The Phnom Penh Post Search

Search form

Logo of Phnom Penh Post newspaper Phnom Penh Post - ស៊ុន ចាន់ថុល៖ កំណែទ​ម្រង់​និង​ការ​សម្រួល​ពាណិជ្ជកម្ម




ស៊ុន ចាន់ថុល៖ កំណែទ​ម្រង់​និង​ការ​សម្រួល​ពាណិជ្ជកម្ម

ស៊ុន ចាន់ថុល៖ កំណែទ​ម្រង់​និង​ការ​សម្រួល​ពាណិជ្ជកម្ម

140124_13
លោក ស៊ុន ចាន់ថុល រដ្ឋមន្រីក្រសួងពាណិជ្ជកម្មដែលរដ្ឋាភិបាលតែងតាំងជំនួយលោក ចម ប្រសិទ្ធ ផា លីណា

ភ្នំពេញៈ លោក Joe Freeman ការី​និពន្ធ​រង​ផ្នែក​សេដ្ឋកិច្ច​របស់ ភ្នំពេញ ប៉ុស្ដិ៍ បាន​ធ្វើ​បទ​សម្ភាស​មួយ​ជាមួយ​លោក ស៊ុន ចាន់ថុល ដែល​បាន​ឡើង​កាន់​តំណែង​កាល​ពី​ខែ កញ្ញា បន្ទាប់​ពី​គណបក្ស​កំពុង​កាន់​អំណាច​បាន​រុះរើ​តំណែង​ជាន់​ខ្ពស់​មួយ​ចំនួន​ក្នុង​គ្រា​ដែល​សន្យា​ធ្វើ​ការ​កែ​ទម្រង់។

លោក ស៊ុន ចាន់ថុល ដែល​បាន​ឡើង​កាន់​តំណែង​ជំនួស​លោក ចម ប្រសិទ្ធ រដ្ឋ​មន្ដ្រី​ក្រសួង ពាណិជ្ជកម្ម ដែល​បាន​កាន់​តំណែង​រយៈ​ពេល​យូរ​នោះ ភ្លាមៗ​ធ្វើ​ការ​ផ្លាស់​ប្តូរ​ជាច្រើន ដែល​បង្ហាញ​ថា លោក​មក​នេះ​គឺ​ដើម្បី​ធ្វើ​កំណែ​ទម្រង់។ លោក ចាន់ថុល បាន​សិក្សា​នៅ អាមេរិក កាល​ពី​ចុង​ទសវត្សរ៍​ឆ្នាំ ១៩៧០ នាំ​យក​បទ​ពិសោធ​ខាង​វិស័យ​ឯកជន​អស់​រយៈ​ពេល​ជា​ច្រើន​ឆ្នាំ​មក​បម្រើ​ការងារ​នៅ​ក្នុង​ក្រសួង ពាណិជ្ជកម្ម ហើយ​លោក​បាន​ធ្វើ​ជា​មន្ត្រី​ប្រតិបត្តិ​មួយ​រូប​នៅ​ក្រុមហ៊ុន General Electric មុន​ពេល​លោក​ត្រឡប់​ចូល​មក កម្ពុជា នៅ​ទសវត្សរ៍​ឆ្នាំ ១៩៩០។

លោក​បាន​ជួយ​បង្កើត​ក្រុម​ប្រឹក្សា​អភិវឌ្ឍន៍​កម្ពុជា និង​បាន​ធ្វើ​ជា​រដ្ឋ​មន្ដ្រី​ក្រសួង សាធារណការ និង​ដឹក​ជញ្ជូន ចាប់​ពី​ឆ្នាំ ២០០៤ ដល់​ឆ្នាំ ២០០៨។ រហូត​ដល់​ពេល​កាន់​តំណែង​បច្ចុប្បន្ន​លោក​ធ្លាប់​ជា​ទេស​រដ្ឋ​មន្ដ្រី​នៅ​ក្រុម​ប្រឹក្សា​អភិវឌ្ឍន៍​កម្ពុជា (CDC) ដែល​លោក​នៅ​តែ​រក្សា​តំណែង​ជា​អនុ​ប្រធាន​របស់​លោក​ដដែល។

តើ​លោក​ចង់​ឡើង​កាន់​តំណែង​នៅ​ក្រសួង ពាណិជ្ជកម្ម នេះ​ឬ?

