The Phnom Penh Post Search

Search form

Logo of Phnom Penh Post newspaper Phnom Penh Post - ក្រុង​ភ្នំពេញ​នឹង​ប្រឈម​បញ្ហា​សំរាម ៥ឆ្នាំ ខាង​មុខ




ក្រុង​ភ្នំពេញ​នឹង​ប្រឈម​បញ្ហា​សំរាម ៥ឆ្នាំ ខាង​មុខ

ក្រុង​ភ្នំពេញ​នឹង​ប្រឈម​បញ្ហា​សំរាម ៥ឆ្នាំ ខាង​មុខ

20140221_12
លោក សេង សាវី ប្រធានស៊ីនទ្រី ផា លីណា

ភ្នំពេញៈ ពេល​ដែល​កម្មករ​ប្រមូល​សំរាម​របស់​ក្រុមហ៊ុន ស៊ីនទ្រី បាន​បដិសេធ​មិន​ធ្វើ​ការ​ដោយ​ទាមទារ​ឲ្យ​មាន​ការ​ដំឡើង​ប្រាក់​ខែ​គោល​ឲ្យ​បាន ១៥០ ដុល្លារ​នា​ពេល​ថ្មីៗ​កន្លង​ទៅ​នេះ​រាជធានី​ភ្នំពេញ​ដែល​ជា​មជ្ឈមណ្ឌល​សេដ្ឋកិច្ច និង​នយោបាយ​សំខាន់​មួយ​របស់ កម្ពុជា បាន​ក្លាយ​ជា​ទី​តាំង​ដែល​មាន​ផ្ទុក​សំរាម​ពាស​វាល​ពាស​កាល និង​ក្លិន​ស្អុយ​ស្ទើរ​គ្រប់​ទី​កន្លែង។ បញ្ហា​បាន​អូស​បន្លាយ​ពេល​បី​ថ្ងៃ​ក៏​ត្រូវ​បាន​ដោះស្រាយ​រួច​រវាង​ភាគី​កម្មករ និង​និយោគជក។ គំនរ​សំរាម និង​ក្លិន​ស្អុយ​នា​ពេល​នោះ ជា​ការ​ដាស់​តឿន​មួយ​ដល់​ប្រជា​ពលរដ្ឋ និង​ភាគី​ពាក់​ព័ន្ធ​ទាំង​អស់​ឲ្យ​យក​ចិត្ត​ទុក​ដាក់​ចូល​រួម​ដើម្បី​រក្សា​សោភណភាព​រាជធានី។

លោក សេង សាវី ប្រធាន​ក្រុមហ៊ុន ស៊ីនទ្រី (ខេមបូឌា) បាន​លើក​ឡើង​ថា ការ​សម្អាត​ទីក្រុង​នៅ​តែ​ជួប​បញ្ហា​ប្រឈម​ជាច្រើន​នៅ​ឡើយ។

តើ​បរិមាណ​សំរាម​នៅ​ភ្នំពេញ​មាន​ការ​ប្រែប្រួល​យ៉ាង​ដូចម្តេច​ដែរ​ពី​មួយ​ឆ្នាំ​ទៅ​មួយ​ឆ្នាំ?

ចំនួន​កាក​សំណល់​មាន​ការ​កើន​ឡើង​ជា​រៀង​រាល់​ឆ្នាំ​គឺ​ក្នុង​រង្វង់ ១៣ ភាគរយ​ជា​ប្រចាំ។ សព្វ​ថ្ងៃ​នេះ បរិមាណ​កាក​សំណល់​នៅ​ទីក្រុង ភ្នំពេញ មាន​ប្រហែល ១ ៤០០ តោន​ក្នុង​មួយ​ថ្ងៃ គឺ​កើន​ឡើង​ពី ៨០០ តោន​ក្នុង​មួយ​ថ្ងៃ​កាល​ពី​ឆ្នាំ ២០០២។

ប្រជាជន​នៅ​រាជធានី​តែង​រអ៊ូ​ពី​គុណភាព​នៃ​ការ​ផ្តល់​សេវា​ប្រមូល​សំរាម​នា​ពេល​កន្លង​មក។ តើ​លោក​យល់​យ៉ាង​ណា​ចំពោះ​ការ​លើក​ឡើង​នេះ?

