The Phnom Penh Post Search

Search form




Logo of Phnom Penh Post newspaper Phnom Penh Post - ពាណិជ្ជកម្ម​កម្ពុជា អង់គ្លេស​នឹង​កើន​$១​ពាន់​លាន

ពាណិជ្ជកម្ម​កម្ពុជា អង់គ្លេស​នឹង​កើន​$១​ពាន់​លាន

ពាណិជ្ជកម្ម​កម្ពុជា អង់គ្លេស​នឹង​កើន​$១​ពាន់​លាន

131206_13
លោក Mark Gooding ឯកអគ្គរាជទូតចក្រភពអង់គ្លេសប្រចំានៅកម្ពុជា ដែលនឹងបញ្ចប់អាណត្តិនៅឆ្នាំនេះ ហេង ជីវ័ន

ភ្នំពេញៈ ទំនាក់ទំនង​ការទូត​រវាង កម្ពុជា និង​ចក្រភព​អង់គ្លេស​កំពុង​មាន​ការ​អភិវឌ្ឍ​ឡើង​ជា​លំដាប់ និង​រឹងមាំ​ឡើង​ពី​មួយ​ឆ្នាំ​ទៅ​មួយ​ឆ្នាំ។ បន្ថែម​ពី​កិច្ចសហការ​ផ្នែក​អភិវឌ្ឍន៍ ចំណង​មិត្តភាព​អង់គ្លេស កម្ពុជា​កំពុង​មាន​ភាព​ចម្រុះ​ឡើង​ថែម​ទៀត​តាមរយៈ​ការ​កើនឡើង​កិច្ចសហ ប្រតិបត្តិការ​លើ​វិស័យ​សេដ្ឋកិច្ច​។ ទំហំ​ទឹកប្រាក់​ពី​ការ​ដោះដូរ​ពាណិជ្ជកម្ម​ទ្វេភាគី​នៃ​ប្រទេស​ទំាង​ពីរ​ក្នុង​រយៈពេល​៩​ខែ​ដំបូង​ឆ្នាំ​នេះ សម្រេច​បាន ៧៥០ លាន​ដុល្លារ​។

លោក Mark Gooding ឯកអគ្គរាជទូត​ចក្រភព​អង់គ្លេស​ប្រចំា​នៅ​កម្ពជា ដែល​នឹង​ផុត​អាណត្តិ​នៅ​កម្ពុជា​នៅ​ឆ្នាំ​នេះ​បាន​រំពឹង​ថា​ទំហំ​ពាណិជ្ជកម្ម​ទ្វេភាគី​កម្ពុជា ចក្រភព​អង់គ្លេស​នឹង​សម្រេច​បាន​១​ពាន់​លាន​ដុល្លារ​នៅ​ឆ្នាំ​២០១៣ នេះ កើនឡើង​៣៣​ភាគរយ​កាលពី​ឆ្នាំ​មុន​។ អ្នក​យកព័ត៌មាន​កាសែត​ភ្នំពេញ​ប៉ុស្តិ៍​លោក ហ៊ គីមសាយ បាន​ជួប​ជាមួយ​លោក Mark Gooding អំពី​ស្ថានភាព​នៃ​កិច្ចសហប្រតិបត្តិការ​រវាង​ប្រទេស​ទាំង​ពីរ​នា​ពេល​កន្លង​មក។

តើ​លោក​អាច​រៀបរាប់​ពី​ស្ថានភាព​រស់នៅ និង​ការងារ​របស់​លោក​នៅ​កម្ពុជា​រយៈពេល​កន្លង​ទៅ​នេះ​បាន​ទេ?

ខ្ញុំ​ពិតជា​រីករាយ​ក្នុង​ការ​រស់នៅ និង​ការ​ធ្វើការ​នៅ​កម្ពុជា​កន្លង​មក។ ការ​ដែល​ខ្ញុំ​ត្រូវ​ចាកចេញ​ពី​កម្ពុជា គឺជា​រឿង​ដែល​សោកសៅ​មួយ​សម្រាប់​ខ្ញុំ។ ប្រជាជន​កម្ពុជា​រួសរាយ​រាក់ទាក់ ហើយ​បទពិសោធ​នៃ​ការ​រស់នៅ និង​ធ្វើការ​នៅ​ទី​នេះ​ជា​បទពិសោធ​ដ៏​ល្អ​សម្រាប់​ខ្ញុំ។

ចុះ​ទំនាក់ទំនង​ការទូត​រវាង​កម្ពុជា អង់គ្លេស​នៅ​ប៉ុន្មាន​ឆ្នាំ​ចុងក្រោយ​នេះ​?

