The Phnom Penh Post Search

Search form

Logo of Phnom Penh Post newspaper Phnom Penh Post - សភា​ពាណិជ្ជកម្មៈ កម្ពុជា​មាន​ការងារ​ច្រើន​ត្រូវ​ធ្វើ




សភា​ពាណិជ្ជកម្មៈ កម្ពុជា​មាន​ការងារ​ច្រើន​ត្រូវ​ធ្វើ

សភា​ពាណិជ្ជកម្មៈ កម្ពុជា​មាន​ការងារ​ច្រើន​ត្រូវ​ធ្វើ

131227_12
លោក ងួន ម៉េងតិច អគ្គនាយកសភាពាណិជ្ជកម្មកម្ពុជា ក្នុងបទសម្ភាសជាមួយភ្នំពេញ ប៉ុស្តិ៍

ភ្នំពេញៈ ថ្មីៗ​នេះ​រដ្ឋាភិបាល​បាន​ដាក់​ចេញ​គោល​នយោបាយ​មួយ​ចំនួន​ក្នុង​បំណង​ជំរុញ​វិស័យ​ឯកជន​ក្នុង​ស្រុក។ គោល​នយោបាយ​នោះ​រួម​មាន​ការ​រឹត​បន្តឹង​ពន្ធ​លើ​ទំនិញ​នាំ​ចេញ នាំ​ចូល ការ​ដាក់​ថ្ងៃ​កំណត់​ដើម្បី​ឲ្យ​មន្ត្រី​គយ និង​ពន្ធដារ​លុប​បំបាត់​ភាព​មិន​ប្រក្រតី ការ​បង្កើត​ឲ្យ​មាន​សេវា​ច្រក​ចេញ​ចូល​តែ​មួយ​ដើម្បី​សម្រួល​ដល់​ការ​នាំ​ចេញ​ជាដើម។

លោក ងួន ម៉េងតិច អគ្គ​នាយក​សភា​ពាណិជ្ជកម្ម​កម្ពុជា​និយាយ​ថា គោល​នយោបាយ​របស់​រដ្ឋាភិបាល​កំពុង​ជួយ​ជំរុញ​វិស័យ​ឯកជន​នៅ​កម្ពុជា តែ​ថា នៅ​មាន​ឧបសគ្គ​ដែល​ត្រូវ​ដោះស្រាយ ខណៈ​វិនិយោគិន​កំពុង​ពិចារណា​លើ​សក្តានុពល​ក្នុង​ការ​វិនិយោគ​នៅ​កម្ពុជា។

តើ​ផែនការ​សកម្មភាព​របស់​សភា​ពាណិជ្ជកម្ម​មាន​អ្វី​ខ្លះ?

សកម្មភាព​សំខាន់​របស់​យើង​គឺជា​ការ​រៀបចំ​វេទិកា​រវាង​វិស័យ​ឯកជន ជាមួយ​នឹង​រដ្ឋាភិបាល ដែល​យើង​បាន​ផ្អាក​កាល​ពី​ឆ្នាំ​មុន​ដោយ​សារ​កិច្ច​ប្រជុំ​អាស៊ាន។ វេទិកា​នេះ គឺ​សម្រាប់​ផ្នែក​វិស័យ​ឯកជន លើក​ឡើង​ពី​ការ​លំបាក​ទៅ​រដ្ឋាភិបាល​ដើម្បី​រក​ដំណោះស្រាយ។

កន្លង​មក ហើយ​ជា​ទម្លាប់ យើង​មាន​សកម្មភាព​ជួប​ជាមួយ​គណៈប្រតិភូ​ពី​ប្រទេស​ផ្សេងៗ​ដែល​គេ​មាន​ចំណាប់​អារម្មណ៍​ក្នុង​ការ​វិនិយោគ​នៅ​កម្ពុជា។ យើង​បាន​ធ្វើការ​ផ្គូផ្គង​អ្នក​វិនិយោគ​ក្រៅ​ប្រទេស​ជាមួយ​អ្នក​រក​ស៊ី​ក្នុង​ស្រុក មាន ហុងកុង ចិន ម៉ាឡេស៊ី និង សិង្ហបុរី ជា​ហូរហែ។

តើ​វិស័យ​ឯកជន​មាន​ការ​វិវឌ្ឍ​ដល់​កម្រិត​ណា​ដែរ​ហើយ?