ខ្ញុំ​មិន​បាន​ស្នើ​សុំ​មុខ​តំណែង​នេះ​ទេ។ ខ្ញុំ​ត្រូវ​បាន​ស្នើ​សុំ​ដោយ​លោក​នាយក​រដ្ឋ​មន្ដ្រី​ឲ្យ​ផ្លាស់​មក​កាន់​តំណែង​នៅ​ទី​នេះ​ដើម្បី​កែ​ទម្រង់​ក្រសួង​នេះ​ដើម្បី​លើក​កម្ពស់​ការ​ធ្វើ​ពាណិជ្ជកម្ម​ឲ្យ​កាន់​តែ​ល្អ​ប្រសើរ​ឡើង និង​ដើម្បី​ជួយ​ដល់​វិស័យ​ឯកជន។ ច្បាស់​ណាស់ ពិភពលោក​នេះ​បាន​ប្រែ​ប្រួល​ហើយ។ យើង​បាន​ត្រៀម​ខ្លួន​រួច​ជា​ស្រេច​សម្រាប់​ចូល​រួម​ក្នុង​សមាគម​អាស៊ាន ឆ្នាំ ២០១៥។ ខ្ញុំ​មិន​និយាយ​ពី​អ្វី​ដែល​ឯកឧត្តម ចម ប្រសិទ្ធ ធ្វើ​មិន​បាន​ល្អ​នោះ​ទេ។ វា​គឺជា​អ្វី​ដែល​ល្អ។ អ្នក​ខ្លះ​អាច​និយាយ​ថា លោក​នាយក​រដ្ឋ​មន្ដ្រី ហ៊ុន សែន បាន​ផ្លាស់​ប្តូរ​មនុស្ស​ចុះ​ឡើង​ក្នុង​គោល​បំណង​បង្ហាញ​ពី​គំនិត​ថ្មីៗ បន្ទាប់​ពី​ការ​បោះឆ្នោត​កាល​ពី​ខែ កក្កដា ដែល​យើង​បាន​មើល​ឃើញ​ថា គណបក្ស​ប្រឆាំង​ទទួល​បាន​សំឡេង​គាំទ្រ​ខ្លាំង​ជាង​មុន។

ពិត​ហើយ ការ​កែ​ទម្រង់​ផែនការ​សម្រាប់​ការ​កែ​ទម្រង់​គឺ​មាន​រយៈ​ពេល​វែង សូម្បី​តែ​មុន​ពេល​បោះឆ្នោត។ នាយក​រដ្ឋ​មន្ដ្រី​របស់​យើង​បាន​រៀបចំ​ផែនការ​រួច​ជា​ស្រេច​ហើយ​ក្នុង​ការ​ផ្លាស់ប្តូរ និង​ការ​កែ​ទម្រង់​មួយ​ចំនួន​ដើម្បី​ធ្វើ​សមាហរណកម្ម និង​ធ្វើ​ឲ្យ​កម្ពុជា​អាច​ប្រកួត​ប្រជែង​កាន់​តែ​ខ្លាំង និង​ទាក់ទាញ​ការ​វិនិយោគ​ផ្ទាល់​ពី​បរទេស​បាន​កាន់​តែ​ច្រើន។ ទោះ​បី​ជា​លទ្ធផល​នៃ​ការ​បោះឆ្នោត​បាន​ជួយ​ពន្លឿន​ការ​កែ​ទម្រង់​ក៏​ដោយ​ក៏​គំនិត​នេះ​មាន​តាំង​ពី​យូរ​ណាស់​មក​ហើយ។ វា​មិន​មែន​ថា លោក​ក្រោក​ឡើង​ហើយ​និយាយ​ថា ហេ! តោះ​យើង​ធ្វើ​ការ​កែ​ទម្រង់​នោះ​ទេ។ ទេ! ផែនការ​មាន​ជា​យូរ​មក​ហើយ។ ប៉ុន្តែ​ល្បឿន​នៃ​ផែនការ​នេះ​នឹង​ដើរ​លឿន​បន្តិច​ហើយ​ក្នុង​ពេល​ឥឡូវ​នេះ។

