ភ្នំពេញ: ក្រុមម្ចាស់សិប្បកម្មផលិតឥដ្ឋមួយចំនួននៅកម្ពុជាបាននិយាយថាតម្លៃឥដ្ឋនៅក្នុងត្រីមាសទី១ឆ្នាំនេះបានធ្លាក់ចុះបើប្រៀបធៀបនឹងរយៈពេលដូចគ្នាកាលពីឆ្នាំមុន។
លោក ព្រាប កុយ ម្ចាស់សិប្បកម្មផលិតឥដ្ឋនៅម្តុំព្រែកអញ្ចាញស្រុកមុខកំពូល ខេត្តកណ្តាលបានប្រាប់ថា តម្លៃឥដ្ឋ និងផលិតកម្មឥដ្ឋបានធ្លាក់ចុះនៅក្នុងត្រីមាសទី១ឆ្នាំ២០១៣នេះបើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ កាលពីឆ្នាំ២០១២កន្លងមក ឥដ្ឋចំនួន១ម៉ឺនដុំមានតម្លៃ៤០០ដុល្លារ តែនៅពេលនេះឥដ្ឋ១ម៉ឺនដុំមានតម្លៃត្រឹមតែ៣៤០ទៅ៣៦០ដុល្លារតែប៉ុណ្ណោះ។
លោកបានអះអាងថា៖«ខ្ញុំមិនដឹងពីមូលហេតុនៃការធ្លាក់ចុះនៅពេលនេះទេ ប៉ុន្តែផលិតកម្មឥដ្ឋធ្លាក់ចុះ គឺដោយសារកង្វះកម្លាំងពលកម្មនិងទីផ្សារមិនសូវមានតម្រូវការច្រើនដូចបណ្តាឆ្នាំមុនទេ»។
ម្ចាស់រោងសិប្បកម្មផលិតឥដ្ឋ«ពន្លឺព្រះអាទិត្យ»ដែលមានទីតាំងនៅព្រែកអញ្ចាញដែរនោះ បាននិយាយដោយបដិសេធមិនបញ្ចេញឈ្មោះថាតម្រូវការឥដ្ឋឆ្នាំនេះមានប្រហាក់ប្រហែលនឹងឆ្នាំមុន ប៉ុន្តែតម្លៃរបស់វាបានធ្លាក់ចុះចន្លោះពី១០ទៅ២០ភាគរយ ហើយមូលហេតុនៃការធ្លាក់ចុះនោះលោកមិនបានដឹងច្បាស់ទេដោយគ្រាន់តែឮដំណឹងថា បច្ចុប្បន្ននេះមានឥដ្ឋផលិតនៅប្រទេសវៀតណាមជាច្រើនកំពុងហូរចូលមកកម្ពុជា។ ម្ចាស់សិប្បកម្មខាងលើបានប្រាប់ទៀតថា បើនិយាយពីគុណភាពឥដ្ឋផលិតនៅវៀតណាមមិនមានគុណភាពល្អដូចឥដ្ឋផលិតនៅកម្ពុជានោះទេ ព្រោះពួកគេធ្វើពីដីឆៅនិងចម្អិនមិនបានល្អ។
ម្ចាស់សិប្បកម្មផលិតឥដ្ឋខាងលើបានថ្លែងថា៖«កម្លាំងទិញឥដ្ឋនៅឆ្នាំនេះមិនមានសញ្ញាកើនឡើងនោះទេបើទោះបីជាវិស័យសំណង់មានការរីកចម្រើនក៏ដោយ ប៉ុន្តែការទិញនិងតម្លៃឥដ្ឋនៅពេលនេះកំពុងធ្លាក់ចុះ។ ការផលិតឥដ្ឋនាពេលនេះមិនសូវមានផលចំណេញនោះទេពីព្រោះវត្ថុធាតុដើម ពិសេសតម្លៃអុសនិងកម្លាំងពលកម្មមានការកើនឡើងច្រើន»។
ម្ចាស់សិប្បកម្មផលិតឥដ្ឋមួយរូបទៀតដែលគ្រាន់តែប្រាប់ឈ្មោះសុវណ្ណ បានប្រាប់ឲ្យដឹងផងដែរថា បច្ចុប្បន្នឥដ្ឋ១ម៉ឺនដុំមានតម្លៃ៤០០ដុល្លារដូចឆ្នាំមុនដែរ ប៉ុន្តែនៅពេលដឹកមកដល់ដេប៉ូនានាក្នុងរាជធានីភ្នំពេញ វាអាចមានតម្លៃខ្ពស់ជាងនេះ។លោកបានបន្តថា លោកក៏ទទួលបានដំណឹងថា តម្លៃឥដ្ឋដែលផលិតនៅម្តុំព្រែកអញ្ចាញធ្លាក់ចុះដែរ តែតម្លៃឥដ្ឋដែលផលិតដោយសិប្បកម្មរបស់លោកមិនបានធ្លាក់ចុះនោះទេ។
អ្នករកស៊ីដឹកឥដ្ឋដាក់តាមដេប៉ូនានានៅក្នុងរាជធានីភ្នំពេញមួយរូបឈ្មោះចែមួយបាននិយាយថា តម្លៃឥដ្ឋបានចាប់ផ្តើមកើនឡើងវិញនៅក្នុងខែឧសភានេះដោយសារអាកាសធាតុចាប់ផ្តើមមានភ្លៀងធ្លាក់ច្រើនធ្វើឲ្យសកម្មភាពផលិតឥដ្ឋមិនសូវដំណើរការល្អ។ បច្ចុប្បន្នឥដ្ឋ១ម៉ឺនដុំ មានតម្លៃ៤០០ដុល្លារនៅកន្លែងផលិតនិងមានតម្លៃប្រហែល៤៨០ដុល្លារពេលដឹកមកដល់ដេប៉ូនានានៅក្នុងរាជធានីភ្នំពេញ។ស្រ្តីដដែលបានបន្តថាឥដ្ឋចាប់ផ្តើមកើនតម្លៃប្រហាក់ប្រហែលនឹងឆ្នាំមុនវិញហើយ ព្រោះការផលិតមានការលំបាក និងកង្វះកម្លាំងពលកម្មក្នុងវិស័យនេះ។
អ្នកស្រី មួយបានអះអាងថា៖«តម្រូវការឥដ្ឋឆ្នាំនេះមានកំណើនច្រើនជាងឆ្នាំមុន ដោយសារការរីកចម្រើននៃវិស័យអចលនទ្រព្យនិងការសាងសង់បានកើនឡើងនៅគ្រប់ទិសទីក្នុងប្រទេស»៕
