The Phnom Penh Post Search

Search form




Logo of Phnom Penh Post newspaper Phnom Penh Post - លោក គន្ធី៖ វិស័យ​ឯកជន​គួរ​ចាប់​ផ្តើម​ធ្វើ​ការ​រួម​គ្នា

លោក គន្ធី៖ វិស័យ​ឯកជន​គួរ​ចាប់​ផ្តើម​ធ្វើ​ការ​រួម​គ្នា

លោក គន្ធី៖ វិស័យ​ឯកជន​គួរ​ចាប់​ផ្តើម​ធ្វើ​ការ​រួម​គ្នា

131220_12
លោក កាន់ គន្ធី នាយកប្រតិបត្តិក្រុមហ៊ុន Battambang Rice Investment ម៉ៃ វីរៈ

ភ្នំពេញៈ បន្ទាប់​ពី​អង្ករ​កម្ពុជា​បាន​ឈ្នះ​ពាន​រង្វាន់​ជា​អង្ករ​ឆ្ងាញ់​លេខ ១ របស់​ពិភពលោក​នា​រយៈ​ពេល ២ឆ្នាំ ជាប់ៗ​គ្នា​រួច​មក គេ​បាន​សង្កេត​ឃើញ​ថា តម្រូវការ​អង្ករ​ក្រអូប​កម្ពុជា​បាន​កើន​ឡើង​គួរ​ឲ្យ​កត់​សម្គាល់។ លោក កាន់ គន្ធី នាយក​ប្រតិបត្តិ​នៃ​ក្រុមហ៊ុន Battambang Rice Investment (Brico) ដែល​ត្រូវ​បាន​គេ​ជ្រើស​រើស​ឲ្យ​ធ្វើ​ជា​អ្នក​តំណាង​ឲ្យ​ប្រទេស​កម្ពុជា ឡើង​ធ្វើ​បទ​បង្ហាញ​អំពី​វិស័យ​អង្ករ​កម្ពុជា​នៅ​ទីក្រុង ហុងកុង កាល​ពី​ខែ វិច្ឆិកា កន្លង​មក បាន​ថ្លែង​ថា ការ​ឈ្នះ​ពាន​រង្វាន់​លើក​នេះ​ពិត​ជា​មាន​អត្ថន័យ​ធំ​ធេង​ណាស់​សម្រាប់​ប្រជា​កសិករ​កម្ពុជា។ លោក​បាន​ប្រាប់​ទៀត​ថា នៅ​ពេល​នេះ​វា​គួរ​តែ​ជា​ចំណុច​ចាប់​ផ្តើម​សម្រាប់​រដ្ឋាភិបាល និង​វិស័យ​ឯកជន​ក្នុង​ការ​ធ្វើ​ការ​រួម​គ្នា ដើម្បី​ជំរុញ​វិស័យ​ទាំង​មូល​អង្ករ​អាច​ប្រកួត​ប្រជែង​ក្នុង​ទីផ្សារ​អាស៊ាន ឆ្នាំ ២០១៥។

១-តើ​លោក​អាច​រៀបរាប់​អំពី​បទ​ពិសោធ​ក្នុង​ការ​ធ្វើ​បទ​បង្ហាញ​នៅ​ទីក្រុង ហុងកុង បាន​ដែរ ឬ​ទេ?