តើ​លោក​អាច​បង្ហាញ​ត្រួសៗ​ពី​អ្វី​ដែល​សម្រេច​បាន​ក្នុង​ការ​ធ្វើ​កំណែ​ទម្រង់​របស់​លោក ឬ​អ្វី​ដែល​កំពុង​ព្យាយាម​សម្រេច​រហូត​មក​ដល់​ពេល​នេះ​បាន​ទេ?

ទី១- យើង​បាន​លុប​បំបាត់​ចោល​វិញ្ញាបនបត្រ​បញ្ជាក់​ប្រភព​ដើម​សម្រាប់​ការ​នាំ​ចេញ​ទៅ​កាន់​ប្រទេស​ដែល​មិន​តម្រូវ​ឲ្យ​មាន។ ទី២- យើង​អនុញ្ញាត​ឲ្យ​ក្រុមហ៊ុន​នាំ​ចេញ​រៀបចំ​វិញ្ញាបនបត្រ​បញ្ជាក់​ប្រភព​ដើម​ដោយ​ខ្លួន​ឯង ដោយ​មាន​ប្រសិទ្ធភាព​ចាប់​ពី​ថ្ងៃ ទី១ ខែ មករា ឆ្នាំ ២០១៤ ទៅ។ ពួក​គេ​អាច​ផ្តិត​ក្រយៅ​ដៃ​ក្នុង​កុំព្យូទ័រ នៅ​ជាន់​ក្រោម​ក្នុង​ក្រសួង​របស់​យើង ហើយ​អាច​បោះពុម្ព​ចេញ​បាន​ដូច្នេះ​វា​សន្សំ​ពេល​វេលា​សម្រាប់​ការ​បញ្ចូល​ទិន្នន័យ។ យើង​ក៏​កំពុង​ដំណើរការ​ប្រព័ន្ធ​វិញ្ញាបនបត្រ​បញ្ជាក់​ពី​ប្រភព​ដើម​ដោយ ស្វ័យប្រវត្ដិ​ដែល​អាច​ឆ្លើយ​ឆ្លង​គ្នា​បាន។

ដូច្នេះ​អ្នក​នាំ​ចេញ​មិន​ចាំ​បាច់​មក​ដល់​ក្រសួង​នេះ​ទេ។ ពួក​គេ​នៅ​ក្នុង​រោងចក្រ​របស់​ខ្លួន ពួក​គេ​ចូល​រក​ព័ត៌មាន ផ្ញើ​វា​មក​យើង​តាម​អ៊ីនធឺណិត យើង​ត្រួត​ពិនិត្យ​តាម​អ៊ីនធឺណិត​យើង​ចេញ​ឲ្យ​តាម​អ៊ីនធឺណិត ហើយ​វា​អាច​ព្រីន​បាន​ទោះ​បី​ជា​នៅ​ទី​ណា​ក៏​ដោយ​នៅ​ពេល​ពួក​គេ​ត្រូវ​ការ។ បញ្ហា​មួយ​ផ្សេង​ទៀត​គឺ​នៅ​ពេល​អ្នក​នាំ​ចេញ​អ្នក​ចាំ​បាច់​ក្នុង​ការ​ចុះ​បញ្ជី​ជា​អ្នក​នាំ​ចេញ​ទទួល​បាន GSP (ប្រព័ន្ធ​អនុគ្រោះ​ពាណិជ្ជកម្ម សម្រាប់​ប្រទេស​កំពុង​អភិវឌ្ឍន៍) ហើយ​ជា​រៀងរាល់​ឆ្នាំ​អ្នក​ត្រូវ​ត្រឡប់​មក​ហើយ​ធ្វើ​វា​ជា​ថ្មី​ម្ដង​ទៀត។

