.jpg)
លោកមេធាវី អ៊ឹម រចនា នៃក្រុមមេធាវី The FLAG LAW GROUP។ រូបថត សហការី
ការរស់នៅប្រចាំថ្ងៃរបស់ពលរដ្ឋក្នុងសហគមន៍ ប្រសិនបើមានអ្នកណាម្នាក់បានធ្វើអ្វីមួយបណ្ដាលឲ្យនរណាម្នាក់ស្លាប់ តែអ្នកប្រព្រឹត្តនោះគឺគាត់ត្រូវបានគេជួលឲ្យមកធ្វើការងារទេ។ ជុំវិញទោសទណ្ឌនៃករណីនេះភ្នំពេញប៉ុស្ដិ៍បានសម្ភាសជាមួយលោក អ៊ឹម រចនា ក្រុមមេធាវី ដឺ ហ្វ្លេក (The FLAG LAW- GROUP) ដែលមានការិយាល័យនៅផ្ទះលេខ ២A ផ្លូវលេខ ៥៦៦ កែងផ្លូវ ៦០៨ សង្កាត់បឹងកក់២ ខណ្ឌទួលគោក រាជធានីភ្នំពេញដែលមានខ្លឹមសារដូចខាងក្រោម ៖
ឧបមាថា លោក (ក) បានជួលកម្មករម្នាក់ឲ្យកាប់ដើមឈើ តែចៃដន្យដើមឈើនោះរលំសង្កត់លើមនុស្សស្លាប់ តើលោក (ក) ត្រូវទទួលខុសត្រូវទាំងស្រុង ឬក៏កម្មករជាអ្នកទទួលខុសត្រូវ?
ករណីនេះពាក់ព័ន្ធនឹងមនុស្សឃាតដោយអចេតនា ហើយជាឯតទគ្គកម្មការទទួលខុសត្រូវព្រហ្មទណ្ឌគឺអ្នកណាប្រព្រឹត្តអ្នកនោះទទួលខុសត្រូវព្រហ្មទណ្ឌ។ ចំពោះទាក់ទងនឹងសំណងវិញគឺត្រូវមើលទំនាក់ទំនងរវាងអ្នកដែលត្រូវគេជួលឲ្យកាប់ឈើ និងអ្នកទទួលសេវាពីការកាប់ឈើថា តើទំនាក់ទំនងរបស់ពួកគេស្ថិតក្នុងលក្ខខណ្ឌបែបណា ឬស្ថិតនៅក្នុងការចុះកុងត្រារបៀបម៉េច? ប្រសិនបើភាគីទាំង ២ នាក់មិនបានធ្វើកិច្ចសន្យាជាមួយគ្នាទេ ជាទូទៅអ្នកណាប្រព្រឹត្តគឺអ្នកនោះត្រូវសងសំណងព្យសនកម្ម។ ប៉ុន្តែដោយសារថាយើងមើលឃើញការអនុវត្តភាគច្រើនគឺអ្នកដែលជួលឲ្យគេធ្វើ ប៉ុន្តែស្រាប់តែអ្នកធ្វើនោះធ្វេសប្រហែស ហើយនាំឲ្យអ្នកផ្សេងស្លាប់ ឬរងគ្រោះ អ៊ីចឹងភាគច្រើនអ្នកដែលជួលឲ្យគេធ្វើហ្នឹងជាអ្នកបង់ថ្លៃសេវាជួសជុលការខូចខាត។
ករណី លោក (ក) ចេញសំណងទៅឲ្យក្រុមគ្រួសារជនរងគ្រោះហើយខាងភាគីរងគ្រោះក៏មិនប្តឹងដែរ។ តែរឿងនេះត្រូវបានសមត្ថកិច្ចនគរបាលមូលដ្ឋានប្តឹងទៅតុលាការ។ តើករណីបែបនេះលោក (ក) ជាប់បណ្តឹងទេ?
ក្នុងករណីនេះ បើទោះបីជាខាងភាគីជនរងគ្រោះមានការដកពាក្យបណ្តឹងក៏ពិតមែន ប៉ុន្តែករណីរឿងព្រហ្មទណ្ឌគឺវាជាប់ពាក់ព័ន្ធបណ្តឹង ២ គឺបណ្តឹងអាជ្ញានិងបណ្តឹងរដ្ឋប្បវេណី។ ចំពោះដើមបណ្តឹងអាជ្ញាគឺមានព្រះរាជអាជ្ញាហើយសេនាធិការរបស់ព្រះរាជអាជ្ញា គឺនគរបាលយុត្តិធម៌។ អ៊ីចឹងទោះបីជាខាងដើមបណ្តឹងរដ្ឋប្បវេណីអាចថាជាគ្រួសាររបស់ជនរងគ្រោះគាត់ដកពាក្យបណ្តឹងដោយសារមានការប៉ះប៉ូវណាមួយរួចរាល់ក៏ដោយ តែបើនគរបាលមើលទៅឃើញថា វាប៉ះពាល់ដល់សណ្តាប់ធ្នាប់សង្គមធ្ងន់ធ្ងរគឺមន្ត្រីនគរបាលយុត្តិធម៌មានសិទិ្ធក្នុងការធ្វើរបាយការណ៍បញ្ជូនរឿងហ្នឹងទៅព្រះរាជអាជ្ញាដដែលដើម្បីឲ្យព្រះរាជអាជ្ញាចាត់ការទៅតាមសមត្ថកិច្ចរបស់ខ្លួនដែលជាដើមបណ្តឹងអាជ្ញា។ រឿងព្រហ្មទណ្ឌវាខុសគ្នានឹងរឿងរដ្ឋប្បវេណី។ រឿងរដ្ឋប្បវេណីបើភាគីទាំងសងខាងដោះស្រាយគ្នារួចរាល់អស់គឺចប់ហើយ។
ប៉ុន្តែរឿងព្រហ្មទណ្ឌ គឺមិនមែនអ៊ីចឹងទេ ត្រូវសងទាំងសំណងរដ្ឋប្បវេណី និងត្រូវទទួលខុសត្រូវព្រហ្មទណ្ឌទៀត។ ទោះបីជាការប៉ះប៉ូវនោះយើងអាចចាត់បញ្ចូលហើយថាជាការសងសំណងរដ្ឋប្បវេណី ប៉ុន្តែការទទួលខុសត្រូវព្រហ្មទណ្ឌនៅតែត្រូវអនុវត្តដដែល។ គ្រាន់តែថាអនុវត្តទៅលើអ្នកប្រព្រឹត្តដែលនាំឲ្យមានមនុស្សស្លាប់។ តែចំពោះលោក (ក) ជួលគឺគាត់ពុំមានតួនាទីទទួលខុសត្រូវករណីព្រហ្មទណ្ឌ តែគាត់ទទួលខុសត្រូវត្រឹមសំណងរដ្ឋប្បវេណីតែប៉ុណ្ណោះ៕
