The Phnom Penh Post Search

Search form




Logo of Phnom Penh Post newspaper Phnom Penh Post - តម្លៃ​ដី​តាម​បណ្តោយ​មហាវិថី​សហព័ន្ធ​រុស្ស៊ី​បន្ត​កើនឡើង

តម្លៃ​ដី​តាម​បណ្តោយ​មហាវិថី​សហព័ន្ធ​រុស្ស៊ី​បន្ត​កើនឡើង

តម្លៃ​ដី​តាម​បណ្តោយ​មហាវិថី​សហព័ន្ធ​រុស្ស៊ី​បន្ត​កើនឡើង

131212_4
ទិដ្ឋភាពនៅតាមបណ្តោយមហាវិថីសហព័ន្ធរុស្ស៊ី ចំណុចស្ពានអាកាស៧មករា ហុង មិនា

ភ្នំពេញៈ តម្លៃ​ដីធ្លី​នៅ​បណ្តោយ​មហាវិថី​សហព័ន្ធ​រុស្ស៊ី មាន​កំណើន​ចន្លោះ​ពី​១៥​ទៅ​២០​ភាគរយ​ក្នុង​រយៈពេល​១១​ខែ ឆ្នាំ​២០១៣ នេះ​បើ​ប្រៀបធៀប​នឹង​រយៈពេល​ដូច​គ្នា​កាលពី​ឆ្នាំ​២០១២​។ នេះ​បើ​តាម​ការ​ប្រាប់​ឲ្យ​ដឹង​ពី​ក្រុម​អ្នក​ជំនាញ​អចលនទ្រព្យ​នៅ​កម្ពុជា ។

លោក ឌឹត ចណ្ណា ប្រធាន​គ្រប់គ្រង​ទូទៅ​ក្រុមហ៊ុន​អចលនទ្រព្យ វីអឹមស៊ី បាន​និយាយ​ថា មហាវិថី​សហព័ន្ធ​រុស្ស៊ី​ជា​ផ្លូវ​ធំ​មាន​សក្តានុពល​ខ្ពស់ ព្រោះ​ជា​ផ្លូវ​ដែល​គណៈប្រតិភូ និង​ភ្ញៀវ​ជាតិ អន្តរជាតិ ឆ្លងកាត់ ហើយ​នា​រយៈពេល​ប៉ុន្មាន​ឆ្នាំ​ចុងក្រោយ​នេះ​គេ​សង្កេត​ឃើញ​ថា មាន​ក្រុមហ៊ុន​លក់​រថយន្ត​ធំៗ​ជាច្រើន​បាន​បើក​កន្លែង​តាំង​បង្ហាញ និង​លក់​នៅ​ទី​នោះ ជា​ហេតុ​ធ្វើឲ្យ​ដី​នៅ​ទីនោះ​ឡើង​ថ្លៃ​ចន្លោះ​ពី​១៥​ទៅ​២០​ភាគរយ បើ​ប្រៀបធៀប​នឹង​រយៈពេល​ដូច​គ្នា​កាលពី​ឆ្នាំ​មុន។

លោក​បន្ត​ទៀត​ថា មាន​គម្រោង​ធំៗ​ជាច្រើន​នៅ​ទី​នោះ​ដែល​មាន​ដូចជា គម្រោង​អភិវឌ្ឍន៍​របស់​ក្រុមហ៊ុន Booyoung Town, Cambodia Plaza, សណ្ឋាគារ ផ្សារ​ទំនើប ព្រម​ទាំង​អគារ​ខ្ពស់ៗ​មួយ​ចំនួន​ទៀត។

លោក​បាន បញ្ជាក់​ថា៖ «​បើ​ទោះ​បី​ជា​ផ្លូវ​នេះ​មាន​សក្តានុពល​ខ្លាំង ដោយសារ​មាន​ក្រុមហ៊ុន​ធំៗ​ចាប់​អារម្មណ៍ និង​ចង់​លើក​ផ្លាកសញ្ញា​របស់​ខ្លួន​នៅ​តាម​ផ្លូវ​នេះ​ក៏​ដោយ ក៏​ផ្លូវ​នេះ​មាន​បញ្ហា​មួយ​ចំនួន​ផង​ដែរ ទាក់ទង​ទៅ​នឹង​ការ​បិទ​ផ្លូវ​ធ្វើ​ចរាចរ​នៅពេល​មាន​គណៈប្រតិភូ​ធំៗ​ឆ្លងកាត់​។