ជា អ្នក​តំណាង​ធ្វើ​បទ​បង្ហាញ ជា​មោទនភាព​ហើយ​ក៏​ជា​បន្ទុក​មួយ​សម្រាប់​ខ្ញុំ​ដែរ។ មាន ២០ ក្រុមហ៊ុន​ដែល​បាន​ចូល​រួម​នៅ​ទីក្រុង ហុងកុង ដោយ​ខាង​យើង​ទៅ​ជាង ៤០នាក់។ នៅ​ក្នុង​ថ្ងៃ ទី១ និង​ថ្ងៃ ទី២ នោះ មួយ​ម៉ាត់​ណា​ក៏​គេ​និយាយ​ពី​អង្ករ​របស់ ថៃ និង​វៀតណាម ដែរ។ ថ្ងៃ ទី៣ យើង​អង្គុយ​នៅ​គ្រប់​ទិស​នៃ​បន្ទប់​ប្រជុំ ខ្ញុំ​ឡើង​ធ្វើ​បទ​បង្ហាញ​អំពី​អ្វី​ដែល​ខាង​វិស័យ​ឯកជន​យើង​កំពុង​ធ្វើ និង​អ្វី​ដែល​ខាង​ដៃ​គូ​អភិវឌ្ឍន៍​កំពុង​តែ​ធ្វើ និង​ឧបសគ្គ​ក្នុង​ការ​នាំ​ចេញ​អង្ករ​ឲ្យ​បាន​ចំនួន ១ លាន​តោន។ យើង​ឃើញ​ថា អ្នក​ស្តាប់​ចាប់​អារម្មណ៍​ការ​បង្ហាញ​របស់​យើង​ខុស​ពី​ថ្ងៃ ទី១ និង​ថ្ងៃ ទី២។ ខ្ញុំ​ប្រាប់​ថា ខ្ញុំ​ជា​តំណាង​កម្ពុជា ហើយ​គ្នា​យើង​ក្រោក​ឈរ​ឡើង​មើល​ទៅ​គ្នា​យើង​ច្រើន​មែន​ទែន។ នៅ​ពេល​នោះ​គេ​ចាប់​ផ្តើម ភ្ញាក់​ផ្អើល​ពីព្រោះ​អ្នក​ដែល​ទៅ​នោះ​សុទ្ធ​តែ​ក្មេងៗ និង​មាន​ភាព​ស្វាហាប់។ គាប់​ជួន​នៅ​ពេល​នោះ​យើង​ឈ្នះ​ទៀត។ អ៊ីចឹង​ធ្វើ​ឲ្យ​គេ​រឹត​តែ​ស្គាល់​យើង​ច្រើន។

២-ដំណើរ​ជ្រើស​រើស​អង្ករ​ឆ្ញាញ់​លេខ ១ តើ​គេ​ធ្វើ​ឡើង​ដូចមេ្តច​ខ្លះ​នៅ​ទីក្រុង ហុងកុង?

អ្នក​ធ្វើ​ស្រែ​នៅ​លើ​ពិភពលោក​គឺ​សុទ្ធ​តែ​មាន​សិទ្ធិ​ដាក់​អង្ករ​ចូល​ប្រកួត។ ខ្ញុំ​មិន​ចាំ​ថា មាន​ចំនួន​ប៉ុន្មាន​ទេ ប៉ុន្តែ​នៅ​វគ្គ​ជម្រុះ​ដំបូង​គឺ​នៅ​សល់ ៦ ប្រទេស រួម​មាន​ខ្មែរ មីយ៉ាន់មា ថៃ វៀតណាម ឥណ្ឌា និង អាមេរិក (អង្ករ កាលី​ហ្វ័រនីញ៉ា)។ លើក ទី២ នៅ​សល់​ចំនួន​បី​ប្រទេស​មាន កម្ពុជា ថៃ និង​អង្ករ កាលីហ្វ័រនីញ៉ា។ មួយ​តង់​ទៀត​នៅ​សល់​យើង​និង អាមេរិក (អង្ករ​កាលីហ្វ័រនីញ៉ា)។ ចុងភៅ​លំដាប់​ថ្នាក់​ពិភពលោក​ជា​អ្នក​វាយតម្លៃ និង​ឲ្យ​ពិន្ទុ។ ការ​មើល​នេះ​គេ​ផ្តោត​លើ​បួន​ចំណុច​មុន​ពេល​ដាំ និង​ក្រោយ​ពេល​ដាំ។ ទី១ គឺ​គេ​មើល​លើ​ក្លិន ទី២ គេ​មើល​លើ​រូប​រាង​អង្ករ និង ទី៣ ភាព​រលោង និង ទី៤ ប្រវែង​គ្រាប់​អង្ករ។ ក្រោយ​ពី​ដាំ​រួច គេ​មើល​លើ​ចំណុច​ដូច​រៀបរាប់​ខាង​លើ។

៣-តើ​ពាន​រង្វាន់​នោះ​មាន​ន័យ​យ៉ាង​ណា​ចំពោះ​ប្រទេស​កម្ពុជា?

