The Phnom Penh Post Search

Search form




Logo of Phnom Penh Post newspaper Phnom Penh Post - អាជីវកម្ម​ក្រុមហ៊ុន​រៀបចំ​ព្រឹត្តិការណ៍​នៅ​កម្ពុជា

អាជីវកម្ម​ក្រុមហ៊ុន​រៀបចំ​ព្រឹត្តិការណ៍​នៅ​កម្ពុជា

អាជីវកម្ម​ក្រុមហ៊ុន​រៀបចំ​ព្រឹត្តិការណ៍​នៅ​កម្ពុជា

131108_12
លោក Rajesh Kunam នាយកគ្រប់គ្រងក្រុមហ៊ុន Mega Events ម៉ៃ វីរៈ

ភ្នំពេញៈ ខណៈ​ដែល​កម្ពុជា​មាន​ភ្នាក់ងារ​ផ្សព្វ​ផ្សាយ​ពាណិជ្ជកម្ម​ច្រើន ចំនួន​ក្រុមហ៊ុន​រៀបចំ​ព្រឹត្តិការណ៍​នៅ​តែ​មាន​ចំនួន​តូច​នៅ​ឡើយ ដែល​មាន​មិន​ដល់ ១០ ក្រុមហ៊ុន​ផង។ អ្នក​យក​ព័ត៌មាន ភ្នំពេញ ប៉ុស្តិ៍ Anne Renzenbrink បាន​ជួប​ជាមួយ​លោក Rajesh Kumar ជា​នាយក​គ្រប់​គ្រង​ក្រុមហ៊ុន Mega Events (Asia) Co Ltd ដោយ​ថ្លែង​ពី​ផល​ចំណេញ ព្រម​ទាំង​បញ្ហា​ប្រឈម​របស់​ក្រុមហ៊ុន​ប្រភេទ​នេះ​នៅ​ក្នុង​ទីផ្សារ កម្ពុជា។

តើ​លោក​ចាប់​ផ្ដើម​ក្រុមហ៊ុន​នេះ​យ៉ាង​ដូចម្ដេច?

ខ្ញុំ​ចូល​មក​ប្រទេស​កម្ពុជា​កាល​ពី​ឆ្នាំ ២០០៨​។ ខ្ញុំ​បាន​ចាប់​ផ្ដើម​ជាមួយ​នឹង កាស៊ីណូ ណាហ្គា វើល​។ ខ្ញុំ​ជា​អនុ​ប្រធាន​រៀបចំ​ព្រឹត្តិការណ៍​កម្សាន្ត និង​ការ​ផ្សព្វ​ផ្សាយ។ ខ្ញុំ​បាន​ធ្វើ​ការងារ​នោះ​អស់​រយៈ​ពេល​ប្រហែល ៥ ឆ្នាំ​។ ខ្ញុំ​មក​ទី​នោះ​ដើម្បី​បង្កើត​ផ្នែក​រៀបចំ​ព្រឹត្តិការ​ណ៍​ទាំង​មូល របស់​ពួក​គេ។ ឥឡូវ​នេះ​ផ្នែក​ទាំង​មូល​នៅ​ទីនោះ​កំពុង​ដំណើរការ​ដោយ​ខ្លួន​ឯង​ដែល​តាម​ពិត​គឺជា​ការ​រៀបចំ​ព្រឹត្តិការណ៍​ដ៏​ពិសេស​ប្រកប​ដោយ​វិជ្ជមាន​សម្រាប់​ខ្ញុំ។ ខ្ញុំ​បាន​កាន់​កាប់​ក្រុមហ៊ុន Mega Events ដែល​ចាប់​ផ្ដើម​តាំង​ពី​ខែ មិថុនា ឆ្នាំ ២០១២ មក។ ខ្ញុំ​បាន​ទិញ​និង​បាន​កែលម្អ​ក្រុមហ៊ុន​មួយ​នេះ។ ជា​រួម​យើង​រៀបចំ​ផែនការ​ដោយ​ខ្លួន​ឯង​ជា​មជ្ឈមណ្ឌល​រៀបចំ ព្រឹត្តិការណ៍​ឥត​គិត​ថ្លៃ​តាំង​ពី​ដើម​រហូត​ដល់​ចប់​សម្រាប់​អតិថិជន។ អតិថិជន​មិន​ចាំ​បាច់​បារម្ភ​អ្វី​ទាំង​អស់ ពួក​គេ​គ្រាន់​តែ​ចាំ​បង្ហាញ​ការ​រៀបចំ​ព្រឹត្តិការណ៍​នេះ​តែ​ប៉ុណ្ណោះ។ យើង​មើល​ការ​ខុស​ត្រូវ​ប្រតិបត្តិការ​នេះ​តាំង​ពី​មុន​ព្រឹត្តិការណ៍ ការ​ធ្វើ​ផែនការ ការ​អនុវត្ត​ក្នុង​អំឡុង​ព្រឹត្តិការណ៍ និង​ការ​រាយការណ៍​ក្រោយ​ព្រឹត្តិការណ៍។

