុន ម៉ុង ឫទ្ធី គ្រុប បាននាំចូលពូជស្វាយ «Irwin» មកដាំនៅដីចម្ការរបស់ក្រុមហ៊ុននៅ ភូមិកែវផុស ឃុំកែវផុស ស្រុកស្ទឹងហាវ ដោយសារមានតម្លៃខ្ពស់នៅទីផ្សារ ប្រទេសកូរ៉េ ជប៉ុន និង ហុងកុង ជាដើម ហើយយើងសង្ឃឹមថា វាមានស្ថិរភាពតម្លៃ និងទីផ្សារជាង។
តើរហូតដល់ពេលនេះក្រុមហ៊ុនលោកមានផលិតកម្មទំហំប៉ុនណាដែរ ទាក់ទងស្វាយ Irwin នេះ?
ពូជស្វាយ Irwin គឺជាស្វាយរបស់ តៃវ៉ាន់ ដែលពេញនិយមពីអតិថិជននៅតាមហាងទំនើបនានា ហុងកុង ជប៉ុន កូរ៉េ និង សិង្ហបុរី ជាដើម។ ពេលនេះយើងបានដាំប្រមាណ ៨ ម៉ឺនដើមរួចហើយ ហើយនឹងពង្រីកបន្ថែម ៥ ម៉ឺនដើមទៀត។ យើងក៏គ្រោងនឹងផ្តល់ជូនពូជនេះទៅកសិករផងដែរនាពេលខាងមុខនៅពេលដែលយើងបានដាំគ្រប់គ្រាន់ហើយ៕