លោក ចណ្ណា បាន​ប្រាប់​ទៀត​ថា ដី​តាម​បណ្តោយ​ផ្លូវ​សហព័ន្ធ​រុស្ស៊ី​មាន​តម្លៃ​ខុសៗ​គ្នា ដោយ​អាស្រ័យ​ទៅ​តាម​តំបន់​នីមួយៗ​ដូចជា ចាប់​ពី​អគារ​កាណាឌីយ៉ា ទៅ​ដល់​ស្ពាន​អាកាស​៧​មករា គេ​អាច​រក​ទិញ​ដី​បាន​ក្នុង​១​ម៉ែត្រ​ការ៉េ ចាប់​ពី​៩០០​ទៅ​១២០០​ដុល្លារ ចំណែក​ចាប់ពី​ស្ពាន​អាកាស​៧​មករា ដល់​ភ្លើងស្តុប​ផ្សារ​ដីហុយ មាន​តម្លៃ​ចន្លោះ​ពី​៧០០​ទៅ​៩០០​ដុល្លារ និង​ចាប់ពី​ភ្លើងស្តុប​ផ្សារ​ដីហុយ ទៅ​ដល់​រង្វង់មូល​ចោមចៅ គេ​អាច​រក​ទិញ​បាន​ក្នុង​តម្លៃ​ចាប់​ពី​៣០០-៦០០​ដុល្លារ​ក្នុង​មួយ​ម៉ែត្រការ៉េ។

លោក គីម ហ៊ាង នាយក​ក្រុមហ៊ុន ខ្មែរ រៀលអេស្ទេត បាន​វាយ​តម្លៃ​អំពី​សក្តានុពល​មហាវិថី​សហព័ន្ធ​រុស្ស៊ី​ខ្ពស់​ជាង​លោក ឌឹត ចណ្ណា ដោយ​លោក​ប្រាប់​ថា ដី​នៅ​តាម​ផ្លូវ​នេះ​បើ​គិត​ពី​អគារ​កាណាឌីយ៉ា​ទៅ​ដល់​ស្ពាន​អាកាស​៧​មករា មាន​តម្លៃ​ចាប់​ពី​១៥០០​ទៅ​២០០០​ដុល្លារ​ក្នុង​១​ម៉ែត្រការ៉េ និង​ចាប់ពី​ស្ពាន​អាកាស​៧​មករា ដល់​ភ្លើងស្តុប​ផ្សារ​ដីហុយ ដី​មាន​តម្លៃ​ចន្លោះ​ពី​១០០០-១៥០០​ដុល្លារ និង​ចាប់​ពី​ស្តុប​ផ្សារ​ដីហុយ ដល់​ព្រលាន​យន្តហោះ​អន្តរជាតិ​ភ្នំពេញ ដី​មាន​តម្លៃ​ចាប់​ពី​៥០០-៨០០​ដុល្លារ​។

លោក​ថ្លែង​ថា​៖​«​តម្លៃ​ដី​នៅ តាម​ផ្លូវ​នេះ​បាន​កើនឡើង​ចន្លោះ​ពី​១០​ទៅ​១៥​ភាគរយ​ក្នុង​ឆ្នាំ​២០១៣​។ ក្រុមហ៊ុន​ធំៗ​ចូលចិត្ត​ប្រើប្រាស់​ផ្លូវ​នេះ​ដើម្បី​ផ្សព្វផ្សាយ ផលិតផល​របស់​ខ្លួន ព្រោះ​ជា​ផ្លូវ​មាន​មនុស្ស​ឆ្លងកាត់​ច្រើន ហេតុនេះ​ទើប​មាន​កន្លែង​លក់​រថយន្ត​ថ្មីៗ​កើតឡើង​ព្រោងព្រាត​នៅ​ទីនោះ​»។

