The Phnom Penh Post Search

Search form

Logo of Phnom Penh Post newspaper Phnom Penh Post - Suzuki៖ ស្ថានភាព​ឧស្សាហកម្ម​កាត់ដេរ​កម្ពុជា




Suzuki៖ ស្ថានភាព​ឧស្សាហកម្ម​កាត់ដេរ​កម្ពុជា

Suzuki៖ ស្ថានភាព​ឧស្សាហកម្ម​កាត់ដេរ​កម្ពុជា

140110_13
លោក Hiroshi Suzuki អគ្គនាយក BRIC ម៉ៃ វីរៈ

ភ្នំពេញៈ បន្ទាប់​ពី​ការ​បោះឆ្នោត​ជាតិ កាល​ពី​ចុង​ខែ កក្កដា ឆ្នាំ ២០១៣ កម្ពុជា​ជួប​បញ្ហា​ប្រឈម​ខាង​នយោបាយ​ដោយ​សារ​ការ​មិន​ចុះ​សម្រុង​គ្នា​រវាង​អ្នក​នយោបាយ។ បញ្ហា​នយោបាយ​កំពុង​រាល​ដាល​ដល់​បញ្ហា​សង្គម​ដ៏​គួរ​ឲ្យ​ព្រួយ​បារម្ភ បន្ទាប់​ពី​កម្មករ កម្មការិនី​រោងចក្រ​កាត់ដេរ​រាប់​ពាន់​នាក់​បាន​ចេញ​តវ៉ា​ដំឡើង​ប្រាក់​ឈ្នួល​អប្បរមា​ឲ្យ​បាន ១៦០ ដុល្លារ​រហូត​ផ្ទុះ​ហិង្សា​បណ្តាល​ឲ្យ​កម្មករ​ស្លាប់ និង​របួស។

អ្នក​យក​ព័ត៌មាន ភ្នំពេញ ប៉ុស្តិ៍ បាន​ជួប​ជាមួយ Hiroshi Suzuki អ្នក​សេដ្ឋកិច្ច​ជាន់​ខ្ពស់​ប្រចាំ​វិទ្យាស្ថាន​ស្រាវជ្រាវ​ពាណិជ្ជកម្ម​នៅ​កម្ពុជា​អំពី​ស្ថានភាព​នយោបាយ​ទូទៅ និង​ស្ថានភាព​សេដ្ឋកិច្ច។

កម្ពុជា​កំពុង​ជួប​បញ្ហា​សង្គម​ដ៏​គួរ​ឲ្យ​បារម្ភ​ដោយ​សារ​ភាព​មិន​ចុះ​សម្រុង​នយោបាយ និង​បញ្ហា​បាតុកម្ម​ទាមទារ​ដំឡើង​ប្រាក់​ខែ​របស់​កម្មករ​រោងចក្រ​កាត់ដេរ​រហូត​ឈាន​ដល់​កើត​មាន​អំពើ​ហិង្សា។ តើ​លោក​គិត​ថា ស្ថានភាព​នយោបាយ​កម្ពុជា​បច្ចុប្បន្ន អាច​រាំង​ស្ទះ​ដល់​កំណើន​សេដ្ឋកិច្ច​របស់​កម្ពុជា​យ៉ាង​ដូចម្តេច​ដែរ?

ចំពោះ​ការ​គិត​របស់​ខ្ញុំ វា​មិន​ទាន់​មាន​ការ​ប៉ះពាល់​ធ្ងន់​ធ្ងរ​ដល់​ស្ថិរភាព​ម៉ាក្រូ​សេដ្ឋកិច្ច​របស់​ប្រទេស​នេះ​នៅ​ឡើយ​ទេ។ ពិត​ណាស់​វា​មាន​ការ​ប៉ះ​ពាល់ តែ​វា​នៅ​មាន​កម្រិត​នៅ​ឡើយ។ កំណើន​សេដ្ឋកិច្ច​របស់​ប្រទេស​កម្ពុជា​ត្រូវ​បាន​រួម​ចំណែក​ដោយ​វិស័យ​ស្នូល​បួន​គឺ កសិកម្ម ទេសចរណ៍ និង​វិស័យ​សំណង់។ វិស័យ​ទេសចរណ៍​នៅ​តែ​មាន​កំណើន​ល្អ ហើយ​នៅ​ទទួល​បាន​ភ្ញៀវ​ទេសចរ​ជាច្រើន​មក​ទស្សនា​កម្ពុជា។ វិស័យ​កសិកម្ម និង វិស័យ​សំណង់​ក៏​នៅ​បន្ត​មាន​កំណើន​ផង​ដែរ។ ដូច្នេះ​ប្រសិន​បើ​យើង​សង្កេត​មើល​កត្តា​សំខាន់ៗ​ទាំង​នេះ ស្ថិរភាព និង​ការ​រីក​ចម្រើន​លើ​វិស័យ​ទាំង​នេះ​នៅ​តែ​អាច​ទ្រទ្រង់​ដល់​កំណើន​សេដ្ឋកិច្ច​នៅ​ប្រទេស​កម្ពុជា។ បើ​ទោះ​បី​ជា ឧស្សាហកម្ម​កាត់ដេរ​រង​ផល​ប៉ះពាល់​ខ្លះ ប៉ុន្តែ​វា​នៅ​មាន​កម្រិត​នៅ​ឡើយ មិន​ទាន់​ធ្ងន់​ធ្ងរ​ទេ។

