The Phnom Penh Post Search

Search form




Logo of Phnom Penh Post newspaper Phnom Penh Post - សេដ្ឋវិទូ៖ កំណែ​ទម្រង់​ពន្ធ​គយ​ប៉ះពាល់​រយៈ​ពេល​ខ្លី

សេដ្ឋវិទូ៖ កំណែ​ទម្រង់​ពន្ធ​គយ​ប៉ះពាល់​រយៈ​ពេល​ខ្លី

សេដ្ឋវិទូ៖ កំណែ​ទម្រង់​ពន្ធ​គយ​ប៉ះពាល់​រយៈ​ពេល​ខ្លី

131129_13
លោក កង ចន័្ទតារារ័ត្ន ក្នុងបទសម្ភាសជាមួយភ្នំពេញប៉ុស្តិ៍ ម៉ៃ វីរៈ

ភ្នំពេញៈ ខណៈ​តម្លៃ​ទំនិញ​ឡើង​ថ្លៃ ដោយ​សារ​គោល​នយោបាយ​រឹត​បន្តឹង​ពន្ធ​ដែល​ដាក់​ចេញ​ដោយ​រដ្ឋាភិបាល​កាល​ពី​ខែ តុលា កំពុង​បង្ក​ផល​ប៉ះពាល់ ដល់​ជីវភាព​ប្រជាជន ប៉ុន្តែ លោក កង ច័ន្ទតារារ័ត្ន ប្រធាន​វិទ្យាស្ថាន​ដើម្បី​ការ​សិក្សា​អភិវឌ្ឍន៍​កម្ពុជា​និយាយ​ថា នេះ​ជា​សញ្ញា​វិជ្ជមាន​សម្រាប់​ការ​អភិវឌ្ឍ​សេដ្ឋកិច្ច​កម្ពុជា​ក្នុង​រយៈ​ពេល​វែង។

តើ​លោក​យល់​យ៉ាង​ណា​ចំពោះ​ការ​ដាក់​ចេញ​គោល​នយោបាយ​រឹត​បន្តឹង​ពន្ធ​ដោយ​រដ្ឋាភិបាល​នា​ពេល​ថ្មីៗ​នេះ?

ខ្ញុំ​គិត​ថា វា​ជា​រឿង​ល្អ ព្រោះ​រដ្ឋ​យើង​ជំពាក់​បំណុល​គេ​ច្រើន​។ យើង​ត្រូវ​ការ​ប្រភព​ចំណូល​ដើម្បី​ការ​អភិវឌ្ឍ និង​ធ្វើ​ឲ្យ​សេដ្ឋកិច្ច​រីក​ចម្រើន។ វា​ចំ​ពេល​ល្អ​ព្រោះ​យើង​ត្រូវ​ការ​ថវិកា​ក្នុង​ការ​កសាង​មូលដ្ឋាន​សេដ្ឋកិច្ច។ ប្រទេស​យើង នៅ​តែ​ពឹង​ផ្អែក​លើ​ជំនួយ និង​បំណុល​បរទេស ហើយ​ឥឡូវ​ថ្ងៃ​ដែល​យើង​ត្រូវ​សង​លុយ​គេ​ក៏​ជិត​មក​ដល់​ដែរ​។ យើង​ត្រូវ​តែ​រក​ប្រភព​ចំណូល​ដើម្បី​ទ្រទ្រង់​មូលដ្ឋាន​សេដ្ឋកិច្ច។ សមាហរណកម្ម​សេដ្ឋកិច្ច​ឆ្នាំ ២០១៥ ក៏​ខិត​ចូល​មក​ដល់។ គេ​នឹង​ទាមទារ​ពី​កម្ពុជា​ពាក់​ព័ន្ធ​ការ​អនុវត្ត​ច្បាប់​និង​គោល​នយោបាយ​សេដ្ឋកិច្ច។ យើង​នឹង​មាន​ប្រព័ន្ធ​គ្រប់​គ្រង​ជាក់លាក់​ពី​ការ​ប្រមូល​ពន្ធ នៅ​ពេល​នោះ​។ យើង​ចាប់​ផ្តើម​យឺត​បន្តិច​ផង។

តើ​គោល​នយោបាយ​នេះ​នឹង​ជំរុញ​ឲ្យ​ផលិតកម្ម​ក្នុង​ស្រុក​ទទួល​បាន​ចំណែក​ខ្លះ​ក្នុង​ទីផ្សារ​ដែរ​ឬ​ទេ?