ទំនាក់ទំនង​រវាង​ចក្រភព​អង់គ្លេស និង​កម្ពុជា​គឺ​មាន​ភាព​កាន់តែ​រឹងមាំ​ឡើង​ក្នុង​រយៈពេល​ពីរ ឆ្នាំ​កន្លះ​ចុងក្រោយ​នេះ​។ អង់គ្លេស​តែង​ព្យាយាម​ភ្ជាប់​ទំនាក់ទំនង​ល្អ​រវាង​ប្រជាជន​នៃ​ប្រទេស​ទាំង​ពីរ ជាពិសេស​សម្រាប់​ប្រជាជន​កម្ពុជា​វ័យក្មេង​។ អង់គ្លេស​តែង​ព្យាយាម​បន្ត​គាំទ្រ​ការ​អភិវឌ្ឍ​នៅ​កម្ពុជា​ទាំង​ផ្នែក នយោបាយ និង​សេដ្ឋកិច្ច​។ យើង​ផ្តល់​ជំនួយ​ទៅលើ​បញ្ហា​សង្គម​ជាច្រើន​គម្រោង ដូចជា​ការ​ផ្តល់​ជំនួយ​ទៅ​លើ​កម្មវិធី​កម្ចាត់​មីន​នៅ​កម្ពុជា ការ​ផ្តល់​ជំនួយ​លើ​ផ្នែក​សុខភាព ការ​ពង្រឹង​លទិ្ធប្រជាធិបតេយ្យ និង​ការ​គោរព​សិទ្ធិមនុស្ស ការ​ពង្រឹង​ប្រព័ន្ធ​យុត្តិធម៌ ការ​ផ្តល់​ជំនួយ​ថវិកា​ដល់​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា និង​ការ​ផ្តល់​អាហារូបករណ៍​ដល់​និសិ្សត​កម្ពុជា​ទៅ​សិក្សា​នៅ​អង់គ្លេស​ជាដើម។

ងាក​ទៅ​មើល​កិច្ចសហប្រតិបត្តិការ​សេដ្ឋកិច្ច​រវាង​ប្រទេស​ទាំង​ពីរ​មាន​ស្ថានភាព​យ៉ាង​ដូចម្តេច​ដែរ?

យើង​មាន​កិច្ចពិភាក្សា​ល្អៗ​ជាច្រើន​ពី​បញ្ហា​ទាក់ទង​នឹង​បរិយាកាស ធុរកិច្ច​នៅ​កម្ពុជា ដូចជា​ការ​តាក់តែង​វិន័យ និង និយតកម្ម​មួយ​ចំនួន។​ទាក់ទង​នឹង​ស្ថានភាព​ពាណិជ្ជកម្ម គឺ​ភាគី​ទាំង​ពីរ​បាន​បន្ត​រក្សា​កំណើន​ពី​មួយ​ឆ្នាំ ទៅ​មួយ​ឆ្នាំ​។ អង់គ្លេស​ជា​ទីផ្សារ​ដ៏សំខាន់​របស់​កម្ពុជា​លើ​ទំនិញ​សំខាន់ៗ​ដែល កម្ពុជា​អាច​ផលិត​បាន​មាន​ដូចជា ផលិតផល​សម្លៀកបំពាក់ និង​កសិផល​។ ចំណែកឯ​ផលិតផល​ដែល​ចក្រភព​អង់គ្លេស​នាំ​មក​លក់​នៅ​កម្ពុជា​គឺ​ភាគច្រើន​ជា​ផលិតផល​ទំនើបៗ​ដូចជា រថយន្ត Land Rover និង Range Rover គ្រឿង​អេឡិចត្រូនិក និង​គ្រឿង​ម៉ាស៊ីន​ជាដើម។ នា​ពេល​កន្លងមក​ក្រុមហ៊ុន​អង់គ្លេស​កាន់តែ​ច្រើន​ឡើង​បាន​ចូល​មក​វិនិយោគ​នៅ​កម្ពុជា ហើយ​ក៏​ទទួល​បាន​ជោគជ័យ​នៅ​ទី​នេះ​ផង​ដែរ ដូច្នេះ​ខ្ញុំ​រំពឹង​ថា​វា​នឹង​បន្ត​កើនឡើង​ថែម​ទៀត​នា​ពេល​ខាង​មុខ​។