យើង​បាន​លុប​ចោល​អស់​ហើយ។ អ្នក​ធ្វើ​វា​តែ​ម្ដង​គត់ ហើយ​ប្រើ​ជា​រៀង​រហូត។ ទី៤ ដើម្បី​ចុះ​បញ្ជី​ក្រុមហ៊ុន​មួយ ដំបូង​អ្នក​ត្រូវ​ទៅ​នាយកដ្ឋាន​កម្មសិទ្ធិ​បញ្ញា បន្ទាប់​មក​អ្នក​ត្រូវ​ទៅ​កន្លែង​ដែល​ចុះ​បញ្ជី​ក្រុមហ៊ុន។ ឥឡូវ​នេះ អត់​ទេ។ មាន​ការិយាល័យ​ច្រក​ចេញ​ចូល​តែ​មួយ យើង​បាន​បញ្ចូល​គ្នា។ អ្នក​មក​ការិយាល័យ​ច្រក​ចេញ​ចូល​តែ​មួយ យើង​នឹង​ធ្វើ​ការងារ​ទាំង​អស់​នេះ​ជូន​អ្នក។ យើង​កំពុង​ដំណើរការ​ប្រព័ន្ធ​ចុះ​ឈ្មោះ​ក្រុមហ៊ុន​ដោយ​ស្វ័យប្រវត្តិ​ផង​ដែរ។

ខ្ញុំ​បាន​ឮ​ពាក្យ​ចោទ​ប្រកាន់​ជា​ច្រើន​ពី​អំពើ​ពុករលួយ​នៅ​កាំកុងត្រូល​ដែល​ជា​ផ្នែក​មួយ​របស់​ក្រសួង ពាណិជ្ជកម្ម ដែល​ទទួល​ខុស​ត្រូវ​ខាង​ការ​ត្រួត​ពិនិត្យ​គុណភាព​នាំ​ចូល​និង​នាំ​ចេញ។ តើ​លោក​នឹង​ធ្វើ​ការ​ផ្លាស់​ប្តូរ​នៅ​កន្លែង​នោះ​ទេ?

ពិត​ហើយ។ ខ្ញុំ​បាន​និយាយ​រួច​ហើយ​ទៅ​កាន់​អគ្គ​នាយក កាំកុងត្រូល។ យើង​នឹង​សម្លឹង​មើល កាំកុងត្រូល ឲ្យ​បាន​ល្អិតល្អន់​ដើម្បី​មើល​តំបន់​ណា និង​អ្វី​ដែល​ចាំបាច់​ត្រូវ​ធ្វើ​ការ​ផ្លាស់​ប្តូរ។ ខ្ញុំ​នឹង​បើក​កិច្ច​ប្រជុំ​មួយ​ដើម្បី​ត្រួត​ពិនិត្យ​សកម្មភាព​ចាប់​ពី​ឆ្នាំ ២០១៣ និង​ដើម្បី​បង្កើត​ផែនការ​សកម្មភាព​សម្រាប់​ឆ្នាំ​នេះ។ ខ្ញុំ​នឹង​ធ្វើ​ការងារ​យ៉ាង​ជិត​ស្និទ្ធ​ជាមួយ​ពួកគេ​ដើម្បី​រក​មធ្យោបាយ​កែលម្អ ដើម្បី​ជួយ​សម្រួល​នីតិវិធី​នាំ​ចេញ​សម្រាប់​វិនិយោគិន និង​ដើម្បី​ពិនិត្យ​មើល​ពី​របៀប​ដែល​យើង​ធ្វើ​ឲ្យ​តូច​បំផុត​លុប​បំបាត់​ចោល និង​កាត់​បន្ថយ​ការ​ចំណាយ​ក្រៅ​ផ្លូវ​ការ។

