The Phnom Penh Post Search

Search form

Logo of Phnom Penh Post newspaper Phnom Penh Post - កំណើន​សេដ្ឋកិច្ច​កម្ពុជា​និង​តំបន់​នៅ​តែ​ល្អ​ទោះ​មាន​វិបត្តិ




កំណើន​សេដ្ឋកិច្ច​កម្ពុជា​និង​តំបន់​នៅ​តែ​ល្អ​ទោះ​មាន​វិបត្តិ

កំណើន​សេដ្ឋកិច្ច​កម្ពុជា​និង​តំបន់​នៅ​តែ​ល្អ​ទោះ​មាន​វិបត្តិ

121120_12
Naoyuki Shinohara អគ្គនាយករងមូលនិធិរូបិយវត្ថុអន្តរជាតិ ម៉ៃ វីរៈ

ភ្នំពេញៈ លោក Naoyuki Shinohara​អគ្គ​នាយក​រង​មូល​និធិ​រូបិយវត្ថុ​អន្តរជាតិ​(IFM )​បាន​លើក​ឡើង​អំពី​បញ្ហា​មួយ​ចំនួន​ទាក់​ទង​នឹង​កំណើន​សេដ្ឋកិច្ច​នៅ​អាស៊ី និង​ឱកាស​រីក​ចម្រើន​និង​បញ្ហា​មួយ​ចំនួន​របស់​កម្ពុជា។

លោក​យល់​យ៉ាង​ណា​ចំពោះ​ទស្សន​វិស័យ​កំណើន​របស់​អាស៊ី ទាំង​ហានិភ័យ​ខាង​ក្នុង និង​ខាង​ក្រៅ ក្នុង​អំឡុង​សេដ្ឋកិច្ច​ពិភព​លោក​មិន​ច្បាស់​លាស់​នោះ​?

កំណើន​សេដ្ឋកិច្ច​អាស៊ី​ខ្លួន​ឯង ដំណើរ​ការ​ទៅ​បាន​ល្អ។ ការ​ពិត​អត្រា​កំណើន បាន​ថយ​ចុះ ចាប់​តាំង​ពី​មាន​វិបត្តិ​ហិរញ្ញវត្ថុ​ពិភព​លោក​មក។ ម្យ៉ាង​វិញ​ទៀត អាស៊ី មាន​កំណើន​ជិត​៨,៥​ភាគ​រយ។ ប្រទេស​អភិវឌ្ឍន៍​កំពុង​អភិវឌ្ឍន៍ និង​ប្រទេស​ផ្សេង​ៗ​ទៀត នៅ​អាស៊ី រួម​មាន​ទាំង​ប្រទេស​ទាំង​អស់​ជា​សមាជិក​អាស៊ាន មាន​កំណើន​សេដ្ឋកិច្ច​ប្រហែល​៨,៥​ភាគ​រយ កាល​ពី​ឆ្នាំ​២០១០ ប៉ុន្តែ​អត្រា​នេះ បាន​ធ្លាក់​ចុះ​មក​នៅ​ប្រហែល ៥,៥​ភាគ​រយ នៅ​ឆ្នាំ​នេះ។ ដូច្នេះ អត្រា​នេះ បាន​ធ្លាក​ចុះ​បន្តិច បើ​ធៀប​នឹង​ប្រទេស​អភិវឌ្ឍន៍​ផ្សេង​ៗ​ទៀត ប៉ុន្តែ​លទ្ធផល​សេដ្ឋកិច្ច​ក្នុង​តំបន់​នេះ មាន​ភាព​ល្អ ហើយ​ប្រទេស​អាស៊ី​ជា​កត្តា​ជំរុញ​ធ្វើ​ឲ្យ​មាន​កំណើន​សេដ្ឋកិច្ច​ពិភពលោក។

តើ​ប្រទេស​នៅ​អាស៊ាន និង​អាស៊ី​បូព៌ា អាច​រក្សា​នូវ​កំណើន​សេដ្ឋកិច្ច​របស់​ខ្លួន​បាន​ដែរ​ឬ​ទេ?

ខ្ញុំ​គិត​ថា សេដ្ឋកិច្ច​នៅ​បណ្តា​ប្រទេស​អាស៊ាន​នឹង​ទទួល​បាន​លទ្ធ​ផល​ល្អ ក្នុង​រយៈ​ពេល​ជា​មធ្យម ហើយ​ជា​ទូទៅ​នឹង​មាន​លទ្ធ​ផល​ល្អ។ ប៉ុន្តែ ក៏​មាន​បញ្ហា​មួយ​ចំនួន​ដែល​ចាំ​បាច់​ត្រូវ​ដោះ​ស្រាយ​ក្នុង​រយៈ​ពេល​មធ្យម​នេះ។ បញ្ហា​ប្រឈម​ទាំង​នោះ មាន​ភាព​ខុស​ៗ​គ្នា​រវាង​ប្រទេស​ជា​ច្រើន និង​ប្រទេស​មួយ​ចំនួន នៅ​អាស៊ាន​។

ប្រទេស​ជា​ច្រើន នៅ​អាស៊ី ដូច​ជា​សិង្ហ​បុរី តៃវ៉ាន់ និង​ប្រទេស​ផ្សេង​ទៀត បាន​អភិវឌ្ឍ​ពី​ប្រទេស​ដែល​មាន​ប្រាក់​ចំណូល​មធ្យម ទៅ​ជា​ប្រទេស​មាន​ប្រាក់​ចំណូល​ខ្ពស់​ក្នុង​រយៈ​ពេល​២​ទសវត្សរ៍។

