The Phnom Penh Post Search

Search form

Logo of Phnom Penh Post newspaper Phnom Penh Post - ថែម​១៥០០៛ ប៉ូលិស​មិន​ឈប់​ទារ​លុយ​ពី​ឡាន​ទេ




ថែម​១៥០០៛ ប៉ូលិស​មិន​ឈប់​ទារ​លុយ​ពី​ឡាន​ទេ

ថែម​១៥០០៛ ប៉ូលិស​មិន​ឈប់​ទារ​លុយ​ពី​ឡាន​ទេ

130315_08
លោក សន ជ័យ អ្នកសម្របសម្រួលនៅកម្ពុជានៃបណ្តាញរួបរួមដើម្បីគណនេយ្យភាព គឹម សារុំ

 

លោក ស ខេង ឧបនាយក​រដ្ឋ​មន្ត្រី លោក នេត សាវឿន អគ្គស្នងការ​នគរបាល​ជាតិ និង​លោក កែប ជុតិមា អភិបាល​រាជធានី បាន​ផ្តល់​ប្រាក់១ ៥០០​រៀល​ក្នុង​មួយ​ថ្ងៃ​ដល់​នគរបាល​ចរាចរ​បន្ថែម​ពីលើ​ប្រាក់​ខែ​ពួក​គាត់​នា​ពេល​បច្ចុប្បន្ន។

លោក ជួន សុវណ្ណ ស្នងការ​នគរបាល​រាជធានី​ភ្នំពេញ​បាន​ព្រមាន​ថា នគរបាល​ណា​ដែល​ប្រព្រឹត្ត​អំពើ​ខុស​ច្បាប់​ក្នុង​តួនាទី​ត្រូវ​បញ្ឈប់​ពី​ការងារ​ជា​បន្ទាន់ លើស​ពី​នេះ​ទៀត​ត្រូវ​ទទួល​ទណ្ឌកម្ម​តាម​ច្បាប់។

លោក សន ជ័យ អ្នក​សម្រប​សម្រួល​កម្ពុជា​បណ្តាញ​រួបរួម​ដើម្បី​គណនេយ្យភាព​សង្គម​នៅ​អាស៊ី​បូព៌ា​និង​ប៉ាស៊ីហ្វិក​ដែល​ធ្វើ​ការ​ពាក់ព័ន្ធ​នឹង​បញ្ហា​នេះ បាន​បង្ហាញ​ពី​ការ​យល់​ឃើញ​របស់​លោក​ជុំវិញ​ការងារ​របស់​ប៉ូលិស​ចរាចរ​និង​វិធានការ​ខាង​លើ តាម​បទ​សម្ភាស​ជាមួយ​ភ្នំពេញ ប៉ុស្តិ៍ ដូច​ខាង​ក្រោម ៖

តើ​លោក​យល់​ដូចម្តេច លើ​ចំណាត់​ការ​ក្រសួង​មហាផ្ទៃ ហាម​មិន​ឲ្យ​ប៉ូលិស​ចរាចរ​យក​លុយ​ពី​ឡាន​ដឹក​ទំនិញ​តាម​ផ្លូវ?

ចំណាត់់ការ​នេះ ខ្ញុំ​មើលឃើញ​ទិដ្ឋភាព​ពីរ​សំខាន់់ គឺថា​ជា​ទ្រឹស្តី គេ​ថា​កាលណា​ប្រាក់​ខែ​តិច​នាំ​ឲ្យ​មាន​អំពើ​ពុករលួយ ប៉ុន្តែ​ទ្រឹស្តី​នេះ​ត្រូវ​បដិសេធ​ដោយ​បុគ្គល​ស្អាតស្អំ​ជាច្រើន​នៅ​ក្នុង​សង្គម ពីព្រោះ​មាន​មន្ត្រី​រាជការ​ខ្លះ​គាត់​មាន​ជីវភាព​លំបាក​ខ្លាំង​តែ​គាត់​មិន​ប្រព្រឹត្ត​អំពើ​ពុករលួយ​ទេ។ កត្តា​នេះ​យើង​លើក​ទឹក​ចិត្ត​ឲ្យ​គាត់់​បន្ត​អនុវត្ត​តែ​គាត់​ត្រូវ​រក​មធ្យោបាយ​ដើម្បី​ឲ្យ​រដ្ឋ​បំពេញ​សេចក្តី​ត្រូវ​ការ​ជូន​គាត់​វិញ។

