ភ្នំពេញ: ការសាងសង់ខុនដូចំនួន ៤ អគា នៅក្នុងដំណាក់កាល ទី១ នៃគម្រោងអភិវឌ្ឍន៍ ទីក្រុងអូឡាំព្យា ស៊ីធី នឹងត្រូវបញ្ចប់នាអំឡុងពាក់កណ្តាល ឆ្នាំ២០១៥ ខាងមុខនេះបើតាមការប្រាប់ឲ្យដឹងពីប្រធានវិស្វកររបស់ក្រុមហ៊ុន អភិវឌ្ឍន៍ទីក្រុង អូឡាំព្យា។
លោក ម៉េង ចំរើន ប្រធានក្រុមវិស្វករគ្រប់គ្រងការសាងសង់អគារមួយនៅក្នុងចំណោមអគារខុនដូចំនួន ៤ នៃគម្រោងអភិវឌ្ឍន៍ ទីក្រុងអូឡាំព្យា បានប្រាប់ថា ការសាងសង់ខុនដូដែលមានកម្ពស់ ២១ ជាន់ចំនួន ៤ អគារ កំពុងដំណើរការទៅមុខយ៉ាងសកម្ម និងមមាញឹកទាំងយប់ទាំងថ្ងៃ។ មកដល់ពេលនេះអគារ ទី១ សង់បានកម្ពស់ ១៤ ជាន់ហើយ ខណៈតាមផែនការការសាងសង់គ្រោងអគារនេះនឹងត្រូវបញ្ចប់នៅ ខែវិច្ឆិកា។ ចំណែកអគារ ទី២ សង់បានដល់ជាន់ ទី១០ អគារ ទី៣ សង់បានចំនួន ៤ ជាន់ និងអគារ ទី៤ សង់បានដល់ជាន់ ទី២។
លោកបានថ្លែងថា៖ «តាមគម្រោងអគារខុនដូទាំង ៤ នឹងបញ្ចប់ការសាងសង់គ្រោងរបស់អគារទាំងមូលនៅពាក់កណ្តាល ឆ្នាំ២០១៥ ខាងមុខ។ បន្ទាប់ពីបញ្ចប់គម្រោងនេះការសាងសង់ផ្សារទំនើបដែលមានកម្ពស់ ៧ ជាន់អាចនឹងចាប់ផ្តើមដំណើរការ»។ តែទោះបីយ៉ាងណាលោកបញ្ជាក់ថា៖ «កាលបរិច្ឆេទនៃការសាងសង់ផ្សារទំនើប អគារខុនដូ ទី៥ អគារការិយាល័យ និងសណ្ឋាគារកម្ពស់ ៤៥ ជាន់ និង ៥៥ ជាន់មិនទាន់ដឹងចាប់ផ្តើមនៅពេលណាជាក់លាក់នោះទេ»។
គម្រោងអភិវឌ្ឍន៍ ទីក្រុងអូឡាំព្យា ដែលស្ថិតនៅភាគខាងជើងពហុកីឡដ្ឋានជាតិអូឡាំពិក ត្រូវបានវិនិយោគដោយក្រុមហ៊ុនអាណិកជនខ្មែររស់នៅក្រៅប្រទេស (OCIC) ក្រោមទឹកប្រាក់ ៤០០ លានដុល្លារ។ គម្រោងនេះចាប់ផ្តើមសាងសង់ដំបូងក្នុង ឆ្នាំ២០១២ លើផ្ទៃដីចំនួនជិត ៧ ហិកតាដោយគ្រោងនឹងបញ្ចប់គម្រោងទាំងមូលក្នុង ឆ្នាំ២០១៧។
កញ្ញា ឡុង សុភ័ក្រ ប្រធានផ្នែកលក់គម្រោង ទីក្រុងអូឡាំព្យា បានប្រាប់ថា ការលក់ខុនដូក្នុងគម្រោង អូឡាំព្យា កំពុងមានដំណើរការទៅមុខយ៉ាងល្អ ដោយអតិថិជនភាគច្រើនជាអ្នកនៅក្នុងស្រុក ចំណែកជនបរទេសមានដូចជា សិង្ហបុរី ចិន និងម៉ាឡេស៊ី។ រហូតមកដល់ពេលនេះការលក់ខុនដូ ទី១ សម្រេចបានជាង ៩៥ ភាគរយហើយ ចំណែកខុនដូ ទី២ លក់បានជាង ៧៥ ភាគរយ និងខុនដូ ទី៣ មិនទាន់បានលក់នៅឡើយទេ ខណៈការលក់ខុនដូ ទី៤ បានចំនួនជាង ៣០ ភាគរយ។