ជា​រួម​គ្រប់​វិស័យ​ឃើញ​មាន​ការ​រីក​ចម្រើន ប៉ុន្តែ​យើង​មាន​ឃើញ​ការ​កើន​ឡើង​ក្នុង​ការ​នាំ​ចេញ​ផ្នែក​អង្ករ ព្រោះ​យើង​បាន​ដាក់​ផែនការ​នាំ​ចេញ​អង្ករ​ដល់​មួយ​លាន​តោន​នៅ​ឆ្នាំ ២០១៥។

រដ្ឋាភិបាល​បាន​សម្រួល​នីតិវិធី​ក្នុង​ការ​នាំ​ចេញ​នោះ​ដែរ។ រដ្ឋាភិបាល​កំពុង​ផ្តោត​ទៅ​លើ​ការ​នាំ​ចេញ​ផលិតផល​កសិកម្ម​ជា​ចម្បង ដូច​ជា ដំឡូង​មី ពោត សណ្តែក គ្រាប់​ស្វាយ​ចន្ទី ជា​ពិសេស ផលិតផល​កៅស៊ូ​មាន​ការ​នាំ​ចេញ​ច្រើន។

ឧស្សាហកម្ម​កៅស៊ូ​គឺ​កំពុង​មាន​ការ​រៀបចំ​គោល​ការណ៍​ក្នុង​ការ​នាំ​ចេញ​ដើម្បី​ឲ្យ​មាន​ភាព​សុក្រឹត និង​យុត្តិធម៌ ប៉ុន្តែ​ច្បាប់​ហ្នឹង​មិន​ទាន់​ចេញ​ជា​រូប​រាង​ទេ ព្រោះ​យើង​ទើប​តែ​មាន​សិក្ខាសាលា​កាល​ពី​ដើម​ខែ ១២។

តើ​អ្វី​ទៅ​ដែល​នៅ​ជា​ឧបសគ្គ​របស់​វិស័យ​ឯកជន?

ឧបសគ្គ​ក្នុង​វិស័យ​ឯកជន គឺ​ទាក់​ទង​នឹង​សំបុត្រ​ស្នាម​ដើម្បី​នាំ​ចេញ​មាន​ការ​យឺត​យ៉ាវ នីតិវិធី​មិន​ត្រឹម​ត្រូវ​។ ភាគ​ច្រើន​គឺ​ក្រុមហ៊ុន​មិន​យល់​ពី​ដំណើរការ​នៃ​ការ​រៀបចំ​ឯកសារ នៅ​ពេល​ដែល​មាន​ដំណាក់កាល​ច្រើន​ទាមទារ​ពេល​វេលា​ច្រើន។ ឯកសារ​មិន​គ្រប់​គ្រាន់ មិន​អាច​នាំ​ទំនិញ​ចេញ​បាន។ ដោយ​សារ​ប្រទេស​យើង​មិន​មែន​ជា​ប្រទេស​ឧស្សាហកម្ម ហើយ​យើង​ទើប​តែ​មាន​ការ​រៀបចំ​ដំណើរការ​នាំ​ចេញ ដូច្នេះ​យើង​មាន​ជួប​បញ្ហា​រអាក់​រអួល​នៅ​ឡើយ​ដូចជា​ការ​រៀបចំ​បែបបទ​ក្នុង​ការ​នាំ​ចេញ។ ឯ​ខាង​វិស័យ​ឯកជន​យល់​ថា​ប៉ុណ្ណឹង​វា​គ្រប់​ហើយ តែ​ខាង​គយ​និង​ពន្ធដារ​ថា វា​មិន​ទាន់​គ្រប់ ដូច្នេះ​ត្រូវ​ដក​ឃ្លា​មក​រៀបចំ​ឯកសារ​ឡើង​វិញ។ វា​ទាមទារ​ពេល​វេលា។ ខ្ញុំ​ស្នើ​សុំ​ទៅ​ខាង​គយ​និង​ពន្ធដារ ឲ្យ​គេ​រៀបចំ​ភ្នាក់ងារ​ច្បាស់​លាស់​មួយ​ដើម្បី​ផ្តល់​ព័ត៌មាន និង​ឆ្លើយ​តប នៅ​ពេល​ក្រុមហ៊ុន​ជួប​បញ្ហា។ គេ​បាន​ឲ្យ​ឈ្មោះ​មក​ហើយ ខ្ញុំ​សង្ឃឹម​ថា បន្ទាប់​ពី​ពេល​នេះ ទៅ​យើង​អាច​សម្រួល​កិច្ចការ​នេះ​បាន​រហ័ស​ជាង​មុន។

