The Phnom Penh Post Search

Search form




Logo of Phnom Penh Post newspaper Phnom Penh Post - IMF: កម្ពុជា​គួរ​ផ្តោត​លើ​វិស័យ​អប់រំ និង​អភិបាល​កិច្ច​ល្អ

IMF: កម្ពុជា​គួរ​ផ្តោត​លើ​វិស័យ​អប់រំ និង​អភិបាល​កិច្ច​ល្អ

IMF: កម្ពុជា​គួរ​ផ្តោត​លើ​វិស័យ​អប់រំ និង​អភិបាល​កិច្ច​ល្អ

131204_13a
លោកស្រី Christine Lagarde នាយកគ្រប់គ្រងមូលនិធិរូបិយវត្ថុអន្តរជាតិ (IMF) ក្នុងបទសម្ភាសជាមួយភ្នំពេញប៉ុស្តិ៍ ម៉ៃ វីរៈ

ភ្នំពេញៈ សេដ្ឋកិច្ច​ក្នុង​តំបន់ និង​ពិភព​លោក​កំពុង​ស្ថិត​លើ​ដំណាក់​កាល​ងើប​ឡើង​វិញ​ប៉ុន្តែ​ល្បឿន​នៃ ការ​ងើប​ឡើង​វិញ​ហាក់​ដូចជា​មាន​ភាព​យឺតយ៉ាវ។ កម្ពុជា​ដែល​ស្ថិត​​ក្នុង​ចំណោម​​ប្រទេស​មាន​ប្រាក់​​ចំណូល​ទាប​ផ្សេង ទៀត​នៅ​តែ​ទទួល​បាន​កំណើន​ប៉ុន្តែ​ប្រទេស​នេះ​ប្រឈម​ឧបសគ្គ​​ជា​ច្រើន​ដែល​ត្រូវ​ដោះ​ស្រាយ​សម្រាប់​កំណើន​ប្រកប​ដោយ​និរន្តរភាព​នៅ​ក្នុង​លក្ខណៈ​បញ្ចូល​គ្នា។

លោកស្រី Christine Lagarde នាយក​គ្រប់​គ្រង​មូល​និធិ​រូបិយ​វត្ថុ​អន្តរជាតិ (IMF)បាន​ផ្ដល់​ឱកាស​ជា​ពិសេស​មួយ​ក្នុង​អំឡុង​ទស្សន​កិច្ច​រយៈ​ពេល ៤ថ្ងៃ​នៅ​កម្ពុជា​ក្នុង​បទ​សម្ភាស​ជា​មួយ​លោក ម៉ៃ គុណ​មករា ប្រធាន​ការីនិពន្ធ​ព័ត៌មាន​សេដ្ឋកិច្ច​នៃ​កាសែត​ភ្នំពេញប៉ុស្ដិ៍ អំពី​ថា ​តើ​កម្ពុជា​អាច​​ដោះស្រាយ​​បញ្ហា​នេះ​ដោយ​របៀប​ណា?

តើលោកស្រី​អាច​ចែក​រំលែក​ទស្សនៈ​ស្ដី​ពី​សេដ្ឋកិច្ច​ពិភព​លោក​ដែល កំពុង​នៅ​តែ​មាន​បញ្ហា​ប្រឈម​ជា​ច្រើន​នៅ​ប្រទេស​ដែល​មាន​សេដ្ឋកិច្ច រីក​ចម្រើន​បាន​​ទេ?

យើងមើល​ឃើញ​សេដ្ឋកិច្ច​ពិភព​លោក​គឺ​កំពុង​តែ​ងើប​ឡើង​វិញ​យឺតៗ ជា​មួយ​ការ​ព្យាករ​កំណើន​មាន​ប្រហែល ២,៩ ភាគរយ​នៅ​ឆ្នាំ​នេះ និង​ប្រហែល ៣,៥ ភាគរយ​នៅ​ឆ្នាំ​ក្រោយ។ ​ដូច្នេះ ការ​កែ​លម្អ និង​ការ​ខិត​ខំ​ពង្រឹង​ខ្លួន​នៅ​ឆ្នាំ ២០១៤ ជាមួយ​នឹង​កម្លាំង​នៃ​ការ​ផ្លាស់​ប្តូរ​កត្តា​កំណើន រួមផ្សំ​នឹង​ការ​ងើប​ឡើង​បន្តិច​របស់​ប្រទេស​មាន​សេដ្ឋកិច្ច​រីក​ចម្រើន ​និង​ធ្លាក់​ចុះ​បន្តិច​នៃ​ប្រទេស​មាន​សេដ្ឋកិច្ច​កំពុង​ងើប​ឡើង​គឺ​វា បាន​ឡើង​ចុះ​​ប្រហែល​ជា​៦​ខែ​មុន។