ខុនដូ ទី៤ ដែលមានផ្ទះចំនួន ៣០០ យូនីត មានផ្ទះចំនួនបីប្រភេទ គឺផ្ទះ ១ បន្ទប់គេងមានតម្លៃចាប់ពី ៨៨ ០០០ ទៅ ៩៤ ០០០ ដុល្លារផ្ទះ ២ បន្ទប់គេងមានតម្លៃចាប់ពី ២២០ ០០០ ទៅដល់ ២៣០ ០០០ ដុល្លារ និងផ្ទះប្រភេទស្ទូឌីយោមានតម្លៃចាប់ពី ៨៨ ០០០ ដល់ ៩២ ០០០ ដុល្លារអាមេរិក។
ខុនដូក្នុងគម្រោង អូឡាំព្យា ស៊ីធី គឺចាប់ពីជាន់ ទី៦ ដល់ជាន់ ទី២១ ខណៈជាន់ផ្ទាល់ដីដល់ជាន់ ទី៥ ជាប្រភេទផ្ទះហាងសម្រាប់លក់ទំនិញ។
កញ្ញា សុភ័ក្រ អះអាងថា៖ «ភាពជោគជ័យរបស់គម្រោង អូឡាំព្យា ស៊ីធី គឺដោយសារជាគម្រោងធំ មានសក្តានុពល និងមានទីតាំងនៅចំកណ្តាលរាជធានីភ្នំពេញ។ នៅទីនោះនឹងមានសេវាកម្មច្រើនយ៉ាងដូចជាផ្សារទំនើបតំបន់សាធារណៈអគារការិយាល័យហាងលក់ទំនិញ ផ្លូវថ្មើរជើង និងសួនច្បារជាដើម»។
កញ្ញាបានបន្តទៀតថា៖ «ការពន្លឿនល្បឿនសាងសង់ ដោយផ្តោតជាចម្បងលើគុណភាពសំណង់ និងលក្ខខណ្ឌបង់ប្រាក់ងាយស្រួលសម្រាប់អតិថិជន គឺជាផ្នែកមួយនៃភាពជោគជ័យរបស់គម្រោងនេះ»។
គម្រោងប្រកបដោយក្តីស្រមៃ និងពោរពេញទៅដោយមហិច្ឆតានេះ ជាគម្រោងអគារខុនដូ កប់ពពកមួយក្នុងចំណោមគម្រោងខុនដូជាច្រើនដែលនឹងជំរុញឲ្យមុខមាត់រាជធានីភ្នំពេញ ផ្លាស់ប្តូរក្នុងរយៈពេលមួយទសវត្សរ៍ចុងក្រោយនេះ។
លោក ប៉ូ អ៊ាវគង់ ប្រធានគ្រប់គ្រងទូទៅនៃក្រុមហ៊ុន អេស៊ា រៀលអេស្ទេត មានប្រសាសន៍ថា ក្នុងដំណាក់កាលទីផ្សារនាពេលបច្ចុប្បន្នវិស័យខុនដូមិនទាន់មានបញ្ហាទេសម្រាប់ទីផ្សារកម្ពុជា ដែលកំពុងត្រៀមខ្លួនធ្វើសមាហរណកម្មជាមួយបណ្តាប្រទេសក្នុងតំបន់នា ឆ្នាំ២០១៥ ខាងមុខ។ ប៉ុន្តែបើសម្រាប់ទីផ្សារក្នុងស្រុកវាហាក់ដូចជាលើសតម្រូវការបន្តិចហើយនៅពេលនេះ។
លោកបន្តថា តាមបទពិសោធកាលពីអំឡុង ឆ្នាំ២០០៩-២០១០ មានជនជាតិខ្មែរយើងជាច្រើនបានទិញខុនដូ De Castle, Camko City, Rose Condo ប៉ុន្តែក្រោយមកពួកគេលក់ចេញវិញដែលភាគច្រើនពួកគាត់បានខាតបង់ប្រាក់យ៉ាងច្រើន។
លោកបានបញ្ជាក់ថា៖ «គម្រោងនេះទទួលបានជោគជ័យ ឬមិនជោគជ័យយើងអាចនឹងដឹងច្បាស់នៅពេលគម្រោងនេះដាក់ឲ្យដំណើរការ។ នៅពេលនោះទើបយើងអាចដឹងថា តើមានភ្ញៀវ និងម្ចាស់ផ្ទះចូលទីស្នាក់នៅក្នុងអគារនេះប៉ុន្មានភាគរយ»។
លោកបានបន្តថា៖ «តម្លៃខុនដូក្នុងគម្រោង ទីក្រុងអូឡាំព្យា គឺមានតម្លៃសមស្រប ដែលជាលក្ខខណ្ឌអាចប្រកួតប្រជែងបានជាមួយគម្រោងដទៃទៀត»៕