ខ្ញុំ​ក៏​បាន​ឮ​ដែរ លោក​បាន​ឮ ប៉ុន្តែ​ខ្ញុំ​មិន​អាច​រក​បាន​ភ័ស្ដុតាង​ជាក់ស្ដែង​ដែល​ហេតុការណ៍​នេះ កំពុង​កើត​ឡើង។ ប៉ុន្តែ​គឺជា​អ្វី​ដែល​យើង​បាន​ឮ​នៅ​ក្នុង​ផ្នែក​នេះ។ លោក​នឹង​មើល​ឃើញ​ការ​ផ្លាស់​ប្តូរ​មួយ​ចំនួន​នៅ​ក្នុង​ផ្នែក កាំកុងត្រូល ដើម្បី​ឲ្យ​មាន​ការ​ជឿ​ជាក់​ពិត​ប្រាកដ។

តើ​កម្ពុជា​អាច​ស្រង់​កេរ្តិ៍​ឈ្មោះ​របស់​ខ្លួន​ពី​អំពើ​ពុករលួយ​បាន​ដូចម្ដេច?

ការ​ធ្វើ​ស្វ័យប្រវត្តិកម្ម​នៃ​វិញ្ញាបនបត្រ​បញ្ជាក់​ប្រភព​ដើម​ការ​ធ្វើ​ស្វ័យប្រវត្តិកម្ម​នៃ​ការ​ចុះ​បញ្ជី​ក្រុមហ៊ុន ដែល​បង្ហាញ​ដល់​ពិភពលោក​ថា យើង​កំពុង​ធ្វើ​ដំណើរ​នៅ​ក្នុង​ទិសដៅ​នោះ។ យើង​នឹង​បំបាត់​ទំនាក់​ទំនង​គ្នា ហើយ​នៅ​ពេល​ដែល​យើង​ធ្វើ នៅ​ពេល​នោះ​យើង​អាច​លុប​បំបាត់​ឬ​កាត់​បន្ថយ​បញ្ហា​នោះ​នៅ​ពេល​នោះ​លោក​អាច​កាត់​បន្ថយ​ការ​ចំណាយ​ក្រៅ​ផ្លូវ​ការ​បាន។

តើ​លោក​បាន​ទទួល​ការ​ប្រឈម​លើ​ការ​ផ្លាស់​ប្តូរ​មួយ​ចំនួន​ទាំង​នេះ​ទេ?

រហូត​មក​ដល់​ពេល​នេះ​ខ្ញុំ​មិន​ទទួល​បាន​ការ​ប្រឆាំង​តប​នោះ​ទេ ទាំង​ពី​ក្រសួង​ផ្សេង​ទៀត ឬ​ក៏​ពី​ប្រជាជន​ជាច្រើន​នៅ​ទីនេះ។ ប៉ុន្តែ​ការ​ផ្លាស់​ប្តូរ​ណា​មួយ​នៅ​ក្នុង​អង្គការ​ណា​មួយ​គ្រប់​ទីកន្លែង​នៅ​លើ​ពិភពលោក​លោក​តែង​តែ​ទទួល​បាន​ការ​ប្រឆាំង​តប​ជានិច្ច។ នោះ​គឺជា​ការ​ពិត​នៃ​ជីវិត។ ខ្ញុំ​គិត​ថា លោក​មិន​អាច​ទទួល​ការ​ពេញ​ចិត្ត​ពី​ប្រជាជន​បាន ១០០ ភាគរយ​នោះ​ទេ។

ការងារ​របស់​លោក​គឺ​កៀងគរ​ការ​វិនិយោគ តើ​លោក​កំពុង​សម្លឹង​មើល​ទៅ​ទី​ណា​ខ្លះ?