ខ្ញុំ​គិត​ថា កាល​ពី​ឆ្នាំ ២០១២ យើង​ឈ្នះ តែ​មិន​បាន​ទទួល​អត្ថ​ប្រយោជន៍​ច្រើន​ទេ ព្រោះ​យើង​មិន​បាន​ធ្វើ​អ្វី​ដែល​ច្បាស់​លាស់។ ការ​ឈ្នះ​ឆ្នាំ ២០១៣ គឺ​មាន​ផល​វិជ្ជមាន​ច្រើន។ ឈ្នះ​លើក​នេះ​ឃើញ​ថា យើង​ទទួល​បាន​នូវ​ការ​ចាប់​អារម្មណ៍​ច្រើន​ណាស់។​ឃើញ​មាន​ប្រតិកម្ម​ពី ប្រព័ន្ធ​ផ្សព្វ​ផ្សាយ​ជាច្រើន។ អ៊ីចឹង​យើង​យក​ពាន​មក​ស្រុក​ខ្មែរ គឺ​ខ្មែរ​អ្នក​ឈ្នះ កសិករ​ខ្មែរ​ជា​អ្នក​ឈ្នះ។ ពាន​រង្វាន់​នេះ​មិន​មែន​ជា​កម្មសិទ្ធិ​របស់​នរណា​ម្នាក់​នោះ​ឡើយ គឺ​របស់​ខ្មែរ​ជា​រួម។ នេះ​ជា​ចំណុច​ចាប់​ផ្តើម​មួយ​សម្រាប់​យើង​រួប​រួម​គ្នា​ជំរុញ​វិស័យ​អង្ករ។

៤-តើ​អ្វី​ទៅ​ជា​ឧបសគ្គ​សម្រាប់​វិស័យ​ឯកជន​ក្នុង​ការ​នាំ​ចេញ​អង្ករ​ទៅ​បរទេស?

ទី១ គឺ​លុយ ការ​ប្រាក់​វា​ខ្ពស់។ ធ្វើ​រោង​ម៉ាស៊ីន​ខ្ចី​លុយ​គេ​ម្តង។ ទិញ​ស្រូវ​ខ្ចី​លុយ​គេ​ម្តង​ទៀត។ លក់​អង្ករ​គេ​ជំពាក់​ទៀត។ ហានិភ័យ​កាន់​តែ​ច្រើន។ យើង​ត្រូវ​ការ​កម្ចី​ដែល​មាន​ការ​ប្រាក់​ទាប។ នេះ​បើ​និយាយ​ពី​បញ្ហា​វិនិយោគ។ ទី២ គឺ​តម្លៃ​ផ្គត់​ផ្គង់​ថាមពល។ បើ​ប្រៀប​ធៀប​ជាមួយ​ប្រទេស​ជិត​ខាង ការ​ផ្គត់​ផ្គង់​ថាមពល​នៅ​ទាប ធ្វើ​ឲ្យ​តម្លៃ​ថ្លៃ។ វា​ជា​បញ្ហា​ធំ​តែ​ម្តង​ព្រោះ​ធ្វើ​ឲ្យ​ការ​ប្រតិបត្តិការ​រោងចក្រ​របស់​យើង​ថ្លៃ មិន​អាច​ប្រកួត​ប្រជែង​ផ្នែក​តម្លៃ​អង្ករ​ជាមួយ​ប្រទេស​ជិត​ខាង។ ទី៣ គឺ​តម្លៃ​ដឹក​ជញ្ជូន និង​សេវាកម្ម​ឡូជីស្ទីក។ តម្លៃ​ដឹក​ជញ្ជូន​ថោក​ជាង​គេ​គឺ​ផ្លូវ​ទឹក បន្ទាប់​មក​ផ្លូវ​ដែក បន្ទាប់​មក​ផ្លូវ​គោក ហើយ​ថ្លៃ​ជាង​គេ​គឺ​ផ្លូវ​អាកាស។ បច្ចុប្បន្ន​យើង​ប្រើ​ផ្លូវ​គោក ដែល​មាន​តម្លៃ​ថ្លៃ។ យើង​នៅ​ខ្វះ​សេវាកម្ម​ដឹក​ជញ្ជូន​ដែល​មាន​តម្លៃ​ថោក។ ទី៤ យើង​ខ្វះ​ការ​ផ្សព្វ​ផ្សាយ ការ​ធ្វើ​ទីផ្សារ។ ប្រសិន​បើ​យើង​អាច​ផ្សារ​ភ្ជាប់​ជាមួយ​វិស័យ​ទេសចរណ៍​ដើម្បី​ផ្សព្វ​ផ្សាយ​បន្ថែម ខ្ញុំ​ជឿ​ថា ពិភពលោក​នឹង​កាន់​តែ​ស្គាល់​ពី​អង្ករ​កម្ពុជា។

