.jpg)
លោកស្រីមេធាវី លឹម ច័ន្ទលីដា។ សហការី
ជម្លោះក្នុងគ្រួសារពេលខ្លះបានបង្កជាអំពើហិង្សា ប៉ុន្តែជារឿយៗគេសង្កេតឃើញថាករណីបែបនេះដូចជាគ្មានអ្នកណាម្នាក់ហ៊ានចូលទៅឃាត់ភ្លាមៗទេព្រោះពលរដ្ឋតែងយល់ថាវាជារឿងបុគ្គលក្នុងគ្រួសាររបស់គេ។
ប៉ុន្តែប្រសិនបើមានជម្លោះហើយអ្នកជិតខាងចូលទៅឃាត់រហូតទទួលរងការវាយដំផងសួរថា តើមានការដោះស្រាយផ្នែកផ្លូវច្បាប់យ៉ាងដូចម្តេច?
ជុំវិញបញ្ហានេះភ្នំពេញ ប៉ុស្តិ៍បានសម្ភាសជាមួយលោកស្រី មេធាវី លឹម ច័ន្ទលីដា សមាជិកគណៈមេធាវីនៃព្រះរាជាណាចក្រកម្ពុជា និងជាប្រធានក្រុមហ៊ុនមេធាវីស៊ីឌីអេសមានការិយាល័យផ្ទះលេខ ៥៤ ផ្លូវលេខ ៣៣៧ សង្កាត់បឹងកក់ ២ ខណ្ឌទួលគោក រាជធានីភ្នំពេញមានខ្លឹមសារដូចខាងក្រោម ៖
ឧបមាថា មានប្តីប្រពន្ធក្នុងគ្រួសារមួយឈ្លោះគ្នា តែពេលនោះមានអ្នកជិតខាងឈ្មោះលោក (ក) ចូលឃាត់។ពេលនោះស្រាប់តែបុរសជាម្ចាស់ផ្ទះវាយលោក (ក) បែកក្បាល។តើបុរសម្ចាស់ផ្ទះមានកំហុសទេ ព្រោះអីគាត់ថា លោក (ក) ចូលក្នុងផ្ទះរបស់គាត់ដោយខ្លួនឯង?
នាពេលបច្ចុប្បន្ននេះ ប្រជាពលរដ្ឋភាគច្រើនមានការយល់ដឹងទាក់ទងទៅនឹងអំពើហិង្សាក្នុងគ្រួសារ ហើយមានការឈឺឆ្អាលជាខ្លាំង ដោយហេតុថា ភាគច្រើនជនរងគ្រោះនៃអំពើហិង្សាក្នុងគ្រួសារគឺជាស្ត្រី និងកុមារដែលជាមនុស្សទន់ខ្សោយ។
បញ្ហាអំពើហិង្សាក្នុងគ្រួសារត្រូវបានរដ្ឋាភិបាលយកចិត្តទុកដាក់តាមរយៈក្រសួងកិច្ចការនារី និង ស្ថាប័នពាក់ព័ន្ធផ្សេងៗទៀតនិងមានការចូលរួមជ្រោមជ្រែងពីអង្គការសង្គមស៊ីវិលជាតិនិងអន្តរជាតិកំពុងអនុវត្តបេសកកម្មភាពយ៉ាងសកម្មដើម្បីទប់ស្កាត់អំពើហិង្សាក្នុងគ្រួសារ ការពារជនរងគ្រោះនិងពង្រឹងវប្បធម៌អហិង្សានិងភាពសុខដុមរមនាក្នុងគ្រួសារ ហើយបញ្ហាអំពើហិង្សាក្នុងគ្រួសារនេះមិនត្រូវបានចាត់ទុកជាទំនាស់ឯកជនរបស់គ្រួសារឡើយ បញ្ហានេះប៉ះពាល់យ៉ាងធ្ងន់ធ្ងរដល់សង្គមទាំងមូល។
ភ្ជាប់ជាមួយនឹងសំណួរខាងលើវិញ លោក (ក) មានចេតនាចូលទៅជួយសង្គ្រោះជនរងគ្រោះ បែរជាត្រូវជនមុខសញ្ញា (បុរសម្ចាស់ផ្ទះ) បង្កអំពើហិង្សានោះ វាយលោក (ក) បែកក្បាល។ ចំពោះទង្វើជនបង្កនេះ គឺជាបទល្មើសព្រហ្មទណ្ឌដែលមានចែងក្នុងក្រមព្រហ្មទណ្ឌនៃព្រះរាជាណាចក្រកម្ពុជា ទោះបីជនមុខសញ្ញានេះបានអះអាងថា លោក (ក) បានចូលក្នុងផ្ទះរបស់គាត់មិនមានការអនុញ្ញាតក៏ដោយ។
ចុះប្រសិនបើលោក (ក) ដែលចូលទៅផ្ទះមានជម្លោះនោះក្នុងបំណងឃាត់កុំឲ្យប្រព្រឹត្តអំពើហិង្សា តែត្រូវបុរសម្ចាស់ផ្ទះវាយបែកក្បាល។ តើលោក (ក) អាចប្តឹងបុរសជាម្ចាស់ផ្ទះនោះបានដែរទេ?