យើង​ទទួល​ស្គាល់ គឺថា គ្រប់​យ៉ាង​នៅ​មិន​ទាន់​ទទួល​យក​បាន​នៅ​ឡើយ​ទេ ពី​ការ​សំអាត​ទីក្រុង​ហ្នឹង។

ក្រុមហ៊ុន និង​សាលា​រាជធានី​បាន​សិក្សា​រយៈ​ពេល​ប៉ុន្មាន​ខែ​មក​ហើយ ដើម្បី​កែ​ទម្រង់​ប្រព័ន្ធ​ប្រមូល​សំរាម និង​ការ​រៀបចំ​កាលវិភាគ​ម៉ោង​ពេល​ដើម្បី​ដឹក​ជញ្ជូន​សំរាម​ឲ្យ​បាន​ល្អ។ ខ្ញុំ​ជឿ​ថា ពេល​ខាង​មុខ​នឹង​អាច​ដោះស្រាយ​បាន គឺ​នឹង​ល្អ​ជាង​ហ្នឹង។

ទន្ទឹម​នេះ​ដែរ​ប្រជា​ពលរដ្ឋ​ត្រូវ​ជួយ​សម្អាត​ទាំង​អស់​គ្នា​ត្រូវ​ផ្លាល់​ប្តូរ​ទម្លាប់​នៃ​ការ​ទុក​ដាក់​សំរាម​រាយប៉ាយ ដោយ​រៀបចំ​ឲ្យ​មាន​សណ្តាប់ធ្នាប់​ល្អ​សម្រាប់​ភាព​ងាយ​ស្រួល​ក្នុង​ការ​ប្រមូល។

អ្វី​ជា​បញ្ហា​ប្រឈម​ដែល​ក្រុមហ៊ុន​លោក​ជួប​ប្រទះ​កន្លង​មក?

យើង​ត្រូវ​ដឹង​ថា តារាង​តម្លៃ​ដែល​ប្រជា​ពលរដ្ឋ​ផ្តល់​ឲ្យ​គឺ​មិន​ទាន់​សម​ស្រប​នៅ​ឡើយ​ទេ។ តម្លៃ ១ ដុល្លារ​សម្រាប់​អ្នក​រស់​នៅ​ផ្ទះ​ជាន់​ផ្ទាល់​ដី និង ០,៨ ដុល្លារ​សម្រាប់​ជាន់​លើ​គឺ​វា​ទាប​ណាស់​តម្លៃ​នេះ​នៅ​ដដែល ហើយ​មិន​ត្រឹម​ប៉ុណ្ណោះ ប្រជា​ពលរដ្ឋ​ដែល​មិន​ទាន់​ចូល​រួម​បង់​ថ្លៃ​សេវា​ប្រមូល​សំរាម​នេះ នៅ​មាន​ច្រើន​នៅ​ឡើយ​គឺ​មាន​ទាំង​ប្រជា​ពលរដ្ឋ​ដែល​ជា​អ្នក​ស្នាក់នៅ​ធម្មតា និង​ម្ចាស់​អាជីវកម្ម​ផង​ដែរ។ បន្ថែម​លើស​ពី​នេះ​ទៀត​បញ្ហា​ទីតាំង​ចាក់​ផ្ទុក​សំរាម​ដែល​ជិត​ពេញ​ទៅ​ហើយ​រឹត​តែ​ជា​បញ្ហា​គួរ​ឲ្យ​បារម្ភ។

អ្វី​ជា​បញ្ហា​ចំពោះ​ក្តី​បារម្ភ​ទាក់ទង​នឹង​ទីតាំង​ផ្ទុក​សំរាម?