តម្លៃ​ស្រូវ​យើង​ទិញ​ពី​ស្រែ​មក​មិន​ខុស​ពី​ប្រទេស​ជិត​ខាង​ទេ តែ​តម្លៃ​សម្ងួត តម្លៃ​ដឹក​ជញ្ជូន ធ្វើ​ឲ្យ​ការ​ផលិត​របស់​យើង​មាន​តម្លៃ​ខ្ពស់ ពិបាក​ប្រកួត​ប្រជែង។

៥-តើ​លោក​មើល​ឃើញ​វិស័យ​អង្ករ​កម្ពុជា​មាន​សក្តានុពល​បែប​ណា​ដែរ?

វិស័យ​អង្ករ​យើង​មាន​សក្តានុពល​ជាង​ប្រទេស​ក្បែរ​ខាង ព្រោះ​យើង​នៅ​ប្រើ​វិធី​បែប​ប្រពៃណី​នៅ​ឡើយ បើ​ប្រៀប​ធៀប​នឹង​ប្រទេស​ជិត​ខាង​។ យើង​ផលិត​បាន​ស្រូវ ៩ លាន​តោន។ តែ​បើ​កម្ពុជា​មាន​ប្រព័ន្ធ​ធារាសាស្រ្ត​គ្រប់​គ្រាន់​វិញ ហើយ​យើង​ប្រើ​ប្រាស់​ដី​ឲ្យ​អស់​ពី​លទ្ធភាព​នោះ យើង​អាច​ធ្វើ​បាន​ផល ២០ លាន​តោន​ស្រូវ។ យើង​នៅ​មិន​មាន​លទ្ធភាព​គ្រប់​គ្រង​ទឹក​ផង​ដែរ។ ប្រសិន​បើ​យើង​មាន​ប្រព័ន្ធ​ទិន្នន័យ​ពី​ការ​សិក្សា​ពី​ប្រភេទ​ដី​ណា​គួរ​ដាំ​ស្រូវ​ប្រភេទ​ណា​ល្អ ខេត្ត​ណា​ដែល​មាន​សក្តានុពល​សម្រាប់​ស្រូវ​ប្រភេទ​ណា​នោះ វា​ជា​រឿង​ល្អ។

៦ តាម​រយៈ​បទ​ពិសោធ​ចូល​រួម​ក្នុង​ការ​ប្រកួត​ជា​អន្តរជាតិ​ជាមួយ​ប្រទេស ដទៃ តើ​អ្វី​ដែល​លោក​មើល​ឃើញ​ថា គួរ​ពង្រឹង​បន្ថែម​ទៀត​សម្រាប់​វិស័យ​អង្ករ​កម្ពុជា?