យើង​សង្កេត​ឃើញ​ថា រោងចក្រ​កាត់ដេរ​ជាច្រើន​បាន​រង​ការ​ប៉ះពាល់​ខូច​ខាត នា​ពេល​ថ្មីៗ​នេះ ដែល​ជា​ការ​បារម្ភ​ថា អាច​ប៉ះពាល់​ដល់​ការ​សម្រេច​ចិត្ត​បញ្ជា​ទិញ​ថ្មីៗ​នៅ​ឆ្នាំ​នេះ តើ​មាន​កត្តា​អ្វី​ខ្លះ​ដែល​លោក​គិត​ថា ស្ថានភាព​មិន​ទាន់​អាក្រក់​ខ្លាំង​នោះ?

ពិត​ណាស់ ឧស្សាហកម្ម​កាត់ដេរ​បាន​ទទួល​រង​ការ​ប៉ះពាល់​លើ​ផ្នែក​មួយ​ចំនួន ព្រោះ​ថា រោងចក្រ​ជាច្រើន​ត្រូវ​បិទ​ទ្វារ រោងចក្រ​ខ្លះ​បាន​រង​ការ​បំផ្លិច​បំផ្លាញ​ដែល​ធ្វើ​ឲ្យ​ចង្វាក់​ផលិតកម្ម​ត្រូវ​កក​ស្ទះ រហូត​ក្រុមហ៊ុន​ខ្លះ​មិន​អាច​ផលិត​ទំនិញ​ទាន់​ពេល​វេលា​កំណត់ ហើយ​វា​ជា​ការ​បារម្ភ​ថា អាច​ធ្វើ​ឲ្យ​ការ​បញ្ជា​ទិញ​ថយ​ចុះ។ ក៏​ប៉ុន្តែ​បញ្ហា​នេះ​មិន​មែន​កើត​មាន​តែ​នៅ​ក្នុង​ប្រទេស​កម្ពុជា​ទេ ព្រោះ​ថា បង់ក្លាដែស ដែល​ជា​ប្រទេស​មាន​ឧស្សាហកម្ម​កាត់ដេរ​ដ៏​សំខាន់​មួយ​ដែរ នោះ​ក៏​កំពុង​ជួប​បញ្ហា​សង្គម និង​នយោបាយ​ដូច​គ្នា។ មាន​រឿង​ល្អ​មួយ​គឺ​ថា ស្ថានភាព​សេដ្ឋកិច្ច​សហរដ្ឋ​អាមេរិក និង​សហគមន៍ អឺរ៉ុប កំពុង​ងើប​ល្អ​ឡើង​វិញ។ ប្រទេស​ទាំង​ពីរ​ជា​ទីផ្សារ​សំខាន់​របស់ កម្ពុជា ហើយ​ស្ថានភាព​សេដ្ឋកិច្ច​ល្អ​នៅ​ប្រទេស​នេះ នឹង​ធ្វើ​ឲ្យ​កើន​ឡើង​តម្រូវ​ការ​ប្រើ​ប្រាស់​ទំនិញ​ផ្សេងៗ ដែល​រួម​មាន​សម្លៀក​បំពាក់​ពី​កម្ពុជា​ផង​ដែរ។ បើ​តាម​ខ្ញុំ​ដឹង​នៅ​សប្តាហ៍​នេះ មាន​កម្មករ​ប្រមាណ ៨០ ភាគរយ​ហើយ​បាន​ចូល​ធ្វើ​ការ​វិញ យើង​រំពឹង​ថា ស្ថានភាព​បាន​ល្អ​វិញ​ជា​បណ្តើរៗ។