ដូចការបញ្ជាក់នៅខាងលើរួចហើយ បញ្ហាអំពើហិង្សាក្នុងគ្រួសារមិនត្រូវបានចាត់ទុកជាទំនាស់ឯកជនរបស់គ្រួសារឡើយ។ ច្បាប់ស្តីពីការទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះមានលក្ខណពិសេសបំផុតដែលទាមទារឲ្យមានការទប់ស្កាត់ឲ្យទាន់ពេលវេលានិងប្រកបដោយប្រសិទ្ធភាព ហើយតម្រូវឲ្យចាត់វិធានការសមស្របបំផុតដើម្បីការពារជនរងគ្រោះឬជនដែលអាចនឹងរងគ្រោះ។
លើសពីនេះទៅទៀតច្បាប់នេះ បានជំរុញកិច្ចសហប្រតិបត្តិការជាមួយអាជ្ញាធរមានសមត្ថកិច្ច អាជ្ញាធរមូលដ្ឋាន អង្គការនានា និងផ្នែកឯកជនដើម្បីចូលរួមទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះ។
ក្នុងករណីនេះដោយភ្ជាប់ជាមួយច្បាប់ស្តីពីការទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះ លោក (ក) មានសិទ្ធិគ្រប់គ្រាន់ក្នុងការធ្វើបណ្តឹងក្នុងនាមជាជនរងគ្រោះដោយខ្លួនឯងប្រឆាំងនឹងជនមុខសញ្ញាខាងលើបាន ហើយក៏អាចធ្វើពាក្យបណ្តឹងសុំដីកាការពារជនរងគ្រោះដោយអំពើហិង្សាក្នុងគ្រួសារទៅតុលាការបានដែរ។
ម្យ៉ាងទៀតប្រសិនបើទាំង ២ នាក់ប្តីប្រពន្ធសម្លាប់គ្នាស្លាប់ទាំង ២ នាក់ ហើយលោក (ក) មានវត្តមាននៅទីនោះដែរ ប៉ុន្តែរឿងនេះលោក (ក) មិនពាក់ព័ន្ធទេ។តើសមត្ថកិច្ចនគរបាលអាចចាប់លោក (ក) បានទេ?
ជាទូទៅ លោក (ក) អាចប្រឈមមុខចំពោះការសង្ស័យរបស់សមត្ថកិច្ច ដែលលោក (ក) ជាកម្មវត្ថុក្នុងការតាមដាន ការស៊ើបអង្កេត ឬការនាំខ្លួនដើម្បីធ្វើការសាកសួរទៅតាមនីតិវិធីរបស់មន្ត្រីនគរបាលយុត្តិធម៌។
មន្ត្រីនគរបាលយុត្តិធម៌អាចស្នើសុំគោលការណ៍ណែនាំពីព្រះរាជអាជ្ញាដើម្បីធ្វើការឃាត់ខ្លួនលោក (ក) ក្នុងដំណាក់កាលមន្ត្រីនគរបាលយុត្តិធម៌បាន ដើម្បីស្វែងរកតម្រុយផ្សេងៗទៀតពីលោក (ក)។
ដោយឡែកក្នុងករណីលោក (ក) បានបង្ហាញពីភាពស្អាតស្អំរបស់គាត់ថា មិនពាក់ព័ន្ធនឹងបទល្មើសដូចមន្ត្រីនគរបាលយុត្តិធម៌បានដាក់ការសង្ស័យលើគាត់ ដោយលោក (ក) មានភ័ស្តុតាងជាសាក្សីមកបំភ្លឺចំពោះមុខមន្ត្រីនគរបាលយុត្តិធម៌ នោះមន្ត្រីនគរបាលយុត្តិធម៌អាចស្នើសុំគោលការណ៍ពីព្រះរាជាអាជ្ញាដើម្បីអនុញ្ញាតឲ្យលោក (ក) វិលត្រឡប់ទៅផ្ទះវិញឬក្រោយផុតរយៈពេលនៃការឃាត់ខ្លួនមន្ត្រីនគរបាលយុត្តិធម៌ត្រូវបញ្ជូនបុគ្គលដែលឃាត់ខ្លួនទៅព្រះរាជអាជ្ញាដើម្បីធ្វើការសម្រេច។
ដើម្បីកុំឲ្យមានបញ្ហាដល់ខ្លួន តើរឿងនេះលោក (ក) គួរត្រូវធ្វើយ៉ាងណា?
ក្នុងករណីបែបនេះ ដោយលោក (ក) មានបំណងចង់ជួយការពារឬសង្គ្រោះជនរងគ្រោះពីជនមុខសញ្ញាប្រព្រឹត្តអំពើហិង្សាក្នុងគ្រួសារ លោក (ក) គួរគប្បីត្រូវរាយការណ៍ភ្លាមទៅសមត្ថកិច្ចមូលដ្ឋានដែលនៅជិតបំផុត តាមរយៈទូរស័ព្ទដៃ ឬឲ្យអ្នកណាម្នាក់ទៅប្រាប់ដំណឹង ដើម្បីសុំកិច្ចអន្តរាគមន៍ជាបន្ទាន់ចំពោះអំពើហិង្សាដែលជនមុខសញ្ញាកំពុងប្រព្រឹត្ត ឬអាចនឹងប្រព្រឹត្តនាពេលខាងមុខ។ លោក (ក) គួរគប្បីហៅអ្នកជិតខាងបានជាគ្នា ដើម្បីចូលរួមអន្តរាគមន៍ការពារជនរងគ្រោះ ឬចូលទៅសង្គ្រោះជនរងគ្រោះពីអំពើហិង្សាក្នុងគ្រួសារនោះ៕