យើង​មាន​ទីតាំង​ផ្ទុក​សំរាម​នៅ​ខណ្ឌ ដង្កោ ដែល​មាន​ផ្ទៃ​ដី ៣០ ហិកតា គឺជា​ទីតាំង​ផ្ទុក​សំរាម​តាំង​ពី​ឆ្នាំ ២០០៩ មក។ បើ​យោង​តាម​ការ​ស្មាន​របស់​យើង​ទី​លាន​នេះ​នឹង​ពេញ​នៅ​ប្រាំ​ឆ្នាំ​ខាង​មុខ។

ឥឡូវ​នេះ​បញ្ហា​ទីលាន​ផ្ទុក​សំរាម​ជា​បញ្ហា​ធំ​បំផុត។ តើ​នឹង​មាន​អ្វី​កើត​ឡើង​នៅ​ពេល​ដែល​ទី​លាន​នេះ​ពេញ តើ​យើង​ត្រូវ​ដឹក​ទៅ​ទុក​នៅ​ខេត្ត? តើ​ក្រុមហ៊ុន​នឹង​អាច​ទូទាត់​ចំណូល​ចំណាយ​បាន​ដោយ​របៀប​ណា​បើ​ត្រូវ​ដឹក​សំរាម​ទៅ​ផ្ទុក​នៅ​ឆ្ងាយ? បញ្ហា​ទីលាន​ផ្ទុក​សំរាម​គឺ​ជា​អ្វី​ដែល​គួរ​ឲ្យ​បារម្ភ​បំផុត​នា​ពេល នេះ​ហើយ​យើង​កំពុង​សិក្សា​ពី​លទ្ធភាព​វិនិយោគ​លើ​រោងចក្រ​កែច្នៃ កាក​សំណល់​ដើម្បី​ធ្វើ​ឲ្យ​ទីតាំង​ផ្ទុក​នេះ​អាច​នៅ​បន្ត​បាន​យូរ​ទៀត ប៉ុន្តែ​បញ្ហា​មាន​ច្រើន​ណាស់។

លោក​អាច​រៀបរាប់​ពី​អ្វី​ដែល​រក​ឃើញ​ពី​ការ​សិក្សា​នេះ​ទេ?

អ្វី​ជា​បញ្ហា​គឺការ​ប្រឈម​មុខ​នឹង​ការ​ខាត​បង់ បើ​វិនិយោគ​លើ​ការ​កែ​ច្នៃ​សុទ្ធ​សាធ​មិន​មាន​ក្រុមហ៊ុន​ណា​ចង់​ធ្វើ​ទេ ទាល់​តែ​រដ្ឋ​ជួយ​ឧបត្ថម្ភ​ដូចជា​ការ​ផ្តល់​អនុគ្រោះ​ពន្ធ​នានា។

កាកសំណល់​ដែល​ចេញ​ពី​គេហដ្ឋាន​ភាគ​ច្រើន​លើស​លប់​មិន​អាច​យក​មក​ប្រើ​ប្រាស់​ដើម្បី​កែ​ច្នៃ​បាន​ទេ។

ជា​ទូទៅ​សំណល់​ដែល​អាច​ប្រើ​បាន​សម្រាប់​កែច្នៃ​ប្រជា​ពលរដ្ឋ​មិន​បោះ​ចោល​ទេ គឺ​ទុក​លក់​ឲ្យ​អេតចាយ។ ដូច្នេះ​កាកសំណល់​ដែល​អាច​កែច្នៃ​បំប្លែង​ជា​វត្ថុ​ផ្សេង​នៅ​សល់​តិច​តួច​បំផុត​ដែល​មិន​អាច​ដំណើរការ​រោងចក្រ​កែច្នៃ​បាន៕ PB

អត្ថបទគួរចាប់អារម្មណ៍