លោក​លើក​ឡើង​ពី​បទពិសោធ​ជោគជ័យ​ដែល​វិនិយោគិន​អង់គ្លេស​មាន​នៅ កម្ពុជា តើ​មាន​ករណី​ជាក់​ស្តែង​ណា​មួយ​ទេ? តើ​វិស័យ​ណា​ខ្លះ​ដែល​ពួកគេ​ចាប់​អារម្មណ៍​?

មាន​វិស័យ​ជាច្រើន​! មាន​ក្រុមហ៊ុន​កាត់ដេរ​របស់​អង់គ្លេស​ធំ​បី​កំពុង​ដំណើរការ​នៅ​កម្ពុជា ហើយ​ពួកគេ​សុទ្ធតែ​ទទួល​បាន​ការ​រីកចម្រើន​។ ជាក់ស្តែង​ដូចជា​ក្រុមហ៊ុន Quantum Clothing (Cambodia) បាន​ចាប់ផ្តើម​ដំណើរការ​នៅ​កម្ពុជា​តាំងពី​ជាង​១០​ឆ្នាំ​មុន ហើយ​ពេល​នេះ​បាន​ពង្រីក​ប្រតិបត្តិការ​កាន់តែ​ធំ។ ការ​វិនិយោគ​ដោយ​ពាណិជ្ជករ​អង់គ្លេស​នៅ​កម្ពុជា​ក៏​ចាប់ផ្តើម​មាន ភាព​ចម្រុះ​ជាង​មុន​ជា​បណ្តើរៗ​ពី​ឧស្សាហកម្ម​កាត់ដេរ ទៅ​ការ​វិនិយោគ​លើ​វិស័យ​អប់រំ វិស័យ​ហិរញ្ញវត្ថុ វិស័យ​សំណង់ និង​ស្ថាបត្យកម្ម និង​វិស័យ​កសិកម្ម​ជាដើម​។ ជាក់ស្តែង​ក្រុមហ៊ុន​អង់គ្លេស​យ៉ាង​ហោច​ណាស់​៨ បាន​ទទួល​សិទ្ធិ​សាងសង់​លើ​គម្រោង​ផ្សេង​គ្នា​ក្នុង​គម្រោង​សាងសង់​អគារ​វឌ្ឍនៈ ដែល​ជា​អគារ​ការិយាល័យ​ដ៏​ទំនើប និង​ធំ​ស្កឹមស្កៃ​មួយ​នៅ​កម្ពុជា។

តើ​អ្នក​ដឹង​ទេ​អំពី​ការ​យល់​ឃើញ​របស់​ពាណិជ្ជករ​អង់គ្លេស​ដែល​មាន​ចំណាប់​អារម្មណ៍​ពី​ឱកាស​វិនិយោគ​នៅ​កម្ពុជា​?

សម្រាប់​វិនិយោគិន​អង់គ្លេស​ជា​ទូទៅ ការ​ស្គាល់​ពី​សក្តានុពល​វិនិយោគ​របស់​ប្រទេស​កម្ពុជា​នៅ​មាន​កម្រិត​នៅ​ឡើយ​។ ប៉ុន្តែ​សម្រាប់​វិយោគិន​ដែល​ធ្លាប់​មាន​បទពិសោធ​ស្រាប់​នៅ​កម្ពុជា ពួកគេ​កំពុង​រីករាយ​នឹង​ឱកាស​វិនិយោគ​នៅ​កម្ពុជា​ដោយសារ​សក្តានុពល​ជាច្រើន​ដែល​ជួយ​ជំរុញ​ការ​រីកចម្រើន​និង​ការ​ដែល​មាន​គោលនយោបាយ លើក​ទឹកចិត្ត​ពី​រដ្ឋាភិបាល​សម្រាប់​អ្នក​វិនិយោគ​។