កម្ពុជា កំពុង​ទទួល​បាន​ការ​ចាប់​អារម្មណ៍​ពី​ក្រុម​អ្នក​វិនិយោគ​កាន់​តែ​ច្រើន​ឡើង​នា​ប៉ុន្មាន​ឆ្នាំ​ចុង​ក្រោយ​នេះ ហើយ​កត្តា​ទាក់​ទាញ​មួយ​ដែល​វិនិយោគិន​តែង​លើក​ឡើង​គឺ​កម្ពុជា​មាន​ប្រជាជន​វ័យ​ក្មេង​ច្រើន និង​មាន​ប្រាក់​ឈ្នួល​ទាប។ ប៉ុន្តែ​ការ​ទាមទារ​ដំឡើង​ប្រាក់​ឈ្នួល​នៅ​កម្ពុជា​អាច​ធ្វើ​ឲ្យ​វិនិយោគិន​ងាក​ចេញ​ពី​កម្ពុជា​ទេ?

ការ​កើន​ឡើង​ប្រាក់​ឈ្នួល​មិន​មែន​កើត​មាន​តែ​នៅ​កម្ពុជា​ប៉ុណ្ណោះ​ទេ យើង​មើល​ឃើញ​ថា ប្រទេស​ជិត​ខាង​កម្ពុជា​ដូចជា ឥណ្ឌូនេស៊ី វៀតណាម និង ថៃ ក៏​កំពុង​មាន​ការ​កើន​ឡើង​ប្រាក់​ឈ្នួល​ផង​ដែរ។ យោង​តាម​របាយ​ការណ៍​ស្រាវជ្រាវ​របស់​អង្គការ​ពាណិជ្ជកម្ម​ក្រៅ​ប្រទេស ជប៉ុន (JETRO) ដែល​សិក្សា​ពី​ចំណូល​កម្មករ​ធ្វើ​ការ​តាម​រោងចក្រ​របស់​ជប៉ុន បុគ្គលិក​រោងចក្រ កម្ពុជា ម្នាក់​អាច​រក​ចំណូល​បាន​ជា​មធ្យម ១ ៧៦៤ ដុល្លារ​ក្នុង​មួយ​ឆ្នាំ​កាល​ពី​ឆ្នាំ ២០១៣។ ប្រាក់​ចំណូល​នេះ​គឺ​រួម​បញ្ចូល​ទាំង​ប្រាក់​ឈ្នួល​អប្បបរមា ប្រាក់​ឧបត្ថម្ភ​ផ្សេងៗ និង​ប្រាក់​បន្ថែម​ម៉ោង។ ការ​សិក្សា​ដូច​គ្នា​បង្ហាញ​ថា បុគ្គលិក​រោងចក្រ​នៅ ចិន ម្នាក់​បាន​ចំណូល​មធ្យម ៧ ៥០៣ ដុល្លារ​ក្នុង​មួយ​ឆ្នាំ​កាល​ពី​ឆ្នាំ ២០១៣។ បុគ្គលិក​ថៃ​ម្នាក់​រក​បាន​ប្រាក់​ចំណូល ៦ ៩៣៦ ដុល្លារ​ក្នុង​មួយ​ឆ្នាំ ឥណ្ឌូនេស៊ី រក​បាន ៤ ១៥៦ ដុល្លារ​ក្នុង​មួយ​ឆ្នាំ ហ្វីលីពីន រក​បាន ៣ ៩២២ ដុល្លារ​ក្នុង​មួយ​ឆ្នាំ វៀតណាម ៣ ០០០ ដុល្លារ​ក្នុង​មួយ​ឆ្នាំ និង​បុគ្គលិក​រោងចក្រ​នៅ ឡាវ អាច​រក​ប្រាក់​ចំណូល​មធ្យម ២ ២៩២ ដុល្លារ​ក្នុង​មួយ​ឆ្នាំ ហើយ​ប្រាក់​ឈ្នួល​ជា​មធ្យម​របស់​បុគ្គលិក​នៅ​តាម​ប្រទេស​ខាង​លើ​នឹង​បន្ត​កើន​ឡើង​ទៀត​នៅ​ក្នុង​ឆ្នាំ ២០១៤ នេះ។ ដូច្នេះ​តាម​រយៈ​ទិន្នន័យ​នេះ បុគ្គលិក​រោងចក្រ​នៅ​កម្ពុជា​មាន​ប្រាក់​ឈ្នួល​ទាប​ជាង​គេ។

ការ​ទទួល​បាន​ប្រាក់​ឈ្នួល​ខ្ពស់​ត្រូវ​ពឹង​លើ​សមត្ថភាព និង​ផលិតភាព​ខ្ពស់​ដែរ។ តំណាង​និយោជក​តែង​លើក​ឡើង​ថា កម្លាំង​ពលកម្ម​កម្ពុជា​មាន​ផលិតភាព​ទាប​ជាង​ប្រទេស​ជិត​ខាង ដែល​មិន​អាច​ដំឡើង​ប្រាក់​ខែ​ដូច​គេ​បាន។ តើ​លោក​គិត​យ៉ាង​ណា​ដែរ?

