ភ្នំពេញៈនៅក្នុងឃ្លាំងស្តុកអង្ករនៃរោងម៉ាស៊ីនកែច្នៃអង្ករមួយក្នុងខណ្ឌមានជ័យ រាជធានីភ្នំពេញកម្មករជាច្រើនកំពុងមមាញឹកក្នុងការងាររបស់ពួកគេ។ខ្លះកំពុងប្រមូលច្រកអង្ករចូលទៅក្នុងបាវខណៈខ្លះទៀតកំពុងជញ្ជូនអង្ករដាក់ទៅក្នុងរថយន្តត្រៀមដឹកទៅកំពង់ផែសម្រាប់នាំចេញ។នេះជារោងម៉ាស៊ីនកែច្នៃអង្កររបស់ក្រុមហ៊ុនខ្មែរហ្វូត។
ខ្មែរហ្វូតជាក្រុមហ៊ុនផលិតអង្ករដ៏ធំមួយក្នុងចំណោមក្រុមហ៊ុនជាច្រើនទៀតនៅកម្ពុជាដែលរួមចំណែកយ៉ាងសំខាន់ក្នុងការបង្កើនផលិតភាពនៃការនាំចេញអង្កររបស់កម្ពុជា។
«ដោយសារទំនាក់ទំនងដ៏ល្អដែលយើងមានជាមួយដៃគូពាណិជ្ជកម្មយើងអាចផ្គត់ផ្គង់អង្ករដែលមានគុណភាពក្នុងតម្លៃមានលក្ខណៈប្រកួតប្រជែង»នេះជាការលើកឡើងរបស់លោក គឹម សាវុធ ប្រធានក្រុមហ៊ុនខ្មែរហ្វូត។
លោកបន្តថានៅឆ្នាំ២០១២កម្ពុជាបាននំាចេញអង្ករសរុប១៨៧ ០០០តោនក្នុងនោះក្រុមហ៊ុនខ្មែរហ្វូតមាន៣ម៉ឺនតោន។ ចំនួននេះបានបង្ហាញថាខ្មែរហ្វូតបានរួមចំណែកប្រមាណ១៥ ភាគរយនៃការនាំចេញអង្ករសរុបរបស់កម្ពុជាក្នុងឆ្នាំ២០១២។
លោកបន្តថា ក្រុមហ៊ុនមានគម្រោងនាំចេញឲ្យបាន៥ម៉ឺនតោននៅឆ្នាំ២០១៣ ។
កាលពីឆ្នាំ២០១១ ក្រុមហ៊ុនខ្មែរហ្វូតបាននាំចេញអង្ករសរុបចំនួន ២៥ ០០០ តោន។
បច្ចុប្បន្ន ខ្មែរហ្វូតបាននឹងកំពុង ផ្តល់ការងារជាច្រើនដល់កម្មករទាំងអ្នកមានជំនាញ នឹងអ្នកមានជំនាញតិចតួច។នៅក្នុងរោងចក្រមានកម្មករប្រមាណ១២០នាក់ដែលជាអ្នកមានជំនាញតិចតួចកំពុងធ្វើការជាប្រចាំ។
លោក គឹម សាវុធ បានឲ្យដឹងថា៖ «កាលពីឆ្នាំ២០០៩លោកត្រូវចំណាយប្រមាណ៥០ ដុល្លារដើម្បីនាំចេញអង្ករក្នុង១តោនប៉ុន្តែបច្ចុប្បន្នលោកអាចចំណាយត្រឹមតែ២៣ ដុល្លារប៉ុណ្ណោះ។ លោកបន្តថា៖ «ដំណើរការនៃការនាំចេញអង្កររបស់កម្ពុជាបាននឹងកំពុងមានការផ្លាស់ប្តូរជាវិជ្ជមានយ៉ាងច្រើន»។
ខ្មែរហ្វូតបានប្រមូលទិញអង្ករពីរោងម៉ាស៊ីនកិនស្រូវតូចៗប្រមាណ១០០ក្រុមហ៊ុនតាមខេត្តនានានៅក្នុងប្រទេសកម្ពុជាយកមកកែច្នៃបន្តឲ្យកាន់តែមានគុណភាពខ្ពស់។បច្ចុប្បន្នក្រុមហ៊ុនមានគោលដៅទីផ្សារនាំចេញសំខាន់ៗជាច្រើនដូចជាសហគមន៍អឺរ៉ុបមានប្រទេស បារាំង ហុងគ្រី អាល្លឺម៉ង់ អេស្ប៉ាញ អ៊ីតាលី និង ប៉ូឡូញ។
លោក គឹម សាវុធ មិនបានបញ្ចប់ការសិក្សាខាងជំនាញកសិកម្មទេ ប៉ុន្តែលោកទទួលបានជោគជ័យធំធេងក្នុងវិស័យនេះ។លោកជា វេជ្ជបណ្ឌិតមួយរូប និងបានចំណាយពេលក្នុងអាជីពនេះតែមួយឆ្នាំប៉ុណ្ណោះ។
សម្រាប់ពាណិជ្ជកររូបនេះបង្កើតមុខរបរដោយខ្លួនឯងបានធ្វើឲ្យជីវិតរបស់លោកមានភាពប្រសើរ។
លោកបន្តថា ភាពជោគជ័យរបស់លោកនៅពេលនេះមិនមែនជាការចៃដន្យនោះទេតែវាបានមកពីការតស៊ូនឹងជម្នះឧបសគ្គរាប់រយជំពូក។លោកគឹម សាវុធ មានដំណើរជីវិតជាក្មេងកំព្រា បន្ទាប់ពីរបបខ្មែរក្រហមបានដួលរលំ។លោកបានចាប់ផ្តើមជាអ្នកលក់នំបុ័ងនៅពេលព្រឹកនិងពេលយប់រត់កង់ឌុបដើម្បីបានប្រាក់បន្តការសិក្សា។
លោកបន្តថា៖ «រាល់គ្រប់ដំណើរជីវិតតែងតែមានឧបសគ្គហើយត្រូវចំាថានៅពេលទំហំពាណិជ្ជកម្មកាន់តែធំ ឧបសគ្គក៏មានកាន់តែច្រើន។តែទោះជាយ៉ាងណាក៏ដោយរាល់គ្រប់ឧបសគ្គតែងតែមានដំណោះស្រាយ»៕
