.jpg)
លោកមេធាវី ឡោ គីមហ្គិច កាលពីពេលកន្លងទៅ។ រូបថត សហការី
ការថតរូប ឬការថតសំឡេង ចំពោះមនុស្សណាម្នាក់ គេអាចគិតថា ជារឿងធម្មតា ប៉ុន្តែអ្នកដែលថតរូបគេនោះមិនបានសុំការអនុញ្ញាត ឬប្រាប់ឲ្យអ្នកដែលយើងត្រូវថតនោះបានដឹងជាមុនទេ។ ពាក់ព័ន្ធនឹងការធ្វើបែបនេះ ថាតើត្រូវច្បាប់ ឬខុសច្បាប់យ៉ាងណានោះ ភ្នំពេញប៉ុស្តិ៍បានសម្ភាសជាមួយលោកមេធាវី ឡោ គីមហ្គិច នៃក្រុមមេធាវីអាស៊ានអន្តរជាតិមានអាសយដ្ឋានផ្ទះលេខ ១៦R ផ្លូវ ២៥២ សង្កាត់ចតុមុខដែលមានខ្លឹមសារដូចខាងក្រោម ៖
ឧបមាថា លោក (ក) កំពុងឈរ ហើយស្រាប់តែមានមនុស្សមកថតរូបគាត់ដោយគ្មានសុំការអនុញ្ញាត។ ចំពោះករណីនេះ តើលោក (ក) អាចប្តឹងអ្នកថតរូបនោះបានទេ ?
ករណី លោក (ក) កំពុងឈរ ហើយមានអ្នកផ្សេងមកថតរូបរបស់គាត់ ខណៈគាត់មិនបានដឹងខ្លួនជាមុន ឬខណៈគ្មានការអនុញ្ញាតពីលោក (ក)។ ដូច្នេះ លោក (ក) អាចប្តឹងអ្នកថតរូបនោះបានហើយត្រូវសងសំណងការខូចខាតទៅឲ្យលោក (ក) ពីព្រោះយើងមិនអាចទៅថតរូបគេដោយសេរីបានទេ។
បើយោងមាត្រា ៣០១ នៃ ក្រមព្រហ្មទណ្ឌចែងថា អំពើស្តាប់ ថតសម្តីដែលនិយាយជាឯកជន ឬជាការសម្ងាត់ដោយគ្មានការយល់ព្រមពីបុគ្គលដែលមានការពាក់ព័ន្ធនោះត្រូវផ្តន្ទាទោសដាក់ពន្ធនាគារ ពី ១ (មួយ) ខែទៅ ១ (មួយ)ឆ្នាំ និងពិន័យជាប្រាក់ពី ១០០ ០០០ (មួយសែន) រៀលទៅ ២០០០ ០០០ ( ពីរលាន) រៀលលើកលែងតែករណីដែលច្បាប់អនុញ្ញាត។ ត្រូវបានសន្មតការព្រមព្រៀង ប្រសិនបើបុគ្គលដែលពាក់ព័ន្ធនេះបានទទួលដំណឹងអំពីការស្តាប់ឬ ថតហើយបុគ្គលនោះមិនបានជំទាស់ទេនោះ។
មាត្រា ៣០២ បទប៉ះពាល់ដល់សិទ្ធិខាងរូបភាពនៃបុគ្គលអំពើថតរូបភាពនៃបុគ្គលនៅក្នុងទីកន្លែងឯកជនដោយគ្មានការព្រមព្រៀងពីបុគ្គលនេះទេ ត្រូវផ្តន្ទាទោសដាក់ពន្ធនាគារពី ១ (មួយ) ខែទៅ ១ (មួយ) ឆ្នាំ និងពិន័យជាប្រាក់ពី ១០០ ០០០ (មួយសែន) រៀលទៅ ២០០០ ០០០ (ពីរលាន) រៀលលើកលែងតែករណីដែលច្បាប់អនុញ្ញាត។ ត្រូវបានសន្មតជាការព្រមព្រៀងប្រសិនបើបុគ្គលដែលពាក់ព័ន្ធនេះបានទទួលដំណឹងអំពីការថត ហើយបុគ្គលនេះមិនបានជំទាស់ទេនោះ។
ឧបមាថាមានករណីគ្រោះថ្នាក់ចរាចរណ៍មួយបណ្តាលឲ្យមានមនុស្សស្លាប់ ។ ពេលនោះមានគេថតរូបជនរងគ្រោះនោះយកទៅចុះផ្សាយជាសាធារណៈ។ តើករណីនេះខុសនឹងច្បាប់ដែរទេ?
នៅត្រង់ចំណុចនេះហាក់ដូចជាមិនទាន់ចែកដាច់ពីគ្នាទេអំពីលទ្ធភាពនៃការថតរូបចុះផ្សាយ ឬមិនអនុញ្ញាតឲ្យចុះផ្សាយបាន។
ក៏ប៉ុន្តែច្បាប់បានចែងថា ប្រសិនបើនរណាម្នាក់ចង់ថតរូប ឬថតសំឡេងរបស់បុគ្គលណាម្នាក់ត្រូវតែមានការអនុញ្ញាតពីបុគ្គលនោះជាមុនសិនទើបអាចថតបាន។ ក៏ប៉ុន្តែបើរឿងនោះជាសាធារណៈដូចជាមានមនុស្សស្លាប់ដោយគ្រោះថ្នាក់ចរាចរណ៍ដែលពេលនោះនរណាក៏ឃើញមនុស្សនោះស្លាប់ដែរ។
ដូច្នេះដូចជាគ្មានបញ្ហាអ្វីពាក់ព័ន្ធនឹងការថតរូបនោះទេ ព្រោះការថតរូបផ្សព្វផ្សាយក៏មិនមែនមានចេតនាបង្កឲ្យអាប់ឱនកិត្តិយសអ្នកស្លាប់ ឬក្រុមគ្រួសារអ្នកស្លាប់ក៏ទេដែរ។ ផ្ទុយទៅវិញយើងជួយធ្វើការផ្សព្វផ្សាយជួយអាណិត ជួយព្រមានដល់អ្នកដទៃដើម្បីឲ្យបានដឹងតែប៉ុណ្ណោះ៕