ដើម្បី​ជំរុញ​ឲ្យ​វិស័យ​អង្ករ​មាន​ភាព​ឈាន​មុខ ទី១ រដ្ឋាភិបាល​គួរ​ពង្រឹង​ការ​ជួយ​បន្ថែម​ទៀត មិន​ត្រឹម​តែ​ដំណើរការ​ឯកសារ​សម្រាប់​ការ​នាំ​ចេញ​នោះ​ទេ តែ​ក៏​គួរ​យក​ចិត្ត​ទុក​ដាក់​ក្នុង​រឿង​ផ្សព្វ​ផ្សាយ​ផង​ដែរ។ សម្រាប់​វិស័យ​ឯកជន គួរ​ចាប់​ផ្តើម​ពង្រឹង​គុណភាព​អង្ករ។ ក្នុង​ករណី​នេះ ក្រុមហ៊ុន Brico មាន​គម្រោង​ធ្វើ​កិច្ចសន្យា​ជាមួយ​កសិករ​ក្នុង​ការ​ដាំ​ដុះ ការ​ជ្រើស​រើស​ពូជ និង​ការ​ប្រើ​ប្រាស់​ដី។ យើង​នឹង​មាន​អ្នក​ជំនាញ​ជួយ​កិច្ចការ​នេះ។ យើង​ជិត​ធ្វើ​សមាហរណកម្ម​សេដ្ឋកិច្ច​អាស៊ាន​ហើយ ដូច្នេះ​ការ​នាំ​ចេញ​នាំ​ចូល​តាម​ព្រំដែន​នឹង​មិន​ជាប់​ពន្ធ​ឡើយ។ យើង​ត្រូវ​តែ​ត្រៀម​ខ្លួន​ឲ្យ​បាន​ល្អ ដើម្បី​ប្រកួត​ប្រជែង ជាមួយ​គេ​ទាំង​តម្លៃ គុណភាព និង​សេវាកម្ម។

អ្វី​ដែល​គួរ​យក​ចិត្ត​ទុក​ដាក់​ខ្ញុំ​គិត​ថា វិស័យ​ឯកជន​គួរ​ចាប់​ផ្តើម​ធ្វើ​ការ​ជា​ក្រុម​ដើម្បី​ជំរុញ​វិស័យ​អង្ករ​នេះ។ អ្នក​បញ្ជា​ទិញ​មិន​ចង់​ទាក់​ទង​អ្នក​នាំ​ចេញ​ច្រើន​ពេក​ទេ។ ប្រសិន​បើ​យើង​មិន​ធ្វើ​ការ​ជា​ក្រុម យើង​មិន​អាច​នាំ​អង្ករ​ចេញ​ក្នុង​ចំនួន​ច្រើន​នោះ​ទេ។ បើ​មិន​ដូច្នេះ​ទេ ការ​បញ្ជា​ទិញ​អង្ករ​ក្នុង​ចំនួន​ច្រើន​នោះ នឹង​ត្រូវ​បង្វែ​ទៅ​រក​ទីផ្សារ​ប្រទេស​ជិត​ខាង​យើង​វិញ​ហើយ។

យើង​ត្រូវ​តែ​ដើរ​ឲ្យ​ទាន់​គេ។​ឥឡូវ​នេះ​យើង​មាន​ផលិតផល​ល្អ​ហើយ​។ យើង​ត្រូវ​ការ​ការ​វេច​ខ្ចប់ និង​ដឹក​ជញ្ជូន ធ្វើ​យ៉ាង​ណា​កាត់​បន្ថយ​ការ​ចំណាយ និង​រក្សា​គុណភាព​ឲ្យ​នៅ​ថេរ។ យើង​ត្រូវ​ការ​ថាមពល និង​ការ​ដឹក​ជញ្ជូន​ដែល​មាន​តម្លៃ​សមរម្យ។ វា​ជា​ទំនួល​ខុស​ត្រូវ​របស់​រដ្ឋាភិបាល​ក្នុង​ការ​កាត់​បន្ថយ​ការ​ចំណាយ​លើ​កត្តា​ទាំង​ពីរ​នេះ៕

អត្ថបទគួរចាប់អារម្មណ៍