យើង​កំពុង​ព្យាយាម​កៀងគរ​ការ​វិនិយោគ​ឲ្យ​បាន​ច្រើន​ឡើងៗ​ពី​ប្រទេស ជប៉ុន។ យើង​មើល​ឃើញ​ថា ក្រុមហ៊ុន ជប៉ុន កំពុង​ឈាន​ចូល​ប្រទេស កម្ពុជា ពួក​គេ​កំពុង​នាំ​យក​វិស័យ​ផលិតកម្ម​ចំណេះ​ធ្វើ បច្ចេកវិទ្យា​មក​កាន់ កម្ពុជា ខ្ញុំ​រំភើប​ចំពោះ​កត្តា​ទាំង​នេះ។ យើង​កំពុង​ទាក់​ទាញ​ការ​វិនិយោគ​ក្នុង​វិស័យ​កសិ-ឧស្សាហកម្ម។ យើង​មើល​ឃើញ​ថា មនុស្ស​ជាច្រើន​កំពុង​បង្កើត​ម៉ាស៊ីន​កិន​ស្រូវ​ក្នុង​ប្រទេស កម្ពុជា ឃ្លាំង​ស្តុក ដើម្បី​សម្ងួត​ស្រូវ។

ដូច​គ្នា​នេះ​ដែរ វិនិយោគិន​ថ្នាក់​ពិភពលោក​មួយ​ចំនួន​ចង់​ឃើញ​ការ​មាន​តុល្យភាព​អំណាច ប្រសើរ​ជាង​នេះ​ក្នុង​ប្រទេស កម្ពុជា ព្រម​ទាំង​តម្លាភាព​បន្ថែម​ទៀត មុន​ពេល​ពួក​គេ​មក​វិនិយោគ​នៅ​ទី​នេះ។ តើ​រដ្ឋាភិបាល​បច្ចុប្បន្ន​ដែល​គ្រប់​គ្រង​ស្ថានភាព​នយោបាយ​អស់​រយៈ ពេល​ជាច្រើន​ឆ្នាំ​នោះ​មាន​មធ្យោបាយ​ប្រសើរ​ដើម្បី​ទាក់​ទាញ​ក្រុម​វិនិយោគិន​ប្រភេទ​នោះ​ទេ?

ស្ថិរភាព​នយោបាយ ស្ថិរភាព​ម៉ាក្រូ​សេដ្ឋកិច្ច ការ​លើក​ទឹក​ចិត្ត​ផ្នែក​វិនិយោគ ហេដ្ឋា​រចនា​សម្ព័ន្ធ ការ​ដឹក​ជញ្ជូន ចំណាយ​លើ​ប្រតិបត្តិការ ទាំង​អស់​នេះ​គឺជា​សមាសធាតុ​ទាំង​អស់​ដែល​វិនិយោគិន​សម្លឹង​មើល មុន​ពេល​ពួក​គេ​មក​វិនិយោគ​ក្នុង​ប្រទេស​មួយ។ លោក​អ្នក​មិន​អាច​មាន​តែ​ស្ថិរភាព​នយោបាយ​តែ​មួយ ប៉ុន្តែ​គ្មាន​ស្ថិរភាព​ម៉ាក្រូ​សេដ្ឋកិច្ច​នោះ​ទេ។ ហេដ្ឋា​រចនា​សម្ព័ន្ធ​របស់​លោក​អ្នក​មិន​ល្អ គ្មាន​នរណា​នឹង​មក​វិនិយោគ​នោះ​ទេ។ ផ្ទុយ​មក​វិញ លោក​អ្នក​មិន​អាច​មាន​តែ​ស្ថិរភាព​ម៉ាក្រូ​សេដ្ឋកិច្ច ហេដ្ឋា​រចនា​សម្ព័ន្ធ​ល្អ ប៉ុន្តែ​នយោបាយ​មិន​ល្អ​នោះ​ទេ។