វា​ជា​ការ​ពិត! ផលិតភាព​ក្នុង​មនុស្ស​ម្នាក់ៗ​សម្រាប់​បុគ្គលិក​រោងចក្រ​កម្ពុជា នៅ​ទាប​ជាង​នៅ​ឡើយ​ធៀប​នឹង​ផលិតភាព​របស់​ប្រទេស​ជិត​ខាង។ ប៉ុន្តែ​ផលិតភាព​នេះ​មិន​គួរ​ពិចារណា​តែ​លើ​កត្តា​ធនធាន​មនុស្ស​តែ​មួយ​ប៉ុណ្ណោះ​នោះ​ទេ។ យើង​គួរ​ពិចារណា​លើ​កត្តា​ផ្សេងៗ​ផង​ដែរ​ដូច​ជា ឧបករណ៍​ដែល​បំពាក់​សម្រាប់​ដំណើរការ​ក្នុង​រោងចក្រ និង​ហេដ្ឋា​រចនា​សម្ព័ន្ធ​ល្អៗ​របស់​រោងចក្រ។ ឧទាហរណ៍ ប្រសិន​បើ​រោងចក្រ​មួយ​ធ្វើ​ការ​វិនិយោគ​ដោយ​បំពាក់​ម៉ាស៊ីន​ល្អៗ ផលិតភាព​របស់​បុគ្គលិក​ក្នុង​រោងចក្រ​នោះ​ក៏​មាន​ការ​រីក​ចម្រើន​ផង​ដែរ។ រោងចក្រ​ជប៉ុន​នៅ​កម្ពុជា​កំពុង​ផ្ដល់​ជូន​មធ្យោបាយ​ល្អ​ដល់​បុគ្គលិក និង​បំពាក់​ឧបករណ៍​ដើម្បី​ជួយ​សម្រួល​ការងារ​របស់​កម្មករ។ ផ្អែក​លើ​ការ​អង្កេត​របស់ JETRO ផលិតភាព​របស់​បុគ្គលិក​កម្ពុជា​បាន​កែលម្អ​យ៉ាង​ឆាប់​រហ័ស​ធៀប នឹង​ប្រទេស បង់ក្លាដែស។ ផលិតភាព​អាច​ត្រូវ​កែលម្អ​បន្ថែម​ទៀត​តាម​រយៈ​ការ​បណ្ដុះ​បណ្ដាល។

ការ​ផ្តល់​ប្រាក់​ខែ​គោល ១៦០ ដុល្លារ​អាច​ជា​ការ​ល្អ​សម្រាប់​ការ​រីក​ចម្រើន​ទាំង​អស់​គ្នា​ដែរ​ឬ​ទេ?

វា​ជា​បញ្ហា​ដ៏​រសើប​មួយ។ បើ​យើង​មើល​ចំណូល​ដែល​បុគ្គលិក​កម្ពុជា​ម្នាក់​ទទួល​បាន ហើយ​ធៀប​នឹង​ចំណូល​របស់​បុគ្គលិក ចិន និង ថៃ ទោះ​បី​ជា​បុគ្គលិក​រោងចក្រ​កាត់ដេរ​កម្ពុជា​ទទួល​បាន​ការ​ដំឡើង ប្រាក់​ឈ្នួល​ដល់ ១៦០ ដុល្លារ​ក៏​នៅ​តែ​គម្លាត​ឆ្ងាយ​នៅ​ឡើយ។ ប៉ុន្តែ​យើង​ចាំ​បាច់​ត្រូវ​ពិចារណា​លើ​ដៃ​គូ​ប្រកួត​ប្រជែង​ស្រួច​ស្រាល់​របស់​យើង​ដែល​មាន​ដូចជា មីយ៉ាន់ម៉ា ឡាវ និង បង់ក្លាដែស ជាដើម។ យើង​ត្រូវ​ព្យាយាម​រក្សា​តុល្យភាព​នៃ​ប្រាក់​ឈ្នួល​អប្បបរមា និង​ការ​ទាក់​ទាញ​វិនិយោគិន បើ​មិន​ដូច្នេះ​ទេ​កម្ពុជា​អាច​មាន​ផល​ប៉ះពាល់។

សម្រាប់​វិនិយោគិន សុវត្ថិភាព និង​ស្ថិរភាព គឺជា​ការ​ចាំ​បាច់​បំផុត៕ PB

អត្ថបទគួរចាប់អារម្មណ៍