យើង​ធ្វើ​អ្វីៗ​ទាំង​អស់ ចាប់​ពី​ការ​រៀបចំ​អាហារ​ល្ងាច​របស់​ក្រុមហ៊ុន សិក្ខាសាលា ការ​តាំង​ពិព័រណ៍ ការ​ប្រគំ​តន្រ្ដី ការ​កម្សាន្ត​ដែល​ជា​ការ​រៀបចំ​ទាំង​មូល។

តើ​ការងារ​មួយ​ចំនួន​ក្នុង​ចំណោម​ការងារ​ទាំង​នេះ​បាន​ធ្លាក់​ចុះ​ច្រើន​ទេ នៅ​ក្នុង​ផ្នែក​ផ្សាយ​ពាណិជ្ជកម្ម និង​ទំនាក់​ទំនង​សាធារណៈ (PR)?

ការ​រៀបចំ​ព្រឹត្តិការណ៍ ពិត​ណាស់​គឺ​ទូលំ​ទូលាយ​បំផុត។ មាន​ការងារ​ខុស​គ្នា​ជាច្រើន​ដែល​យើង​ធ្វើ យើង​ធ្វើ PR យើង​ធ្វើ​អ្វី​ដែល​យើង​ហៅ​ថា សេវាកម្ម​ពិគ្រោះ​យោបល់ យើង​ធ្វើ​សំឡេង និង​ពន្លឺ យើង​រៀបចំ​ឆាក។ យើង​ព្យាយាម​បន្ត​ការ​រៀបចំ​ដ៏​ច្រើន។ ខ្ញុំ​មាន​ដៃ​គូ​មួយ​ចំនួន​នៅ​ប្រទេស ម៉ាឡេស៊ី។

បញ្ហា​គឺ​ទីផ្សារ​នៅ​ទី​នេះ​មិន​ត្រូវ​ការ​កម្លាំង​ច្រើន​ទេ ដោយ​សារ​ទំហំ​នៃ​ព្រឹត្តិការណ៍​នៅ​ទីនេះ​តូច។ បើ​វា​ធំ​ក្រុម​ការងារ​មក​ពី​គូឡា​ឡាំពួ​នឹង​ធ្វើ​ដំណើរ​មក​ដើម្បី​ជួយ​ការងារ។ សម្រាប់​ឆ្នាំ​ក្រោយ ខ្ញុំ​មិន​អាច​និយាយ​ប្រាប់​នៅ​ពេល​នេះ​បាន​ទេ ប៉ុន្តែ​យើង​កំពុង​ធ្វើ​ការងារ​លើ​ការ​រៀបចំ​ព្រឹត្តិការណ៍​ធំៗ​ពីរ​ដែល​តាម​ពិត​នឹង​ដាក់​ប្រទេស​កម្ពុជា​លើ​ផែនទី​ពិភពលោក។ ការងារ​នេះ​មាន​ទំហំ​ធំ ហើយ​កើត​ឡើង​នៅ​កម្ពុជា​ជា​លើក​ដំបូង។ ខ្ញុំ​មិន​អាច​ប្រាប់​អ្នក​ព័ត៌មាន​លម្អិត​ច្រើន​បាន​ទេ នៅ​ពេល​នេះ​ដោយ​សារ​តែ​វា​មិន​ត្រូវ​បាន​ប្រកាស​ឲ្យ​ដឹង។

អ្វី​ជា​អត្ថ​ប្រយោជន៍​នៃ​ការ​តាំង​មូលដ្ឋាន​នៅ​ទី​នេះ​បើ​ធៀប​នឹង​ទីផ្សារ​ចាស់​ទុំ​ច្រើន​ដូច ម៉ាឡេស៊ី ឬ ថៃ?

