The Phnom Penh Post Search

Search form




Logo of Phnom Penh Post newspaper Phnom Penh Post - គួយ ធុនណា ៖ មេធាវី​ត្រូវ​ស្គាល់​ពី​កាលៈ​ទេសៈ




គួយ ធុនណា ៖ មេធាវី​ត្រូវ​ស្គាល់​ពី​កាលៈ​ទេសៈ

គួយ ធុនណា ៖ មេធាវី​ត្រូវ​ស្គាល់​ពី​កាលៈ​ទេសៈ

130104_10
លោកមេធាវី គួយ ធុនណា បម្រើសេវាជាមេធាវីឯកជន ទទួលរឿងក្តីចម្រុះ សារុំ

ភ្នំពេញៈ ការ​សាង​ខ្លួន​ឲ្យ​ក្លាយ​ជា​មេធាវី​ឬ​អ្នក​ច្បាប់​មាន​វិជ្ជា​ជីវៈ​ ក្នុង​អាជីព​នោះ តើ​ត្រូវ​ផ្តើម​ចេញ​ពី​អ្វី? ហើយ​គួរ​ធ្វើ​របៀប​ណា​ដើម្បី​ការពារ​ក្តី​ឈ្នះ និង​ចៀស​វាង​ពី​ការ​រិះគន់​លើ​ការ​លម្អៀង​ទៅ​បាន?

លោក គួយ ធុនណា ជាមេធាវី​បម្រើ​សេវា​ឯកជន​និង​មាន​រឿង​ក្តី​ចម្រុះ ដែល​កូន​ក្តី​បាន​មក​ពឹង​ពាក់​ឲ្យ​ជួយ​ការពារ ពិសេស​កូន​​ក្តី​ជា​មន្រ្តី​រដ្ឋាភិបាល ពី​ក្រុម​ហ៊ុន​ធំៗ ក្នុង​ស្រុក​និង​ក្រៅ​ស្រុក​ផង។ ប៉ុន្តែ រឿង​ប្រឈម​ជាមួយ​នឹង​អ្នក​ច្បាប់​ដើម្បី​ឈ្នះ​ក្តី​បាន​នោះ មិន​សុទ្ធ​តែ​ជា​ជោគ​ជ័យ​របស់​លោក​នោះ​ទេ តែ​វា​ជា​កាតព្វ​កិច្ច​មេធាវី ត្រូវ​រិះ​រក​មធ្យោ​បាយ ធ្វើ​យ៉ាង​ណា​ដើម្បី​ជួយ​កូន​ក្តី​ឲ្យ​អស់​លទ្ធភាព។

លោក គួយ ធុនណា ជា​កូន​អ្នក​ស្រុក​កោះ​ធំ​ខេត្ត​កណ្តាល​និង​មាន​បង​ប្អូន​៧​នាក់​(ប្រុស​៣ ស្រី​៤) កំព្រា​ឪពុក​ពី​តូច​ហើយ​លោក​រៀន​សូត្រ​ចេះ​ដឹង​ដោយ​បាន​មក​រស់​នៅ​ជាមួយ​បង​ស្រី​នៅ​ភ្នំពេញ។ លោក​បាន​បញ្ចប់​ការ​សិក្សា​ផ្នែក​ច្បាប់​ថ្នាក់​ឧត្តម នៅ​សាលា​ភូមិន្ទ​នីតិ​សាស្រ្ត​និង​វិទ្យា​សាស្រ្ត​សេដ្ឋ​កិច្ច និង​បាន​ជាប់​ជា​មេធាវី​ដោយ​ស្វ័យ​ប្រវត្តិ​នៅ​ឆ្នាំ​២០០៩ បន្ទាប់​ពី​លោក​ធ្វើ​ជា​គ្រូ​បង្រៀន​ច្បាប់​នៅ​តាម​សាលា​ឯកជន​មួយ​រយៈ។

ខាង​ក្រោម​នេះ​ជា​បទ​សម្ភាស​ផ្ទាល់​ជាមួយ​លោក គួយ ធុនណា ជុំវិញ​បទ​ពិសោធ​ក្នុង​អាជីព​មេធាវី​របស់​លោក ៖

តើ​ធ្វើ​ដូចម្ដេច​ដើម្បី​ឲ្យ​ក្លាយ​ខ្លួន​ជា​មេធាវី​អាជីព​អាច​ការ​ពារ​ក្តី​បាន​ពូកែ?