ក្រោយ​ពី​ការ​ពង្រឹង​ការ​ប្រមូល​ពន្ធ អ៊ីចឹង​តម្លៃ​នៃ​ទំនិញ​នឹង​កើន​ឡើង​។ ហេតុការណ៍​ទី​មួយ​នឹង​មាន​ការ​ផ្លាស់​ប្តូរ​ក្នុង​ការ​វិនិយោគ។ ទីពីរ ការ​វិនិយោគ​នឹង​ផ្តល់​ឱកាស​សម្រាប់​ការ​វិនិយោគ​ក្នុង​ស្រុក​ជាង​ការ​វិនិយោគ​មក​ពី​ខាង​ក្រៅ ហើយ​ខ្ញុំ​ជឿ​ថា ប្រហែល​មួយ​ឆ្នាំ​ក្រោយ យើង​នឹង​ឃើញ​លទ្ធផល​ថា​នឹង​មាន​ការ​ប្រែ​ប្រួល​ក្នុង​រចនា​សម្ព័ន្ធ​នៃ​ប្រព័ន្ធ​សេដ្ឋកិច្ច​ខ្លះ។ ប្រព័ន្ធ​ផលិតកម្ម​របស់​យើង​អាច​នឹង​មាន​ការ​បោះទុន​ផ្សេង​ទៀត​ទាក់​ទង​ទៅ​នឹង​រឿង​ធ្វើ​ម៉េច​ឲ្យ​មាន​ការ​ជំនួស​អីវ៉ាន់​នាំ​ចូល ថា​តើ​យើង​អាច​ធ្វើ​អ្វី​បាន​ខ្លះ។ យើង​មិន​ទាន់​ឃើញ​ថា វា​មាន​រូបភាព​ទេ ប្រហែល​ជា​មួយ​ឆ្នាំ​ទៀត វា​នឹង​ចេញ​រូបរាង​ហើយ។

ប៉ុន្តែ​ភ្លាមៗ​គោល​នយោបាយ​នេះ បាន​ធ្វើ​ឲ្យ​តម្លៃ​ទំនិញ​នាំ​ចូល​កើន​ឡើង​ហើយ​អ្នក​ក្រ​ប៉ះពាល់​ខ្លាំង?

ថ្លៃ​កើន​ឡើង​គឺ​ប៉ះពាល់​ទាំង​អស់​គ្នា​ហើយ​។ អ្វី​ដែល​កើត​មាន​ឡើង​នេះ ជា​អ្វី​ដែល​យើង​ត្រូវ​ទទួល​យក​សិន។ នៅ​ពេល​ដែល​ទីផ្សារ​ចាប់​ផ្តើម​ប្រែ​ប្រួល​ខ្លួន​ទៅ​តាម​គោល​នយោបាយ នេះ គឺ​ប្រជាជន​នឹង​បាន​ធូរ​វិញ មាន​ន័យ​ថា យើង​នឹង​ឃើញ​មាន​ផលិតផល​ផ្សេង​ចូល​មក​ជំនួស​ផលិតផល​ចាស់ៗ ដែល​យើង​នាំ​ចូល​ហើយ​ក៏​អាច​មាន​ផលិតផល​ខ្លះ​បង្កើត​នៅ​ក្នុង​ស្រុក​តែ​ម្តង ដែល​ធ្វើ​ឲ្យ​ប្រជាជន និង​ទីផ្សារ មាន​លំនឹង​ឡើង​វិញ។

ប្រតិកម្ម​ដំបូង​ពី​គោល​នយោបាយ​នេះ​មើល​ទៅ​ប្រជាជន​ហាក់​ដូចជា​រងគ្រោះ​ខ្លះ​ហើយ។

តើ​ការ​ឡើង​ថ្លៃ​មុខ​ទំនិញ​នៅ​ក្នុង​ទីផ្សារ​បង្ក​ជា​ផល​ប៉ះពាល់​ដល់​សេដ្ឋកិច្ច​ទាំង​មូល​ឬ​ទេ?