និន្នាការ​នៃ​ការ​វិនិយោគ​បច្ចុប្បន្ន​ផ្តោត​លើ​វិស័យ​ណា​ខ្លះ?

អ្នក​វិនិយោគ​គេ​ចាប់​អារម្មណ៍​លើ​គ្រប់​វិស័យ ប៉ុន្តែ​រដ្ឋាភិបាល​ផ្តោត​ខ្លាំង​លើ​ឧស្សាហកម្ម​អង្ករ។ អ្នក​វិនិយោគ​ឥឡូវ​ក៏​ផ្តោត​អារម្មណ៍​លើ​វិស័យ​កសិកម្ម​ដែរ។ ដូចជា​ប្រទេស ចិន ដែល​គេ​ចង់​វិនិយោគ​ខ្លាំង​ទៅ​លើ​វិស័យ​កសិកម្ម​យើង។ ព្រោះ​យើង​អាច​មាន​លទ្ធភាព​ជួយ​ផ្តល់​ដី​សម្បទាន​សម្រាប់​ការ​ដាំ​ដុះ​កសិកម្ម​មាន​ដាំ​ស្រូវ សណ្តែក ដំឡូង ពោត​ជាដើម។ នេះ​ជា​កត្តា​មួយ​ជំរុញ​ឲ្យ​គេ​វិនិយោគ​នៅ​ស្រុក​យើង​ដែរ។

មួយ​រយៈ​នេះ ការ​វិនិយោគ​វិស័យ​កសិកម្ម​មាន​ភាព​ផុស​ផុល​ខ្លាំង។ ជាក់ស្តែង យើង​ឃើញ​មាន​ការ​វិនិយោគ​រួម​រវាង​អ្នក​វិនិយោគ ចិន និង​លោក​ឧកញ៉ា ម៉ុង ឫទ្ធី ក្នុង​ការ​ចាប់​ផ្តើម កសិដ្ឋាន​ចិញ្ចឹម​ជ្រូក​ជាដើម។

គេ​សម្លឹង​ឃើញ​ទីផ្សារ​ផ្គត់​ផ្គង​ផលិតផល​ក្នុង​ស្រុក​ដែល​នៅ​មិន​ទាន់​មាន​ភាព​ទូលំ​ទូលាយ​នៅ​ឡើយ។ យើង​នាំ​ចូល​ពី​ប្រទេស​ជិត​ខាង​មក​ដែល​ជា​ការ​ខាត​បង់​ច្រើន។ ដូច្នេះ​ហើយ​ទើប​មាន​ការ​វិនិយោគ​ទុន​ដើម្បី​ផ្គត់​ផ្គង់​តម្រូវការ​ទីផ្សារ​ក្នុង​ស្រុក​សិន មិន​ទាន់​គិត​ដល់​ការ​នាំ​ចេញ​នៅ​ឡើយ​ទេ។ ដូច​វិស័យ​សាងសង់​ជាដើម ស៊ីម៉ងត៍​ដែល​ផលិត​នៅ​ក្នុង​ស្រុក​ផ្គត់​ផ្គង់​បាន​ត្រឹម​តែ ២៥ ភាគរយ​នៃ​តម្រូវការ​ទីផ្សារ​ប៉ុណ្ណោះ។ ដូច្នេះ​យើង​កំពុង​ទាក់​ទាញ​ការ​វិនិយោគ​លើ​ផលិតកម្ម​ក្នុង​ស្រុក​ផង​ដែរ។

ស្ថានការណ៍​មុន​និង​ក្រោយ​បោះឆ្នោត​បាន​ប៉ះពាល់​ដល់​អ្នក​វិនិយោគ​យ៉ាង​ណា​ដែរ?

