.jpg)
លោក មេធាវី យុង ផានិត កាលពីកន្លងមក។ រូបថត សហការី
ការយកទ្រព្យសម្បត្តិអ្នកដទៃចាត់ទុកជាអំពើលួច។ តែអំពើយកទ្រព្យអ្នកដទៃក្នុងស្ថានភាពដែលម្ចាស់ទ្រព្យសម្បត្តិនោះកំពុងមានគ្រោះអាសន្នដូចជា ភ្លើងឆេះផ្ទះជាដើម តើជនដែលយកទ្រព្យសម្បត្តិគេនោះនឹងត្រូវមានទោសកម្រិតណា? ជុំវិញបញ្ហានេះ ភ្នំពេញប៉ុស្តិ៍បានសម្ភាសជាមួយលោកមេធាវី យុង ផានិត អនុប្រធាននាយកដ្ឋានការពារក្តីជនក្រីក្រនៃគណៈមេធាវីនៃព្រះរាជាណាចក្រកម្ពុជាដែលមានខ្លឹមសារដូចតទៅ ៖
ឧបមាថាមានករណីអគ្គិភ័យឆេះផ្ទះ ហើយមានជនណាម្នាក់ចូលទៅជួយជញ្ជូនទ្រព្យសម្បត្តិម្ចាស់ផ្ទះដែលឆេះនោះ ប៉ុន្តែគេបានឆក់ឱកាសយកទ្រព្យទាំងនោះទៅទុកនៅផ្ទះខ្លួនទៅវិញ។
សួរថា តើអ្នកដែលបានយកទ្រព្យគេនោះ ចាត់ទុកថាពាក់ព័ន្ធនឹងអំពើលួចដែរទេ?
ករណីជនណាម្នាក់ទៅជួយជញ្ជូនទ្រព្យអ្នកដែលត្រូវភ្លើងឆេះផ្ទះហើយបន្លំយកទ្រព្យសម្បត្តិគេនៅពេលម្ចាស់ទ្រព្យមិនបានដឹងនោះ គឺជនម្នាក់ហ្នឹងចាត់ទុកថា ជាចោរលួចទ្រព្យសម្បត្តិគេហើយ។ ដោយសារតែជនម្នាក់នោះដឹងហើយថា ទ្រព្យនោះជារបស់ម្ចាស់ផ្ទះដែលមានភ្លើងឆេះ ប៉ុន្តែខ្លួនបែរជាបន្លំជញ្ជូនយកទ្រព្យសម្បត្តិគេទៅទុកនៅក្នុងផ្ទះរបស់ខ្លួនវិញ។
ករណីនេះពាក់ព័ន្ធនឹងអំពើលួចមួយរយភាគរយហើយ ហើយជនម្នាក់នោះមិនអាចប្រកែកថា គាត់ជួយជញ្ជូន ប៉ុន្តែអត់មានកន្លែងទុកក៏យកទ្រព្យនោះទៅទុកនៅផ្ទះរបស់គាត់នោះទេ និយាយឲ្យខ្លីគឺមិនអាចដោះសាបែបនេះបានទេ។
ចុះបើការយកទ្រព្យរបស់គេក្នុងស្ថានភាពអាសន្នបែបនេះអាចមានទោសធ្ងន់ជាងបទលួចធម្មតាទេ?
អំពើលួចរបស់ជនម្នាក់នោះគឺជាអំពើលួចធម្មតាទេដែលមិនអាចនិយាយថាម្ចាស់ទ្រព្យកំពុងមានអាសន្នភ្លើងឆេះផ្ទះហើយ ហើយជនដែលលួចទ្រព្យគេនោះមានទោសធ្ងន់នោះទេ។ តែបើ (ឧទាហរណ៍) ថាជនម្នាក់នោះលួចយកទៅជួយសង្គ្រោះជីវិតអ្នកដទៃ ឬគ្រួសាររបស់ខ្លួនគឺតុលាការអាចផ្តល់ស្ថានសម្រាលទោសដល់ជននោះបានខ្លះ។
ប៉ុន្តែបើជននោះទៅលួចទ្រព្យគេនៅពេលដែលម្ចាស់ទ្រព្យកំពុងមានអាសន្នហ្នឹងដោយគ្មានមូលហេតុដូចខាងលើគឺតុលាការមិនផ្តល់ស្ថានសម្រាលទោសឲ្យជននោះទេ។ តែបើត្រូវមានទោសធ្ងន់លើសពីទោសលួចនោះទៀតក៏គ្មានដែរ។
យោងមាត្រា ៣៥៣ នៃក្រមព្រហ្មទណ្ឌចែងថា អំពើលួចគឺជាអំពើដកហូតដោយទុច្ចរិតនូវទ្រព្យសម្បត្តិ ឬវត្ថុផ្សេងទៀតរបស់អ្នកដទៃតាមគ្រប់មធ្យោបាយក្នុងគោលបំណងយកមកធ្វើជាកម្មសិទ្ធិរបស់ខ្លួន។
ចំពោះមាត្រា ៣៥៦ នៃក្រមព្រហ្មទណ្ឌនេះដែរក៏ចែងថា អំពើលួចត្រូវផ្តន្ទាទោសដាក់ពន្ធនាគារពី ៦ (ប្រាំមួយ) ខែទៅ ៣ (បី) ឆ្នាំ និងពិន័យជាប្រាក់ពី ១ 000 000 (មួយលាន) រៀលទៅ ៦ ០០០ ០០០ (ប្រាំមួយលាន) រៀល៕