ការ​ឡើង​ថ្លៃ​នៃ​ទំនិញ​នឹង​ធូរ​ស្រាល​ឡើង​វិញ​នៅ​រយៈ​ពេល​មួយ​ឆ្នាំ​ទៀត ជា​ការ​ទស្សន៍ទាយ​របស់​ខ្ញុំ។ ចន្លោះ​ពេល​នេះ​យើង​ត្រូវ​បង្ក​បរិយាកាស​ឲ្យ​មាន​ការ​វិនិយោគ​ក្នុង​ស្រុក ដើម្បី​ឲ្យ​មាន​ផលិតផល​ជំនួស​នៃ​ទំនិញ​នាំ​ចូល​មួយ​ចំនួន។

តើ​រដ្ឋាភិបាល​គួរ​មាន​ចំណាត់​ការ​បែប​ណា​ក្នុង​ការ​ដោះស្រាយ​បញ្ហា​នេះ?

គាត់​ត្រូវ​គិត​ដល់​នយោបាយ​កាត់​បន្ថយ​ចំណាយ​ដែល​គ្មាន​ប្រសិទ្ធភាព​របស់​រដ្ឋ។ យើង​គួរ​បង្កើត​ច្បាប់​ទាក់​ទាញ​អ្នក​វិនិយោគ​ក្នុង​ស្រុក និង​ក្រៅ​ស្រុក​ឲ្យ​ផលិត​នៅ​ក្នុង​ស្រុក​ជំនួស​ការ​នាំ​ចូល​។ ឥឡូវ​គួរ​តែ​ចាប់​ផ្តើម​ហើយ កែ​សម្រួល​ច្បាប់ វិនិយោគ​ក្នុង​ស្រុក។ យើង​គួរ​តែ​យក​ចិត្ត​ទុក​ដាក់​ក្នុង​កត្តា​ថាមពល​ដែល​ជំរុញ​ការ​វិនិយោគ។ រយៈ​ពេល​មួយ​ឆ្នាំ​គឺ​ខ្លី​ណាស់។ វា​អាច​កាត់​បន្ថយ​ឥទ្ធិពល​អាក្រក់ ទៅ​លើ​ប្រជាជន ព្រោះ​ថា​ប្រសិន​បើ​ទំនិញ​នៅ​បន្ត​ឡើង​ថ្លៃ​រយៈ​ពេល​យូរ ការ​ឡើង​ថ្លៃ​នឹង​ក្លាយ​ទៅ​ជា​អតិផរណា ដែល​នាំ​ឲ្យ​កំណើន​សេដ្ឋកិច្ច​មិន​អាច​កើន​ខ្ពស់​បាន​ទេ។

កំណើន​សេដ្ឋកិច្ច​កម្ពុជា​និង​អតិផរណា​យ៉ាង​ណា​ដែរ​នៅ​ឆ្នាំ​ក្រោយ?

កំណើន​សេដ្ឋកិច្ច​នៅ​ឆ្នាំ ២០១៤ នឹង​ជួប​បញ្ហា​ខ្លះ ដោយ​សារ​វិបត្តិ​នយោបាយ។ បើ​មាន​កំណើន​ក៏​មិន​លើស ២០១៣ ដែរ។ គ្រាន់​តែ​ថា ២០១៤ សេដ្ឋកិច្ច​យើង​នឹង​មាន​គុណភាព​ជាង​ឆ្នាំ ២០១៣។ សេដ្ឋកិច្ច​កម្ពុជា​នឹង​ប្រែ​រូបភាព​ទៅ​ជា​មាន​ប្រព័ន្ធ​ផលិតកម្ម​ក្នុង​ស្រុក ចាប់​ផ្តើម​កកើត​ល្អ​ជាង​មុន គឺជា​គុណភាព​នៃ​កំណើន។ យើង​មិន​មែន​មាន​កំណើន​ដោយ​សារ​ការ​ធ្វើ​ជំនួញ​ពី​វិស័យ​ទេសចរណ៍ ផ្នែក​សេវាកម្ម​តិច​តួច​នោះ​ទេ។ អ្វី​ដែល​យើង​ចង់​បាន​គឺ​សេដ្ឋកិច្ច​មាន​កំណើន​អាច​ទប់​ទល់​នឹង​វិបត្តិ​ផ្សេងៗ​បាន គឺ​សេដ្ឋកិច្ច​យើង​មាន​ប្រព័ន្ធ​ផលិតកម្ម និង​ប្រព័ន្ធ​កែច្នៃ​ក្នុង​ស្រុក​ឲ្យ​រីក​សុសសាយ៕

អត្ថបទគួរចាប់អារម្មណ៍