មុន និង​ក្រោយ​បោះឆ្នោត គឺ​មិន​មាន​ផល​ប៉ះពាល់​អ្វី​ធ្ងន់​ធ្ងរ​នោះ​ទេ ដោយសារ​តែ​គោល​នយោបាយ​រដ្ឋាភិបាល​មិន​មាន​ការ​ផ្លាស់​ប្តូរ គឺ​គោល​នយោបាយ​ការ​វិនិយោគ​បរទេស។

ទំនាក់​ទំនង​រវាង​រដ្ឋាភិបាល​ជាមួយ​សភា​ពាណិជ្ជកម្ម និង​អ្នក​វិនិយោគ​មិន​មាន​ការ​ប៉ះពាល់​ទេ។ អ្វី​ដែល​អាច​ប៉ះពាល់​ហើយ​ដែល​ខ្ញុំ​បារម្ភ​នោះ គឺ​ចលនា​បាតុកម្ម​ដែល​កើត​មាន​ក្រោយ​ការ​បោះឆ្នោត​នេះ​ឯង។ ការ​បន្ត​ធ្វើ​បាតុកម្ម​នឹង​អាច​ធ្វើ​ឲ្យ​អ្នក​វិនិយោគ​ខ្លាច​រអា​ក្នុង​ការ​មក​បណ្តាក់​ទុន​នៅ​ស្រុក​ខ្មែរ។ គេ​អាច​ធុញ​ទ្រាន់​នឹង​ភាព​រញ៉េរញ៉ៃ។ បាតុកម្ម​អាច​នឹង​ធ្វើ​ឲ្យ​អ្នក​វិនិយោគ ដក​ឃ្លា​ពិចារណា​ពី​ការ​បណ្តាក់​ទុន​នៅ​កម្ពុជា។ បាតុករ​គួរ​តែ​ពិចារណា​ពី​ទង្វើ​របស់​ខ្លួន​ឡើង​វិញ ចំពោះ​គុណសម្បត្តិ​និង​គុណ​វិបត្តិ​នៃ​ទង្វើ​របស់​ពួក​គេ ចំពោះ​សេដ្ឋកិច្ច ក៏​ដូច​ជា​ខ្លួន​គេ​ផ្ទាល់។

កន្លង​មក​សភា​ពាណិជ្ជកម្ម​បាន​អន្តរាគមន៍​ចំពោះ​ទីផ្សារ និង​តម្លៃ​ផលិតផល​របស់​កសិករ​ដូចម្តេច​ខ្លះ​ដែរ?

ក្រុមហ៊ុន​នីមួយៗ​គេ​រក​ទីផ្សារ​ដោយ​ខ្លួន​ឯង​។ សភា​ពាណិជ្ជកម្ម ជា​អ្នក​ចាំ​សម្រប​សម្រួល គោល​ការណ៍​នយោបាយ​របស់​រដ្ឋាភិបាល​ដែល​មាន​ឥទ្ធិពល​លើ​ដំណើរការ​រក​ស៊ី​របស់​គេ។ បើ​មិន​មាន​ការ​សម្រប​សម្រួល​នេះ​យើង​មិន​មាន​ការ​រីក​ចម្រើន​ផ្នែក​វិស័យ​ឯកជន​ទេ។ ការ​អន្តរាគមន៍​របស់​រដ្ឋាភិបាល​មាន​ច្រើន បន្ទាប់​ពី​មាន​ការ​លើក​ឡើង​ក្នុង​វេទិកា​នោះ។