ចំណុច​ទី២ គឺថា​អគ្គស្នងការ​នគរបាល​ជាតិ​បាន​ដឹង​អ្វីខ្លះ​ពី​ព័ត៌មាន​របស់​ប៉ូលិស​ចរាចរ​ដែល​ទៅ​កាន់​ប៉ុស្តិ៍​នីមួយៗ។ បើ​យើង​មើល​មិន​ច្រឡំ ហើយ​ជា​ទម្លាប់​មួយ​ដែល​យើង​ដឹង​គ្រប់​គ្នា គឺថា​ការ​បញ្ជូន​មន្ត្រី​ប៉ូលិស​ទៅ​ប៉ុស្តិ៍​ណា​មួយ គឺ​តែង​តែ​មាន​ថ្នូរ​ជា​ការ​សូកប៉ាន់ ហើយ​ពេល​គាត់ ទៅ​គាត់​នឹង​រក​លុយ​ស្រង់​ដើម​វិញ។ យើង​ឃើញ​ជា​ញឹកញយ ពី​មន្ត្រី​ស្លៀកពាក់​ស៊ីវិល​បើក​ឡាន​ទៅ​លូក​ដៃ​យក​លុយ​ពី​ប៉ូលិស​ចរាចរ​នៅ​តាម​កាច់​ជ្រុង​ភ្លើង​ស្តុប ដែល​គាត់​រក​លុយ​បាន ហើយ​បើ​និយាយ​ថា​គេ​ទៅ​យក​របាយការណ៍​នោះ​ក៏​មិន​មែន​ដែរ។

តើ​ប៉ូលិស​ចរាចរ​ទៅ​យក​ប្រាក់​ពី​ឡាន​ដឹក​ទំនិញ​ឬ​ឡាន​ដឹក​លើស​ចំណុះ​គាត់​ធ្វើ​ទាំង​បង្ខំ? ឯ​ប្រាក់​បន្ថែម​១៥០០​រៀល អាច​បំបាត់​បាតុភាព​នេះ​បាន​ទេ?

យើង​ដឹង​ហើយ​ថា ប៉ូលិស​ចរាចរ​មាន​ប្រាក់​ខែ​ប្រមាណ​តែ​៣០​ម៉ឺន​រៀល​ប៉ុណ្ណោះ​ប៉ុន្តែ​ទំហំ​នៃ​ការងារ​របស់​គាត់​គឺ​ធ្ងន់ធ្ងរ​ណាស់ ព្រោះ​គាត់​ត្រូវ​ឈរ​ហាល​ខ្យល់​ត្រូវ​ថ្ងៃ ហាល​ភ្លៀង​ទាំង​ថ្ងៃ​ទាំង​យប់។ ពេល​ខ្លះ​ខ្ញុំ​ឃើញ​ប៉ូលិស​ទារលុយ​ពី​អ្នក​ដំណើរ​ខ្ញុំ​រិះគន់ តែ​ពេល​ខ្លះ​ខ្ញុំ​អាណិត​ច្រើន​ជាង​ការ​ខឹង ព្រោះ​ជា​ទង្វើ​ដែល​គាត់​ធ្វើ​ទាំង​បង្ខំ​ទេ។ យើង​សួរ​ថា ប្រាក់​ខែ​៣០​ម៉ឺន​រៀល​សម​នឹង​ទំហំ​ការងារ​និង​អាច​ជួយ​ជីវភាព​គ្រួសារ​បាន​ទេ​?បើ​ទោះ​មាន​សមាគម​មិត្ត​ប៉ូលិស​ក្តី សួរ​ថា តើ​អង្គភាព​មាន​ធានា​រ៉ាប់រង​សុខភាព​គាត់​ដែរ​ឬ​ទេ? យើង​ងាក​មក​មើល​លុយ​បន្ថែម​១ ៥០០​រៀល ក្នុង​មួយ​ថ្ងៃ គឺ​យើង​គិតថា ជា​រឿង​ត្រឹមត្រូវ ព្រោះ​ដើម្បី​បំបាត់​បាតុភាព​ខុសឆ្គង​នានា តែ​ខ្ញុំ​គិត​ថា លុយ​នេះ​គាត់​យក​ទៅ​ទិញ​ទឹក​សុទ្ធ​ធម្មតា​បាន​តែ​៣​ដប​ទេ តើ​ឲ្យ​គាត់​រស់នៅ​ក្នុង​ការងារ​ស្អាតស្អំ​យ៉ាង​ម៉េច​កើត? ខ្ញុំ​គិត​ថា លុយ​បន្ថែម​នេះ​មិន​អាច​ឲ្យ​ពួក​គាត់​ស្អាតស្អំ ក្នុង​ការងារ​បាន​ទេ ហើយ​បើ​ជូន​ប្រាក់​ខែ​គាត់​មួយ​លាន​រៀល ទើប​អាច​ជួយ​សម្រួល​ជីវភាព​គាត់​បាន​ខ្លះ។