ធ្វើ​ជា​មេធាវី​ត្រូវ​ផ្អែក​លើ​សមត្ថភាព ឆ្លាត​វាង​វៃ មាន​បញ្ញា​ចេះ​ស្គាល់​កាលៈ​ទេសៈ និង​កាលានុវត្ត​ភាព ដូច្នេះ​បើ​គ្មាន​មូល​ដ្ឋាន​ទាំង​នេះ គឺ​មិន​អាច​ទៅ​រួច​ទេ។ ប៉ុន្តែ ខ្ញុំ​ទើប​តែ​ចូល​ប្រឡូក​និង​ឆ្លង​កាត់​បទ​ពិសោធ​បាន​រយៈ​ពេល​តែ​៣​ឆ្នាំ​តែ​ប៉ុណ្ណោះ​ក្នុង​អាជីព​ជា​មេធាវី​នេះ។

តើ​មាន​រឿង​ក្តីអ្វី​ខ្លះ​ដែល​លោក ជួប​ប្រទះ​ក្នុង​ការ​ការពារ​ក្តី​ហើយ​មាន​កូន​ក្តី​ប្រភេទ​ណា​ដែល​បាន​មក​ពឹង​ឲ្យ​ការពារ?

ធម្មតា​ធ្វើ​ជា​មេធាវី​កូន​ក្តី​ណា​ក៏​ដោយ ដែល​មក​ពឹង​ហើយ​យើង​ត្រូវ​តែ​ជួយ​ទាំង​អស់ ដូច្នេះ​ហើយ​បាន​ជា​គេ​ថា មេធាវី​ជួយ​ចោរ។ ការ​ពិត​ព្រោះ​មេធាវី​ផ្អែក​តែ​លើ​ឯកសារ​ផ្លូវ​ច្បាប់ និង​ភស្តុ​តាង​ទេ ដើម្បី​រក​មធ្យោ​បាយ រក​ច្រក​ណា​ចេញ​រួច។ ជា​ទ្រឹស្តី​របស់​ខ្ញុំ​នោះ មេធាវី​ដែល​ពូកែ គឺ​ថា បើ​កូន​ក្តី​ខ្លួន​ខុស​កាន់​តែ​ខ្លាំង គាត់​កាន់​តែ​ជួយ​បាន នោះ​គឺ​គាត់​ពូកែ។ ប៉ុន្តែ អាជីព​ខ្ញុំ​មេធាវី​ខ្ញុំ​មាន​មនសិការ ខ្ញុំ​មាន​សីល​ធម៌ វិជ្ជា​ជីវៈ​របស់​ខ្ញុំ ហើយ​រាល់​កូន​ក្តី​ណា​ក៏​ដោយ ដែល​មក​ពឹង​ខ្ញុំ បើ​ខ្ញុំ​មើល​ទៅ​ឃើញ​ថា កូន​ក្តី​ខ្ញុំ​ត្រូវ គឺ​ខ្ញុំ​ជួយ​អស់​លទ្ធភាព​រីឯ​បញ្ហា​លុយ បើ​អ្នក​ក្រ​ខ្ញុំ​មិន​យក​លុយ​ទេ តែ​បើ​អ្នក​មាន​ត្រូវ​តែ​បង់​លុយ​ឲ្យ​ខ្ញុំ។ ចំពោះ​ការ​ប្រឈម​វិញ វា​តែង​តែ​មាន​ហើយ ព្រោះ​ធម្មតា​នៅ​ក្នុង​សង្គម​វា​មាន​បញ្ហា​គ្រប់​បែប​យ៉ាង ដូច្នេះ​វា​មាន​អន្តរាគមន៍​ពី​អ្នក​តូច​ពី​អ្នក​ធំ ហើយ​យើង​ត្រូវ​តាំង​ចិត្ត​ថា យើង​ជា​មេធាវី ជា​អ្នក​ចេញ​ទៅ​ច្បាំង គឺ​យើង​មិន​ត្រូវ​ខ្លាច​ទេ ព្រោះ​យើង​ធ្វើ​តាម​ច្បាប់ ហើយ​បើ​អ្នក​ឯង​គំរាម​មេធាវី​ទៀត​នោះ គឺ​ចប់​ហើយ។

ដើម្បី​ការ​ពារ​រឿង​ក្តី​ណា​មួយ​បាន​ជោគ​ជ័យ តើ​លោក​បាន​រៀប​ចំ​យុទ្ធ​សាស្រ្ត​បែប​ណា​ខ្លះ​ដែរ?

