ភ្នំពេញៈ យោងទៅលើភាពចាំបាច់អគ្គនាយកដ្ឋានពន្ធដារ កាលពីថ្ងៃចន្ទកន្លងមកបានចេញសេចក្តីជូនដំណឹងថ្មីមួយទៀត ស្តីអំពីការសម្រេចពន្យារពេលលើការបង់ពន្ធអចលនទ្រព្យ ជាបន្តទៀត។
ក្នុងសេចក្តីជូនដំណឹងរបស់អគ្គនាយក នៃអគ្គនាយកដ្ឋានពន្ធដារ ដែលបានផ្សព្វផ្សាយពីថ្ងៃ ទី៤ ខែ វិច្ឆិកា កន្លងមកបានប្រាប់ឲ្យដឹងថា ក្នុងអំឡុងពេលជិតបញ្ចប់នៃការប្រមូលពន្ធលើអចលនទ្រព្យ និងក្នុងអំឡុងពេលនៃការពន្យារពេលកន្លងមកឃើញថា នៅមានម្ចាស់អចលនទ្រព្យជាច្រើននៅបាននឹងកំពុងមមាញឹកមកប្រកាសបង់ពន្ធនៅតាមបណ្ដាសាខាពន្ធដារ ខេត្ត-ខណ្ឌ ជាហេតុធ្វើឲ្យការផ្ដល់សេវាជូនអ្នកជាប់ពន្ធ មិនបានទាន់ពេលវេលា។ ហេតុនេះអគ្គនាយកដ្ឋានពន្ធដារ សម្រេចពន្យារពេលប្រមូលពន្ធលើអចលនទ្រព្យជាបន្តទៀត រហូតដល់ថ្ងៃ ទី៣០ ខែ វិច្ឆិកា ឆ្នាំ ២០១៣។ ដើម្បីបង្កឲ្យមានភាពងាយស្រួលដល់ម្ចាស់អចលនទ្រព្យបន្ថែមទៀតនោះ អគ្គនាយកដ្ឋានពន្ធដារ បានរៀបចំចាត់ចែង ប្រមូលពន្ធ នៅថ្ងៃ សៅរ៍-អាទិត្យ បន្ថែមទៀត។
សូមបញ្ជាក់ថា តាមផែនការការបង់ពន្ធលើអចលនទ្រព្យ សម្រាប់ឆ្នាំ ២០១៣ ត្រូវបញ្ចប់នៅថ្ងៃ ទី៣០ ខែ កញ្ញា ឆ្នាំ ២០១៣ ប៉ុន្តែដោយយល់ឃើញថា ការបង់ពន្ធនៅមានភាពយឺតយ៉ាវ ក្រសួង សេដ្ឋកិច្ច និង ហិរញ្ញវត្ថុ តាមរយៈអគ្គនាយកដ្ឋានពន្ធដារ សម្រេចពន្យាររហូតដល់ថ្ងៃ ទី៣០ ខែ វិច្ឆិកា ឆ្នាំ ២០១៣៕
