The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ដែនដី​ថា វិវាទ​ដីធ្លី​ទូទាំង​ប្រទេស​ថយ​ចុះ​ជាង ២០០ ករណី

ក្រសួង​ដែនដី​ថា វិវាទ​ដីធ្លី​ទូទាំង​ប្រទេស​ថយ​ចុះ​ជាង ២០០ ករណី

ពលរដ្ឋ​មាន​ជម្លោះ​ដីធ្លី​នៅ​ភ្នំពេញ​តវ៉ា​ឲ្យ​ដោះលែង​តំណាង​របស់​ខ្លួន។
ពលរដ្ឋ​មាន​ជម្លោះ​ដីធ្លី​នៅ​ភ្នំពេញ​តវ៉ា​ឲ្យ​ដោះលែង​តំណាង​របស់​ខ្លួន។ ហេង ជីវ័ន

ក្រសួង​ដែនដី​ថា វិវាទ​ដីធ្លី​ទូទាំង​ប្រទេស​ថយ​ចុះ​ជាង ២០០ ករណី

ភ្នំពេញៈ ក្រសួង​រៀបចំ​ដែនដី នគរូបនីយ​កម្ម និង​សំណង់ តាម​រយៈ​គណៈ​កម្មការ​សុរិយោ​ដី បាន​អះ​អាង​ថា វិវាទ​ដីធ្លី​ទូទាំង​ប្រទេស​កម្ពុជា បាន​ថយ​ចុះ​ជាង ២០០ ករណី​ក្នុង ឆ្នាំ​២០១៤ បើ​ធៀប​នឹង ឆ្នាំ​២០១៣ ផ្ទុយ​ពី​ការ​លើក​ឡើង​របស់​អង្គការ​លីកាដូ ដែល​ថា ពលរដ្ឋ​រង​គ្រោះ​ដី​ធ្លី​ថ្មី​មាន​ជាង ១ ម៉ឺន​គ្រួសារ​ក្នុង ឆ្នាំ​២០១៤ កើន​បី​ដង ធៀប​នឹង ឆ្នាំ​២០១៣។

ជាមួយ​គ្នា​នេះ​តាម​រយៈ​ក្រសួង គណៈកម្មការ​សុរិយា​ដី​ថ្នាក់​ជាតិ ក៏​បាន​ស្នើ​ជា​លើក​ដំបូង ទៅ​ថ្នាក់​ដឹក​នាំ​អង្គការ​លីកាដូ ឲ្យ​ផ្តល់​ទិន្នន័យ និង​ឯកសារ​ពាក់​ព័ន្ធ​ករណី​ទំនាស់​ដីធ្លី ដែល​ខ្លួន​លើក​ឡើង​នោះ ដើម្បី​ធ្វើ​ការ​ផ្ទៀង​ផ្ទាត់ និង​ស្រាវជ្រាវ។

តាម​សេចក្តី​ជូន​ដំណឹង​ចុះ​ថ្ងៃ ទី២០ ខែ​កុម្ភៈ ក្រសួង​រៀប​ចំ​ដែនដី នគរូប​នីយកម្ម និង​សំណង់ បាន​ចាត់​ទុក​តួលេខ​ដែល​រក​ឃើញ​ដោយ​លីកាដូ ថា​ច្រើន​លើស​លប់ មិន​ឆ្លុះ​បញ្ចាំង​ពី​ការ​ពិត។ ក្រសួង បាន​ឲ្យ​ដឹង​ថា នៅ​ត្រឹម​ដំណាច់ ឆ្នាំ​២០១៤ វិវាទ​ដីធ្លី មាន​ចំនួន ៧៥០ ករណី​តែ​ប៉ុណ្ណោះ ដែល​គណៈ​កម្មការ​សុរិយោ​ដី កំពុង​ដោះ​ស្រាយ​ ហើយ​តួលេខ​នេះ បាន​ថយ​ចុះ​ប្រមាណ ២៤០ ករណី បើ​ធៀប​នឹង ឆ្នាំ​២០១៣ ដែល​មាន ៩៩០ ករណី។ ក្នុង​លិខិត​នោះ បាន​បន្ត​ឲ្យ​ដឹង​ថា ចាប់​ពី ឆ្នាំ​២០០២ រហូត​ដល់​ដំណាច់ ឆ្នាំ​២០១៤ គណៈ​កម្មការ​សុរិយោ​ដី ទទួល​បាន​ពាក្យ​បណ្តឹង​វិវាទ​ដីធ្លី​ទូទាំង​ប្រទេស​ចំនួន ៦.៥៥៦ ករណី។