ខ្ញុំ​គិត​ថា កត្តា​សំខាន់​សម្រាប់​ប្រទេស​ទាំង​នោះ គឺ​ការ​ដោះស្រាយ និង​ការ​បន្ត​កិច្ច​ខិត​ខំ​ធ្វើ​កំណែ​ទម្រង់​គោល​នយោបាយ​ដែល​ចាំ​បាច់​សម្រាប់​ផ្លាស់​ប្តូរ​ប្រទេស​ទាំង​នោះ ទៅ​ជា​ប្រទេស​មាន​ចំណូល​ខ្ពស់​ហើយ​នោះ​មិន​មែន​ជា​រឿង​ដែល​ប្រទេស​ផ្សេង​ៗ​ទៀត អាច​ដោះ​ស្រាយ​បាន​ទេ។

កម្ពុជា មិន​ទាន់​ឈាន​ដល់​ដំណាក់​កាល​នោះ​នៅ​ឡើយ​ទេ។ កម្ពុជា មាន​សេដ្ឋកិច្ច​អំណោយ​ផល​នា​ពេល​អនា​គត​។

លោក​អាច​ផ្តល់​ព័ត៌​មាន​លម្អិត​ខ្លះ​ទាក់​ទង​នឹង​ទស្សន​វិស័យ​របស់​កម្ពុជា​បាន​ដែរ​ឬ​ទេ?

បើ​យើង​ក្រឡេក​មើល​ទៅ​លើ​សេដ្ឋកិច្ច​កម្ពុជា លទ្ធផល​សេដ្ឋកិច្ច​ប្រទេស​នេះ មាន​ភាព​ល្អ ទោះ​បី​ជា​សេដ្ឋ​កិច្ច​ពិភពលោក​ធ្លាក់​ចុះ​ក៏​ដោយ ប៉ុន្តែ​កំណើន​សេដ្ឋកិច្ច​កម្ពុជា នៅ​តែ​បោះ​ជំហាន​ទៅ​មុខ​ជា​លំដាប់។ កំណើន​សេដ្ឋកិច្ច​របស់​កម្ពុជា នៅ​ឆ្នាំ​នេះ មាន​អត្រា ៦,៥​ភាគ​រយ ដូច្នេះ​យើង​រំពឹង​ថា​កម្ពុជា​នឹង​មាន​កំណើន​ល្អ។

តើ​កម្ពុជា​គួរ​ធ្វើ​បែប​ណា ដើម្បី​ចៀស​ផុត​ពី​ហានិភ័យ​មក​លើ​សេដ្ឋកិច្ច​របស់​ខ្លួន?

ខ្ញុំ​គិត​ថា បញ្ហា​ដែល​កម្ពុជា​ត្រូវ​ធ្វើ គឺ​ការ​បង្កើត​មូល​ដ្ឋាន​ពិពិធកម្ម​សេដ្ឋ​កិច្ច។ សេដ្ឋកិច្ច​ប្រទេស​នេះ​ពឹង​ផ្អែក​លើ​វិស័យ​ទេសចរណ៍​និង​កសិកម្ម​ដដែល។

ខ្ញុំ​គិត​ថា កត្តា​សំខាន់​គឺ​ត្រូវ​លើក​កម្ពស់​បរិយាកាស​អាជីវកម្ម​ពី​ព្រោះ​បរិយាកាស​នេះ​គ្រប​ដណ្តប់​ជា​ច្រើន​ចំណុច រួម​មាន​បទ​ប្បញ្ញត្តិ​រដ្ឋាភិបាល បរិយាកាស​ម៉ាក្រូ​សេដ្ឋកិច្ច​ស្ថិរភាព​ដែល​ឆ្លុះ​បញ្ចាំង​ឲ្យ​ឃើញ​ថា ការ​អប់រំ​ល្អ​សម្រាប់​ប្រជាជន ផ្តល់​នូវ​កម្លាំង​ពលកម្ម​ដែល​មាន​គុណភាព​ខ្ពស់ ហើយ​ទាំង​នេះ ត្រូវ​ធ្វើ​រួម​គ្នា ដើម្បី​បង្កើត​បរិយាកាស​អាជីវកម្ម​ល្អ​សម្រាប់​ក្រុម​ហ៊ុន​ឯក​ជន។

កម្ពុជា​ត្រូវ​ការ​ទីផ្សារ​ហិរញ្ញវត្ថុ​រឹង​មាំ។ ខ្ញុំ​គិត​ថា អាជ្ញាធរ​កម្ពុជា កំពុង​ព្យាយាម​បង្កើត​ការ​ទុក​ចិត្ត​ក្នុង​ចំណោម​ប្រជាជន ចំពោះ​រូបិយប័ណ្ណ​ក្នុង​ស្រុក ដែល​នៅ​ពេល​នេះ​សេដ្ឋកិច្ច​កម្ពុជា នៅ​ផ្អែក​លើ​ប្រាក់​ដុល្លារ​អាមេរិក​នៅ​ឡើយ​។ ដូច្នេះ ការ​ប្រើ​ប្រាស់​រូបិយប័ណ្ណ​ក្នុង​ស្រុក ពិត​ជា​សំខាន់​ណាស់ ក្នុង​ការ​ទទួល​បាន​គោល​នយោបាយ​រូបិយវត្ថុ​ឯករាជ្យ​ដែល​ជា​ផ្នែក​មួយ​ចាំ​បាច់​ត្រូវ​មាន​ក្រប​ខ័ណ្ឌ​ម៉ាក្រូ​សេដ្ឋកិច្ច​រឹង​មាំ និង​មាន​ការ​គ្រប់​គ្រង​ទី​ផ្សារ​ហិរញ្ញវត្ថុ​បាន​ល្អ​៕CS

អត្ថបទគួរចាប់អារម្មណ៍