ខ្ញុំ​គិតថា ការ​គិត​គូរ​ពី​ការ​ដំឡើង​ប្រាក់​ខែ​ដល់​ប៉ូលិស គឺជា​រឿង​មួយ​ត្រឹមត្រូវ​ព្រោះ​វា​ជា​កត្តា​ជួយ​ជំរុញ​ឲ្យ​បាតុភាព​ក្នុងការ​អនុវត្ត​ការងារ​របស់​ប៉ូលិស​ចរាចរ​ត្រូវ​បាន​លុប​បំបាត់។ គ្មាន​ប៉ូលិស​ចរាចរ​ណា​មួយ​គាត់​ចង់​ឲ្យ​អ្នក​ដទៃ​មើល​ងាយ​គាត់​ទេ ខណៈ​ដែល​គាត់​ស្លៀកពាក់​ឯកសណ្ឋាន​ជា​ប៉ូលិស មាន​កញ្ចែ​ផ្លុំ​បញ្ជា​ឲ្យ​គេ​បត់​ឆ្វេង​ស្តាំ គឺ​គាត់​ស្តាយ​អត្តសញ្ញាណ​នេះ​ណាស់​តែ​ពេល​ខ្លះ​គាត់​គ្មាន​ជម្រើស។

តើ​គ្រោះថ្នាក់​ចរាចរណ៍​អាច​ជា​ចំណែក​មួយ​នៃ​ការ​បង្ក​ពី​ប៉ូលិស​ដែរ​ទេ?

ខ្ញុំ​យល់​ឃើញ​ថា គ្រោះថ្នាក់​ចរាចរណ៍​អាច​ជា​ចំណែក​មួយ​បង្ក​មក​ពី​ប៉ូលិស​ខ្លះ​ដែរ ព្រោះ​ពេល​ខ្លះ​អ្នក​ជិះ​ព្យាយាម​បើក​គេច​ពី​ប៉ូលិស​ដោយ​សារ​គាត់​ខ្លាច​ប៉ូលិស​ហៅ​ទៅ​ផាក​ក្នុង​តម្លៃ​មួយ​ខ្ពស់ លុះ​គាត់​ព្យាយាម​គេច​ក៏​ទៅ​ប៉ះ​នឹង​អ្នក​ផ្សេង​ទៀត។ម្យ៉ាង បើ​អ្នក​បើក​ឡាន​បុក​មនុស្ស​ស្លាប់​ពេល​ប៉ូលិស​ដេញ​ទាន់​គាត់​អាច​យក​លុយ​ឲ្យ​ប៉ូលិស​នោះ​ដែរ ហើយ​ប៉ូលិស​គាត់​ក៏​បណ្តោយ​ឲ្យ​ឡាន​នោះ​រត់​បាត់ នេះ​ក៏​ជា​កត្តា​មកពី​ប្រាក់​ខែ​តិច​ដែរ។ តែ​ទោះជា​យ៉ាងណា​ប៉ូលិស​ចរាចរ គាត់​ត្រូវ​ការ​ប្រើ​ឆន្ទៈ និង​ប្រើ​មនសិការ​របស់​គាត់​ច្រើន​ណាស់​ដើម្បី​សម្រួល​ចរាចរណ៍។ ដូច្នេះ​ខ្ញុំ​គិតថា ការ​គិត​គូរ​ដំឡើង​ប្រាក់​ខែ​សមរម្យ​ដល់​ប៉ូលិស គឺជា​រឿង​មួយ​ត្រឹមត្រូវ​និង​គួរ​តែ​គិត ហើយ​វា​ក៏​ជា​កត្តា​មួយ​ជួយ​ជំរុញ​ឲ្យ​បាតុភាព​នៅ​ក្នុង​ការអនុវត្ត​ការងារ​របស់​ប៉ូលិស​ចរាចរ​ត្រូវ​លុប​បំបាត់។ ពេល​នោះ​ហើយ យើង​នឹង​សង្ឃឹម​ថា អត្រា​នៃ​ការ​គោរព​ច្បាប់​ចរាចរណ៍​នឹង​មាន​ការ​កើន​ឡើង ហើយ​គ្រោះថ្នាក់​ចរាចរណ៍​ក៏​នឹង​ត្រូវ​បាន​កាត់​បន្ថយ​ដែរ។

ការ​បង្ហាញ​ពី​តម្លាភាព​នៃ​ការ​ផាក​ពិន័យ​តម្រូវ​ឲ្យ​ប៉ូលិស​ចេញ​ប័ណ្ណ​ផាកពិន័យ តែ​វិធានការ​នេះ​ហាក់​មាន​ប្រសិទ្ធភាព​រយៈពេល​ខ្លី តើ​លោក​យល់​បែប​ណា​ដែរ ?