សេចក្តី​ជូន​ដំណឹង​នេះ ចេញ​ផ្សាយ​ក្រោយ​មួយ​ថ្ងៃ បំភ្លឺ​ទៅ​សេចក្តី​ថ្លែង​ការណ៍​របស់​លីកាដូ ដែល​បាន​រក​ឃើញ​ថា មាន​ពលរដ្ឋ ១០៦២៥ គ្រួសារ​ដែល​ប្រមាណ ៤៩៥១៩ នាក់​ដែល​បាន​រង​ផល​ប៉ះពាល់​ថ្មី​ដោយ​សារ​ជម្លោះ​ដីធ្លី ចំនួន​ជាង ៩០ ករណី ក្នុង​ខេត្ត​ចំនួន ១៣ និង​ក្នុង​រាជធានី​ភ្នំពេញ។ ចំនួន​នេះ មាន​ការ​កើន​ឡើង ៣ ដង បើ​ធៀប​នឹង ឆ្នាំ​២០១៣ ដែល​មាន ៣៤៧៥ គ្រួសារ និង​កើន​ជាង ២ ដង​បើ​ធៀប​នឹង ឆ្នាំ​២០១២ ដែល​មាន​ចំនួន ៥៦៧២ គ្រួសារ។

តាម​លិខិត​ដាច់​ដោយ​ឡែក​មួយ​ផ្ញើ​ទៅ​កាន់​នាយិកា​អង្គការ​លីកាដូ ចុះ​ថ្ងៃ ទី២០ ខែ​កុម្ភៈ ដដែល​នោះ គណៈ​កម្មការ​សុរិយោ​ដី​ថ្នាក់​ជាតិ ក៏​បាន​ស្នើ​ទិន្នន័យ​ពី​អង្គការ​នេះ ដើម្បី​ធ្វើ​ការ​បញ្ជាក់​ឲ្យ​ច្បាស់​លាស់​ពី​អត្ត​សញ្ញាណ​នៃ​ករណី​ទំនាស់​នីមួយៗ ដោយ​រួម អត្ត​សញ្ញាណ​ភាគី​ទាំង​សង​ខាង កម្មវត្ថុ​នៃ​បណ្តឹង​ទាមទារ ទំហំ​ដី​ទំនាស់ ចំនួន​គ្រួសារ ឬ​ចំនួន​មនុស្ស ទី​តាំង​វិវាទ អង្គភាព​ដែល​បណ្តឹង​ទាំង​នេះ​បាន​ដាក់ និង​ស្ថានភាព​នៃ​ការ​ដោះ​ស្រាយ​ដូច​ម្តេច។