តាម​ពិត​វា​ងាយ​ស្រួល​ណាស់។ បើ​អ្នក​សម្លឹង​មើល​ទីផ្សារ​មាន​ភាព​ចាស់​ទុំ​ដូចជា ប្រទេស ម៉ាឡេស៊ី មាន​ក្រុមហ៊ុន​រៀបចំ​ព្រឹត្តិការណ៍ ១៥ ០០០ គ្រាន់​តែ​ក្នុង​ទីក្រុង​មួយ។ ដូច្នេះ​ខ្ញុំ​គិត​ថា វា​មិន​អាច​រស់​បាន​ដើម្បី​ទៅ​ប្រកួត​ប្រជែង​ជាមួយ​ពួក​គេ​នោះ​ទេ។ ខ្ញុំ​គិត​ថា កម្ពុជា គឺជា​កន្លែង​តែ​មួយ​គត់ មាន​ឱកាស​ដ៏​ធំ និង​មាន​សក្ដានុពល​បំផុត​នៅ​ទី​នេះ។ ទី​មួយ​ទីផ្សារ​នេះ​គឺ​នៅ​តូច។

តើ​អ្វី​ជា​បញ្ហា​ប្រឈម​ដ៏​សំខាន់​នៅ​ប្រទេស​កម្ពុជា?

បញ្ហា​ប្រឈម​សំខាន់​របស់​ខ្ញុំ​ដែល​ខ្ញុំ​មើល​ឃើញ​ពី​មុន​គឺ​ការ​ទម្លាក់​តម្លៃ។ នៅ​ពេល​នេះ​វា​កំពុង​កើត​ឡើង​នៅ​កម្ពុជា​ដោយ​មាន​ការ​កំណត់​ចំនួន​អ្នក​រក​ស៊ី​ខាង​រៀបចំ​ព្រឹត្តិការណ៍។ ដូច្នេះ​ពួកគេ​បន្ទាប​តម្លៃ​គ្រាន់​តែ​ដើម្បី​បាន​ការងារ​ធ្វើ​ខ្ញុំ​មាន​ន័យ​ថា បើ​អ្នក​កាត់​បន្ថយ​ទៅ​វិញ​ទៅ​មក​ខ្ញុំ​គិត​ថា អ្នក​ពិត​ជា​កំពុង​សម្លាប់​គ្នា​ទៅ​វិញ​ទៅ​មក។

តើ​ផ្នែក​ណា​មាន​តម្រូវ​ការ​ធំ​ជាង​គេ​សម្រាប់​ការ​រៀបចំ​ព្រឹត្តិការណ៍​នៅ​កម្ពុជា?

ភាគ​ច្រើន​ក្រុមហ៊ុន​បរទេស។ យើង​មាន​ផែនការ​សហការ​ជាមួយ​ធនាគារ May bank។ ជា​មូលដ្ឋាន​អាទិភាព​ដំបូង​របស់​យើង​គឺ​ធ្វើ​ការងារ​ជាមួយ​អតិថិជន ម៉ាឡេស៊ី ខ្ញុំ​ជា​ជនជាតិ​ម៉ាឡេស៊ី។ ក្រៅ​ពី​នោះ​យើង​ចង់​ធ្វើ​ការងារ​ជាមួយ​ក្រុមហ៊ុន​ដូចជា ក្រុមហ៊ុន BMW ធនាគារ ANZ។ យើង​អាច​ធ្វើ​ការ​បន្ថែម​បន្ថយ​លើ​ការ​វេច​ខ្ចប់​របស់​យើង​ដល់​អតិថិជន​តូចៗ​ផង​ដែរ ដូចជា រោងចក្រ​កាត់ដេរ ប្រសិន​បើ​ពួក​គេ​ចង់​ធ្វើ​ពិធី​អាហារ​ពេល​ល្ងាច។ ដូច្នេះ​មាន​ន័យ​ថា​យើង​មិន​កំណត់​ខ្លួន​យើង​ចំពោះ​ឧស្សាហកម្ម ជាក់​លាក់​មួយ​ទេ៕ PB

អត្ថបទគួរចាប់អារម្មណ៍