រឿង​ខ្លះ​ដែល​ខ្ញុំ​កាន់ គឺជា​រឿង​ស្មុគ​ស្មាញ ដូច្នេះ​ខ្ញុំ​ត្រូវ​ធ្វើ​យុទ្ធ​សាស្រ្ត​ប្រៀប​ដូច​ជា​យុទ្ធ​សាស្រ្ត​វាយ​សមរភូមិ​របស់​កង​ទ័ព​ដូច្នោះ​ដែរ ដោយ​ត្រូវ​មើល​ជ្រុង​ច្បាប់ ចិត្ត​សាស្រ្ត សេដ្ឋ​កិច្ច និង​នយោ​បាយ​យ៉ាង​ម៉េច។ សម្រាប់​បទ​ពិសោធ​របស់​ខ្ញុំ បើ​ពិនិត្យ​មើល​រឿង​ក្តី​ធំៗ​នោះ​បាន​ល្អិត​ល្អន់​ហើយ គឺ​ខ្ញុំ​រៀប​សេណា​រីយោ​ដើម្បី​ទប់​ទល់​ក្តី​មិន​ខុស​នោះ​ទេ។ ចំពោះ​កូន​ក្តី​មក​ពឹង​រក បើ​អ្នក​មាន​ខ្ញុំ​យក​ថ្លៃ​សេវា តែ​បើ​ក្រីក្រ​ពិសេស​អ្នក​កាសែត​ខ្ញុំ​មិន​យក​លុយ​ទេ។

តើ​លោក​ធ្លាប់​ទទួល​រឿង​ក្តី​ណា​ដែល​អយុត្តិធម៌ ហើយ​ជួយ​ការពារ​ទាំង​បំពាន​ដែរ​ទេ​ពី​មុន​មក?

ខ្ញុំ​មិន​ដែល​កាន់​រឿង​ដែល​អយុត្តិធម៌​ហើយ​បំពាន កាឡៃ​ជា​រឿង​ផ្សេង​ទេ ព្រោះ​យើង​គួរ​គិត​ថា បើ​យើង​មិន​ខុស​ទេ ហើយ​គេ​មក​ធ្វើ​អំពើ​អយុត្តិធម៌​លើ​យើង តើ​យើង​ឈឺ​ចាប់​ប៉ុន​ណា? ដូច្នេះ​ខ្ញុំ​ធ្វើ​តែ​អ្វី​ដែល​យុត្តិធម៌​ទេ។ ខ្ញុំ​ប្រកាន់​ទ្រឹស្តី​មួយ​ថា ធ្វើ​ជា​មេធាវី ទី១ ត្រូវ​មាន​សមត្ថភាព​ចំណេះ​ដឹង ទី២-​ឆ្លាត ទី៣-​មាន​បញ្ញា ទី៤-​កាលៈ​ទេសៈ​កាលានុ​វត្ត​ភាព។ បើ​មាន​មូល​ដ្ឋាន​ទាំង​៤ នេះ​ទើប​អាច​ធ្វើ​មេធាវី​ទៅ​រួច។

តើ​មាន​រឿង​ក្តីក្តាំ​ណា​ខ្លះ​ដែល​លោក​ជួប​បញ្ហា​ប្រឈម និង​រឿង​ក្តី​ណា​ខ្លះ​ដែល​លោក​គិត​ថា​មាន​គ្រោះ​ថ្នាក់​ដែរ​ទេ?

