.jpg)
លោក គង់ សុវណ្ណ អនុប្រធានក្រុមកម្មវិធីសុវត្ថិភាពចរាចរណ៍។ សហការី
កាលពីសប្ដាហ៍មុន ភ្នំពេញ-ប៉ុស្ដិ៍បានផ្សព្វផ្សាយមួយវគ្គរួចហើយទាក់ទងនឹងកម្រិតនៃគ្រោះថ្នាក់ចរាចរណ៍ និងមូលហេតុចម្បងដែលនាំឱ្យមានគ្រោះថ្នាក់នេះក្រោយពេលមានច្បាប់ចរាចរណ៍ផ្លូវគោកតាមរយៈការសម្ភាសជាមួយលោក គង់ សុវណ្ណ ជាទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទ។ ជុំវិញប្រធានបទដដែលនេះ យើងសូមផ្សព្វផ្សាយបន្តនូវកិច្ចសម្ភាសន៍ដែលជាវគ្គបញ្ចប់មានខ្លឹមសារដូចខាងក្រោម ៖
តើករណីគ្រោះថ្នាក់ចរាចរណ៍បច្ចុប្បន្នមានការថយចុះ ឬកើនឡើងជាងកាលពីមិនទាន់មានច្បាប់ចរាចរណ៍? ដោយសារកត្តាអ្វីខ្លះ?
ដូចដែលបានលើកឡើងខាងដើមអត្រាអ្នកស្លាប់ដោយសារតែគ្រោះថ្នាក់ចរាចរណ៍ក្នុងឆ្នាំ ២០១៧ កើនឡើង ៧ ភាគរយ និងអ្នករបួសធ្ងន់ធ្ងរក៏បានកើនឡើង ៤ ភាគរយបើធៀបទៅនឹងឆ្នាំ ២០១៦។ ដូចគ្នានេះដែរយោងតាមរបាយការណ៍នាយកដា្ឋននគរបាលចរាចរណ៍ និងសណ្តាប់ធ្នាប់សាធារណៈត្រឹម ៧ ខែដើមឆ្នាំ ២០១៨ អ្នកស្លាប់ដោយគ្រោះថ្នាក់ចរាចរណ៍មានចំនួនរហូតដល់ ១០៦០ នាក់ និងរបួសធ្ងន់ ១៧៥៥ នាក់ផងដែរ។
ដូចនេះ ប្រសិនបើមានតែការអប់រំផ្សព្វផ្សាយ ប៉ុន្តែពុំមាននូវវត្តមានរឹតបន្តឹងការអនុវត្តច្បាប់ ពិសេសចំពោះការបើកបរលើសល្បឿនកំណត់ បើកបរក្រោមឥទ្ធិពលគ្រឿងស្រវឹងមិនពាក់មួកសុវត្ថិភាព និងការល្មើសចំពោះភ្លើង និងមិនគោរពតាមស្លាកសញ្ញាចរាចរណ៍ឱ្យបានក្លៀវក្លាទេនោះចំនួនអ្នកស្លាប់ និងរបួសធ្ងន់ធ្ងរជាក់ស្ដែងនៅក្នុងឆ្នាំ ២០១៨ នេះអាចនឹងកើនខ្ពស់ជាងឆ្នាំ ២០១៧ ទៅទៀត។
និយាយពីមន្ត្រីនគរបាលចរាចរណ៍វិញ តើគាត់អនុវត្តច្បាប់ចរាចរណ៍បានកម្រិតណាដែរបើតាមការសង្កេតរបស់លោក? រីឯអ្នកធ្វើដំណើរមានការយល់ដឹងត្រឹមកម្រិតណាដែរ?
នៅក្នុងឆ្នាំ ២០១៨ នេះអាចជាឆ្នាំដែលកម្ពុជាមានភាពមមាញឹកខ្លាំង ហើយថ្មីៗនេះមានខេត្តជាច្រើនក៏កំពុងជួបប្រទះនឹងគ្រោះធម្មជាតិទឹកជំនន់ថែមទៀត។ ដូចនេះអាជ្ញាធរ និងនគរបាលចរាចរណ៍ប្រហែលជាមានផលលំបាកក្នុងការអនុវត្តរឹតបន្តឹងច្បាប់ចរាចរណ៍ផ្លូវគោកឱ្យបានជាប់លាប់ និងពេញលេញ។
អង្គការរបស់លោកគឺជាដៃគូសំខាន់មួយដែរក្នុងការចូលរួមកាត់បន្ថយគ្រោះថ្នាក់ចរាចរណ៍នៅក្នុងប្រទេសកម្ពុជា។ តើមានការចូលរួមលើផ្នែកអ្វីដែរ? ហើយទទួលបានលទ្ធផលយ៉ាងម៉េចដែរ?
តាមរយៈវិសាលភាពកម្មវិធីសុវត្ថិភាពចរាចរណ៍សហគមន៍ផ្តួចផ្តើមដោយក្រសួងអភិវឌ្ឍន៍ជនបទក្រោមការគាំទ្រជំនួយបច្ចេកទេស និងថវិកាពីដៃគូអភិវឌ្ឍន៍រួមមាន ធនាគារអភិវឌ្ឍន៍អាស៊ី ទីភ្នាក់ងារអភិវឌ្ឍន៍នៃប្រទេសបារាំង និងកម្មវិធីជំនួយអូស្ត្រាលី ក្រុមការងារជំនាញសុវត្ថិភាពចរាចរណ៍បានចូលរួមរៀបចំកម្មវិធីអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោកដល់ប្រជាពលរដ្ឋ និងសិស្សានុសិស្សនៅតាមតំបន់នៃគម្រោងកែលម្អផ្លូវជនបទជំហានទី ២ ទាំង ១០ ខេត្តរួមមានខេត្តកំពង់ចាម ត្បូងឃ្មុំ តាកែវ កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំដោយផ្តោតលើកត្តាហានិភ័យនានាសំដៅធ្វើយ៉ាងណាចូលរួមទប់ស្កាត់ និងកាត់បន្ថយហានិភ័យនៃគ្រោះថ្នាក់ចរាចរណ៍ដល់អ្នកប្រើប្រាស់ផ្លូវគ្រប់រូបដែលក្នុងនោះរួមមាន ការបើកហួសល្បឿនកំណត់ការបើកបរក្រោមឥទ្ធិពលគ្រឿងស្រវឹង ការពាក់មួកសុវត្ថិភាពសុវត្ថិភាពថ្មើរជើង សុវត្ថិភាពជិះកង់ សុវត្ថិភាពតំបន់សាលារៀន និងការសង្គ្រោះបឋម៕