សេដ្ឋកិច្ច​អាមេរិក​ប្រហែល​ជា​កើន​ឡើង​ប្រមាណ​ជា ១,៦ ភាគរយ​នៅ​ឆ្នាំ​នេះ និង ២,៦​ ភាគរយ​នៅ​ឆ្នាំ​ក្រោយ ដោយ​សង្ឃឹម​ថា ការ​ជំរុញ​អំពី​បញ្ហា​សារពើពន្ធ​ដែល​ពួកគេ​បាន​ទទួល​រង​នូវ​ការ​ឈឺ​ចាប់ កាល​ពី​ឆ្នាំ ២០១៣ នឹង​កាត់​បន្ថយ​នៅ​ឆ្នាំ​ក្រោយ ហើយ​យើង​ពិត​ជា​សង្ឃឹម​ថា​ពួកគេ​នឹង​លើក​ឡើង​នូវការ​ដោះ​ស្រាយ​បញ្ហា ការ​កម្រិត​បំណុល និង​ផែន​ការ​សារពើ​ពន្ធ​រយៈពេល​មធ្យម​ដែល​កំពុង​មាន​ការ​ខ្វះ​ចន្លោះ។ តំបន់​ចាយ​ប្រាក់​អឺរ៉ូ​កំពុង​ធ្វើ​បាន​កាន់តែ​ល្អ​ប្រសើរ ហើយ​កំពុង​ឈាន​ដល់​របត់​មួយ និង​ប្រហែល​ជា​មាន​សញ្ញាណ​វិជ្ជមាន​នៅ​ឆ្នាំ​ក្រោយ ហើយ​ប្រទេស​ជប៉ុន​នឹង​​កើន​ឡើង​តាម​រយៈការ​ដាក់​បញ្ចូល​គ្នា​នូវ​គោល​នយោ​បាយ​ដែល​ផ្តល់​លទ្ធ​ផល​ប្រសើរ​នៅ​ឆ្នាំ​នេះ។

ពេល​នេះ​ដោយ​សារ​តម្រុយ​នៃ​ការ​ធ្លាក់​ចុះ ​និង​ការ​ភ័យ​ខ្លាច​របស់​វិនិយោគិន​បាន​ធ្វើឲ្យ​ពួក​គេ​ផ្លាស់​ប្តូរ មូល​ធន​ចេញ​ពី​ប្រទេស​ដែល​មាន​សេដ្ឋកិច្ច​ទីផ្សារ​កំពុង​រីក​ចម្រើន​ឬ ប្រទេស​មួយ​ចំនួន​ដូច​ជា​ប្រទេស ​រុស្ស៊ី ឥណ្ឌា ​ប្រេស៊ីល ចិន ​អា្រហ្វិក បាន​បន្ថយ​ល្បឿន​ដែល​ជា​ការ​ផ្លាស់​ប្តូរ​កម្លាំង​ជំរុញ។

តើ IMF មាន​ដំបូន្មាន​អ្វី​ដល់​បណ្ដា​ប្រទេស​មាន​ប្រាក់​ចំណូល​ទាប​ដូចជា កម្ពុជា​ដែល​ភាគ​ច្រើន​ពឹង​ផ្អែក​លើ​ការ​នាំ​ចេញ​សម្រាប់​កំណើន​របស់​ខ្លួន?

ជាដំបូង​បណ្ដា​ប្រទេស​មាន​ប្រាក់​ចំណូល​ទាប​មាន​ភាព​ល្អ​ប្រសើរ​ច្រើន ក្នុង​អំឡុង​ពេល​មាន​វិបត្តិ​ហិរញ្ញវត្ថុ​កាល​ពី​ឆ្នាំ ២០០៨ ហើយ​មាន​ភាព​ខ្លាំង​ផង​ដែរ​នៅ​ក្នុង​ការ​អភិវឌ្ឍក្រោយ​មក។ កំណើន​នេះ​នឹង​កើន​ឡើង​នៅ​ក្នុង​ចំនួន ៥,៥ ភាគរយ និង​ទំនង​ជា​កើន​ឡើង​បន្តិច។ ការ​ព្យាករ​កំណើន​របស់​កម្ពុជា​ប្រហែល ៧ ភាគរយ​នៅឆ្នាំ​ក្រោយ​ដែល​ជា អត្រា​កំណើន​ដ៏​គួរ​ឲ្យ​ស្ញប់​ស្ញែង។

