ភ្នំពេញៈ គម្រោងកសាងទីក្រុងពាណិជ្ជកម្ម និងលំនៅឋាន Booyoung Town តម្លៃជាង ១,១ ពាន់លានដុល្លារអាមេរិក ដែលស្ថិតតាមបណ្តោយមហាវិថី សហព័ន្ធរុស្ស៊ី ខាងលិចស្ពានអាកាស ៧ មករានៅពេលនេះកំពុងបោះជំហានទៅមុខយឺតៗ ស្របពេលស្ថានភាពនយោបាយនៅប្រទេសកម្ពុជាមិនទាន់មានភាពច្បាស់លាស់។
លោក Geum Yeon Hwang នាយកគ្រប់គ្រងទូទៅនៃក្រុមហ៊ុន Booyoung Khmer Co.,Ltd បានប្រាប់ថា ការដ្ឋានសាងសង់ទីក្រុង Booyoung Town កំពុងបោះជំហានទៅមុខដោយសន្សឹមៗរង់ចាំមើលសភាពការណ៍ ខណៈនៅពេលនេះគ្រឿងចក្ររបស់ក្រុមហ៊ុនកំពុងជីកដីសម្រាប់ធ្វើ ចំណតយានយន្តនៅខាងក្រោមដីនៃអគារពាណិជ្ជកម្ម។
លោកបានថ្លែងថា៖ «ពេលនេះក្រុមហ៊ុនកំពុងពិចារណាអំពីស្ថានភាពនយោបាយ និងវិស័យអចលនទ្រព្យនៅកម្ពុជា តែទោះបីជាយ៉ាងណាយើងរំពឹងថា អ្វីៗនឹងមានភាពប្រសើរក្នុងពេលឆាប់ៗ»។ លោកបន្តទៀតថា៖ «យើងមិនបានផ្អាកការសាងសង់ទេ គ្រាន់តែយើងធ្វើយឺតៗ ហើយក្រុមហ៊ុនគ្រោងនឹងបញ្ចប់គម្រោងទាំងមូលក្នុងរយៈពេល ៧ ឆ្នាំ ប៉ុន្តែអ្វីៗអាចប្រែប្រួលទៅតាមពេលវេលាជាក់ស្តែង»។
ទោះបីយ៉ាងណា លោក Geum Yeon Hwang នៅតែមានសុទិដ្ឋិនិយមចំពោះគម្រោងនេះ ដោយលោកបានប្រាប់ថា គម្រោងនេះនឹងទទួលជោគជ័យ ហើយវិស័យអចលនទ្រព្យនៅកម្ពុជានឹងប្រសើរឡើងវិញក្នុងពេលឆាប់ៗនេះ។
លោក សារ៉ា សន្តិសុខប្រចាំការគម្រោងអភិវឌ្ឍន៍អចលនទ្រព្យដ៏ធំខាងលើបានប្រាប់ថា៖ «បើតាមខ្ញុំដឹងនៅពេលនេះម្ចាស់គម្រោងត្រូវជីកដីជម្រៅ ១២ ម៉ែត្រចុះក្រោមដើម្បីធ្វើជាចំណតរថយន្តចំនួន ៤ ជាន់មុននឹងចាប់ផ្តើមខួងគ្រឹះសង់អគារពាណិជ្ជកម្ម»។
លោក គីម ហ៊ាង នាយកក្រុមហ៊ុន ខ្មែរ រៀលអេស្ទេត បានថ្លែងថា បើគម្រោងរបស់ Booyoung Town ចាប់ផ្តើមពីពេលនេះគឺជាការប្រសើរណាស់សម្រាប់ពេលអនាគត ប៉ុន្តែបើយើងនិយាយអំពីទម្លាប់រស់នៅខុនដូរបស់ប្រជាជនខ្មែរ គឺមិនទាន់មកដល់ពេលនោះទេ ខណៈទីតាំងរបស់ Booyoung Town ពិតជាល្អណាស់។
លោកបានបញ្ជាក់ថា៖ «សម្រាប់ទីតាំងរបស់គម្រោង Booyoung Town គឺជាប់លេខ១ ព្រោះជាផ្លូវដែលគណៈប្រតិភូ និងភ្ញៀវបរទេសធ្វើដំណើរឆ្លងកាត់ ដែលអាចមើលឃើញនិងចាប់អារម្មណ៍ ហេតុនេះវានឹងជួយជំរុញឲ្យគម្រោងនេះទទួលបានជោគជ័យ»។
លោក ច្រឹក សុខនីម អគ្គនាយករងក្រុមហ៊ុន VTrust Group បាននិយាយថា៖ «គម្រោងនេះពិតជាស្ថិតនៅចំទីតាំងល្អ ហើយបើគាត់ចាប់ផ្តើមពីពេលនេះវាគឺជាការល្អណាស់ ព្រោះនៅពេលកម្ពុជាធ្វើសមាហរណកម្មសេដ្ឋកិច្ចទៅក្នុងតំបន់អាស៊ាន នាឆ្នាំ ២០១៥ នឹងមានអ្នកវិនិយោគជាច្រើនចូលមកវិនិយោគនៅកម្ពុជា ដូច្នេះពេលនោះជាឱកាសដែលក្រុមហ៊ុនអាចប្រមូលទុនទៅវិញបាន»។
គម្រោងកសាង ទីក្រុង Booyoung Town ត្រូវបានវិនិយោគដោយក្រុមហ៊ុនពហុធុរកិច្ចដ៏ធំរបស់ប្រទេស កូរ៉េខាងត្បូង Booyoung Group។ គម្រោងមួយនេះបានបើកការដ្ឋានសាងសង់កាលពីថ្ងៃទី៧ ខែ ឧសភា ឆ្នាំ ២០១៣ នៅលើផ្ទៃដីសរុបជាង ២ លានម៉ែត្រការ៉េ ដោយក្រុមហ៊ុននឹងកសាងកន្លែងស្នាក់នៅចំនួន ១៧ ០០០ Unit អគារពាណិជ្ជកម្ម មជ្ឈមណ្ឌលកីឡា និងសាលារៀន ដែលមានទឹកប្រាក់វិនិយោគជាង ១,១ ពាន់លានដុល្លារ។ នៅដំណាក់កាលទី១នេះក្រុមហ៊ុននឹងសាងសង់អគារស្នាក់នៅរួម និងអគារពាណិជ្ជកម្មលើផ្ទៃដី ២៥ ម៉ឺនម៉ែត្រការ៉េ ដោយមានទុនវិនិយោគប្រហែល ១០៥ លានដុល្លារអាមេរិក៕