យើង​ឃើញ​សេដ្ឋកិច្ច​របស់​យើង​ដែល​មាន​លំនឹង​នេះ​មិន​មែន​ជា​ការ​ចៃដន្យ នោះ​ទេ គឺ​ដោយសារ​យើង​រៀបចំ​ផែនការ​បាន​ល្អ។ ការ​ផ្លាស់​ប្តូរ គោល​នយោបាយ​របស់​រដ្ឋាភិបាល​ក្នុង​ច្បាប់​វិនិយោគ​ជាដើម​ដូច​ជា គោល​នយោបាយ​បើក​ចំហ​ជើង​មេឃ​ដែល​បាន​ទាក់​ទាញ​ជើង​យន្តហោះ និង​ភ្ញៀវ​ទេសចរ ធ្វើ​ឲ្យ​មាន​កំណើន​សម្រាប់​អ្នក​រក​ស៊ី ក្នុង​វិស័យ​ទេសចរណ៍។ ការ​ផ្លាស់​ប្តូរ​គោល​នយោបាយ​បន្តិច​បន្តួច​នេះ​គឺ​បាន​ជួយ​ដល់​វិស័យ​ឯកជន​ច្រើន​ណាស់។

សភា​ពាណិជ្ជកម្ម​កម្ពុជា​នឹង​ធ្វើ​អ្វី​សម្រាប់​ឆ្នាំ ២០១៤?

យើង​នឹង​រៀបចំ​វេទិកា​ធំ​មួយ​ជាមួយ​រដ្ឋាភិបាល​នៅ​ខែ មីនា ឆ្នាំ​ក្រោយ។ យើង​និង​រង់ចាំ​ស្តាប់​ពី​ក្រុម​ការងារ​ក្នុង​វិស័យ​ទាំង ៩ នោះ​លើក​ឡើង​ពី​ការ​លំបាក​និង​សំណូមពរ​របស់​គេ។ ជា​ទូទៅ ដំណោះស្រាយ​បាន​ត្រឹម​តែ ១ ភាគ​បួន​ក្នុង​ចំណោម​បញ្ហា​ដែល​លើក​ឡើង​ទាំង អស់​។ អ្វី​ដែល​នៅ​តែ​ជា​បញ្ហា​នៅ​ឡើយ​នោះ គឺ​ការ​ដឹក​ជញ្ជូន​ការ​បំពេញ​បែបបទ​នៃ​ការ​នាំ​ចេញ នាំ​ចូល និង​ការ​សម្រប​សម្រួល​ឲ្យ​រហ័ស។ បើ​ដោះស្រាយ​បាន​នោះ​វិស័យ​ឯកជន​អាច​រីក​ចម្រើន​បាន​លឿន​ជាង​នេះ។ សភា​ពាណិជ្ជកម្ម​កម្ពុជា ឥឡូវ​កំពុង​ពិភាក្សា​រក​ដំណោះស្រាយ​ជាមួយ​ក្រសួង​ពាក់​ព័ន្ធ និង​ការិយាល័យ​គយ និង​ពន្ធដារ​ដើម្បី​ពន្លឿន​ការ​រីក​ចម្រើន​សេដ្ឋកិច្ច។

លោក​យល់​យ៉ាង​ណា​ចំពោះ ការ​ដាក់​ចេញ​របស់​រដ្ឋាភិបាល​ដើម្បី​ឲ្យ​ស្ថាប័ន​គយ និង​ពន្ធដារ លុប​បំបាត់​ភាព​មិន​ប្រក្រតី?

រដ្ឋាភិបាល​បាន​រក​ឃើញ​ភាព​មិន​ប្រក្រតី​មាន​ហើយ​ទើប​ដាក់​ចេញ​គោល​នយោបាយ​នេះ។ យើង​ត្រូវ​រង់ចាំ​មើល​វិធានការ​បន្ទាប់​របស់​រដ្ឋាភិបាល​ក្រោយ​ថ្ងៃ​កំណត់។ យើង​ដឹង​ថា មាន​ក្រុមហ៊ុន​មួយ​ចំនួន​ដែល​ជួប​ការ​លំបាក​ក្នុង​ទំនាក់​ទំនង​ជាមួយ ការិយាល័យ គយ និង​ពន្ធដារ​ដែរ​។ ខ្ញុំ​មិន​អាច​និយាយ​ឲ្យ​ច្បាស់​ជាង​នេះ​ទេ។ យើង​ត្រូវ​រង់​ចាំ​មើល​លទ្ធផល​ទាំង​អស់​គ្នា​បន្ទាប់​ពី​នេះ៕

អត្ថបទគួរចាប់អារម្មណ៍