ដូច្នេះ​លោក​អ្នក​ត្រូវ​ការ​សមាសធាតុ​ទាំង​នោះ ដើម្បី​ទាក់​ទាញ​ការ​វិនិយោគ​ផ្ទាល់​ពី​បរទេស​ទៅ​កាន់​ប្រទេស​នោះ។ បច្ចុប្បន្ន ចាប់​ពី​បោះឆ្នោត​មក យើង​ជួប​ភាព​ជាប់​គាំង​ផ្នែក​នយោបាយ។ មួយ​ផ្នែក បាទ! វិនិយោគិន​មួយ​ចំនួន​ដែល​សម្លឹង​មើល​កម្ពុជា​អាច​រង់ចាំ​បន្តិច ដោយ​ចាំ​មើល​ថា​មាន​អ្វី​នឹង​កើត​ឡើង​នា​ពេល​បន្ទាប់ ប៉ុន្តែ​សម្រាប់​វិនិយោគិន​ផ្សេង​ទៀត ពួក​គេ​និយាយ​ថា មើល​ខ្ញុំ​មិន​គិត​ថា​នេះ​គឺជា​បញ្ហា​ធំ​នោះ​ទេ។ ដោយ​សារ​ខ្ញុំ​ក៏​ជា​អនុ​ប្រធាន​ក្រុម​ប្រឹក្សា​វិនិយោគ​កម្ពុជា​ដែរ​នោះ ខ្ញុំ​នៅ​តែ​មើល​ឃើញ​ថា ការ​វិនិយោគ​បាន​ចូល​មក​ប្រទេស​យើង​តាម​រយៈ​ក្រុម​ប្រឹក្សា​វិនិយោគ​នេះ។

នៅ​ថ្ងៃ​សុក្រ​នេះ យើង​មាន​គម្រោង​ផ្សេងៗ​គ្នា​ចំនួន ២០ ដែល​យើង​នឹង​ពិនិត្យ​មើល​ឡើង​វិញ។ ខ្ញុំ​សង្ឃឹម​ថា គណបក្ស​ប្រឆាំង​នឹង​ទទួល​យក​អាសនៈ​នៅ​រដ្ឋសភា ហើយ​នឹង​ចូល​រួម​ក្នុង​ការ​អភិវឌ្ឍ​ប្រទេស​ជាតិ។ អ្វី​ដែល​ត្រូវ​លើក​យក​មក​ពិភាក្សា​គ្នា​នោះ ការ​ពិភាក្សា​ត្រូវ​ធ្វើ​នៅ​ក្នុង​រដ្ឋសភា​ជាតិ។ វា​មិន​ល្អ​សម្រាប់​ប្រទេស​ជាតិ​នោះ​ទេ វា​មិន​ល្អ​នោះ​ទេ។ ការ​ធ្វើ​បែប​នេះ​មិន​អាច​ដោះស្រាយ​បញ្ហា​នោះ​ទេ។ ខ្ញុំ​ចង់​ឲ្យ​យើង​ជជែក​អំពី​ភាព​ខុស​គ្នា​នៃ​គោល​នយោបាយ​នៅ​ក្នុង​រដ្ឋសភា មិន​មែន​នៅ​តាម​ផ្លូវ​នោះ​ទេ។ វា​នឹង​ធ្វើ​ឲ្យ​ជីវិត​ខ្ញុំ​ងាយ​ស្រួល​ជាង​នេះ​បន្តិច​ក្នុង​ការ​ជំរុញ​ការ​វិនិយោគ​នៅ​ពេល​ដែល​ខ្ញុំ​ធ្វើ​ដំណើរ​ទៅ​បរទេស​ទាក់​ទាញ​ពួក​គេ៕ PB

កិច្ច​សម្ភាស​នឹង​បន្ត​សប្តាហ៍​ក្រោយ​ទៀត!

អត្ថបទគួរចាប់អារម្មណ៍