ឆ្លើយ​តប​នឹង​រឿង​នេះ មន្រ្តី​ជាន់​ខ្ពស់​ផ្នែក​បច្ចេកទេស​ស៊ើប​អង្កេត​នៃ​អង្គការ​លីកាដូ លោក អំ សំអាត បាន​ឲ្យ​ដឹង​ថា ថ្នាក់​ដឹក​នាំ​របស់​ខ្លួន បាន​ត្រៀម​ខ្លួន​ជា​ស្រេច​នូវ​អំណះ​អំណាង​និង​ទឡ្ហីករណ៍​ព័ត៌មាន សម្រាប់​កិច្ច​សហការ​ជាមួយ​អាជ្ញាធរ ធ្វើ​ការ​ផ្ទៀង​ផ្ទាត់ និង​ស្វែង​រក​ដំណោះ​ស្រាយ​ដល់​ពលរដ្ឋ​រង​គ្រោះ​វិវាទ​ដី​ធ្លី។ លោក​បន្ត​ថា៖ «ករណី​វិវាទ ដែល​ចង​ក្រង​ដោយ​គណៈ​កម្មការ​សុរិយោ​ដី គឺ​ផ្អែក​តែ​លើ​បណ្តឹង​ដែល​ឆ្លង​តាម​គណៈកម្មការ​នេះ​តែ​ប៉ុណ្ណោះ មិន​បាន​រាប់​បញ្ចូល​ករណី​ជម្លោះ​កើត​ឡើង​ដោយ​សម្បទាន​ដី​សេដ្ឋកិច្ច ឬ​ករណី​រង​គ្រោះ​ដែល​ពលរដ្ឋ​រក​ដំណោះ​ស្រាយ​តាម​ប្រព័ន្ធ​តុលាការ និង​ជំនួយ​ពី​អង្គការ​ក្រៅ​រដ្ឋាភិបាល​ឡើយ»។

ជុំវិញ​ការ​លើក​ឡើង​ទាំង​នេះ ប្រធាន​ផ្នែក​ដីធ្លី​នៃ​សមាគម​ការពារ​សិទ្ធិ​មនុស្ស​អាដហុក លោក ឡាត់ គី បាន​ឲ្យ​ដឹង​ថា ថ្វី​បើ​នីតិវិធី​នៃ​ការ​ស្រង់​របាយ​ការណ៍​តួលេខ​ខុស​គ្នា​ក្តី តែ​លោក​គិត​ថា តួលេខ​ដែល​លីកាដូ​លើក​ឡើង​គឺ​សមរម្យ​ស្រប​ទៅ​នឹង​ព្រឹត្តិ​ការណ៍​ដែល​កើត​ឡើង​កាល​ពី ឆ្នាំ​២០១៤។ លោក​ក៏​បាន​រិះគន់​ទៅ​គណៈកម្មការ​សុរិយោ​ដី ហាក់​មិន​សកម្ម​នឹង​ការងារ និង​មិន​ផ្តល់​ទំនុក​ចិត្ត​ដល់​ជន​រង​គ្រោះ ដែល​ជា​ហេតុ​នាំ​ឲ្យ​ពលរដ្ឋ​រងគ្រោះ មិន​ស្វែង​រក​យន្តការ​នេះ ហើយ​ថែម​ទាំង​ជម្នះ​ដើរ​ស្វែង​រក​ដំណោះ​ស្រាយ​ដោយ​ខ្លួន​ឯង តាម​ស្ថាប័ន​ពាក់​ព័ន្ធ។

អនុ​ប្រធាន​លេខាធិការ​ដ្ឋាន​គណៈកម្មការ​សុវិយោ​ដី​ថ្នាក់​ជាតិ លោក អេ ប៊ុនធឿន ដែល​បាន​ចុះ​ហត្ថលេខា​លើ​លិខិត​ស្នើ​ទៅ​លីកាដូ​នោះ បាន​បដិសេធ​អធិប្បាយ​បន្ថែម។ លោក​បន្ថែម​ថា៖ «ខ្ញុំ​មិន​ទាន់​បាន​ឃើញ​ការ​ឆ្លើយ​តប​ពី​លីកាដូ​ទេ ហើយ​ខ្ញុំ​ក៏​មិន​មាន​តួនាទី​ឆ្លើយ​តប​នឹង​អ្នក​សារ​ព័ត៌មាន​ទេ»៕

អត្ថបទគួរចាប់អារម្មណ៍