ដំបូន្មាន​របស់​យើង​គឺ​ពិត​ណាស់​ត្រូវតែ​ពង្រឹង​ការ​ការពារ​របាំង​មួយ​ដែល​អាច​ទប់​ទល់​នឹង​​ហានិភ័យ​ពី​ខាង​ក្រៅដ៏​មាន​សក្ដានុពល។ ​ការ​នាំ​ចេញ​របស់​កម្ពុជា​ទាំងអស់ ៨០ ភាគរយ​គឺ​ទៅ​សហរដ្ឋ​អាមេរិក និង​អឺរ៉ុប ឬ ៨០​ភាគរយ​នៅ​ក្នុង​ឧស្សាហកម្ម​កាត់ដេរ ដូច្នេះ​ការ​ខិត​ខំ​ប្រឹង​ប្រែង​ក្នុង​ការ​ធ្វើ​ពិពិធកម្ម​ជា​មូលដ្ឋាន​នៃ​វិស័យ​ឧស្សាហកម្ម ហើយ​ទាក់ទង​បណ្ដា​ប្រទេស​ជា​គោល​ដៅ​នាំចេញ​គឺ​ពិត​ណាស់​នឹង​ការពារ ហានិភ័យ​ដ៏​ធំ​ដែល​កម្ពុជា​អាច​ប្រឈម។ ក្របខ័ណ្ឌ​ច្បាប់​ម៉ាក្រូ​សេដ្ឋ​កិច្ចរឹង​មាំ​ និង​មាន​ស្ថិរភាព និង​បរិយាកាស​ហិរញ្ញ​វត្ថុ​គឺ​ពិត​ជា​ជួយ​ក្នុង​ការ​ធ្វើ​ឲ្យ​មាន​ស្ថិរភាព​សម្រាប់​ប្រទេស​នេះ។

តើអ្វីដែល​ប្រទេស​មាន​ប្រាក់​ចំណូល​ទាប​អាច​ធ្វើ​ក្នុង​ការ​លើក​កម្ពស់​កំណើន​រួម​ផ្សំ​បន្ថែម​ទៀត?

យើង​ជឿ​ជាក់​ថា កំណើន​រួម​ផ្សំ​នឹង​ធ្វើ​ឲ្យ​កំណើន​កាន់តែ​មាន​ចីរភាព។ យើង​បាន​មើល​ឃើញ​មូល​ដ្ឋាន​គ្រឹះ​សំខាន់​ពីរ​ថ្មីៗ​នេះ មួយ​គឺជា​វិបតិ្ត​ហិរញ្ញ​វត្ថុ​ឆ្នាំ​២០០៨ ដែល​ប្រហែល​ជា​បាន​បង្កើន​ការ​គ្មាន​សមភាព និង​កម្លាំង​ចលករ​ដ៏​សំខាន់​នៅ​អាស៊ី​បាន​បង្កើន​ការ​គ្មាន​សម​ភាព​ផង​ដែរ។ ដូច្នេះ​អ្នក​មាន​សិទ្ធិ​ក្នុង​ការ​និយាយ​ពី​គោល​ដៅ​នៃ​កំណើន​រួម​ផ្សំ​គ្នា​បន្ថែម​ទៀត​ដើម្បី​ធ្វើ​ឲ្យ​ប្រាកដ​ថា​កំណើន​នេះ​ប្រកប​ដោយ​ចីរភាព ហើយ​យើង​ពិតជា គាំទ្រ​ដល់​ការ​ជំរុញ​កំណើន​រួម​ផ្សំ។

តើអ្វី​ដែល​អ្នកត្រូវ​​ណែនាំ​ដល់​បណ្ដា​ប្រទេស​ជា​សមាជិក​អាស៊ាន ដើម្បី​ឲ្យ​សម្រេច​បាន​នូវ​គោល​ដៅ​របស់​ពួកគេ​សម្រាប់​​សហគម​សេដ្ឋកិច្ច​អាស៊ាន​ឆ្នាំ​២០១៥?

វាជា​គម្រោង​ដ៏​មាន​មហិច្ឆតា និង​មាន​សក្ដានុពល។ ច្បាស់​ណាស់​ការ​បើក​ដំណើរ​ការ​ទី​ផ្សារ ការ​កាត់​បន្ថយ​របាំង​ពាណិជ្ជកម្ម និង​មិន​មែន​ពាណិជ្ជ​កម្ម ផ្តល់​ផល​វិជ្ជមាន​ដល់​សេដ្ឋកិច្ច​ជា​ច្រើន​ជុំវិញ​ពិភព​លោក ហើយ​វាពិត​ជា​ជួយ​ក្នុង​ការ​កាត់​បន្ថយ​ភាព​ក្រីក្រ​របស់​ប្រជាជន​ជា​ច្រើន។

