នៅពេលដែលជនណាម្នាក់ជាប់ពាក់ព័ន្ធ ឬជាប់ចោទនឹងការផ្តន្ទាទោសពីតុលាការដែលបទចោទមានដូចជាបទលហុ,បទមជ្ឈិម និងបទឧក្រិដ្ឋ។ ប៉ុន្តែ ថាតើបទចោទណាខ្លះដែលត្រូវមានមេធាវី ឬគ្មានមេធាវីក្នុងពេលជំនុំជម្រះ ភ្នំពេញប៉ុស្តិ៍បានសម្ភាសជាមួយលោក យុង ផានិត អនុប្រធាននាយកដ្ឋានការពារក្តីជនក្រីក្រនៃគណៈមេធាវីនៃព្រះរាជាណាចក្រកម្ពុជាដែលមានខ្លឹមសារដូចតទៅ ៖
តាមនីតិវិធីក្នុងការជំនំជម្រះ តើបទល្មើសណាមិនតម្រូវឲ្យមានមេធាវី ហើយបទល្មើសណាតម្រូវឲ្យមានមេធាវី?
តាមនីតិវិធីនៅក្នុងការជំនុំជម្រះដែលតម្រូវ ឬចាំបាច់ឲ្យមានវត្តមានមេធាវីគឺបទឧក្រិដ្ឋ និងបទល្មើសដែលទាក់ទងជាមួយអនីតិជន។ ប៉ុន្តែក្រៅពីនេះមិនតម្រូវឲ្យមានមេធាវីទេ តែអាស្រ័យលើជនជាប់ចោទ បើគាត់ពឹងពាក់មេធាវីដើម្បីការពារក្តីឲ្យគាត់ក៏បាន។ និយាយឲ្យចំទៅគឺបទឧក្រិដ្ឋ និងអនីតិជន ត្រូវមានមេធាវីការពារក្តីឲ្យដាច់ខាត។
ឧទាហរណ៍សវនាការជំនុំជម្រះក្នុងបទមជ្ឈិមតើករណីនេះតម្រូវឲ្យភាគីម្ខាងៗមានមេធាវីដែរទេ?
ដូចខ្ញុំបានជម្រាបអ៊ីចឹងជាគោលការណ៍សិទ្ធិរបស់ជនជាប់ចោទគឺគាត់អាចពឹងពាក់មេធាវីក៏បាន មិនពឹងពាក់រកមេធាវីក៏បាន។ អាហ្នឹងទាក់ទងនឹងរឿងបទមជ្ឈិម ពោលគឺមនុស្សគ្រប់រូបត្រូវមានសិទ្ធិការពារខ្លួនតាមផ្លូវច្បាប់ដែលគាត់មានសិទ្ធិរកមេធាវី។ ប៉ុន្តែករណីបទមជ្ឈិមគឺសាមីខ្លួនរកមេធាវីខ្លួនឯង តែបើស្ថាប័ន ឬអង្គការណាមួយចង់ជួយក៏បានដែរ។
៤- តើតួនាទីរបស់មេធាវីមានសារៈសំខាន់ដូចម្តេច?
មេធាវីជាអ្នកយល់ដឹងពីច្បាប់ ហើយគាត់អាចទាមទារនូវសិទ្ធិទាំងឡាយណា ដែលត្រូវបានគេបំពានឲ្យកូនក្តីរបស់គាត់។ មេធាវីអាចតំណាងឲ្យរឿងរដ្ឋប្បវេណីបាន តែបើជារឿងព្រហ្មទណ្ឌវិញ មេធាវីមិនអាចតំណាងឲ្យកូនក្តីបានទេ តែបើកូនក្តីគាត់ដែលជាជនជាប់ចោទមានវត្តមានគឺគាត់អាចការពារក្តីឲ្យកូនក្តីគាត់បាន៕