បើ​ធ្វើ​ជា​មេធាវី​ខ្លាច គួរ​កុំ​ធ្វើ! ខ្ញុំ​មាន​រឿង​ក្តី​ចម្រុះ​ដែល​ធ្លាប់​បាន​ជួប​ដូច្នេះ​មុន​នឹង​ចាប់​ផ្តើម​ការ​ពារ​រឿង​នោះ យើង​ត្រូវ​សិក្សា​មើល​ថា តើ​វា​នឹង​អាច​ដោះ​ចេញ​តាម​ច្រក​ណា​បាន? អ៊ីចឹង​ត្រូវ​គិត​ជ្រុង​ពី​ចិត្ត​សាស្រ្ត ជ្រុង​ច្បាប់ ជ្រុង​នយោបាយ​និង​ជ្រុង​សេដ្ឋកិច្ច គឺ​ប្រៀប​ដូច​ជា​ក្រឡា​អុក​ដែរ។ ប៉ុន្តែ​រឿង​ដែល​ខ្ញុំ​កាន់​ច្រើន​តែ​រឿង​នោះ​ឆ្លង​កាត់​មេធាវី​៣-៤​រួច​ហើយ ដូច​ជា រឿង​ទំនាស់​មេព្រៃ​និង​ទាហាន​នៅ​សៀមរាប គឺ​ដូរ​មេធាវី​៣-៤​នាក់​ហើយ​ទម្រាំ​មក​ដល់​ខ្ញុំ និង​ការពារ​ក្តី​ឲ្យ​អតីត​ប្រធាន​ពិធី​ការ​សម្តេច ជា ស៊ីម លោក​ស្រី ផេង​គន្ធា បូរី ពិសេស​រឿង​ក្តី​ក្តាំ​រវាង​ក្រុម​ហ៊ុន​០១១ ដែល​ខាង​ក្រុម​ហ៊ុន​សាំង​ហ្គាពួរ-​ន័រវែស បាន​មក​ពឹង​ខ្ញុំ។

តើ​លោក​មាន​វិធី​ដូចម្តេច​ទើប​អាច​តតាំង​យក​ឈ្នះ​លើ​អ្នក​ច្បាប់​ដូច​គ្នា​បាន នា​ពេល​កន្លង?

ធ្វើ​មេធាវី​ដូច​ធ្វើ​ចម្បាំង​ដែរ​គ្រាន់​តែ​មួយ​ច្បាំង​ខាង​អាវុធ​និង​មួយ​ទៀត ចម្បាំង​ខាង​ផ្លូវ​ច្បាប់។ ធម្មតា​ទេព​កោសល្យ​និង​ចំណេះ​ដឹង បញ្ញា​របស់​មនុស្ស​ម្នាក់ៗ​ខុស​គ្នា ចំពោះ​ខ្ញុំ​ដើម្បី​ការពារ​រឿង​ក្តី​ណា​មួយ​ឲ្យ​ជោគ​ជ័យ ទី១ ត្រូវ​ដឹង​ថា កូនក្តី​យើង​មាន​ចំណុច​អ្វី​ខ្លាំង​ខាង​ផ្លូវ​ច្បាប់ ទី២​ត្រូវ​ដឹង​ថា ភាគី​យើង​មាន​ចំណុច​ខ្សោយ​អី និង​ទី៣ យើង​ត្រូវ​សិក្សា​ពី​ដៃគូ​យើង​ថា តើ​គេ​មាន​ចំណុច​ខ្សោយ​ត្រង់​ណា​ខាង​ផ្លូវ​ច្បាប់ តើ​យើង​គួរ​វាយ​បក​យ៉ាង​ម៉េច​ដើម្បី​បាន​ឈ្នះ?

ចំពោះ​បទ​ពិសោធ​របស់​ខ្ញុំ ពេល​ដែល​ភាគី​ចាញ់ ក្នុង​ទឹក​ទី១ ហើយ គឺខ្ញុំ​វាយ​យក​ផ្តាច់​តែ​ម្តង ប៉ុន្តែ ភាព​រហ័ស​រហួន គឺជា​រឿង​មួយ​សំខាន់​ខ្លាំង​ណាស់។

ជា​បទ​ពិសោធ​ក៏​ដូច​ជា​អនុសាសន៍​សម្រាប់​អ្នក​ដែល​ចង់​ក្លាយ​ជា​មេធាវី​អាជីព តើ​គួរ​រៀប​ចំ​ខ្លួន​ដូចម្តេច?

គ្រាន់​តែ​ជា​ការ​យល់​ឃើញ​និង​ជា​បទ​ពិសោធ​របស់​ខ្ញុំ ដើម្បី​ឲ្យ​ក្លាយ​ជា​មេធាវី​ល្អ គឺ​គប្បី​មាន​ចំណេះ​ជា​មូល​ដ្ឋាន​ពិត កុំ​មាន​តែ​សញ្ញា​បត្រ ព្រោះ​ចំណេះ​ប្រៀប​ដូច​ជា​អាវ​ក្រោះ​ការពារ​ខ្លួន​យើង ហើយ​ម្យ៉ាង​ត្រូវ​ហ៊ាន​សម្រេច​ចិត្ត តែ​ក៏​ត្រូវ​ចេះ​យល់​ពី​កាលៈ​ទេសៈ​ផង​ដែរ៕

អត្ថបទគួរចាប់អារម្មណ៍