តើ​អ្នក​មើល​ឃើញ​វិស័យ​ដែល​ចាំបាច់​សម្រាប់​ធ្វើការ​កែលម្អ​ដែរ​ឬ​ទេ? តើ​កម្ពុជា​ត្រូវ​ធ្វើអ្វី​ដើម្បី​ទទួល​បាន​ផលប្រយោជន៍ និង​ទាក់ទាញ​វិនិយោគិន​របស់ UK បាន​កាន់តែ​ច្រើន​?

ជា​រួម​ក្រុមហ៊ុន​វិនិយោគ​នៅ​ទីនេះ​មាន​បទពិសោធ​វិជ្ជមាន​។ ប៉ុន្តែ​ទាក់ទង​នឹង​ភាព​ជាក់លាក់ មាន​បញ្ហា​ពីរ​ដែល​ក្រុមហ៊ុន​តែងតែ​មាន​ចំណាប់អារម្មណ៍​ដើម្បី​មើល​ឃើញ ការ​កែទម្រង់​។ ទី​១​គឺ​ការ​ប្រឆាំង​អំពើ​ពុករលួយ​។ វិធានការ​លុប​បំបាត់​អំពើ​ពុករលួយ​កាន់តែ​ច្រើន ក្រុមហ៊ុន​មាន​ភាព​កាន់​តែ​ល្អ​ប្រសើរ​។ បញ្ហា​ដ៏​សំខាន់​ទី​ពីរ​គឺ​អភិបាល​កិច្ច​ល្អ​។ ឧទាហរណ៍​ការ​ធ្វើឲ្យ​ប្រាកដ​ថា តម្លាភាព​នៃ​ការ​កែទម្រង់​ផ្នែក​តុលាការ​នឹង​អាច​ជួយ​បាន​ដោយសារ តែ​ជួនកាល​ក្រុមហ៊ុន​ទាំងនេះ​ចាំបាច់​ត្រូវ​ដក​ដោយសារ​តែ​ច្បាប់ ប្រសិន​បើ​ពួកគេ​មាន​បញ្ហា​។ ដូច្នេះ​ជាទូទៅ​កំណែទម្រង់​អភិបាលកិច្ច​គឺជា​អ្វីៗ​ដែល​អាច​ជួយ​បាន​។

ទាក់ទង​នឹង​បញ្ហា​នយោបាយ​នៅ​កម្ពុជា​ក្រោយ​ការ​បោះឆ្នោត គណបក្ស​សង្គ្រោះ​ជាតិ​នៅ​តែ​បន្ត​ការ​ទាមទារ​ប្រឆាំង​នឹង​លទ្ធផល​បោះឆ្នោត​ដោយ​មិន​ព្រម​ចូលរួម​ប្រជុំ​សភា​។ តើ​វា​អាច​មាន​ផលប៉ះពាល់​អវិជ្ជមាន​ទេ​?

បញ្ហា​នេះ​មាន​សារៈសំខាន់ និង​ចំណាប់​អារម្មណ៍​ដើម្បី​សម្លឹង​មើល​ទៅ​ការ​កែលម្អ​វិជ្ជមាន នៅក្នុង​ការ​បោះឆ្នោត​អាណត្តិ​នេះ​។ យើង​បាន​មើល​ឃើញ​ការ​ចូលរួម​ជា​សាធារណៈ​កាន់តែ​ច្រើន​នៅក្នុង យុទ្ធនាការ និង​ការ​បោះឆ្នោត​ធ្វើ​ឡើង​ដោយ​ភាព​ស្ងៀមស្ងាត់។ មាន​បញ្ហា​មួយ​ចំនួន​ដែល​ភាគី​ទាំង​ពីរ​មិន​យល់ព្រម​ទៅវិញ​ទៅមក ប៉ុន្តែ​ខ្ញុំ​គិត​ថា​ ពួកគេ​អាច​ចរចា​គ្នា​ដើម្បី​សែ្វងរក​ដំណោះស្រាយ​បាន​៕PB

អត្ថបទគួរចាប់អារម្មណ៍