.jpg)
លោកមេធាវី លី កុសល កាលពីពេលកន្លងមក។ រូបថត សហការី
ជាទូទៅ រាល់ការឃាត់ខ្លួនជនណាម្នាក់យើងតែងតែឃើញសមត្ថកិច្ចប្រមូលយកភ័ស្ដុតាងមកជាមួយផងមានដូចជាអាវុធ រថយន្ត ម៉ូតូ ទូរស័ព្ទ និងគ្រឿងអលង្ការផ្សេងៗជាដើម។ល។ ចុះមានមូលហេតុអ្វីដែរបានជាសមត្ថកិច្ចត្រូវប្រមូលភ័ស្តុតាងបែបនេះ? ជុំវិញករណីនេះ ភ្នំពេញប៉ុស្ដិ៍បានសម្ភាសជាមួយលោកមេធាវី លី កុសល ដែលមានការិយាល័យផ្ទះលេខ ៤៥Eo ផ្លូវលេខ ៩ ក្រុម ៥ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញដែលមានខ្លឹមសារដូចខាងក្រោម៖
ធម្មតានៅពេលចាប់ជនសង្ស័យណាម្នាក់ ឬក្រុមណាមួយ សមត្ថកិច្ចតែងតែប្រមូលវត្ថុតាងមកជាមួយផង តើដើម្បីប្រយោជន៍អ្វីដែរ?
ទាក់ទងនឹងការប្រមូលវត្ថុតាងរបស់សមត្ថកិច្ច គឺមានប្រយោជន៍ក្នុងការស៊ើបអង្កេតការចោទប្រកាន់របស់សមត្ថកិច្ច ឬតុលាការ ជាពិសេសក្នុងគោលដៅស្វែងរកតម្រុយនៃបទល្មើស ឬការស្រាវជ្រាវរកជនល្មើស ឬកុំឲ្យវត្ថុនោះក្លាយជាឧបករណ៍សម្រាប់ការប្រព្រឹត្តបទល្មើសនោះសាជាថ្មីទៀត។
ម្យ៉ាងវិញទៀតការប្រមូលវត្ថុតាងគឺដើម្បីស្វែងរកធាតុផ្សំនៃបទល្មើសអាចជាភ័ស្តុតាងដាក់បន្ទុក ឬភ័ស្តុតាងដោះបន្ទុក ដើម្បីធានាបាននូវការស្វែងរកការពិត និងយុត្តិធម៌។
ជាទូទៅយើងសង្កេតឃើញថា វត្ថុតាងខ្លះគឺជារបស់មានតម្លៃ ដូចជា រថយន្ត ម៉ូតូ ទូរស័ព្ទ ឬគ្រឿងអលង្ការជាដើម...តើសមត្ថកិច្ចខាងណាជាអ្នកគ្រប់គ្រង?
យោងតាមមាត្រា ១១៣ នៃក្រមនីតិវិធីព្រហ្មទណ្ឌ នៅពេលណាដែលមានការឆែកឆេរគឺសមត្ថកិច្ចតែងតែមានការដកហូតនូវវត្ថុដែលមានការពាក់ព័ន្ធ ឬវត្ថុដែលមានការសង្ស័យទៅនឹងការប្រព្រឹត្តបទល្មើស ដូចជា ម៉ូតូ ឬ រថយន្ត ជាដើម នោះហើយនៅពេលដែលមានការរឹបអូសយកវត្ថុដែលត្រូវបានឆែកឆេរទាំងនោះ និងដែលបានរកឃើញនៅកន្លែងកើតហេតុនោះគឺសមត្ថកិច្ចត្រូវនាំមករក្សាទុកនៅទីតាំង ឬកន្លែងរបស់គាត់ និងត្រូវរាយការណ៍មកកាន់តំណាងអយ្យការសិន ដើម្បីឲ្យតំណាងអយ្យការធ្វើការប្រមូលភ័ស្តុតាង និងធ្វើរបាយការណ៍បញ្ជូនមកកាន់សាលាដំបូងខេត្ត-ក្រុង ដែលពាក់ព័ន្ធ។ ចំណែក អ្នកដែលត្រូវគ្រប់គ្រងវត្ថុតាងនោះ គឺខាងតុលាការជាអ្នកគ្រប់គ្រង។
និយាយរួម នៅពេលចាប់បានភ័ស្តុតាងពីជនជាប់សង្ស័យនៅពេលបង្ក្រាបបទល្មើសនោះ វត្ថុតាងទាំងនោះត្រូវបានសមត្ថកិច្ចនគរបាលយុត្តិធម៌ជាអ្នកដកហូត និងរក្សាទុកវត្ថុតាងរួចរាយការណ៍ និងបញ្ជូនភ័ស្តុតាងដែលពាក់ព័ន្ធទាំងនោះ មកកាន់តុលាការ ដើម្បីសម្រេចរក្សាទុកវត្ថុទាំងនោះទៅតាមផ្លូវច្បាប់ដើម្បីស៊ើបអង្កេតបន្ត។ (សូមរង់ចាំអានវគ្គបន្ដនៅសប្ដាហ៍ក្រោយ)