លោក ចេង ខេង អគ្គនាយក​ក្រុមហ៊ុន​អចលនទ្រព្យ​កម្ពុជា ស៊ីភីអិល និង​ជា​ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា មាន​ប្រសាសន៍​ថា តម្លៃ​ដីធ្លី និង​ការ​ពេញ​និយម​សម្រាប់​ផ្លូវ​នេះ​ពិតជា​មាន​ការ​ប្រែប្រួល​ច្រើន​ក្នុង ប៉ុន្មាន​ឆ្នាំ​ចុងក្រោយ​នេះ ដោយ​បាន​ធ្វើឲ្យ​តម្លៃ​របស់​វា​កើនឡើង​ចន្លោះ​ពី​១០​ទៅ​២០​ភាគរយ បើ​ប្រៀបធៀប​ទៅ​នឹង​រយៈពេល​ដូច​គ្នា​កាលពី​ឆ្នាំ​២០១២​។ លោក​បន្ត​ថា មាន​កន្លែង​ដាក់​តាំង​បង្ហាញ​ជា​ច្រើន​កើតឡើង​នៅ​តាម​បណ្តោយ​មហាវិថី​នេះ ខណៈ​អគារ​ខ្ពស់ៗ​បាន​លេច​រូបរាង​ជា​បន្តបន្ទាប់។

លោក​អះអាង​ថា​៖​«​តម្លៃ​ដី​ឡើង​បន្ថែម​ទៀត ឬ​អត់ គឺ​ពិបាក​កំណត់​ណាស់ ព្រោះ​អ្វីៗ​វា​អាស្រ័យ​លើ​ស្ថានភាព​សេដ្ឋកិច្ច​»។

កញ្ញា ហាំង សុពិសី ប្រធាន​គ្រប់គ្រង​ទូទៅ​ផ្សារទំនើប​រតនាផ្លាហ្សា ដែល​មាន​ទីតាំង​នៅ​តាម​បណ្តោយ​មហាវិថី​សហព័ន្ធ​រុស្ស៊ី បាន​ប្រាប់​ថា ធម្មតា​កាលណា​គេ​ចង់​សាងសង់​ផ្សារ​ទំនើប​គេ​តែង​ជ្រើសរើស​យក​ផ្លូវ ធំៗ និង​តំបន់​ទីប្រជុំជន​។ ការ​សង់​ផ្សារ​ទំនើប​នៅ​បណ្តោយ​មហាវិថី​សហព័ន្ធ​រុស្ស៊ី ពិតជា​មាន​សក្តានុពល​ខ្ពស់ ព្រោះ​ងាយស្រួល​ផ្សព្វផ្សាយ​ព័ត៌មាន​ឲ្យ​អតិថិជន​បាន​ដឹង បើ​ទោះ​បី​ជា​ពេល​ខ្លះ​មាន​ការ​កកស្ទះ​ចរាចរណ៍​ក៏ដោយ ។

កញ្ញា​អះអាង ថា​៖​«​ការ​មាន​ផ្សារ​ទំនើប​នៅ​តាម​បណ្តោយ​មហាវិថី​នេះ​ពិតជា​មាន សក្តានុពល ដោយសារ​ពេល​នៅពេល​មាន​ភ្ញៀវ​ឆ្លងកាត់​ទៅ​ព្រលាន​យន្តហោះ​គេ​នឹង​ឃើញ ផ្សារ​របស់​យើង​»​។

យោង​តាម​របាយការណ៍​ស្រាវជ្រាវ​ដែល​ទើប​ចេញ​ផ្សាយ កាលពី​ពេល​ថ្មីៗ​របស់​ក្រុមហ៊ុន​អចលនទ្រព្យ​កម្ពុជា ស៊ីភីអិល បាន​បង្ហាញ​ថា ដី​នៅ​តាម​មហាវិថី​សហព័ន្ធ​រុស្ស៊ី ចាប់ពី​អគារ​កាណាឌីយ៉ា ទៅ​ដល់​ស្ពាន​អាកាស មាន​តម្លៃ​ចាប់​ពី​១៦០០-២០០០​ដុល្លារ​ក្នុង​១​ម៉ែត្រការ៉េ រីឯ​ចាប់ពី​ស្ពាន​អាកាស ទៅ​ដល់​ភ្លើងស្តុប​ផ្សារ​ដីហុយ មាន​តម្លៃ​ចាប់​ពី​៨០០-១០០០​ដុល្លារ និង​ចាប់ពី​ស្តុប​ផ្សារ​ដីហុយ ដល់​ចោមចៅ មាន​តម្លៃ​ចន្លោះ​ពី​៤៥០​ទៅ​៦៦០​ដុល្លារ​៕

អត្ថបទគួរចាប់អារម្មណ៍