ដើម្បី​រៀបចំ​ឲ្យ​បាន​កាន់​តែ​ល្អ​ប្រសើរ​នៃ​មហិច្ឆតា​នៃ​ការ​ធ្វើ​សមាហរ័ណ​កម្ម​សេដ្ឋកិច្ច សមាជិក​នីមួយ​ៗ ដែល​​ត្រូវ​ធ្វើ​សមាហរ័ណ​កម្ម​ត្រូវ​តែ​ពង្រឹង​មូលដ្ឋាន​គ្រឹះ​របស់​ខ្លួន​ហើយ​កម្ពុជា​នឹង​ត្រូវ​​បាន​ចោទ​សួរ​ពីការ​បន្ត​ការ​វិនិយោគ​នៅ​ក្នុង​ផលិត​ភាព​របស់​ខ្លួន ហើយ​ត្រូវ​ឲ្យ​ប្រាកដ​ថា មាន​​ការ​ចំណាយ​ជា​សាធារណៈ​គ្រប់​គ្រាន់​លើ​វិស័យ​អប់រំ ជា​ឧទាហរណ៍ ការ​លុប​បំបាត់​បញ្ហា​ជា​ច្រើន​នៅ​ក្នុង​ហេដ្ឋារចនា​សម្ព័ន្ធ និង​ការ​ប្រមូល​ប្រាក់​ចំណូល​ដើម្បី​ពង្រឹង​​សេដ្ឋកិច្ច​កម្ពុជា។

តើលោកស្រី​អាច​ចែក​រំលែក​ទស្សនវិស័យ​អំពី​សេដ្ឋកិច្ច​កម្ពុជា និង​ការ​ផ្ដល់​អនុសាសន៍​ក្នុង​ការ​ដោះស្រាយ​បញ្ហា​ប្រឈម​ទាំង​នេះ​បាន​ទេ?

យើង​ជឿជាក់​ថា សេដ្ឋកិច្ច​របស់​កម្ពុជា​នឹង​កើន​ឡើង​ក្នុង​ជំហាន​មួយ​ដ៏​លឿន​បំផុត អ្នក​ដឹង​ទេ កំណើន ៧ ភាគរយ​ក្នុង​មួយ​ឆ្នាំ​គឺជា​តួលេខ​ដ៏​រឹងមាំ។ យើង​ជឿ​ជាក់​ផង​ដែរ​ថា ដំណើរ​ឆ្ពោះ​ទៅ​រក​បដិ​ដុលា្លរ​នីយកម្ម​នឹង​ត្រូវ​ការ​ពេល​វេលា​ប៉ុន្តែ​អ្នក​ដឹង​ពី​ផ្លូវ​ដែល​ត្រូវ​ទៅ។ យើង​ជឿ​ជាក់​ថា កម្ពុជា​នឹង​ជា​ទិសដៅ​ទាក់​ទាញ​សម្រាប់​ការ​វិនិយោគ​ផ្ទាល់​ពី​បរទេស។

អនុសាសន៍របស់​យើង​គឺ​មាន​ពីរ មួយ​គឺ​កែ​លម្អ​ផលិត​ភាព​តាម​រយៈ​ការ​វិនិយោគ​ទៅ​លើ​វិស័យ​សុខាភិបាល និង​វិស័យ​អប់រំ និង​អភិបាល​កិច្ច​ល្អ អនុសាសន៍​ទីពីរ​គឺ​ធ្វើ​ឲ្យ​ប្រាកដ​ថា ទី​ផ្សារ​ហិរញ្ញ​វត្ថុ​មាន​ស្ថិរភាព​ រឹង​មាំ​ និង​គ្រប់គ្រង​បាន​ល្អ ដូច្នោះ​វា​នឹង​មិន​ឡើង​កម្ដៅ ហើយ​មិន​បង្ក​ឲ្យ​មាន​វិបត្តិ​ឥណទាន​ប្រភេទ​ណា​មួយ​ដែល​អាច​ជា​ឧបសគ្គ ដល់​ការ​អភិវឌ្ឍ​ទេ។

ដូច្នេះ​វា​ជា​តុល្យភាព​មួយ​ដ៏​ល្អ ​និង​វាង​វៃរ​វាង​បទ​ប្បញ្ញត្តិ​ត្រឹម​ត្រូវ រឹងមាំ​ដែល​អាច​បត់​បែន​បាន​គ្រប់គ្រាន់ ការ​ត្រួត​ពិនិត្យ​ខ្លាំង​ក្លា និង​វិស័យ​ហិរញ្ញ​វត្ថុ ដែល​នេះ​គឺ​ពិត​ជា​ល្អ​សម្រាប់​ហិរញ្ញប្បទាន​ដល់​សេដ្ឋកិច្ច៕PB

អត្ថបទគួរចាប់អារម្មណ៍