ខ្ញុំ​យល់​ថា ចំណាត់​ការ​នោះ​នៅ​តែ​មិន​អាច​ទៅ​រួច ហើយ​យន្តការ​បែប​នោះ​ដូច​ជា​មិន​ដំណើរ​ការ​ទាល់​តែ​សោះ។ ខ្ញុំ​ឃើញ​មាន​ចំណុច​ចន្លោះ​ប្រហោង​ខ្លះ ដែល​ហេតុផល ទី១-គឺ​ការ​មិន​ទាន់​មាន​ទំនុក​ចិត្ត​ពី​អ្នក​បើកបរ ព្រោះ​ពេល​ខ្លះ​នគរបាល​ទារ​យក​ប័ណ្ណ​បើកបរ​ទុក។ សួរថា តើន​រណា​ជា​អ្នក​ទទួល​ខុស​ត្រូវ​ក្នុងការ​បាត់បង់?ទី២-ភាគ​ច្រើន​អ្នក​ដែល​ត្រូវ​ប៉ូលិស​ផាក​ចង់​បញ្ចប់​នៅ​នឹង​កន្លែង​ជា​ជាង​ទៅ​អធិការដ្ឋាន​ខណ្ឌ ព្រោះ​មិន​ចង់​ចំណាយ​ពេល​យូរ ហើយ​កន្លងមក​ប៉ូលិស​ផាក​មិន​ដែល​ចេញ​វិក្កយបត្រ​ឲ្យ​ទេ តែ​ពេល​នេះ​យើង​ឃើញ​មាន​ប៉ូលិស​ចរាចរ​ខ្លះ​គាត់​កាន់​វិក្កយបត្រ​ផាក​កើន​ឡើង​ហើយ។

មាន​ប៉ូលិស​ចរាចរ​ខ្លះ​ជាប់​ឈ្មោះ​ក្នុង​បញ្ជី​អំពើ​ពុករលួយ​ដោយសារ​គាត់​យក​លុយ​បន្តិច​បន្ទួច តែ​គេ​ដឹង​ថា​មាន​មន្ត្រី​ខ្លះ​ប្រព្រឹត្ត​អំពើ​ពុករលួយ​ខ្លាំង​ជាង​ប៉ូលិស​តែ​មិន​ជាប់​ទោស​តើ​មាន​តម្លាភាព​ទេ?

អំពើ​ពុករលួយ​របស់​ប៉ូលិស​ចរាចរ ជា​អំពើ​ពុករលួយ​តូចតាច ហើយ​រហូត​ដល់​ពេល​នេះ គេ​មិន​ទាន់​ឃើញ​ប៉ូលិស​ណា​ម្នាក់​ជាប់​ទោស​ទេ​តែ​កន្លង​ទៅ​ប៉ូលិស​ត្រូវ​បាន​គេ​ហៅ​ទៅ​ស៊ើបសួរ​ដែរ។ អំពើ​ពុក​រលួយ​នៅតាម​ដង​ផ្លូវ​របស់​គាត់ គឺ​ងាយ​គេ​មើល​ឃើញ​ណាស់។ ខ្ញុំ​សរសើរ​ដល់​ប្រជាពលរដ្ឋ​ដែល​គាត់​ហ៊ាន​ប្តឹង​ប៉ូលិស​ចរាចរ តែ​ពួក​គាត់​ក៏ត្រូវ​ចេះ​រក​មធ្យោបាយ​ស៊ើប​អង្កេត​អំពើ​ពុករលួយ​នៅ​កម្រិត​ធំៗ​ផង​ដែរ ដូចជា​អំពើ​ពុករលួយ​ក្នុង​ការ​កាប់​បំផ្លាញ​ព្រៃ​ឈើ អំពើ​ពុករលួយ​ក្នុង​ការ​ដេញ​ថ្លៃ​មិន​ប្រក្រតី និង​ពុករលួយ​ក្នុង​សេវា​សាធារណៈរដ្ឋ​ធំៗ ...៕

អត្ថបទគួរចាប់អារម្មណ៍